1, 2. (a) Tipagine agu aboro naadu ti rago gu mokedi nangia Pauro anaabaka bangiriyo ti ni na pa gupai nga ga sunge kanga gbiati ranirii? (b) Gini boro Pauro ayugu ni fu aboro nga ni rengbe ka fu ndikidi ranirii fuyo?

AGU aboro naaraka Roma yo, nga aguyo agu aKristano naadu mbata aaraka dagbayo, i adu na rukö mbiko i aabitiyo nga i angia aboro ndiko, ruru sarangbanga, gbiati ranirii. Ono wa si avura duwo, bakere gu ome gbiati taarimo gu Bariwara Ngbii Nga ga ARomo adu na ni aye mbiko gu nyanyaki sunge akanga aamangaha. Kura regbo adu kinaho sa biata bawe rii kama nga ga agu aboro naaraka yo angia akanga. Zanga kapa, gupai nga ga sunge kanga gbiati ranirii angia gupai naanata ata rii aboro yo, kodihe na aKristano.

² Agu awaraga gu mokedi nangia Pauro akekehe aima fura bakere gbe tipa ranirii. Ono tie, gu sunge ko aamangaha aadunga tipa ka manga ariapai dagba aboro watadu rogo birĩ zogarago yo, nga gupai aboro aagbata gene ka mangaha ti gu regbo re te. Kuba gupai nga Pauro na akurako aKristano ngere koyo du gu zogarago ni nga ga wiri aboro watadu riigbu tipa ka gbia ranirii, i amangisunge nyanyaki ka undo kura aboro i wiriki gu wene pangbanga nga ga ga Mbori Kindo na ka undoyo i ini wai du ga Kristo Yesu motumo tumorii na nyanyakipaha kisusi. Pauro ayugu bara gu Ba fu akurako aidipase nga gu i arengbe ka gbia ndikidi ranirii rogoho. Ni kpiapai,  ho ko ake gako ue waraga ni fu agu aKristano nangia aKorindo, ko ape gupai fuyo ziazia nga: “Gbia [watadu Yekova] nga Toro, ho du Toro Gbia ni yo du raniri ni.”​—2 Kor. 3:17.

3, 4. (a) Gini apai Pauro agumbaha mbata fu ko gumba agu afugo du rogo 2 AKorindo 3:17? (b) Ginipai si aida ani mangihe tipa kadu na gu ranirii naye be Yekova?

³ Rogo ga Pauro ue waraga yo fu aKorindo, ko afura tipa gu taarimo Moize adu na ni ho ko azorõ ni rii Bagangara Sinai yo tingbafuo du ko barabangiri ga Yekova maraika. Ho aboro abi Moize ni, gunde aziyo, na Moize ki dadi kpakpuko na roko dadarii. (Gate 34:​29, 30, 33; 2 Kor. 3:​7, 13) Pauro asaki rogoyo ki ya, “ono ni gu rago i ka sa tiyo koyo du Gbia ni, i ki di ũdada he ku sa yo.” (2 Kor. 3:16) Ginipai du Pauro aaida ka gumbaha na agu afugo re?

⁴ A wa ani awirikihe rogo gu kekeapai yo naaye mbata fu gere, Yekova, nga Bakusiahe dũ, nga gu yangara Boro du na gu ranirii adunga digidoho ti ni ya. Si ruaru tie nga barabangiri Yekova na “ho du Toro Gbia ni” yo du ranirii ni. Ono tie, tipa kadu na gu ranirii re na ka gbia undo ti ni, si naida ani ‘sa tirani ko yo du Gbia ni,’ naida ka ya, si naida ani du na pagume dagbarani na Yekova. Agu aYisaraere naadu ngbakungba yo aabingo ga Yekova mangaapai na yo na gu bipai nga ga toro te. Si adu wa ka i ya kpotoyo yo na berãyo yo adu ni dadidadihe na ni nyanyakihe, na i aaberãpa mangasunge na gu ranirii i agbiaha Ezipeta yo ka mbiisa kina gayo nyemuapai nga ga borose.​—Eb. 3:​8-10.

5. (a) Gini ngbatunga ranirii ga Yekova toro aye na ni? (b) Wai du ani aino gupai nga padu boro ni zizi ni ni kanga adianga gu ranirii kusayo Yekova afuhe te? (d) Gini asanahe si aida ani karagapai sa ni?

⁵ Ono tie, gu ranirii naye be ga Yekova toro, si nga gu ngbatunga ranirii paha naima susa du na ranirii be kungbo sunge kanga. Gu toro nga ga Yekova naye na ranirii be ingapai na kpio, kodihe na ranirii be gu sunge kanga nga ga ziree pambori gbiati gaha amangaapai, nga gu ranirii gu nyanyaki asadatise nga ga wiri aboro arengbanga ka ye na ni ya. (Rom. 6:23; 8:2) Nairiwo gu ngbatunga bawene ranirii re! Boro rengbe kadu na gu ngbatunga ranirii re zavura ho du ni ni bambukiso yo watadu ho ziyo ni ni ni kanga. (Bam. P. 39:​20-23) Gipai re aima manga wirinarani nangia Nancy Yuen gbiati Wiriba Harold King, i dunduko ue araki bambukiso yo tipa dungu agarã mbiko gayo idapase. Oni rengbe ka bi yo i nigumba gupai namangiyo rogo JW Broadcasting. (Oni ngere tii gu paparaha nga INTERVIEWS AND EXPERIENCES > ENDURING TRIALS.) Ono tie, si naida ani wisigingo agi asanahe re, wai du rengbe ani ka yugoho nga ani nabi gaani ranirii abi na nyanyakipaha? Na ginipai rengbe ani ka mangaha tipa ka mangasunge na gaani ranirii rogo tatamana yo?

6. Wai du aYisaraere ayugu gupai nga i aadunga na tambuahe tipa gu ranirii Mbori afuhe fuyo te?

⁶ Ho ani ainopa wai ni nyakipa gu gamunihe boro nagamuhe furani nga gu ni angbehe na ba marã, si nasarani ani yugu gaani tambuahe fu gu boro re. AYisaraere aadunga na tambuahe tipa gu ranirii Yekova afuhe fuyo ho ko akusiyo ni tii sunge kanga Ezipeta yo te. Tingbafuo bete adiwi wa ko abatasiyo, i atona kadu na kere nyemu agu ariahe i anaarihe Ezipeta yo na i kini bisirapa gu riahe Yekova afuhe fuyo, na zavura i ki idi ka karagatiyo ku Ezipeta yo. Oni berẽnga gipai re, i aabi ‘atĩo, akoforo, zuzuhe wa apaipai, na abaro, na amatangburu, gbiati rukutu amatangburu fũ afũ gbe’ na nyanyakipaha kisusi gu ranirii Mbori afuhe fuyo ka iriso ndikidi Mbori nga Yekova. Ya mo si rengbe ka iriwo tirani nga Yekova adu na zinga na gu gako aboro re? (Geda 11:​5, 6, 10; 14:​3, 4) Nairiwo wai du gupai re ni gupai si aida ani wirikipai ti ni!

7. Wai du Pauro amangipai na ngbanya kuti gu gako rugute du rogo 2 AKorindo 6:​1, na wai du rengbe ani ka manga kina gu ngisapai re?

 ⁷ Gu mokedi nangia Pauro angarasi rani nga aKristano dunduko nga, ka ani bingo gu ranirii Yekova nafuhe furani vurube Wiriko nga Yesu Kristo na paha taata ya. (Oni gedi 2 AKorindo 6:1.) Oni tingidinga pa gu rungo gbiati igirã nga ga sangbakpotoseyo Pauro adu na ni mbiko biko tiko ni zizi ko fu ingapai na kpio. Ono wa si avura duwo, ko atakipande gupai na tambuahe nga: “Mi natambua Mbori mbiko Yesu Kristo gaani Gbia.” Tipagine? Ko ape nduhe fu akurako aKristano ki ya: “Bambiko gu rugute nga ga Toro nga ga unga rogo Kristo Yesu yo kusi re be gu rugute nga ga ingapai na kpio.” (Rom. 7:​24, 25; 8:2) Si naida ani pekefuo ga Pauro kpiapai a ki zanga kaa bi pa kusa Yekova rani be gu sunge kanga nga ga ingapai na kpio na taatapaha. Mbiko ga Yesu motumo, ani ima rengba kaa mangasunge fu Yekova na gigiri sangbakpotoseyo na kini gbia ndikidi ngbarago ti mangaha wo.​—Tam. 40:8.

8, 9. (a) Gini zahe gu mokedi nangia Petero afuhe nibipa mangasunge na gaani ranirii? (b) Gini kerepai ani agbiatirani na ni areme?

⁸ Ono tie, kupati yugo gaani tambuahe, si naida ani du na rubangirise ka zanga mangasunge na gaani nyanyakipa ranirii ngba gbegberẽ gene. Gu mokedi nangia Petero afu zahe furani nga ka ani gbunga kugii gaani ranirii tipa kaa manga agu apai bororani akpinyemuhe ya. (Oni gedi 1 Petero 2:16.) Ya mo gu zahe re atingidanga roni na gupai naamangi aYisaraere ngbakungba yo te? Gu kerepai namangi yo re kindi kinaho areme, isoke si areme kisusi wai si adu mbata. Satana na gako zegino nakusa badungu ahe nga gu nananga bangiri aboro, wa gu nga vodatise gbiati mbakadatise, riahe na mbirahe, zambuasitise na aũngbarago, gbiati gu kura dungu apai. Agu aboro natakapande pa bagibagiahe namangasunge na agu aboro bibiyo nangba angba gbe tipa ka sa rani ani ngbe agu ahe adunga ani nzunzu na zingo tipaha ya. Nairiwo wai duhe taata tipa ani zi ti agu agbina re na ki mangisunge na gaani ranirii ngba gbegberẽ gene!

⁹ Gu rugute Petero afuhe nabipa gu nyanyakipa apai abi a nga ga raka, wa gu nga, ga boro siapai tipa wirikapai gbiati sunge. Ni kpiapai, aboro nasosoda gu paranga aboro areme ni kerehe nga aguyo du sukuru yo tipa i ndu tipa bakere wirikapai. Aboro nasayo i bihe nga bakere wirikapai nazakagene fu boro tipa ni gbia gu sunge boro azio bakere marã ti ni na du ni iriirihe, na dedede, i namangasunge na aringbisapai tipa ka yugo wai agu aboro wirikipai ni bakerehe azio bakere marã kisusi aguyo aturongo na wirikapai ya. Paranga aboro ima rengba ka bi bakere wirikapai ni wenehe ho du he ni nga si naida i mangi gu siapai nga gu nika du na maapai kurii gayo raka naabaha. Ginipai si aida i tingidihe gbiati avunguyo?

10. Ginipai si aida ani tingidihe ho ani amanga gaani asiapai ni?

¹⁰ Kura aboro rengbe ka bihe nga wa du boro du si aida ni mangi gani siapai nibipa agi apai re, si naida i du na ranirii ka sia gupai i akpinyemuhe ka si du nga sangbakpotoyo yo asoganga ha te. Wa vura duhe nirengo nga ani na ranirii berani ka manga gaani asiapai nibipa wirikapai gbiati sunge marã, si naida ani tingidi gupai nga gaani ranirii ni betehe na agu adiaberã dunduko ani adiaha na kina asangbanaha ti ni. Mbiko gu ndupai re, Pauro aya: “ ‘Ru apai aru dunduko;’ ono apai angba nga tipa rani dunduko te. ‘Ru apai aru dunduko;’ ono apai nanyakasa nga boro dunduko te.” (1 Kor. 10:23) Nirengo, gupai re naundo rani ani ini gupai nga wa vura du ani na ranirii berani ka manga asiapai rogo raka yo, kuraapai kinaho si aida ani berẽkuriihe nga gu paha naima nyaka kisusi gupai ani akpinyemuhe.

11. Gini ndupai Yekova nafu ranirii ti ni furani?

¹¹ Ho Petero afu zahe ni tipa gbegberẽ mangasunge na ranirii, ko aima yugo wene gene mangasunge na ni a. Ko angarasi rani ani mangisunge na gaani ranirii wa “ga Mbori azogo.” Rogo gi gene re, gu ndikidi ndupai Yekova amangisunge na Yesu ti ni ka batasa rani be gu ndiko nga ga ingapai na kpio nga tipa ani raki gu raka nga ga kparatise wa “ga Mbori azogo.”

12. Gini kpiapai Noa na gako aborokporo amoihe furani?

¹² Gu wene gene rengbe ani ka bandatirani ngbaha ti gbegberẽ mangasunge na gaani rani na ti da ni akanga berewe fu agu asasa gbiati nyemuapai nga ga zegino nga ka dia bakere regbo kuti manga agu apai nga ga toro. (Gara. 5:16) Ni kpiapai, oni bingo gu bakumba nangia Noa gbiati gako aborokporo. I araki rogo gu zegino naaima hi be zuu gbiati wasiro. Ono wa si avura duwo, i aarimisongo tiyo ku rogo gu nyemuapai yo gbiati asasa nga ga agu aboro naadu patiyo te. Ginipai naundo yo i mangihe wo? I asia ka dia gayo regbo naabaha kina kuti ngba gu sunge Yekova afuhe fuyo, nga ka mbakada kurungba, ka igo riahe tipa tiyo na tipa anya, na ka fu zahe fu kura aboro. “Noa ki mangi wo; wa Mbori arugu ko na ni, kina wo ko amangi he dũ.” (Bam. P. 6:22) Sangbanaha angia gine? Noa na gako aborokporo abati ho Mbori agberesi gu zegino re ni.​—Eb. 11:7.

13. Gini sunge i afuhe fu Yesu nga gu ko afuhe fu apefuoko a?

¹³ Ginipai Yekova nazinahe furani nga ani mangihe areme? Ani ima ino gupai nga Yekova afu gu sunge fu Yesu nga ga tungusapai na Yesu ki fu gu sunge re a fu gako abawiriki. (Oni gedi Ruka 4:​18, 19.) Areme, badungu aboro duho kindi mbori gi zegino re nakisi bangiriyo na i tii gu sunge zio nga ga ziree pambori, nyemu aũzegino, gbiati birĩ zogarago. (2 Kor. 4:4) Si nipa momu furani ka pekafuo ga Yesu kpiapai nga ga undo aboro i ye ka ino Yekova na kini irisiko, nga gu Mbori nga ga ranirii ko. (Mt. 28:​19, 20) Taata sunge nga gu sunge re te, badungu akpakarapai du rogoho. Rogo gu kura aringara, badungu aboro na nyemu gupai tiyo ani atungusaha te, agu akurayo nazinga azinga zaatu ho ani atungusapai  ni fuyo. Gu sanahe si aida ani sana tirani na ni wadu ani ni basasa dũ nga, ‘Ya mo mi rengbe ka mangasunge na gimi ranirii ka undo gu sunge nga ga Kindo bakere gbe?’

14, 15. Ginipai badungu ga Yekova aboro nadiberã ka mangaha? (Oni bi gu sura duti tonatonaha.)

¹⁴ Si nipa ngarasaro ka bi gupai nga badungu aboro ima bihe nga ani naraka ti yangara arame na i ki ima sa gayo raka si du taata tipa ka mangasunge Kindo ti aregbo dũ. (1 Kor. 9:​19, 23) Agu akurayo namangasunge kina rogo gayo dagbarago; agu akurayo kini ga ku rogo agu arago du na bakere zingo abatungusipai rogoho. Vuru agu agarã yo bisue susi kusayo, aboro bangeyo naima susa ue kama na bisue bawe akutu tona mangasunge ni agu abazakigene natungusapai ti aregbo dũ na bangeyo ima ye ka kio awere kisusi mirioni sa na kama akutu. Nairiwo gu wenepai nga ni re nga badungu aboro namangasunge na gayo ranirii ka mangasunge fu Yekova ngba gu gene re!​—Tam. 110:3.

¹⁵ Gine naundo agu awirina re i mangisunge na gayo ranirii rogo tatamana yo? Oni bingo John gbiati Judith, nga aguyo mangisunge rogo badungu aringara vuru agu agarã yo 30 susi kusayo. I natingida gupai nga ho i azaki gu Sukuru Nga ga Abazakigene ni rogo 1977, i anyakasipa gupai fu aboro nga ga ndu kaa mangasunge rogo gu ba du na bakere zingo abatungusipai rogoho. Tipa gupai nga i moi berãyo fuo gu sasa re, John aya ko aˈaria asunge marã bara dunguhe tipa ka raka taata raka. Niyangaraha, ho i ada ni rogo kura ringara, i aye ka bi gupai nga kparakpee fu Yekova na kido kutiko aundo yo i dibe gu ngbatunga akpakarapai duwa, wirika vovo fugo, inidotise na vovo sinoraka, gbiati inidotise na wai du rago. Gini sangbanapai agu agarã i adihe kuti ngba sunge re adu na ni kuriyo? John aya, “Mi nabihe nga sunge ho mi amangihe nangba kisusi gu sunge re te. Yekova ada ni ndikidi boro fere, wa gu bagude du na nyemuse. Awere, mi ima ye ka rugatire wenengai na gupai Yakoba 4:8 ayugoho, nga gu naya: ‘Oni mbédi na Mbori, ko ki mbedi na oni.’ Mi aima inoho nga mi aima gbia guhe mi aagbataha, nga gu raka du na wene rogoyo ti ni.”

16. Wai du kura aboro namangisunge na gayo ranirii rogo tatamana yo?

¹⁶ Kura aboro kinaho adunga apai tipa yo wa ga aJohn na Judith ya, agu apai du tipa agu aboro re nambugene fuyo i mangisunge Kindo ti aregbo dũ tipa kina wiri guru regbo. Ono wa vura duhe wo, badungu aboro namangasunge na gu momu du beyo ka futiyo tipa ka undo sunge tingba gu sunge meka abambu gaani riigbu amangaha rogo zegino dũ. Ni kpiapai, ho i aadua gaani bakere basunge nga ga zegino ni Warwick New York yo, awirina wa 27,000 afutiyo tipa ka undo sunge, aguyo tipa aposo ue, aguyo tipa bete adiwi, aguyo tipa garã sa na aguyo tipa gbanga regbo kisusi. Badunguyo ambupa kura gayo apai tipa ka mangasunge yo. Nairiwo gu wene kpiapai nga ga agu aboro nga aguyo namangisunge na gu gayo ranirii Mbori afuhe fuyo re tipa ka tambua Yekova na ka fu irisa fuko, nga gu Mbori nga ga ranirii ko!

17. Gini weneapai nasungudo agu aboro kumbatayo nga aguyo namangasunge na gu gayo ranirii Mbori nafuhe fuyo na tatamana?

¹⁷ Ani na tambuahe nga ani ima ye ka ino Yekova na ani ima rengba ka gbia ngbarago ti gu ranirii ndikidi irisombori aye na ni. Ani yugungo ho ayugo na agu asiapai ani amangaha nga ani nabi gu ranirii re na nyanyakipaha. Kuba gupai nga ani mangisunge na ni ngba gbegberẽ gene, ani mangingo sunge amanga na gaani ranirii gbiati agu amomu si aye na ni ka mangasunge fu Yekova ni bakerehe gbe. Ka ani mangihe wo, ani ima rengba ka maabangirani tipa ka gbia ngbarago ti agu amaku Yekova nakidopaha ho afugo gu sangbanebi nika digisotihe ni nga gu naya: ‘I abatasa ũzegino tigaha a be du ni ga zirã kanga sa kura gu taarimo nga ga awiri Mbori.’​—Rom. 8:21.