“Da Ini Gu Berã Nga Ga Gbia?”

“ ‘Da ini gu berã nga ga Gbia, ni ka yugo pai fu ko?’ Ono ani du na ga Kristo berã ti rani.”—1 KOR. 2:16.

1, 2. (a) Gini kpakarapai namanga badungu aboro? (b) Ginipai si aida ani tingidihe tipa gaani aberã na gu nga ga Yekova?

YA MO si adu nga furoni nikpakarakpakaraha tipa ka rugatironi na gu gene kura boro aberã ngbaha? Si rengbe kadu nga oni mangi rogatise bambeda, na oni ki bi gupai nga gene ho tipa oni rugutironi na wai gaoni badiarogatise aberã te. Nirengo, zavura gu gene akumba aberã ngbaha na kini fura, si kia ti gu nga ga adee. Na rogo kura angbatunga, akumba nape gu fugo dukia ti gu adee apehe! Kurigure, padu sino ngbatunga aboro nibakiakia na afugoyo rengbe ka sa gupai nga gayó aberã na asinoyo du a nibakiakia. Ono tie, pa dia ani regbo ka ino aboro nasa gupai nga ani tona ka rugatirani na gu gene i aberã ngbaha.

² Sidu tie, si aidanga gupai iriwo tirani nga gaani aberã nituturũhe ti ga Yekova watadu kia ti gako te. Yekova aya fu aYisaraere kungba gako nebi nangia Yesaya wee: “Gimi aberã wa gaoni aberã te, gaoni apai wa gimi apai a te.” Fuo gure, Yekova ayugu gipai re fuyó na kpiapai ki yaa: “Bambiko wa turũ angbangbaturũ gbe ti kpotosende ku ari, wo du gimi apai ku ari ki susi gaoni apai, na gimi aberã ki susi gaoni aberã.”—Yes. 55:8, 9.

3. Gini agene ue rengbe ani ka duna wene “ngbanya” dagbarani na Yekova ngbaha?

³ Ya mo gipai re nayugo gupai nga si aidanga ani mangi asadatise tipa ka rugatirani na gu gene Yekova aberã ngbaha te? Oó. Wa vura duhe nga ani arengbanga ka rugatirani na ga Yekova aberã dunduko te, Ziazia Kekeapai nangarasa rani ani duna wene “ngbanya” dagbarani na Yekova. (Oni gedi Eyobo 29:4.) Gene sa dagba agu akuraha rengbe ani kadu na wene ngbanya dagbarani na Yekova ngbaha na ki mbedi naako nga ka yugo irisa tipa gako mangaapai na kini moiberã rani fuoho, nga gu yuguyo paha rogo Ziazia Kekeapai. (Tam. 28:5) Gu kura gene berewe nga, ka ino “ga Kristo berã” nga guko “nayugo Mbori nga gu ko ka i abi nga ko” ya. (1 Kor. 2:16; Koro. 1:15) Pa dia ani regbo ka geda agu apangbanga nga ga Ziazia Kekeapai na kini berẽkuriihe rengbe ka sa gupai nga ani rugutirani na asino Yekova gbiati gu gene ko aberã ngbaha.

Ka Oni Dunga na Iraira Bipai Tipa Yekova Ya

4, 5. (a) Ginipai si aidanga ani mangihe ya? Oni sakingo rogoyo. (b) Gini iraira berã aYisaraere adu nani?

⁴ Wa ani kaa berãkurii ga Yekova mangaapai, si aidanga ani sapungbanga Ko kuti gu iraira bipai nga ga aboro te. Yekova agumbapa gi irairapai re nisanza rogo Atambuahe 50:21 niyaa: “Mo aberẽ he tigamo ya mi adu wa kina ro.” Agarã wa 175 kusayo, wene bawiriki Ziazia Kekeapai sa ape gupai nga: “Aboro nasapangbanga Mbori nitiyo, na kini berẽhe nga Mbori nandu kina kuti agu arugute aboro abihe nga si ruu.”

⁵ Si naida ani duna rugatise ani andu kadu na iraira bipai tipa Yekova, kini berẽ gupai nga si naida ko naandu kina kuti agu apai ani  abihe nga si ruu watadu agu apai ani akpinyemuhe. Tipagine nyakipa gupai re ti ni? Gupai re na nyanyakipaha mbiko gupai nga, ho ani awisigo Ziazia Kekeapai ni, ani nabihe nga kura apai kinaho Yekova amangihe kusayo naarunga ya. Agu aYisaraere nadumbata aduna kina gu iraira berã re kini bihe nga Yekova aamanganga pai naayó ngba ruru gene te. Oni bingo gupai Yekova apehe fuyó ki yaa: “Oni naya, ‘Gu pai nga ga Gbia ru nga ha te.’ Ako ngbatunga aYisaraere, oni gí he awere: Ru nga gi pai te? A nga si nga gaoni pai aru nga ya, te?”—Yeze. 18:25.

6. Ginipai Eyobo awirikihe, na wai rengbe ani ka gbia undo ti gupai re?

⁶ Pai sa rengbe ka undo rani ka ani sapungo ngbanga Yekova kina kuti gaani bipai nga aboro ya nga, si naida ani tingidi gupai nga gaani bipai kusende na ti kura aregbo ani namanga kere ingahe amanga. Si aidi aida Eyobo wiriki gipai re. Ho Eyobo aduni rogo rungosiro, ko aaberã kina pa tiko tooni. Bangiriko ago ti bakere apai. Ono Yekova aundo ko ninyemuse ko aria gako bipai. Yekova asanako na asanahe susi 70, nga agu asanahe Eyobo aarengbanga ka karagapai kuti gu kandara sa ya. Gipai re kini yugu gupai nga berã Eyobo adu kusende gbe ti ga Mbori. Eyobo amangipai niumbasitise ki aria gako bipai.—Oni gedi Eyobo 42:​1-6.

Wai Kadu na “ga Kristo Berã”

7. Wai pa berã ani kurii ga Yesu mangaapai aundo rani ani rugutirani na ga Yekova berã?

⁷ Yesu awiriki Bako rogo apai yo dunduko singia rogo fugo yo na rogo mangapai yo. (Yo. 14:9) Sidu tie, pa wisigo ani ga Yesu mangaapai naundo rani ani rugutirani na gu gene Yekova aberã ngbaha. (Rom. 15:5; Frp. 2:5) Ani wisigingo apai ue nga gudu rogo aKitabu Wene Pangbanga yo.

8, 9. A wa duhe nikekehe rogo Yoane 6:1-5, ginipai namangi nasa Yesu ko sana Firipo na sanahe, na tipagine ko asanako ti ni?

⁸ Oni bingo gupai namangi Pumbo Susiri nimbedi ka manga rogo gu garã nangia 32 F.B.K. Ga Yesu amokedi akaragatiyo ba tungusapai yo Gariraya yo. Wa i aduna mbugo be gu bakere sunge i amangihe, Yesu adi yó ku pavuru gu Baime yo nga Gariraya tipa i ndu ka ongoda. Ono tie, badungu akutu aboro napefuoyo koyo. Fuo husa Yesu badungu aboro na ki yugu dungu apai fu aboro, pai akuru sa. Aboro dunduko nadu na gomoro na ka gene adunga wa ka i gbia riahe rogo gu ba re ya. Fuo ino Yesu gipai re, ko asana Firipo nangia vuru gu rago re ki yaa: “Wari ani ka ngbe udiudi kpokuta ni, agi aboro ri he re?”—Yo. 6:1-5.

⁹ Tipagine Yesu asana Firipo ti ni na gi sanahe re wa ko aima ino nga riahe aadunga rogo gu rago re te? Ya mo Yesu aabakabangiriko abaka naapa gupai ka ko mangihe? Oó. Ginipai nadu berãko yo nzunzu? Gu mokedi nangia Yoane, nadu kina rago gupai re a, akepai ki yaa: “[Yesu] agumba gere ni asada ko, bambiko ko aini gu pai aina ni tiko ko ka manga.” (Yo. 6:6) Ko aidi ka ino wai gako abawiriki nanyaki rogo idapase yo. Ko asanahe wo tipa i yawee ko nitiko nika riga agu aboro re. Ono i aagumbanga ha wo te, na gipai re ayugu wai gayó berã adu kusende gbe. (Oni gedi Yoane 6:​7-9.) Fuo duhe were, Yesu kini mo ka manga gu bakerepai i aaberãnga kandara berẽberẽ gupai nga ka ko mangihe ya. Ko arigi agu akutu aboro-gomoro re dunduko.—Yo. 6:10-13.

10-12. (a) Tipagine Yesu aamanganga gupai ti ni niipo dee asanako tipaha ya? Oni sakingo rogoyo. (b) Ginipai ani ka wisigoho awere?

¹⁰ Gi pangbanga re naundo rani ani rugutirani na ga Yesu berã rogo kurapai berewe namangi. Ngbutuko fuo riga ko gu badungu aboro re, ko aguari na gako amokedi ki ndu ku nodiyo, gii Yisaraere yo, mbembedii na Tura na Sidona. Ho i aduni yo, i agbia dee ni Giriki ri ki zungodi Yesu ko husi wiiri. Yesu aká aká mbata. Ono ho ri aakpara ni fuko kindi, ko aya furi: “Agude mbiki mbata; bambiko  ngba nga dia ga agude kpokuta ka ba ha fu aango te.”—Mk. 7:24-27.

¹¹ Tipagine Yesu aká aká ti ni mbata ka undo gi dee re? Ya mo ko aaʹasada ri aʹasada a wa ko aʹasadi Firipo, tipa ka ino gupai ri nika mangaha? Isoni. Gu gene ko afura ngbaha, si aabanga gberarago tiri ri ki guari kusayo te. Wa ko avura ya tiri ‘ango’ a wa aYuda anaabi aGendiria, ko agumbaha rogo gu fugo nasaha ka si dunga niʹiigiraha ya. Isoke Yesu amangipai wa gu bagude naida aida ka fuhe fu wirini ono ní kini ká aká mbata nani tipa ka ino singia gu gude re naida guhe re aida nzunzu. Wa ani avuranga ino gupai nzunzu nasa Yesu ko mangipai wa gure ya, gupai nga rengo nga, ho gu dee re ayugu gari idapase ni, ko aima manga gupai ri akpinyemuhe beko.​—Oni gedi Marako 7:​28-​30.

¹² Agi apangbanga du ue re naundo rani ani inipai tipa “ga Kristo berã.” Ani bingo wai awere tie rengbe agi apangbanga re ka undo rani ani rugutirani naapa ga Yekova berã.

Ga Yekova Mangapai na Moize

13. Wai pa ino ani gu gene Yesu aberã ngbaha aundo rani?

¹³ Pa ino ani gu gene Yesu aberã ngbaha naundo rani ani girogo gu kekeapai du rogo Ziazia Kekeapai yo nga gu rengbe kadu nikpakarakpakaraha ka giarogoyo. Nikpiapai, ani makianga gupai Yekova agumbaha fu Moize ho awiri aYisaraere amangi kpia wiri bagara ni ka irisoho. Yekova ayaa: “Mi bi agi aboro re, mo ngére, airanyakari nga yo; wa du he were, mo mbú re awere, gi zinga rúngudi fafoi kuti yo, mi ki ba tungayo; ono mi asá ro ni bakere rikaaboro.”—Gate 32:9, 10.

14. Wai Moize amangipai ho Yekova ayani Ko naida ka ba tunga aYisaraere kpäkäyä?

¹⁴ Gi pangbanga re nandu kumbatayo kini yaa: “Mose ki zungadi Yekova nga gako Mbori, ki ya, ‘Ako Yekova, tipagine ga zinga arunguda fafoi ti ni kuti gamo aboro, nga agu yo mo akusi yo ringara Ezipeta yo ni bakere tandu, na ni nyanyaki bero? Tipagine aEzipeto ka gumba ha ti ni, ki ya, “Ko akusi yo ka manga yo gbegberẽ, ka imo yo dagba abaagangara, na ka ba tungayo auru kpotosende zegino dunduko”? Mo sá tiro ti ga nzengerenzengere zinga, ki sa ga berã ti manga gbigbitapai fu gamo aboro. Mo tíngidi pa aAbarayama, na Yisaka, na Yisaraere, nangia gamo amoyambu, nga agu yo mo azunga he ni tiro fu yo niya, “Mi angéesa ngbatungaroni wa akerekuru ngbangbaturũ yo, na gi ringara re dunduko nga gu mi agumba paha mi afú he fu ngbatungaroni, i adía ha ni gayo nye anye kindi.” ’ Yekova ki birĩ tiko ti gu gbigbitapai nga gu ko aberẽ pa manga ha kuti gako aboro.”—Gate 32:11-14. *

15, 16. (a) Gini momu Moize agbiaha mbiko gupai Yekova apehe? (b) Tipagine Yekova ‘abirĩ tiko’ ti ni?

 ¹⁵ Ya mo si aidi kina Moize rugu ga Yekova berã, angianga kina Yekova ruguhe nitiko ya? Wagusa te! Wa Yekova avura pepa gupai ko aberẽpa mangaha, anga si nangia gako yangara sapangbanga te. Gupai nzunzu nga rengo nga, Yekova aaʹasada Moize aʹasada a wa Yesu aʹasadi Firipo na gu dee nangia boro Giriki kusa. Yekova afu gu momu re fu Moize tipa ko gumba gako bipai. * Yekova amoi Moize ko duni azarõ dagbako na aYisaraere, na Yekova aduna irisa tipa gu mbakadapai re. Isoke Yekova aidi ka ino a singia rago nika gberã ti Moize mbiko ga aYisaraere mangapai ko ki idihe fuko Ko gbarasiyo ki sa kina ngbatungako sa nibakere rikaaboro.

¹⁶ Ga Moize karagapai ayugu gako idapase gbiati kido kuti ga Mbori ruru sarangbanga. Gupai Moize agumbaha ayugu gupai nga ko aaberãpa rimo Yekova angianga kina patiko ya. Ko aaidanga gbegberẽpai ye kuti rimo Yekova te. Gipai re nayugo gupai nga Moize aima ino “gu berã nga ga Gbia” nibi gipai re. (1 Kor. 2:16) Sangbanaha angia gine? Wa duhe nga anga Yekova aima diaberã nibasa tipa ka gbarasa aYisaraere te, ko ‘abirĩ tiko ti gu gbigbitapai nga gu ko aberẽpa’ ye nani kurii gu rikaaboro re dũ.

Ga Yekova Mangapai na Abarayama

17. Wai Yekova ayugu bakere zerangbaduse rogo gako mangapai yo na Abarayama?

¹⁷ Gu kura kpiapai berewe nayugo wai Yekova ambu momu fu gako amoyambu i gumbapa gayó idapase na gayó kido nabipa ga Abarayama asanahe tipa Sodomo. Rogo gu pangbanga re, Yekova aima yugo gako bakere zerangbaduse nimbuko Abarayama ko sana asanahe muambe. Abarayama agumba gupai berewe fu Yekova nga: “Si túrũ aturã ti ro ka manga wo, nga mongo gbarasi ruru aboro na gbegberẽ aboro, ya ruru aboro ka du wa gbegberẽ aboro! Túrũ gu pai re aturã ti ro! Ka Basapungbanga zegino dunduko mángi nga gu pai ru aru te?”—Bam. P. 18:22-33.

18. Ginipai ani awirikaha ti gu gene Yekova amangipai ngbaha na Abarayama?

¹⁸ Nibi gi pangbanga re, ginipai ani awirikaha tipa ga Yekova berã? Ya mo si aidi gupai nga kina Abarayama sakipai mbata na Yekova ko mangi ruru diaberã? Oó. Si aidi gupai aida nga Yekova ima gumbapa gako diaberã dunduko ti kina tonatonaha fu Abarayama. Ono Yekova ambuko tipa ko sanahe nitiko ka inopa gako diaberã na gako berãpai. Si nasa Abarayama ko rugutiko na ga Yekova bakere nunga gbiati gako rurupai. Nirengo, Yekova amangipai na Abarayama wa bakure.—Yes. 41:8; Yak. 2:23.

Gupai Ani Awirikaha

19. Wai rengbe ani ka wirika Eyobo?

¹⁹ Ginipai wiriki ani he tipa gu “berã nga ga Gbia”? Agu apai ani nawirikihe nga: Si naida ani mbu Fugo Mbori si rugu gaani bipai tipa ga Mbori berã. Si aidanga ani duna iraira bipai tipa Yekova na ki sapungbanga ko kina kuti gaani bipai na gaani berãpai te. Eyobo ayaa: “Kumba nga Mbori te, wa du pa re, mi ka karaga pai fu ko, ya ani ye wa sa tipa sarangbanga.”  (Eyo. 9:32) Wa kina Eyobo, ho ani atona ni ka rugatirani na ga Yekova berã, si nasa rani ani yaa: “Mo ngére, agi apai re nga kina bete gako apai; ani nagia kina rukutu wiri apai tipa ko! Ono woro su gako tandu, da rengbe na ruga tini na ni?”—Eyo. 26:14.

20. Ginipai si aida ani mangihe ka si du nga ani kuru bara pai rogo Ziazia Kekeapai nga gu duni kpakarakpakaraha ka giarogoyo?

²⁰ Ho ani ageda Ziazia Kekeapai ni, ka si du nga ani kuru bara gupai duni kpakarakpakaraha ka giarogoyo, gbe nibipa ga Yekova mangaapai, ginipai si aida ani mangihe? Ka si du nga ani wetekepai tipa gipai re ka ani arengbanga ka gbia ndikidi karagapai sani ya, si naida ani bi gipai re wa asada gaani kido kuti Yekova. Ani tingidi gupai nga, kura apai kinaho du rogo Ziazia Kekeapai rengbe arengba ka kpakara bangirani, ono si naida ani idi kuti ni kina kuho ka si vura du nga ani agianga rogoyo te vurũ. Si naida ani idi kuti gupai niumbasitise nga, ani arengbanga ka giarogo agu apai yo dunduko Mbori amangaha te. (Batu. 11:5) Sidu tie, si naida ani idi kuti fugo gu mokedi nangia Pauro, nayaa: “Ako gu dungura nga ga gu ũkumuko nga ga Mbori tatamana na inahe! Na gasi wisiga gako andika, na gasi rugatise na gako mangaapai! . . . ‘Bambiko da ini nga ga Gbia berã? Da nadu nga ni barugupai fu ko?’ ‘Da nafu he fu ko mbata, ko karaga kura he fu ni berewe?’ Bambiko ahe dunduko si aye kina be ko, mbiko ko, na fu ko. Taarimo du fu ko nye anye kindi. Amina.”—Rom. 11:33-36.

[Gu rukutu kekeapai du bandu kpewaraga yo]

[Asanahe nga ga wisigopai]

[Gu kpiahe du ti kpewaraga 13]

Ginipai ani awirikaha tipa ga Yekova berã nibi gu gene ko amangipai ngbaha na Moize gbiati Abarayama?

[Gu kpiahe du ti kpewaraga 14]

Oni Natingidaha?

• Ginipai rengbe ka undo rani ka ani sapungo ngbanga Mbori kuti kina gaani bipai ya?

• Wai pa ruga ani tirani na ga Yesu mangaapai aundo rani ani rugutirani na gu gene Yekova berã ngbaha?

• Gini apai oni nawirikihe ti ga Yekova fugo na Moize gbiati Abarayama?