Tipagine Yesu ape agu afugo ti ni du rogo Atambuahe 22:1 mbembedi mbata fu ko kpi?

Dagba gu yangara afugo yo Yesu agumbaha mbata fu ko kpi, ko agumba gupai du rogo Matayo 27:46: “Gi Mbori, gi Mbori, guari mo ti re sa gine?” Nigumba Yesu gi fugo re, ko adigisi gupai gu bake papara Atambuahe nangia Davide akehe rogo Atambuahe 22:1. (Mk. 15:34) Si ima rengba kadu ni irairaha kada kuti gu digisopai nga, Yesu agumba agi afugo re mbiko rago agberẽ tiko mbiko Yekova watadu ko azanga gako idapase koyo du Mbori ni tipa bete regbo. Yesu aima rugatiko nzunzu na ndu gupai si aaida ko kpi ti ni, na ko aima du na nyemu ka kpi. (Mt. 16:21; 20:28) Ko aima ino gupai a nga, ti regbo kpio ko, si nika ida Yekova mbu bandako. (Eyo. 1:10) Yekova ambu banda Yesu tipa gupai nga Yesu yugu gupai gbaiga nga, ko nika nye ni ruruko ti aregbo dunduko ka gako kpio vura kpakara ni kerehe vurũ.—Mk. 14:35, 36.

Sidu, tipagine Yesu agumba agu afugo ti ni du rogo Atambuahe? Wa vura duhe nga ani ainongo ndu gupai nzunzu ko agumbaha ti ni te, ani nika fura tipa bete kura nduapai si narengbe kadu ti ni nga si du ko agumbaha ti ni. *

Ni gumba Yesu agi afugo re, ya mo ko aanyakasa gupai nga, Yekova arimisongo tiko kurogo agu apai naandu kuti pakpio ko te? Yesu aaida ka fu motumo tumorii zanga gu undo nga ga Yekova. Ko adu ni boro na si aaida ko kpi akpi tipa gupai nga ka “hia kpio tipa aboro dunduko.”—Eb. 2:9.

 Ho Yesu apeke bete afugo gu veresi nga ga Atambuahe re ni, ya mo ko aaida gupai nga aboro berãpa gu veresi re naabaha? Si anidu ni sino aboro ti agu aregbo re kaa zio dungu agu averesi nga ga Atambuahe kuriyo yo. Ho i anigi veresi sa ni nga ga Atambuahe, i anaaberãpa namba gu Atambuahe re naabaha ni kina boro ipo. Ka si du nga gipai re du naadu berã Yesu yo, naida ka ya, ko aima undo agu apefuoko nangia aYudo tipa i tingidi gu dungu sangbaanebi du rogo gi papara Atambuahe nafura tipa agu apai nikaa manga ti regbo kpioko re. (Tam. 22:7, 8, 15, 16, 18, 24) Berewe a, yangara averesi nga ga gu papara Atambuahe re nataasarimo Yekova na kini yugu ko ni gu Bakindo du kurii kpotosende dunduko.—Tam. 22:27-31.

Ni gumba Yesu agi afugo Davide re, ya mo ko aayugopa tiko ni gu boro naamanganga gbegberẽpai ya? Mbata fu imoyo Yesu, ga aYudo aboro rondo aima kitangbanga ko ni wia na ki saringbanga ko nga ko angia boro gberãngba yo. (Mt. 26:65, 66) Ga aYudo agbia-ngbanga adunguratiyo ni ipo kina yuru na ki gumba ngbanga angianga kuti andiko nga ga gumba ngbanga ya. (Mt. 26:59; Mk. 14:56-59) Ho Yesu asana gu sanahe ni nga, “Gi Mbori, gi Mbori, guari mo ti re sa gine?” si ima rengba kadu nga ko aayugo gu rengo nga gbegberẽpai ho ko amangihe narẽ na ngbatunga gu mbusa re te.

Ya mo Yesu aayugo gupai fu kura aboro nga wa vura duhe nga Davide nga bake gi papara Atambuahe re aima gbiatiko na arungosiro, gere aayugongo gupai nga Yekova aaidanga na ga Davide pai berewe te te? Pa sana Davide gi sanahe re aayugongo gupai nga ko aadunga na idapase te te. Tifuo ko fu gi sanahe re, ko afura tipa gu kido ko adu na ni kuti ga Yekova ome tipa ka batasa ko na Yekova andu kindi kumbatayo kaa fu maku fuko. (Tam. 22:23, 24, 27) Teketeke a, wa vura duhe nga Yesu nga “wiri Dawidi” aarungo ti ngbundurungua rungosi, gere ayugongo gupai nga Yekova aaidanga berewe na ga Yesu pai te te.—Mt. 21:9.

Ya mo Yesu aayugopa gu gako kere imisiri ko adu rogoho mbiko wa Yekova aabandanga ko ti gi imisiri re ya tipa ko rengbe ka yugopa gako padu niruruse? Anga ga Yekova mbakadapai du nangiaha ti tonatonaha tipa Wiriko rungo na ki kpi te. Gipai re aye ka da wo tifuo aAdamu na Eva samungu. Gbegberẽpai ho Yesu amangihe te, ono si aaida ko rungo na ki kpi tipa ka fu karagapai kuti gupai Satana akusihe na ka fu gu motumo narengbe ka ngbe guhe aboro azangaha. (Mk. 8:31; 1 Pet. 2:21-24) Gipai re arengbe ka manga kina gu ka Yekova adi gako bandahe ti Yesu tipa bete regbo, na gere nangia bambata regbo tipa Yekova mangihe wo.

Ya mo Yesu aasada ka undo apefuoko tipa i gbeberã yo kuti gu ndupai Yekova ambuko ti ni ko kpi ngba gi gene re? * Yesu aima ino gupai nga pa imo yo ko ti ngbunduru ngua rungosi wa bakuondiko aima rengba kadu ni ũkota fu dungu aboro. (1 Kor. 1:23) Wa ka apefuo Yesu amoiberã yo tipa ndu gupai ko akpi ti ni, ka i aima rugatiyo na pa wai kpioko adu na nyanyakipaha. (Gara. 3:13, 14) Ka i aabi ko ni Batasi angianga ni bakuondiko ya.

Ka si vura du nga kina gini ndupai nasa Yesu ko gumba agi afugo re, ko aima rugatiko na gupai nga ni kpiko ti ngbunduru ngua-rungosi, ko aamanga gupai Yekova akpinyemuhe. Ngbutuko tifuo Yesu gumba agu afugo du rogo gu papara Atambuahe re, ko aya: “Si nyasi!” (Yo. 19:30; Rk. 22:37) Ni rengo, pa zanga Yekova fu undo fu Yesu tipa bete regbo aima fu momu fu Yesu tipa ko digisi gupai ko aye ku auru kpotosende no tipaha ngba rengberengbe gene. Si ambu gene a tipa ko digisi agu apai dunduko i agumbaha tipa ko “rogo ga Mose Rugute yo na anebi na Atambuahe.”—Rk. 24:44.