1. Tipagine gu mokedi nangia Pauro arugu agu aKristano nangia aEbere ti ni i ngarasi akurayo “ki nimangi he susi”?

TIPAGINE si aida ani kiisi gu ome ti ni ani amangaha ka fu ngarasaro? Gu mokedi nangia Pauro afu ndu gupai si aida ani mangihe ti ni wo rogo gu gako waraga yo ko akehe fu agu aKristano nangia aEbere. Ko aya fuyo wẽ: ‘Ani bérẽ pa akuarani ka nyakasa yo kuti nyemuse na wene mangaapai. Ka ani hé nga dungura tirani na akuarani, wa du sino agu yo ya, ono ani rúgu akuarani aruga [watadu ani ngarasi yo]; ki nimangi he susi, wa bi oni he ya gu uru re si nambeda.’ (Eb. 10:​24, 25) Mbata fu agarã bisue, agu aYudo nangia aKristano naaraka Yerusarema yo abi gupai nga ‘rago Gbia’ aambeda na i ki bi gupai si nimangi nga gu Yesu aya ka i ta ka bihe si nimangi, i ki zubo kusayo rogo gu gbata re tipa ka batasa raka yo. (Amo. 2:​19, 20; Rk. 21:​20-22) Gu ga Yekova uru re ada rogo gu garã nangia 70 Fuo Batikayo Kristo ho aRomo aye ni na ga Yekova sapangbanga kurii Yerusarema.

2. Tipagine si aida ani naaberã pa ngarasa akuarani ti ni gbe areme?

² Areme, ani na wene ndupai berani ka ida kuti gupai nga ga Yekova uru nga gu “du ni bakere he ni iiriwoho gbe” ima mbeda.  (Yoe. 2:11) Gu nebi nangia Zefania aya: “Gu bakere rago nga ga Yekova du mbembedi, si mbembedi ki niipisi tihe gbe!” (Zef. 1:14) Gu sangbanebi du ni zahe re nabipa gaani regbo abi a. Nibi gupai nga ga Yekova uru ima mbeda, Pauro aya furani “ani bérẽ pa akuarani ka nyakasa yo kuti nyemuse na wene mangaapai.” (Eb. 10:24) Sidu tie, si naida nyemu awirinarani du tirani ni bakerehe, tipa gupai nga ani rengbe ka ngarasa yo ho i aida ngarasaro ni.

3. Ginipai gu mokedi nangia Pauro agumbaha nibipa ngarasaro? (Oni bi gu sura duti tonatonaha.)

³ “Rungo boro ku kpotoni yo nazoga ni ku sande, ono wene fugo nafu ngbarago fu ni.” (Snz. 12:25) Gipai re nga rengo tipa rani dunduko. Ani dunduko naida fugo ngarasaro aida ti kura aregbo. Pauro ayugu gupai nga zavura gu boro du na gu tindiro beni nga ga ngarasa kura aboro, si naida aida i ngarasi ni a. Ko akepai fu agu aKristano naaraka Roma yo ki ya: “Nyemu bi roni namanga re, mi fu ga Ziazia Toro ũgume fu roni, sa du oni nyanyaki; nga, ani mongo wasa na oni dagba roni yo, ani ni ba sa sa be ga akuarani idapase, gaoni na gimi a.” (Rom. 1:​11, 12) Nirengo, Pauro, nga guko nanaafu wene ngarasaro fu kura aboro aaida aida i fu ngarasaro fuko ti kura aregbo.​—Oni gedi ARomo 15:​30-32.

4, 5. Ada rengbe ani ka fu ngarasaro fuyo areme, na tipagine?

⁴ Si naida aida i fu ngarasaro fu agu aboro mbupa kura gayo apai rogo raka yo. Agu aboro du dagba agu aboro re nga ruru abazakigene. Badungu aboro mbupa badungu apai rogo raka yo tipa ka mangasunge abazakigene. Kina gu bangisapai re a du tipa amokedi, agu aboro namangasunge be-basunge yo, ababi adungurati na adiayo, gbiati agu aboro namangasunge rogo agu abasunge nga ga safugo. Agi aboro re dunduko nambupa kura apai rogo raka yo tipa ka dia bakere regbo kuti ziazia sunge. Sidu, si naida aida i fu ngarasaro fuyo. Agu aboro du kindi na nyemu mangasunge Kindo ti aregbo dũ tiyo, nga aguyo naaima mangaha mbata ono i kini rugusi he mbiko kura nduapai, i gu duadu na tambuahe a ho i afu ngarasaro ni fuyo.

⁵ Agu awirina nye zanga manga rogatise mbiko gupai nga i naida ka giasangba gu rugute naya rogatise mangi “kina rogo Gbia yo,” i nga gu kura aboro si aida i fu ngarasaro fuyo. (1 Kor. 7:39) Wakina gure a, gu dereakumba namangasunge nyanyaki gu duadu na tambuahe ho akumbayo ape afugo ngarasaro ni fuyo. (Snz. 31:​28, 31) Berewe a, si naida aida i fu ngarasaro fu agu aKristano nanye ni ruruyo ho i arungosi yo ni watadu ho du yo ni na kaza. (2 Tesa. 1:​3-5) AYekova na Kristo nafu wasa fu gi ruru amoyambu re dunduko.​—Oni gedi 2 ATesaroniko 2:​16, 17.

6. Gini sunge abaakumba amangaha nga gu furayo tipaha rogo Yesaya 32:​1, 2?

⁶ Oni gedi Yesaya 32:​1, 2. Yesu Kristo nafu ngarasaro gbiati undo fu agu aboro du rogo bakere gberãrago ti gi kere regbo re vurube gako mbedimbedi aKristano gbiati “abazogo,” nga aguyo nga abaakumba kidu ni papara kura akandoro. Kina boro wo si aida si du, bambiko agi abaakumba re na pa “zoga” gu idapase nga ga kura aboro te, ono i nga “amounda” ga awirinayo ngbarago.​—2 Kor. 1:24.

7, 8. Kupati pe afugo ngarasaro, wai du rengbe abaakumba ka ngarasa kura aboro?

⁷ Gu mokedi nangia Pauro amoi kpiapai nga gu si aida i wirikihe. Ko akepai fu agu aKristano naadu Tesaronike yo nga aguyo i arungosi yo ki ya: “Ani nikpi nyemu roni akpi, fu kina ga Mbori wene pangbanga fu roni angba nga ti rani sa te, ono mbisimorani  a, bambiko oni aye ka ngba ti rani gbe.”​—1 Tesa. 2:8.

⁸ Tipa ka yugo gupai nga anga kina pe fugo ngarasaro sa si aidaha te, Pauro agumba gupai fu agu abaakumba naadu Efesa yo nga: “[Oni unda] agu yo anyaka nga ya, ki tingidi pa Gbia Yesu wa ko aya tigako, ‘Fu he ngba ti dia ha [watadu gu ngbarago boro agbiaha ho ní agamahe ni, si kii kisusi gu ní agbiaha ho boro afu he ni funi].’ ” (Amo. 20:35) Pauro aadunga na nyemu kina fu ngarasaro sa fu awirinako te, ono ko adu a na nyemu ka ‘baga tiko abaga zaza dati digida ha’ tipa yo. (2 Kor. 12:15) Wakina gure a, si aidanga abaakumba naafu kina afugo ngarasaro gbiati wasa sa fu awirinayo te, ono si naida a i naangarasa yo ni yugoyo gupai nga i na nyemu yo tiyo.​—1 Kor. 14:3.

9. Wai rengbe abaakumba ka fu rugute ngba gu gene nafu ngarasaro?

⁹ Nyakasa akuarani nakoda fu rugute akoda a, ono si naida abaakumba pekefuo gu kpiapai du rogo Ziazia Kekeapai yo nibipa wai ka fu rugute ngba gu gene nika fu ngarasaro. Yesu amoi wene kpiapai nibipa gipai re tingbafuo ko kpi na ki zingi be kpio. Nyanyaki rugute adu kina beko si adu nga ko fuhe fu kura adungurati Asia Minor yo, ono oni bingo wai ko afu gu rugute re. Mbata fu ko fu gu rugute re, ko atambua agu adungurati wenengai naadu Efesa yo, Perugamona yo, na Tuatira yo. (Yugo. 2:​1-5, 12, 13, 18, 19) Ko ape gupai fu gu dungurati naadu Raodikiya yo nga: ‘Agu yo dunduko mi nakpi nyemu yo mi naza yo ti pai ki nirugu yo; si oni ka du ngangarã ti ni, ki sa gaoni berã.’ (Yugo. 3:19) Si naida abaakumba wiriki ga Kristo kpiapai ho i aida ka fu rugute ni.

10. Wai du rengbe ani dunduko ka nyakasa akuarani?

¹⁰ Sunge fu ngarasaro sa fu kina abaakumba te. Pauro angarasi aKristano dunduko nga i naapeka “gu pai ngba angba sa nyakasa ho zingoho nidu ni, si fu undahe” fu kura aboro. (Ef. 4:29) Ani dunduko ni basasa si  aida ani naaino pa gu ‘zingo’ du kura aboro na ni. Pauro afu gu rugute fu agu aKristano nangia aEbere nga: “Oni túmba agu abe ku ari naazorã ku sende, na agu arukusue anyaka nga ya; ki nimbakadi ruru agene tipa nduroni, ya agu yo nagbarã ka i aria nga yo ti gene ya, ono husa yo ngba.” (Eb. 12:​12, 13) Ani dunduko, kodihe na rukutu agude, rengbe ka nyakasa akuarani na afugo ngarasaro.

11. Wai du Marthe agbia undo ti gu regbo ri adu rogo bakere gberãrago?

¹¹ Wirina sa nga Marthe, * nga guri naadu rogo bakere gberãrago akepai ki ya: “Rogo kura uru sa fuo manga mi kparakpee tipa ngarasaro, mi agbia kura sosono wirina sa, na ri ki yugu nyemuse fere gbiati nunga, nga agu apai mi aaidaha ti gu regbo re. Ri apeke agu apai fere a namangi ri nga kina gu ngbatunga apai mi adu rogoho, sidu, mi ki bi tire nga anga kina mi sa gupai re amangi re te.” Si nawira gupai gbe nga, gu sosono wirina re aainongo gu wene sangbanapai gari afugo amangihe na Marthe te.

12, 13. Rogo gini agene rengbe ani ka mangasunge na gu rugute du rogo AFiripoio 2:​1-4?

¹² Pauro afu gu rugute fu agu aboro dunduko naadu rogo gu dungurati naadu Firipoi yo nga: “Si ngia wasa nadu rogo Kristo yo tie, si ngia gu wasa nga ga nyemuse, si ngia gu ngbanya nga ga Ziazia Toro, si ngia nunga na weneringise, oni hísi gi ngbarago, oni ki du na berã sa, na nyemuse sa, ki sungu wa sa, na berã sa. Ka oni mángi nga pai na vura na ruka wa sa ya, ono gu ni bérẽ pa kura ni rogo umbasi gani berã ya ni ngba susi ni. Ka oni bérẽ nga pa kina gaoni pai ya, ono oni bérẽ pa ga akuaroni apai.”​—Frp. 2:​1-4.

¹³ Nirengo, ani dunduko si aida ani mangi nyanyaki asadatise tipa kaa berã pa akuarani, kini fu “wasa nga ga nyemuse,” “ngbanya nga ga Ziazia Toro,” gbiati “nunga na weneringise” tipa ka ngarasa awirinarani.

14. Gini apai rengbe ka fu ngarasaro fu boro?

¹⁴ Ho ani agia gupai ni nga agu aboro ani aundo yo mbata kusayo kindi ni ruruyo, si ima rengba ka fu ngarasaro furani, wa kina gu si adu tipa gu mokedi nangia Yoane nga guko nakepai nga: “Bakere ngbarago ti re susi gi te re, ya mi gi pa awire i nita rogo rengo.” (3 Yo.  4) Badungu abazakigene ima ida kuti wai duhe ni pa ngarasaro fuyo ho i agia gupai ni nga bete agu aboro i aundo yo i gi rengo agarã kusayo nairiso Yekova kindi ni ruruyo, na zavura kura regbo, i nga abazakigene. Tingida gu bazakigene du rogo bakere gberãrago na pa gu weneapai ni aagbia ngbarago ti ni mbata kusayo ima rengba ka fu wasa funi.

15. Gini gene sa rengbe ani ka ngarasa agu aboro ngbaha kakuti gayo sunge fu Yekova?

¹⁵ Badungu ababi adungurati ima pe pa wai i naagbia ngarasaro gbiati adiayo ho aboro afu kekeapai ni fuyo nga ga tambuahe tipa pa nduyo ka bi dungurati. Kina gu bangisapai re a du tipa abaakumba, amokedi, abazakigene, gbiati avuru Betere nga aguyo nagbia tambuahe tipa wai i nakakuti gayo sunge.

16. Ginipai rengbe ka fu ngarasaro adunga adu ni ba pai ya?

¹⁶ Si ima rengba kadu ni irairapai ka ani aabihe nga ani arengbanga ka fu ngarasaro te, mbiko gupai nga ani nga agu aboro afuranga gayo gbe ya. Anga ba pai si aidaha kadu ni agu aboro nafu ngarasaro te, mo ima rengba ka moma ti ngbaro kidu na ngbarago kpakpuro yo ho mo afu sene ni fu boro. Ka gu boro re amomanga foro ya, si ima rengba kadu nga pai kinaho nafuda ni, na mo ima rengba kafu wasa funi ni dega mo turo kuti gupai ni apehe.​—Yak. 1:19.

17. Wai du kura paranga wirina sa agbia undo ti gu regbo ko adu rogo bakere gberãrago?

 ¹⁷ Paranga wirina sa nga Henri, adu rogo bakere gberãrago ho mbembedi agumeko kodihe na bako, nga guko nangia iriiri bakumba rogo dungurati ambu rengo ni. Henri agbia ngarasaro ho babi adungurati andu ni na ko ku ba mbira buni yo i mbirihe, na ki mbuko ko peke agu apai naadu kpotoko yo. Henri aini gupai nga gu yangara gene rengbe ko ka undo gako aborokporo ngbaha i yego ku rogo rengo nga ka ye ni ruruko. Ko agbia bakere wasa ti geda Atambuahe 46; Zefania 3:17; gbiati Marako 10:​29, 30.

18. (a) Ginipai Bakindo Soromo agumbaha? (b) Gini berãpai gu mokedi nangia Pauro afuhe?

¹⁸ Agu akpiapai nga ga Marthe gbiati Henri nayugo gupai nga ani ima rengba ka ngarasa gu wirina naida na wasa. Bakindo Soromo akepai ki ya: “Gu pai nakura ti kina ragoho, ngba ha angba! Gu imarago nga ga bangirise nangiisa kpoto boro yo, wene pangbanga nakiisa nzeme meme.” (Snz. 15:​23, 30) Kurigure, gedapai fu gu boro du rogo bakere gberãrago rogo Ngbaõbambu Sinziri watadu rogo gaani bangiriba nga ga Internet ima rengba ka ngarasa ni. Pauro ayugu gupai nga bibia Kindo sa na akuarani ima rengba kadu ni pa ngarasaro. Ko akepai ki ya: ‘Oni yugu pai fu akuaroni ki nirugu pai rogo abia tambuahe yo, na abia wasa, na agu abia Toro nayugo, nibi he na undahe kpotoroni yo fu Gbia.’​—Koro. 3:16; Amo. 16:25.

19. Tipagine ngarasa tirani dagba tirani nika du ti ni na nyanyakipaha gbe rogo agu auru du kumbatayo, na ginipai si aida ani mangihe?

¹⁹ Ngarasa tirani dagba tirani nika du na paha ni nyanyakihe gbe wa ga Yekova uru ‘ambeda.’ (Eb. 10:25) A wa gu Pauro agumbaha fu agu akurako aKristano naadu ti rago ko, “oni zúngadi tironi na akuaroni, ki ninyakasi tironi dagba roni yo, a wa oni namanga a.”​—1 Tesa. 5:11.