1. Gini ngarasaro Yekova afuhe ti regbo gu samungu namangi Edene yo?

NAATONA ti kina gu regbo aboro ati ku rogo ingapai gbiati zangarengba, Yekova aima yugo gupai nga ko nga gu Mbori nafu ngarasaro. Nibasa tingbafuo gu samungu namangi Edene yo, ko ape pai nga gu narengbe ka fu ngarasaro gbiati maabangirise fu agu awiri Adamu naaye kumbatayo. Apai aagberãnga nyeanye kindi fu aboro te. Ho ka aboro agi rogo gu sangbanebi ni du ni kekehe rogo Bambata Pai 3:​15, ka si afu gu maabangirise fuyo dunduko nga i nika gbarasa “bakuru wo,” nga Satana Bakitingbanga, gbiati gako mangaapai dunduko.​—Yugo. 12:9; 1 Yo. 3:8.

2. Wai du Yekova angarasi Noa?

² Ga Yekova moyambu nangia Noa araki rogo gu zegino naadu na azanga sinombori rogoho, nga gu regbo kina ga Noa riikporo  sa adu ni gu yangara riikporo naairiso Yekova. Mbiko gupai nga aboro zuu gbiati amangi wasiwasi kodaba aima ke Noa ake kirikiri, ko aima rengba kadu rogo bakere gberãrago. (Bam. P. 6:​4, 5, 11; Yuda 6) Ono Yekova ape gupai fu Noa nga gu naafu gu ngarasaro fuko ko aaidaha tipa ka kpatagara kuti ‘ta na Mbori.’ (Bam. P. 6:9) Yekova ape gupai fu Noa nga ko nika gbarasa gu gbegberẽ zegino re na ko ape gupai fuko si aaida ko mangihe tipa ka batasa gako riikporo. (Bam. P. 6:​13-18) Yekova aima du ni Mbori ngarasaro fu Noa.

3. Gini ngarasaro Yosua agbiaha? (Oni bi gu sura duti tonatonaha.)

³ Kusa, Yosua adu na gu nyanyaki sunge beko nga ga ndu na ga Mbori aboro i di Ringara Mokido. Gu sunge re aakoda diabe gu nyanyaki ariivura nga ga agu aboro naaraka rogo gu ringara re. Yosua aima du na bakere ndupai beko ka gunde. Fuo ino Yekova gipai re, ko ape gupai fu Moize nga ko ngarasi Yosua. Mbori aya: “Mo rúgu Yosua, ki ngarãsi ko, ki nyakasi ko; bambiko ko nikasi ku mbiti yo mbata fu agi aboro re. Ko nikandu na yo i rogo gu ringara re nigayo mo akabi he.” (Pa Rug. 3:28) Mbata fu Yosua tona gako sunge, Yekova angarasi ko, ki ya: “A nga mi arugu ro, te? Mo dú nyanyaki ki du na bakere erã; ka mo nigúnde nga ya, ka mo niyúngura nga a ya; bambiko Yekova nga ga Mbori du na mo yo mo ka andu ku ho ni.” (Yos. 1:​1, 9) Nairiwo agu afugo ngarasaro nangiaha re!

4, 5. (a) Gini ngarasaro Yekova afuhe fu gu gako aboro naadu bakuru kusayo? (b) Wai du Yekova angarasi Wiriko?

⁴ Yekova aangarasanga aboro kina ni basasa sa te, ono ko aima pe afugo ngarasaro fu gako aboro ni badona a. Yekova agumba afugo ni sangbanebi nga gu narengbe ka fu wasa fu agu aYudo i aziyo ku Babera yo, ki ya: “Ka mo gúnde nga ya, mbiko mi du na mo, ka mo kío nga ya, mbiko mi nga ga Mbori; mi anyákasa ro, mi aúnda ro, mi asóngoda ro ni kumbabere du na gi rurupai.” (Yes. 41:10) Agu aKristano naadu mbata kusayo aima gbia gu bangisa ngarasaro re, na kina gu bangisa ngarasaro re gu ga Mbori aboro du areme agbiaha a.​—Oni gedi 2 AKorindo 1:​3, 4.

⁵ Yesu nitiko aima gbia ngarasaro be Bako. Ti regbo ga Yesu bapatiza, ko agi fugo ngbangbaturũ yo nga gu naaya: “Wire du re, nyemuko namanga re, ngba ko ti re gbe.” (Mt. 3:17) Nairiwo wai agu afugo re arengbe ka nyakasa Yesu ti regbo gako sunge tungusapai auru kpotosende!

6. Wai du gu sanza nga ga taranda afu ngarasaro?

⁶ Yesu awiriki ga Bako kpiapai. Gu sanza nga ga taranda, nga gu du rogo gu ga Yesu sangbanebi yo du tipa digido zegino, si nanyakasa padu ni ruruse. Bairasunge atambua gako ruru amoyambu ni basasa dũ na agu afugo nga: “Mo amangi he wenengai, wene kangara boro sunge nga mo; mo amangi agu apai du ni umba ha wenengai, mi aasia pa bakere apai foro; mo rimi ku rogo ga bairaro ngbarago.” (Mt. 25:​21, 23) Nairiwo wai agu afugo re angarasi gako abawiriki i naandu kindi kumbatayo kaa iriso Yekova ni ruruyo!

7. Gini ngarasaro Yesu afuhe fu gako amokedi, gbe fu Petero?

⁷ Ga Yesu amokedi anaapapaya apapaya dagbatiyo dedede nibipa da dagbayo pani akii gbe, ono Yesu amangipai na yo na hipai ki ngarasiyo i du na umbasitise na kidu ni amoyambu angianga kadu kurii akurayo ya. (Rk. 22:​24-26) Petero aima ba gberãrago ti Yesu bara dunguhe. (Mt. 16:​21-23; 26:​31-35, 75) Kuba gupai nga Yesu sogo Petero, ko angarasi ko na zavura ki fu gu sunge fuko nga ga ngarasa awirinako.​—Yo. 21:16.

8. Wai du Izikiya angarasi abangerekurii abanzengere gbiati aboro Yuda?

⁸ Zavura mbata fu Wiri Yekova ye ku auru kpotosende no na ki moi bawene kpiapai nga ga wai ka fu ngarasaro, ga Yekova ruru amoyambu aima ino gupai nga si aaida aida i du ni agu aboro nafu ngarasaro. Ho aAsuro aserekpo aboro Yuda ni, Izikiya adungura abangerekurii abanzengere gbiati avuru Yuda tipa ka ngarasa yo. Na “aboro ki songodi tiyo ku be gu pai nga ga [ko].”​—Oni gedi 2 Pekapai 32:​6-8.

9. Ginipai gu buku nga ga Eyobo ayugoho furani nibipa fu ngarasaro?

⁹ Wa si avura du nga si aaida i fu ngarasaro fu Eyobo, ko aima yugopai nibipa fu ngarasaro fu gako “gbegberẽ abangarãsi boro,” nga aguyo naadu biata. Ko ape gupai fuyo nga ka ko adu wa yo, ka ko ‘arengbe ka nyakasa yo na fugo ngbako, na gu pa wasa naadu ngbako ki zeresi gayo rungo.’ (Eyo. 16:​1-5) Niyangaraha, Eyobo aima gbia ngarasaro be Eriu na be Yekova nitiko.​—Eyo. 33:​24, 25; 36:​1, 11; 42:​7, 10.

10, 11. (a) Tipagine si aaida i fu ngarasaro ti ni fu wiri Yepeta? (b) Ada du naima rẽ i fu gu ngbatunga ngarasaro re fuyo areme?

¹⁰ Wiri Yepeta nangia gu kura boro bakuru kusayo si aaida i fu ngarasaro funi. Mbata fu gu basapungbanga nangia Yepeta ndu ka sovura kuti aAmono, ko amangi mozunga ki ya ka Yekova undo ko ko du na diabese, ko nika fu gu bambata boro nika ye ka gbia ko fuo yego ko ba vura yo tipa ga Yekova sunge rogo gako kparakpara ba. Si aye kadu nga wiriko du, nga guri nangia bangisa wiriko naye fuoko ni bambataha ka ngi na ko tipa gako diabese. Yepeta adu ni fudifudi ko gbe kpotokoyo. Ono ko aima kakuti gako mozunga na ki kedi ngasu wiriko ku Siro yo ri naamangasunge banye yo rogo gari raka yo naabaha.​—Abasa. 11:​30-35.

¹¹ Wa gipai re avura kpakara fu Yepeta, si aima kpakara fu wiriko kisusi, ono ri aidi nitiri ka mangapai ringbisihe kuti gu diaberã bari amangihe. (Abasa. 11:​36, 37) Sidu, ri ambupa gari rengo nga ga dia kumba, vunga agude, gbiati banda rimo riikporo gbiati ũkumbo. Si aaida i fu bakere wasa gbiati ngarasaro furi. Gu pangbanga nga ga Ziazia Kekeapai naya: “Si adu ni sino dagba aYisaraere, ya, awiri aYisaraere nangia ade anandu na garã ka tingida pa [watadu kaa tambua] wiri Yepeta nangia de tipa uru biama rogo garã sa.” (Abasa. 11:​39, 40) Ya mo agu aKristano mbupa manga rogatise tipa ka maaberã yo gbe tipa “agu apai nga ga Gbia” arẽnga tipa i tambua yo na ki fu ngarasaro fuyo te?​—1 Kor. 7:​32-35.

12, 13. Wai du Petero ‘angarasi awirinako’?

¹² Rogo gu yuru naadu mbata fu Yesu kpi, ko aya fu gu mokedi nangia Petero wẽ: “Ako Simona, Simona, mo bí, Satana akpi nyemu ka dia roni ka igita roni wa tunga, ono mi akpari tipa ro, ya ka ga idapase paya nga ya. Mo tigamo, ho mo ka sa tiro ni berewe, mo nyákasi awirinamo.”​—Rk. 22:​31, 32.

¹³ Petero aima du ni songodi rogo gu bambata dungurati nangia ga aKristano. (Gara. 2:9) Ko aima ngarasa awirinako na gako kpiapai nga ga wingbaduse ti regbo Pendekote na tingbafuoho a. Ti gu regbo gako sunge tungusapai aambeda ka digo, ko akepai fu akurako aKristano. Ko asaki gu ndupai ko akepai ti ni fuyo ki ya: “Mi ke pai fu roni . . . ki nirugu roni, [watadu kini ngarasi roni] ki ya ni dezire ya ndikidi ga Mbori undahe nga gere, oni rú rogo ho  nyanyaki.” (1 Pet. 5:12) Ga Petero awaraga nga gu ga Mbori toro adu kugiipa kehe ninaangarasa aKristano kindi vuru agu agarã ninaasusa da kuti gi gaani regbo re. Nairiwo wai ani aida na gi ngarasaro re wa ani apido ga Yekova akidohe si digisitihe.​—2 Pet. 3:13.

14, 15. Wai du agu awaraga ga Mbori toro adu kugii gu mokedi nangia Yoane ko kekehe adigi nidu ni pa ngarasaro fu aKristano vuru agu akama agarã yo ninaasusa?

¹⁴ Gu mokedi nangia Yoane aima du a ni songodi rogo gu bambata dungurati nangia ga aKristano. Gako Kitabu Wene Pangbanga nga gu nafura tipa ga Yesu sunge tungusapai aima digo nidu ni pa ngarasaro fu aKristano vuru agu akama agarã yo ninaasusa, na si kinawo kindi areme a. Gako Kitabu Wene Pangbanga nisaha na gu fugo Yesu rogoho nape gupai nga nyemuse nga guhe i aino ga Yesu ndikidi abawiriki ti ni.​—Oni gedi Yoane 13:​34, 35.

¹⁵ Gu ga Yoane awaraga du biata na kura nyanyakipa apai rogoho nga ga rengo. Ho du ani ni rogo bakere gberãrago mbiko manga ani ingapai, ya mo ani agbianga wasa ho ani ageda gupai ni nga ‘kure Yesu nagiriso rani ti ingapai dũ’ te? (1 Yo. 1:7) Na ka si du nga kpotoraniyo nakitangbaanga rani kindi, ya mo ani agbianga wasa ho ani ageda gupai ni nga “Mbori nga bahe ti kpotorani yo” te? (1 Yo. 3:20) Kina Yoane sa nake gupai nga “Mbori nga nyemuse.” (1 Yo. 4:​8, 16) Gako ue waraga gbiati biataha natambua agu aKristano nandu kindi kumbatayo kaa ‘ta rogo rengo’ yo.​—2 Yo. 4; 3 Yo. 3, 4.

16, 17. Gini ngarasaro gu mokedi nangia Pauro afuhe fu agu aKristano naadu mbata?

¹⁶ Rogo bambata sa kama agarã, si nawira gupai nga gu mokedi nangarasi awirinani gbe angia gu mokedi nangia Pauro. Si nangera wa ti agu aregbo gu pambori nga ga aKristano atona atona, badungu  amokedi anye kina Yerusarema yo, nga gu ba riigbu bipasunge adu rogoho. (Amo. 8:14; 15:2) Agu aKristano naadu Yuda yo atungusipa Kristo fu agu aboro naima ida kuti bangisa Mbori mbiko gu maapai kurii nga ga gu pambori nga ga aYudo. Ono tipa gu mokedi tigako nangia Pauro, ziazia toro akedi ko ko ndu ka tungusapai fu aGendiria, nga agu aboro naadu rogo ringara aGiriki na aRomo, nga aguyo naairiso dungu ambori.​—Gara. 2:​7-9; 1 Tim. 2:7.

¹⁷ Pauro andu tuturũ ku rogo gu ba i ayambaha awere nga Turkey, na ko andu a ku ringara aGiriki yo na ku Itaria yo, kini zaki adungurati nga ga aKristano yo dagba agu aboro naangianga aYudo ya. Gi vovo aboro naasa tiyo ni aKristano re “ahi apai a be [angbatungayo]” na si aaida i fu ngarasaro fuyo. (1 Tesa. 2:14) Bara rogo gu garã nangia 50 Fuo Batikayo Kristo, Pauro akepai fu gu vovo dungurati naadu Tesaronike yo ki ya: “Ani nafu tambuahe fu Mbori tipa roni dunduko dedede, nigumba pa roni rogo gaani kpe yo; nitingida pa gaoni mangapai nga ga idapase na gaoni sunge nyemuse na gaoni hipai.” (1 Tesa. 1:​2, 3) Ko angarasi yo a nga i nyakasi tiyo dagbatiyo, niya ko fuyo wẽ: “Oni zúngadi tironi na akuaroni, ki ninyakasi tironi dagba roni yo.”​—1 Tesa. 5:11.

18. Wai du gu riigbu bipasunge naadu rogo bambata sa kama agarã angarasi Firipo?

¹⁸ Gu riigbu bipasunge naadu rogo bambata sa kama agarã anaafu ngarasaro afu fu agu aboro naangbembatayo na fu aKristano dunduko a. Ho gu batungusi wene pangbanga nangia Firipo atungusipai ni tipa Kristo fu aboro Somorona, agu aboro dunduko naadu rogo riigbu bipasunge adu kina kugiiko. I akedi aboro ue dagbayo yo, Petero na Yoane, i kpari tipa gu vovo aidipase re tipa i gbia ziazia toro. (Amo. 8:​5, 14-17) Nairiwo wai Firipo gbiati agu aboro ko asayo ni aKristano re arengbe ka gbia ngarasaro be gi songodahe nangia ga riigbu bipasunge re!

19. Gini sangbanapai gu waraga riigbu bipasunge akedihe adu na ni kurii gu bambata dungurati nangia ga aKristano?

¹⁹ Kusa, si aaida riigbu bipasunge mangi siapai singia si aaida agu aKristano nangianga aYudo ya mangi yeratise, ringbisihe kuti ga Moize Rugute. (Amo. 15:​1, 2) Na gu undo nga ga ziazia toro na tifuo agu awirina re berẽ wenengai kurii Ziazia Kekeapai, i amangi gu diaberã nga gipai re aarẽnga berewe tipa mangaha te, na i ake waraga nibipa gu gayo diaberã re fu adungurati. I akedi agu aboro naarukuba riigbu bipasunge i ndu na agu awaraga re ku rogo adungurati. Sangbanaha angia gine? “Ho i agedi he ni, rago ki ngba ti yo mbiko gu pa wasa re.”​—Amo. 15:​27-32.

20. (a) Gini ngarasaro Riigbu Bipasunge afuhe areme fu awirina rogo zegino dunduko? (b) Gini sanahe ani nika gbia karagapai kutini rogo gu kekeapai ngbefuo gere?

²⁰ Areme, gu Riigbu Bipasunge nga ga aDezire Yekova nafu ngarasaro fu avuru Betere, fu gu kparakpara amangisunge Kindo namangasunge rogo kura abangiriba, na fu agu awirina du rogo zegino dunduko. Na sangbanaha wakina gu naadu a rogo bambata kama agarã, nga ani nangi mbiko gu ngarasaro re! Kurigure, rogo 2015, Riigbu Bipasunge akusi gu burosua nga Mo Karagatiro fuo Yekova, nga gu naima du ni bakere pa ngarasaro fu dungu aboro rogo zegino dunduko. Ono ya mo kina agu aboro sa du na pagbia beyo si aida i wiriki Yekova nifu yo ngarasaro? Ani nika gbia karagapai kuti gu sanahe re rogo gu kekeapai ngbefuo gere.