1. Ginipai Yekova abihe ku rogo gako aboro yo?

RAGO nangba angba ti Yekova Mbori “tipa gako aboro.” (Tam. 149:4) Gipai re nasa gupai nga ani du na bakere ngbarago! Yekova nabi gu wene asino abi du tirani; ko nabi gu ngbatunga wene aboro abi rengbe ani kada nga yo na ko naundo rani ani da ni abakureako. Ka ani nye ni rururani fuko, ko nika nye mbembedi na ani nyeanye kindi!—Yo. 6:44.

2. Tipagine kura aboro abihe ti ni ni mbumbuhe ka ida kuti gupai nga Yekova ima kpinyemu yo?

² Kura aboro rengbe ka ya, ‘Mi ima inoho nga Yekova ima kpinyemu gako aboro wa du yo ni badona, ono waigu rengbe mi kadu na gu kido nga Yekova ima kpinyemu re?’ Ginipai rengbe ka sa boro ni sana ngbatunga gu sanahe re? Oksana * arungo nikerehe ho ri adu ni ni gude. Ri aya: “Mi adu na bakere ngbarago ho mi azi bapatiza ni na ki tona mangasunge ni nazakigene. Ono fuo agarã 15 kusa, mi atona ka tingidapa gu gbegberẽ apai namangi re mbure tooni. Mi aye kada kuti gupai nga, ka Yekova idinga na mi te na mi arẽnga tipa gako nyemuse te.” Yua, nga nazakigene naadu na kina badungu akpakarapai mburi ni tooni gude aya: “Mi akpara gimi raka fu Yekova mbiko mi aaida ka sa ngbarago tiko. Ono mi aidi kuti gupai nga ka ko kpingo nyemu re te.”

3. Ginipai ani nika sakapai tipaha rogo gi kekeapai re?

³ Wakina gi ruru aKristano i nafura tipa yo re, mo ima kpinyemu Yekova ni bakerehe gbe ono mo ima rengba kadu na kapa singia ko kpinyemu ro. Tipagine si aida mo du ti ni na gu kido nga ko naberãpa ro aberã nzunzu? Na ginipai rengbe ka undo ro ho mo aberã gupai ni nga Yekova akpingo nyemuro te? Ani nika sakapai tipa akaragapai kuti agi asanahe re.

4. Tipagine duhe ti ni ni kerepai kadu na kapa tipa ga Yekova nyemuse tipa rani?

⁴ Nyemuse nga gu nyanyakipa he nafõ boro ni mangipai. Ho du ani ni na kido nga Yekova ima kpinyemu rani, si nika sarani ani mangisunge fuko wa rengbe omerani na ni zavura ho du gaani raka ni ni kpakarakpakaraha. Ono ka ani du na kapa tipa gupai nga Yekova naberãpa rani aberã, ‘omerani nika du tooni gbua.’ (Snz. 24:10) Na ka ani du na gberãrago na ki tona berã gupai nga Mbori akpingo nyemu rani te, ani adunga na rengba ka ru fu ga Satana azubohe te.—Ef. 6:16.

5. Ginipai namangi kura awirina nga aguyo naaberãnga gupai nga Mbori nakpinyemu yo akpi ya?

⁵ Kura awirinarani ima tona kaa berã gupai nga Yekova akpingo nyemu yo te na ko aberãnga pa yo te, na gayo idapase ima tona kaa rungbura. Bakumba rogo dungurati du rimoko nga James aya: “Wa vura duhe nga mi aamangasunge Betere yo na kini gbia ngbarago ti tungusapai rogo gu dungurati nape kura fugo kia, mi aabaka kina bangire singia Yekova adu na ngbarago mbiko gupai mi aamangaha. Ti kura regbo sa, mi atona ka bakabangire singia Yekova adegatuko kuti gimi akparakpee.” Eva nga guri namangasunge Kindo a ti aregbo dũ aya: “Mi aye ka rugatire na gupai nga si ni kerepai ka berã gupai nga Yekova akpingo nyemu rani te. Mbiko si nasa rani ani mbu manga apai fu Mbori na ani ki zanga gaani ngbarago.” Michael, nga bazakigene na ni bakumba aya: “Ka mo aidanga kuti gupai nga Mbori naberãpa ro aberã ya, mo ima rengba ka bitikpa kusayo tiko.”

6. Ginipai si aida ani mangihe ka ani tona berã gupai nga Mbori akpingo nyemurani te?

⁶ Agi apangbanga re nayugo pa wai du na gu berãpai nga Yekova akpingo nyemurani te narengbe ka gbarasa gaani idapase. Ono ginipai si aida ani mangihe ka ani tona berã gupai nga Yekova akpingo nyemurani te? Si naida ani mbu berã ngbatunga gu berãpai re niipo! Mo sana Yekova ko undo ro mo aria gu “berã pa apai” re na ‘gu zereda nga ga Mbori nga gu nika bánda kpotoroyo na gamo berã.’ (Tam. 139:23; Frp. 4:6, 7) Na mo tingidi gupai nga anga kina ro sa naberã ngbatunga agu aberã re te. Kura awirina kinaho nasota na iraira abipai. Zavura gu ga Yekova amoyambu naadu mbata kusayo aima gbiatiyo na ngbatunga agu akpakarapai re. Oni bingo gupai rengbe ani ka wirikaha ti gu kpiapai nangia ga gu mokedi nangia Pauro.

7. Gini akpakarapai Pauro agbiatiko na ni?

⁷ Ya mo mo naabihe ti kura aregbo nga dungu asunge ima nge bero na si ni kere kpakarakpakaraha mo mangi agu apai dunduko si aida mo mangihe? Ka singia wo duhe, mo ima rengba ka rugatiro na gupai Pauro adu rogoho. Ko adu na bakabangirise, angianga tipa kina bangisa dungurati sa ya ono “tipa akanisa [adungurati] dunduko.” (2 Kor. 11:23-28) Ya mo mo na bangabanga kaza tiro nga gu nadia gamo ngbarago kusayo? Pauro adu na kpakarapai nga gu naarungosi ko nikerehe. Si ima rengba kadu nga gu kpakarapai re angia kaza kpotose, na ko aaida i dihe kusayo tiko. (2 Kor. 12:7-10) Ya mo mo na gberãrago mbiko gamo azangarengba? Kinawo Pauro adu ti kura aregbo. Ko aya tipa tiko “rungorungo boro” nga ko bambiko gu vura ko aasoho na aˈuru dunduko tipa ka manga gupai du ni ruruhe.—Rom. 7:21-24.

8. Ginipai naundo Pauro ko sovura kuti gako akpakarapai?

⁸ Wa vura duhe nga Pauro ahi agi akpakarapai re dunduko, ko aandu kindi kumbatayo kaa iriso Yekova. Ginihe nafu ome fuko ko naandu kindi kumbatayo kaa iriso Yekova? Wa vura duhe nga ko aima inopai wenengai tipa gako azangarengba, ko adu na nyanyaki idapase kuti motumo tumorii. Ko aima ino gu ga Yesu kidohe a nga, agu ‘aboro dunduko ka idi pa [Yesu] . . . nyenye unga du adu beyo.’ (Yo. 3:16; Rom. 6:23) Ni rengo, Pauro aima du na idapase kuti motumo tumorii. Ko aima ida kuti gupai nga Yekova regerege ka mbupai zavura fu agu aboro naima manga kere ingapai ka i saberã yo.—Tam. 86:5.

9. Ginipai ani awirikaha ti agu afugo Pauro du ni kekehe rogo AGaratio 2:20?

⁹ Pauro aima du a na idapase nga Mbori aima kpinyemuko mbiko ko aima ino gupai nga Mbori akedi Yesu ko ye ka kpi tipa ko. (Oni gedi AGaratio 2:20.) Mo bingo agu afugo kidohe du ti digido gu veresi re. Pauro aya: ‘Wiri Mbori . . . akpi nyemu re, ki fu tiko tipa re.’ Pauro aabingo ho nga ko aima du ni gbegberẽ boro na si ki sa gupai nga ka Mbori kpingo nyemuko te te, ko aapenga gupai nga, ‘Mi ima bi ndu gupai Yekova narengbe ti ni ka kpinyemu awirinina, ono ko arengbanga ka kpinyemu re te te.’ Pauro atingidi aRomo na gupai nga: ‘Nikpi Kristo tipa rani wa ani adu ni aboro ingapai.’ (Rom. 5:8) He ho ka ká na Mbori ti gu nyemuse du ko na ni tipa rani te!

10. Ginipai ani awirikaha rogo ARomo 8:38, 39?

¹⁰ Oni gedi ARomo 8:38, 39. Pauro aima ino pa wai du ga Yekova nyemuse ni nyanyakihe. Ko ake gupai nga, pai ho ka ‘kpara rani ti ga  Mbori nyemuse te.’ Pauro aima inopa wai Yekova amangipai na aYisaraere rogo zerangbaduse yo. Ko aima ino wai a Yekova ayugu inapai fuko. Sidu, ka pepai rogo kura fugo, Pauro aaya, ‘Wa mi naima ino gupai nga Yekova akedi bangisa wiriko ko ye ka kpi tipa re, ndupai ho mi du na kapa nga ko ima kpinyemure te.’—Rom. 8:32.

11. Wa vura duhe nga Pauro aima manga aingapai wa agu du paha rogo 1 Timoteo 1:12-15, tipagine ko adu ti ni na gu kido nga Mbori ima kpinyemu ko?

¹¹ Oni gedi 1 Timoteo 1:12-15. Si nawira gupai nga, rago anaagberã agberã ti Pauro ho ko anaaberã kurii agu apai ni ko amangihe mbata fu ko da ni Kristano. Si airiwongo te nga, ko aya tipa tiko ko nga “barumbatayo” nga ga ingapai! Mbata fu Pauro ini rengo, ko anaata rogo agbata kaa rungosi aKristano, kini ba agu yo ku bambukiso yo na kini songodi gupai nga i imi agu akurayo. (Amo. 26:10, 11) Oni berẽnga pa wai ka Pauro arengbe kadu ka ko agbia gu paranga Kristano ko asongodi pa imo avunguni. Pauro aima bira tiko ti gako aingahe, ono ko aima ino gupai nga ka ko arianga gupai namangi kusayo te. Ko aima ida gupai nga Kristo akpi tipa ko, na ko ki ke gupai ni kido nga: “Be gu undahe nga ga Mbori mi du wa du mi.” (1 Kor. 15:3, 10) Ginipai ani awirikaha ti gipai re? Mo idi kuti gupai nga Yesu akpi tipa ro na ki sa gupai nga mo du na rengba kadu na mbembedi pabakure na Yekova. (Amo. 3:19) Gupai nyakipaha fu Mbori nga gupai ani amangaha awere na gu ani nika mangaha kumbatayo, angianga agu aingahe ani amangihe kusayo, singia ani angia aDezire Yekova watadu ani angianga aDezire Yekova te ya.—Yes. 1:18.

12. Waigu rengbe agu afugo du ni kekehe rogo 1 Yoane 3:19, 20 ka undo rani ka si du nga ani nabihe nga sunge tirani te watadu i akpingo nyemurani te?

¹² Ho mo aberã ni kurii gupai nga Yesu akpi tipa ka dada gamo aingapai, mo ima rengba ka ya, ‘Mi arẽnga tipa gu nyanyakipa gamahe  re te.’ Tipagine rengbe mo ka berãpai ti ni wa gu re? Kpotoraniyo nga gu adunga ni rengberengbehe ya ima rengba ka nanga rani ki sarani ani naaberã gupai nga sunge tirani te watadu i akpingo nyemurani te. (Oni gedi 1 Yoane 3:19, 20.) Ti ngbatunga agu aregbo re, si naida ani tingidi gupai nga, “Mbori nga bahe ti kpotorani yo.” Zavura ka ani vura kaa bihe vurũ nga Yekova akpingo nyemurani te watadu ko ambunga pai furani te, gu Barani du ngbangbaturũ yo naberãpa rani kindi na ko nika mbupai ambu furani. Si naida ani wiriki ka ida kuti gupai nga Yekova ima kpinyemu rani. Tipa ka manga gupai re, si naida ani naawisigo Fugoko dedede, kini mangi kparakpee fuko dedede, na kini koditirani dedede na gako ruru aboro. Tipagine nyakipa manga agu apai re ti ni?

13. Waigu rengbe wisigo Fugo Mbori ka undo rani? (Oni bi gu sanduki nga, “ Wai Fugo Mbori Aundo Yo.”)

¹³ Mo naawisigo Fugo Mbori na aʹuru dunduko, na si nika saro mo rugutiro ni bakerehe gbe na gu badungu wene asino du ti Yekova. Mo nika rugatiro na bakio wai ko nakpinyemu ro. Berãkurii papara Fugo Mbori na aˈauru dũ nika undo ro mo naaberã ziazia gbe, kini ‘rugu’ apai berãro yo na kpotoro yo. (2 Tim. 3:16) Bakumba du rimoko nga Kevin naasota na gu bipai nga pako anyakanga te aya: “Geda Atambuahe 103 na kini berẽkuriihe aundo re mi rugu gimi berãpai na ki rugutire na gupai Yekova aberãha nzunzu tipa re.” Eva i nipepa ri kusayo aya: “Ti digido uru, mi naadia regbo ka berãkurii ga Yekova aberãpai. Si naaye na zereda nga ga kpotoseyo fere na kini nyakasi gimi idapase.”

14. Waigu rengbe kparakpee ka undo rani?

¹⁴ Oni naamanga kparakpee dedede. (1 Tesa. 5:17) Ho mo aida ka zio bakure ni na boro, si naida oni naafura dedede na mo kini peke gamo aberãpai funi. Kina gu bangisapai re du tipa gaani pabakure na Yekova. Ho ani apeka agu apai ni du kpotoraniyo gbiati gaani aberãpai na gaani abakabangirise fuko rogo kparakpee yo, ani nayugo gupai nga ani na kido kutiko na ani naino gupai nga ko ima kpinyemu rani. (Tam. 94:17-19; 1 Yo. 5:14, 15) Yua i nifura tipa ri kusayo aya: “Ho mi amanga kparakpee ni, mi naapenga kina agu apai niimangi re rogo gu uru re fu Yekova te. Mi naape agu apai fuko nzunzu mi aberãha. Yeeye, mi ima ye ka bi Yekova, angianga wa bakere baramu rogo bakere basunge ya, ono wa gu Baagude naima kpinyemu awirini nzunzu.”—Oni bi gu sanduki nga, “Ya mo Mo Gedihe?”

15. Wai du Yekova ayugo gupai nga ko naberãpa rani aberã?

¹⁵ Mo naakoda tiro na ruru abakure; i nga gamahe be Yekova. (Yak. 1:17) Gu Barani du ngbangbaturũ yo nayugo gupai nga ko naberãpa rani aberã ni fuko awirina furani rogo dungurati nga aguyo nayugo nyemuse ti “arago dunduko.” (Snz. 17:17) Rogo ga Pauro waraga yo fu aKorosaio, ko agumbapa kura aKristano  nga aguyo nasongodi ko, ko aya tipa yo i “nangarãsi” ko. (Koro. 4:10, 11) Zavura Kristo Yesu aaida undo aida be abakureako, amaraika gbiati aboro na ko aima du na tambuahe tipa gu undo re.—Rk. 22:28, 43.

16. Waigu rengbe ruru abakure ka undo rani ani mbedi gbe na Yekova?

¹⁶ Ya mo mo nagbia undo ni bakerehe gbe ti gu ga Yekova gamahe nga ruru abakure? Ho ani apeka pa gaani abakabangirise ni fu gu bakurearani Kristano naima nyaka rogo toroyo, si ayugongo gupai nga gaani idapase rurungbura te. Kuba gure, manga ani he wo nga bandahe furani. Oni bingo gupai James i nifura tipa ko kusayo agumbaha, ko aya: “Wene pabakure na agu aKristano naima nyaka rogo toroyo ima undo re ni bakerehe gbe. Ho iraira aberã ninaafu ni rii omere, gi nyanyakipa abakure re ninaadegatuyo fere na zerangbaduse na kini gumba gupai fere nga i ima kpinyemu re. Ho i amangaha ni wo, mi naye ka ino gupai nga Yekova ima kpinyemu re na ko naberãpa re aberã.” Si ni nyanyakipa pai ka sonosa mbembedi pabakure na agu awirinarani nga ga toroyo na ki bandaha!

17-18. Da si aida ani degeturani fu ni, na tipagine?

¹⁷ Satana naida gupai nga ani mbu sovura tipa manga gupai du ni ruruhe. Ko naida ani idi kuti gupai nga, Yekova akpingo nyemu rani te na ani arẽnga na gako batasahe te. Ono a wa ani nabihe, rengo nga gupai re te.

¹⁸ Yekova ima kpinyemu ro. Mo na nyanyakipa ro bangiriko. Ka mo gisangbako, mo nika “nye rogo gako nyemuse” yo nyeanye kindi wa gu Yesu anye. (Yo. 15:10) Ka mo idinga kuti gupai Satana apehe watadu gupai kpotoroyo apehe ya. Kuba gure, mo degeturo fu Yekova nga gu ko nabi gu wenepai du rogo rani yo wa du ani ni basasa dunduko. Mo idi kuti gupai nga, rago nangba angba tiko “tipa gako aboro” kodihe na mo!