Oni Naagbata “Gako Rurupai” Mbata

“Oni gbáta gako ngbi mbata, na gako rurupai; i ki kpamia agi ahe re dunduko fu roni kuti ni.”—MT. 6:33.

1, 2. Ga Mbori rurupai nga gine, na mburuhe rii gine?

“ONI gbáta gako ngbi mbata.” (Mt. 6:33) Gi rugute Yesu Kristo afuhe ti regbo gako tungusapai rii bagangara yo re nga gu rugute aDezire Yekova naima inoho areme wenengai gbe. Ani nayugo gupai rogo gaani raka naabaha nga, ani nakpinyemu ga Mbori Kindo na kini ra kutii behe. Ono si aidanga bangirani go ti gupai papara gu veresi re apehe te, ki yaa, “na gako rurupai.” Ga Mbori rurupai nga gine, na wai rengbe ani ka gbataha?

² Ga Mbori “rurupai” nga gupai ruu bangiriko. Wangia ko Bakusiahe, ko na rengo beko ka maa andiko tipa gupai du niwenehe na gudu nigbegberẽhe, gudu niruruhe na gudu niʹirairaha. (Yugo. 4:11) Ono tie, anga ga Mbori andiko niʹiigiraha watadu nibadunguhe kisusi ome te. Mburuhe rii bangua asinoko, nga gako rurupai, nyemuse, tatamana, na ome. Sidu tie, ga Mbori rurupai nikodikodihe naapa gupai ko akpinyemuhe na gako ringbisapai. Si nabipa gupai abi a ko akpinyemuhe be agu aboro naida ka irisoko.

3. (a) Gine nga gbata ga Mbori rurupai mbata? (b) Tipagine ani airisa ga Yekova andiko ti ni?

 ³ Gine nga gbata ga Mbori rurupai mbata? Gbata ga Mbori rurupai mbata nga ka manga gupai Mbori akpinyemuhe tipa ka sa ngbarago tiko. Pa gbata ani ga Mbori rurupai mbata nakodapa manga ani asadatise ka raka ringbisihe kuti gako arugute angianga gaani ya. (Oni gedi ARomo 12:2.) Gi ngbatunga raka re nabipa gaani pagume na Yekova. Ani airisanga ga Mbori andiko mbiko gunde ani nga ko nika fu mbusa furani te. Ono nyemu Mbori du nafõngbaduraniyo ani asaditirani ka sa ngbarago tiko niʹirisa ani gako andiko, angianga kaa ndu kina kuti gaani andiko nitirani ya. Ani ini gupai nga si nga gu rurupai si aida ani mangihe na si Mbori akusi rani ani mangihe. Si naida ani kpinyemu rurupai a wa Bakindo ga Mbori Kindo nga Yesu Kristo amangihe.—Eb. 1:8, 9.

4. Tipagine nyakipa gbata ga Mbori rurupai ti ni?

⁴ Wai nyakipa gbata ga Yekova rurupai? Oni bingo gipai re: Gu asada naye fu aAdamu na Eva ati Edene yo, si aʹasadi yó singia i nika ida na gu rengo du Yekova nani ka rũ andiko fu aboro watadu i aidanga nani te. (Bam. P. 2:17; 3:5) Pa ti yó gu asada re aye na rungo gbiati kpio kurirani dunduko nga awiriyo. (Rom. 5:12) Ono Fugo Mbori nayaa: ‘Gu boro nagbata rurupai na weneringise abí unga na irisa.’ (Snz. 21:21) Ka ani agbata ga Mbori rurupai mbata, si nika sa gupai nga ani duna wene pagume naako, si ki sa gupai nga ani gbia bata.—Rom. 3:23, 24.

Si Aidanga Ani Naandu Kina Kuti Gaani Arugute Te

5. Ginipai si aida ani bandatirani ti ni?

⁵ Rogo gu waraga Pauro akehe fu aRomo, ko agumbapa kurapai si aida ani bandatirani ti ni ka ani aida ka gbata ga Mbori rurupai mbata. Ko afura tipa akurako aYuda ki yaa: ‘Mi nga dezire yó ya nyemu Mbori tiyo ono ku sangba inahe yo te. Bambiko wa i ainanga waĩ Mbori asayo niruruyo ya, i ki nigbata pa du niruruyo nitiyo, i afunga tiyo ku tii ga Mbori rurupai te.’ (Rom. 10:2, 3) Agu airisimbori re aaruganga tiyo naapa ga Mbori rurupai te bambiko i aaʹasada tiyo kadu niruruyo nitiyo angianga ringbisihe kuti ga Mbori andiko ya.

6. Gini berã si aidanga ani du nani ya, na tipagine?

⁶ Gene sa rengbe ani ka manga gi ingahe re ngbaha nga ka bi gaani sunge fu Mbori wa abaangira, kini ringbisi tirani na akuarani. Gi berã re rengbe ka sa rani ani naaberã gbe tipa kina gaani tatamana gbiati gaani wene mangaapai. Ono ka ani amangapai wa gure, gure nga bangirani ima go ti ga Yekova rurupai. (Gara. 6:3, 4) Gupai si aida si sa rani ani naamangasunge fu Yekova nga nyemuko. Ka si du nga ani naʹasada tirani ka yugo kina gaani ruru mangaapai, gure yugu gupai nga nyemuko tirani te.​—Oni gedi Ruka 16:15.

7. Wai Yesu afura tipa pa bi boro tiní nga ní du niruruni?

⁷ Yesu aabaka bangiriko abaka naapa agu aboro “naberã ha tigayo ya ruru aboro nangia yo, ki basa pa kura aboro.” Ko agumba sanza tipa pa bi boro tiní niruru boro ki yaa: “Akumba ue abiti ku yekaru yo ka kpara; gu ni nangia Farusi, gu ni nangia barogo marã ngbeti. Farusi ki ru ki nikpari tigako wa gere, ‘Mbori, mi natambua ro, bambiko mi adu nga wa kura aboro, nga abatuka, na airabiriki, na airabari, na wa kina gi barogo marã ngbeti re a te. Mi nagina riahe bara ue rogo poso sa, mi nakpara gimi ahe dunduko ki rũ gu fu Mbori.’ Ono barogo marã ngbeti ki ru tururũ, ko angera nga ku ngbangbaturũ yo a te, ono ko ata ngbaduko ki ya, ‘Mbori, mo íni pai fere nga boro ingapai!’ ” Yesu adigisi gako sanza ki yaa: “Ya mi fu roni, gi kumba re azoro ku kpuko yo ni ruru ko ti gu  kura kumba; bambiko gu ni nakiisa tini i aumbasi pa ni aumbasi; gu ni naumbasi tini i akiisa pa ni akiisa.”—Ruka 18:9-14.

“Ka Mo Dú Nga Ni Ruru Boro Susi Ya”

8, 9. Gine nga du “ni ruru boro susi,” na si rengbe ka sa boro ní mangi wai?

⁸ Gu kurapai si aida ani bandatirani ti ni du rogo Batungusipai 7:​16. Gu veresi re nayaa: ‘Ka mo dú nga ni ruru boro susi ya, ka mo sá nga tiro ni iratatamana susi a ya; tipagine ka mo agbárasa tiro ti ni?’ Soromo agumba ndu gupai ko ape gupai re ti ni ki yaa: “Ni rengo a nga ruru boro auru kpotosende no namanga wenepai, zanga manga ingaapai te.” (Batu. 7:20) Gu boro du “ni ruru boro susi,” ní namaa gani andiko nitini kaa ndu kuti ni, na kini sapungbanga kura aboro. Ono bangirini nago ti gupai nga, ní natumba gani andiko kuari ti ga Mbori. Gipai re kini sa ní niʹiraira boro bangiri Mbori.

⁹ Pa du ani “ni ruru boro susi” rengbe arengba ka sa rani a ani bisira gu kura mangaapai nga ga Yekova. Ono si naida ani tingidi gupai nga, ka ani abisira gu mangaapai nga ga Yekova watadu gako adiaberã, gure nga ani natumbasipa gaani andiko kuari ti gako. Gure wa ani sungusi Yekova ngbangayo tipa ka sarangbanga ko ringbisihe kuti gaani andiko. Ono Yekova du tie nga gu boro duna rengo beni ka rũ andiko ani naandu kuti ni, angianga ani nitirani ya!—Rom. 14:10.

10. A wa si adu tipa Eyobo, gine rengbe ka sa rani ani sapungbanga Mbori?

¹⁰ Wa vura duhe nga boro ho dagbarani rengbe ki taino aino kini sapungbanga Mbori te, gaani zangarengba rengbe arengba ka sa rani ani mangihe wo. Gipai re rengbe ka manga nikina ipo ho ka ani bi kura ga Mbori mangaapai ni nga runga ha te watadu ho ka ani duni rogo kerepai. Zavura gu ruru kumba nangia Eyobo, ko aima manga gi ingahe re. Ziazia Kekeapai naya tipa Eyobo wee ko “adu ni ziazia ko ni ruru ko a, nga gu ko nagunde ti Mbori ki nine gbigbitapai.” (Eyo. 1:1) Ono tie, agberãngbi ati kurii Eyobo gu tingbafuo kuraha, na ko ki bihe nga Mbori du naye na gbegberẽpai sako. Gipai re nasa Eyobo ko ‘yugu patiko niruru boro susi Mbori.’ (Eyo. 32:1, 2) Si aidi i rugu berã Eyobo aruga. Sidu, ngbatunga gupai re rengbe arengba kadu tipa rani a. Ka si mangi wo tipa rani, gine rengbe ka undo rani ani rugu gaani berã?

Anga Aregbo Dunduko Ini Ani Arengo Dunduko Tipa Pai Te

11, 12. (a) Ka ani bi gupai nga kurapai kinaho arunga ya, ginipai si aida ani tingidihe? (b) Tipagine rengbe kura aboro ti ni ka yawee gu bairasunge Yesu agumba pako rogo gako sanza angia gbegberẽ boro?

¹¹ Gu bambatapai si aida ani tingidihe nga, anga aregbo dunduko ini ani arengo dunduko tipa pai te. Kina gupai re nadu tipa Eyobo a. Ko aainongo pa gu dunguratise agu awiri Mbori nga amaraika amangihe ngbangbaturũ yo nga gu Satana akitingbaanga Mbori ragoho te. (Eyo. 1:7-12; 2:1-6) Eyobo aainongo gupai nga agu agberãngbi naye sako re si aye be Satana te. Na ani ainongo singia Eyobo aini gu boro nzunzu nga Satana te! Sidu, ko aberẽhe tigako nga Mbori du naye na agberãngbi kuriko. Gipai  re nayugo gupai nga, si nitaatapai ani duna iraira berã ho ani ainongo agu arengo ni dunduko du tipa pai ya.

¹² Nikpiapai, oni bingo gu sanza Yesu agumbaha tipa agu aboro nandu ka mangasunge ati bakakue yo. (Oni gedi Matayo 20:​8-​16.) Rogo gu sanza re, Yesu agumbapa kumba nafu bakio marã kina sa fu gako amangisunge, singia aguyo natona sunge wiso ki da ku nyemu watadu aguyo namangisunge tipa saa sa gbua. Oni nabi gupai re wai? Ya mo rurupai du ko amangihe re? Isoke rungo agu aboro namanga roni amanga namangisunge uru pitipiti rogo gbaigbai uru, oni kini bihe nga si aidi i fu marã fuyó nibakerehe ti ga aguyo. Ka si du nga wo oni abihe, gure nga oni nabi gu bairasunge re nigbegberẽ boro. Zavura nibi gu gene ko akaragapai ngbaha fu agu abamangisunge nakpakanahe, oni rengbe ka bihe nga ko angia gu kere boro abingo rungo aboro ya. Ono ya mo ani ini agu apai dunduko nasako ko mangipai wa gure?

13. Gini kurapai si aida ani berẽkuriihe nibipa agu akumba namangisunge ati bakakue yo?

¹³ Ani wisigingo gi sanza re. Zanga kapa, gu bairasunge re aima ino gupai nga, agu akumba re dunduko si aidi i rigi gayó aborokporo ariga. Ti agu aregbo nangiaha re, agu aboro naamangasunge atiyo, i animangisunge i ki tumoyo nikina gu uru re. Gayo aborokporo anaarihe mbiko kina gu marã i agbiaha nigu uru re. Awere tie, oni berẽnga pa agu aboro-sunge bairasunge abiyo nyemu i ki mangisunge tipa saa sa gbua. Ka si adu nga ko afu marã fuyó ringbisihe na kina gu saa sa i amangisunge rogoho, ka gayó aborokporo aringa he te; ono tie, i aima ida ka tona sunge kina wiso ono ka i adianga yó tipa sunge niipo ya. (Mt. 20:1-7) Anga i du nasa gupai nga ka i mangingo sunge tona wiso ku nyemu ya te. Na pai ho nayugo gupai nga i du nitiyo naaidanga ka mangasunge ya te. Oni moingo tironi ku bayo, nga oni sungu tipa i di roni tipa sunge tona wiso ki da ku nyemu, na gaoni aborokporo nangera kina ku beroni tipa riahe. Nairiwo gu ngbarago ka oni du nani ho ka i di roni ni tipa sunge, na nairiwo gu tambuahe ko oni fuhe fu bairasunge ka ko fu gu marã furoni rengbe arengba ka riga roni na gaoni aborokporo!

14. Ginipai ani awirikaha ti gu sanza du tipa agu aboro namangisunge ati bakakue yo?

¹⁴ Awere tie, ani wisigingo gupai berewe bairasunge amangihe. Boro ho ko afu marã funi kusende ka si arengbanga na gani sunge ya te. Ko aima ino nga agu abamangisunge re dunduko naida marã aida tipa yó na gayó aborokporo. Wa si avura du nga dungu aboro naaida sunge, ko aagbatanga kina aguyo narengbe ka mangasunge fuko tipa tooni marã te. Agu aboro-sunge re dunduko naga ku kpuyo yo na bakere dugure beyo fu gayó aborokporo. Pa berã ani kurii gipai re rengbe ka aria gaani bipai tipa gu mangaapai nga ga gu bairasunge re. Gako mangapai angia gu mangapai nga ga nyemuse,  angianga gbegberẽ sino ya. Ginipai ani awirikaha ti gipai re? Gupai ani awirikaha nga, ka ani wisigipai gbua tooni tipa pai, si rengbe ka sa rani ani dakuti gupai arunga ya. Na gi sanza re nayugopa ga Mbori rurupai, nga gu si aidanga boro rẽarẽ mbata tipaha ya.

Gaani Bipai Rengbe Kadu Niirairaha

15. Tipagine rengbe gaani bipai ti ni kadu niirairaha watadu nitoonihe?

¹⁵ Gu kurapai si aida ani tingidihe ho du ani ni rogo gupai ani abihe nga runga ha te nga, gaani bipai rengbe arengba kadu niirairaha watadu nitoonihe. Si rengbe kadu niirairaha mbiko zangarengba, mbiko sogote, watadu mbiko ngbatungarani. Na ani arengbanga ka ino gupai a nasa aboro i mangipai ngba kura agene te, na ani arengbanga ka ino gupai du kpoto aboro yo a te. Ono tipa aYekova na Yesu, pai ho naka naayó ti ino apai dunduko te.—Snz. 24:12; Mt. 9:4; Ruka 5:22.

16, 17. Tipagine Yekova aasapanga ngbanga aDavide ti ni na Bataseba sa kpio ya?

¹⁶ Ani wisigingo gu pangbanga du tipa gu bäri Davide amangihe na Bataseba. (2 Sam. 11:2-5) Ringbisihe kuti agu aNdiko Yekova afuhe kube Moize, i dunduko ue narẽ tipa kina kpio. (Pa Mot. 20:10; Pa Rug. 22:22) Ono wa Yekova avura fu mbusa fuyó, ko aaimongo yó te. Ya mo ruru sarangbanga du nangia gure? Ya mo Yekova angbe angbe na Davide ki kuo gako ndiko nisako? Wo kura agedi Ziazia Kekeapai abihe.

¹⁷ Ono si naida ani ini gupai nga, Yekova afu gu ndiko nadu tipa bäri re kube agu abasapungbanga nangia kpakpa aboro, naarengbanga ka ino gupai du kpoto aboro yo ya. Gi ndiko re asayo i naasarangbanga kina sa. Ono tipa Yekova tigako, ko naino gupai aino du kpoto boro yo. (Bam. P. 18:25; 1 Peka 29:17) Sidu, ani arengbanga ka yawee Yekova duwa ka ko ndu kuti gu ndiko ko afuhe fu abasapungbanga nga kpakpa aboro te. Ka ani aida si duwo, gure duwa ani zi gu boro duna wene bangirini ní vo gu nandara du tipa agu aboro angeranga wenengai ya. Yekova aima wisigo kpoto Davide yo na Bataseba ki bi gupai nga i aima saberã yó nzunzu. Gipai re nasako ko mangipai naayó ninyemuse.

Oni Naagbata ga Yekova Rurupai Kindi

18, 19. Gine rengbe ka undo rani ka ani sapungo ngbanga Yekova ringbisihe kuti gaani andiko ya?

¹⁸ Ka pai duho nga gu ani abihe nga Yekova arunga rogoho te, singia ani gedihe rogo Ziazia Kekeapai watadu si mangi rani, ka ani sapungo ngbanga Yekova ringbisihe kuti gaani andiko ya. Ani tingidi gupai nga, anga aregbo dunduko ini ani agu arengo dunduko du tipa pai te, na gaani bipai rengbe kadu nikina irairaha. Ka bangirani gonga ti gupai ya nga, “gu zinga nga ga boro si amanga nga gu rurupai nga ga Mbori te.” (Yak. 1:19, 20) Ka ani amangaha wo, ngbaduraniyo ‘zinginga kuti Yekova te.’—Snz. 19:3.

¹⁹ Si naida ani ini gupai ti aregbo dũ nga, kina Yekova sa duna rengo beko ka rũ andiko furani ani naandu kuti ni. Gure nga gupai Yesu aidi kuti ni a. (Mk. 10:17, 18) Ani asaditirani ka gbia ndikidi “inahe” tipa ga Yekova arugute. (Rom. 10:2; 2 Tim. 3:7) Ka ani idi na ga Yekova arugute na kini raki ringbisihe kuti gupai ko akpinyemuhe, ani yugu gupai nani nga ani ‘nagbata gako rurupai mbata.’—Mt. 6:33.

[Asanahe nga ga wisigopai]

[Gu kpiahe du ti kpewaraga 17]

Ginipai ani awirikaha ti gu kpiapai Yesu afuhe tipa agu akumba ue naakpara yekaru yo?

[Gu kpiahe du ti kpewaraga 18]

Ya mo si aarunga bairasunge fu marã fu agu aboro namangisunge tipa saa sa wakina gu ko afuhe fu aguyo namangisunge uru pitipiti te?

[Gu kpiahe du ti kpewaraga 19]

Oni Natingidaha?

• Tipagine nyakipa gbata ga Yekova rurupai ti ni?

• Gini apai ue si aida ani bandatirani ti ni?

• Wai rengbe ani kaa gbata ga Mbori rurupai mbata?