Ya Mo Oni Nafu Nyakasaro Ba Agu Adunguratise Yo Nga Ga Akristano?

“Ho oni nadungura tironi ni, . . . oni mángi apai dunduko sa nyakasa tise.”—1 KOR. 14:26.

1. Ringbisihe kuti 1 AKorindo kapita 14, gini banguapai ani amanga agu adunguratise ti ni nga ga aKristano?

‘GU DUNGURATISE re nyakasi re nibakerehe!’ Ya mo oni apenga ngbatunga fugo wa gure tingbafuo dunguratise Bambu Kindo yo? Ani naberãha nga oni aima pepai wa gure! Nirengo, agu adunguratise nga ga aKristano nga mburu nyakasaro. A wa si adu ti rago agu aKristano nadumbata, gaani sásá ho ani adunguratirani ni nga ka nyakasa tirani rogo toro yo. Oni bingo wai gu mokedi nangia Pauro anyakasipa gupai re rogo gu bambata waraga ko akehe fu aKorindo. Rogo kapita 14, ko anyakasi gupai bara dunguhe nga, agu apai dunduko namanga ti regbo dunguratise duwa ka si du tipa ‘nyakasa kanisa.’—Oni gedi 1 AKorindo 14:​3, 12, 26. *

2. (a) Ginihe ninaasa dunguratise si fu nyakasaro? (b) Gini sanahe ani nika ino karagapai sani?

² Si nirengo nga, gu dunguratise nafu nyakasaro watadu nayugopai furani nga sangbana gu mangaapai nga ga ga Mbori toro. Sidu, ani naatona gaani adunguratise nga ga aKristano na gu kparakpee naye ngbaduseyo, kini sana gu Barani du ngbangbaturũ yo ko fu maku kurii gaani dunguratise vurube gako ziazia toro. Ono wa vura duhe wo, agu aboro dunduko du rogo dungurati rengbe arengba ka fu nyakasaro wa rengbe yó ka mangaha. Rogo gini agene rengbe ani nibasasa dunduko ka manga asadatise tipa agu adunguratise dunduko ninaamanga rogo aposo du nigupai nikaa fu nyakasaro na kini zambuasi aboro?

3. Wai nyakipa ga aKristano adunguratise?

³ Tipa ani gbia karagapai, ani wisigingo bete agu apai si aida agu aboro namanga apapara adunguratise moihe ku berãyo yo ho i amangaha ni. Na ani nika wisigo wai a rengbe dungurati naabaha ka sa adunguratise si du nigupai nafu nyakasaro fu agu aboro dunduko du pati ni. Gipai re na nyanyakipaha furani bambiko gaani adunguratise nga agu adunguratise nga ga irisombori. Nirengo, du pati adunguratise na kini mangi agu apai si aida i mangihe yo nga nyanyakipa papara gaani iriso fu Yekova.—Tam. 26:12; 111:1; Yes. 66:22, 23.

Dunguratise Tipa Wisigo Ziazia Kekeapai

4, 5. Ndu wisigo ani Ngbaõbambu Sinziri nga gine?

⁴ Ani naabarani naida aida ka gbia undo  be gu gaani wisigopai nga ga Ngbaõbambu Sinziri ani naamangaha na aposo dũ. Sidu, si naida ani rugutirani na gu bangua ndupai ani naawisigo Ngbaõbambu Sinziri ti ni, na ki tingidipa bete agu aʹariapai i amangihe nibipa agu apapara Ngbaõbambu Sinziri du tipa wisigoho ba dunguratise yo.

⁵Ngbaõbambu Sinziri naundo rani ani wisigi Ziazia Kekeapai wenengai. Ti regbo gu gaani wisigopai nga ga Ngbaõbambu Sinziri, i naasakarogo Fugo Mbori yo “nzunzu” “aboro ki rugu tiyo” nani a wa si adu ti rago Nemaya.—Nem. 8:8; Yes. 54:13.

6. (a) Gini ariapai i amangihe rogo Ngbaõbambu Sinziri? (b) Ginipai si aida ani inihe tipa agu averesi keyo pai pati ni nga “oni gedihe”?

⁶ Wa duhe nga Ziazia Kekeapai nga gaani bangua kitabu, i aima manga ariapai nibipa wisigo Ngbaõbambu Sinziri. Rogo agu apaparaha du tipa wisigoho ba dunguratise yo, dungu averesi keyo pai pati ni nga “oni gedihe.” I nangarasa rani naabarani dunduko ani zara gaani aZiazia Kekeapai ho i ageda agu averesi re ni ti regbo dunguratise. (Amo. 17:11) Tipagine? Si wo mbiko gupai nga, ho ani ageda ga Mbori rugute ni rogo gaani Ziazia Kekeapai, si nadu na bakere sangbanaha kurirani. (Eb. 4:12) Sidu tie, mbata fu gu boro i nasiani ní gedihe tona gedaha, si naida gu boro nanungusaha fu regbo fu aboro i gbia gu veresi re mbata fu ní tona gedaha.

Bakere Regbo Tipa Kusapa Idapase

7. Gini momu du ani nani ti regbo wisigo Ngbaõbambu Sinziri?

⁷ I aima manga ariapai a nibipa bagizo agu apapara Ngbaõbambu Sinziri du tipa wisigoho ba dunguratise yo. Tona rogo 2008 ka da ku awere, si niguruguruhe ti wai si anidumbata. Wa duhe were tie, geda agenewaraga nadia regbo nikina wiri guruhe, bakere regbo kidu tipa karagapai. Aboro dunduko ba dunguratise yo na momu beyo ka kusapa gayó idapase nifuyo akaragapai kuti agu asanahe i asanaha, nisaka yó rogo averesi yo, watadu nigumba yó guru apangbanga nga gu nayugopa wai duhe nipatatamana ka mangasunge na agu arugute nga ga Ziazia Kekeapai. Si naida i di regbo adia a ka fura tipa asura.—Oni gedi Atambuahe 22:22; 35:18; 40:9.

8, 9. Ga banungusi wisigo Ngbaõbambu Sinziri sunge nga gine?

⁸ Ono tie, ani rengbe kadu na bakere regbo berani ka fu dungu akaragapai kinagu ka si du nga aboro nafu akaragapai niguruguruhe na gu boro nanungusaha afuranga nibakerehe te. Ono gine rengbe ka undo gu boro nanungusaha ní ini wai si aida ní fura tipa ka sa dunguratise si du nigupai nafu nyakasaro?

⁹ Tipa ani gbia karagapai, ani bingo kpiapai. Gu wisigo Ngbaõbambu Sinziri du niwenehe, si wa kina gu ati mbumbudo i nimbakadihe si kidu niwene bibihe. A wa ati ambumbudo nidu na angbatunga ambumbudo rogoho ngba arikoho, wisigo Ngbaõbambu Sinziri na dungu ngbatunga akaragapai rogoho. A wa ati mbumbudo nidu na ambumbudo rogoho na arangihe watadu abasonaha nibakiakia, kinawo du agu akaragapai du ti regbo dunguratise nibakiakia na agu agene i afuhe ngbaha. Gu boro nanungusaha gani sunge nga gine? Si aidanga ome gani fugo furii ga aboro te, ono gani sunge nga ka undo aboro i fu karagapai na ka gumba gu ka kpa koyo. Ho agu akaragapai aboro afuhe na gu betehe gu boro nanungusaha afuhe akodatihe ni, si nasa dunguratise si du nigupai nanyakasa agu aboro dunduko du pati ni.

 “Ani Tumo Ni Motumo Tambuahe fu Mbori”

10. Wai agu aKristano nadumbata anaabi agu adunguratise nga ga irisombori?

¹⁰ Gupai Pauro apehe tipa ga aKristano adunguratise du rogo 1 AKorindo 14:26-​33 nayugo wai furani i anaamanga adunguratise rogo bambata sa kama agarã. Wene bawiriki Ziazia Kekeapai sa afura tipa agi averesi re ki yaa: “Gupai naanidu rogo agu aKanisa nadumbata nga, aboro dunduko nibasasa nanaandu koyo na gu berãpai nga i gu duadu na momu ka pe gupai rengbe ka fu undo, na si naida aida i mangihe wo. Boro anaayengo ka sungo asungo gbua ka gia kina pai te, ono tipa ka fura a.” Nirengo, agu aKristano nadumbata anaabi gayó adunguratise nimomu tipa ka kusapa gayó idapase.—Rom. 10:10.

11. (a) Gine nasa gupai gbe nga dunguratise fu nyakasaro, na tipagine duhe ti ni wo? (b) Wai rengbe ani ka sa gaani akaragapai si du niwenehe gbe?

¹¹ Kusapa gaani idapase ba adunguratise yo ‘nanyakasa kanisa.’ Nirengo, ka si  vura du nga ani aima digo nindu kupati adunguratise tipa dungu agarã, ani niduadu na ngbarago ho ani agia agu akaragapai ni awirinarani afuhe. Ani nidu na bakere ngbarago ho gu wirinarani nga sosono boro naafu karagapai ni, watadu bakumba, na ho wiri gude aurumo fugo ni ka kusa pa gau nyemuse fu Yekova. Si tie ziazia nga, ho ani afu karagapai ni, ani nafubee tipa ka sa adunguratise si du nigupai nafu nyakasaro.

12. (a) Ginipai rengbe ani ka wirikaha be ga aMoize na Yeremaya kpiapai? (b) Wai rengbe kparakpee ka undo rani ani fu karagapai?

¹² Agu aboro duna zee, si nikpakarapai fuyó ka fu karagapai. Kangia wo duhe tipa ro, mo ini gupai nga anga kina ro sa du gupai re tipa ro te. Zavura gu ga Mbori ruru amoyambu nangia Moize na Yeremaya, i abi tiyo nga i arengbanga ka fura dagba aboro te. (Gate 4:10; Yere. 1:6) Ono a wa Yekova aundo agu amoyambu re i fura wenengai tipa ko dagba aboro, ko nika undo roni aundo oni fu motumo tambuahe. (Oni gedi AEbere 13:15.) Wai rengbe oni ka gbia ga Yekova undo ka do gunde kusayo? Bambatapai nga oni mbakaditironi wenengai tipa dunguratise. Fuo gure, mbata fu oni ndu ku Bambu Kindo yo, oni sana Yekova tipa ko fu ngara furoni oni karagapai. (Frp. 4:6) Wa duhe nga oni nasanako “ku sangba gako nyemuhe yo,” oni duna kido nga ko nika gia gaoni kpee agia.—1 Yo. 5:14; Snz. 15:29.

Gu Dunguratise Du Tipa ‘Nyakasaro, Ngarasaro, na Fu Wasa’

13. (a) Gini undo si aida gaani adunguratise fuhe fu agu aboro du pati ni? (b) Gini sanahe si aida abaakumba sana tiyo nani?

¹³ Pauro ape gupai nga, ndu manga gu dunguratise nga ga aKristano nga ka ‘nyakasa, ka ngarasa, na ka fu wasa’ fu agu aboro du pati dunguratise. (1 Kor. 14:3) Wai rengbe agu abaakumba du areme ka sa agu agumbapai i amangaha ba dunguratise yo si zambuasi awirinayo na ki fu wasa fuyó? Tipa ka gbia karagapai sa gu sanahe re, ani wisigingo pai tipa gu dunguratise Yesu amangihe ngbutuko tingbafuo zingako bekpio.

14. (a) Ginipai namangi mbata fu gu dunguratise Yesu ayambu gako amokedi tipaha? (b) Tipagine ya ani ti ni wee amokedi aima uka omeyo ho ‘Yesu anduni fuoyo ki gumbapai fuyó’?

¹⁴ Nibambatapai, ani bingo gupai namangi mbata fu gu dunguratise re. Mbata fu i imi Yesu, amokedi ‘aguari aguari pati ko dũ,’ ki ‘gbándaka agbandaka yasika dunduko ku kpuyo yo’ a wa Yesu aima gumbaha. (Mk. 14:50; Yo. 16:32) Tingbafuo zinga Yesu bekpio, ko ayambu gako amokedi tipa gu dunguratise nadu kia. * Fuo gure, “agu abawiriki nadu bawe na sa i ki ndu ku Gariraya yo, ku pati gu bagangara Yesu agumba pa ha fu yo.” Ho i adani, ‘Yesu andu fuoyo ki gumbapai fuyó.’ (Mt. 28:10, 16, 18) Oni berẽnga pa wai agu  amokedi re auka omeyo ho Yesu amangi gupai re ni! Ginipai Yesu afura tipaha?

15. (a) Ginipai Yesu afura tipaha, na ginipai ko aafuranga tipaha ya? (b) Ginipai gu dunguratise re amangi amokedi nani?

¹⁵ Yesu atona gako fugo niyaa: “I asia pa ahe fere dunduko.” Fuoho, ko afu sunge fuyó ki yaa: “Oni ndú tie, ki sa arikaaboro dunduko ni abawiriki.” Niyangaraha, ko angarasiyo ki yaa: “Mi na oni ti arago dũ.” (Mt. 28:18-20) Ono ya mo oni ini gupai Yesu aamanganga ha ya? Ko aabiranga gako amokedi watadu ka sayo i berẽ gupai nga i nga aboro ingapai mbiko wa i ambuko ki oro te. Kuba gure, Yesu ayugupa gako nyemuse na ga Bako fuyó nifuko nyanyakipa sunge fuyó. Ga Yesu mangapai aduna gini sangbanaha kurii gako amokedi? Si afu nyakasaro, na ngarasaro, gbiati wasa fuyó, i dunduko kini ‘yugupai na kini tungusipai’ tingbafuo gu dunguratise re.—Amo. 5:42.

16. Wai abaakumba awirika ga Yesu kpiapai areme nimangayo gu dunguratise nazambuasi aboro?

¹⁶ Niwirika ga Yesu kpiapai, abaakumba areme nabi dunguratise nimomu ka yugopa ga Yekova nyemuse fu gako aboro. (Rom. 8:38, 39) Sidu, ti regbo dunguratise, abaakumba nafura tipa gu ome awirinayo amangaha angianga gayó arungbura ya. Gayó afugo nayugo gupai nga i nabi akurayó aidipase ni agu aboro nakpinyemu Yekova na kini asadi ka manga gupai ko kpinyemuhe. (1 Tesa. 4:1, 9-12) Ti kura aregbo, abaakumba rengbe arengba ka fu arugute fu dungurati naabaha, ono ka si du nga bete aboro du gbua si aida i undoyo, si ngbaangba i fu gu rugute re fu kina agu aboro re angianga dagba aboro ya. (Gara. 6:1; 2 Tim. 2:24-26) Ho abaakumba afura ni fu dungurati naabaha, si naida aida i tambua dungurati ho daha ada ni. (Yes. 32:2) I namanga ome ka fura ngba gu gene nika zambuasi aboro na ki ngarasiyo fuo nyasa dunguratise.—Mt. 11:28; Amo. 15:32.

Gaani Adunguratise Nga Mburu Nyakasaro

17. (a) Ginipai du gaani adunguratise ti ni awere nimburu nyakasaro susi gu nadumbata? (b) Ginipai rengbe ani ka mangaha wa du ani nibasasa tipa ka sa adunguratise si du nimburu nyakasaro? (Oni bi gu sanduki nga: “Agene Bawe Ka Sa Adunguratise Si Fu nyakasaro Furoni na Fu Kura Aboro.”)

¹⁷ Wa ga Satana zegino agberã kina kumbatayo, si naida ani ini gupai nga gaani adunguratise nga mburu nyakasaro fu aboro dũ. (1 Tesa. 5:11) Wirina sa na kumbaari nagbiatiyo na dungu aʹasada nayaa: “Ho ani anidu ni Bambu Kindo yo, si anidu wa Yekova tindi rani kina ngbabeko. Agu aregbo dunduko ani anaadiaha koyo na agu awirinarani nga akumba na adee, ani anaambu gaani apai dunduko kube Yekova, na ani agbia zereda kpotoraniyo.” (Tam. 55:22) Kina gu bangisapai re dunga adu a tipa agu aboro naye kupati gaani adunguratise. Tipa gaani adunguratise du nimburu nyakasaro, ani nibasasa si aida ani mangi ome.

[Gu rukutu kekeapai du bandu kpewaraga yo]

Gaoni Karagapai Nga Gine?

• Wai nyakipa agu adunguratise nga ga aKristano?

• Wai agu akaragapai i afuhe ti regbo adunguratise afu ‘nyakasaro’?

• Ginipai rengbe ani ka wirikaha ti gu dunguratise Yesu amangihe na gako amokedi?

[Asanahe nga ga wisigopai]

[Gu Sanduki du ti kpewaraga 26]

AGENE BAWE KA SA ADUNGURATISE SI FU NYAKASARO FURONI NA FU KURA ABORO

Oni ima mbakadatironi mbu regbo koyo kindi. Ho oni awisigo gu waraga ni oni andu ka wirikapai rogoho Bambu Kindo yo, si nasa gupai nga oni girogo gupai yo wenengai oni andu ka wirikaha na si ki nye kurironi yo na ngbaduroniyo.

Oni du pati adunguratise ti aregbo dũ. Wa duhe nga pa nge aboro pati dunguratise nafu nyakasaro afu, padu oni pati dunguratise nga nyanyakipa pai.

Oni da mbata fu regbo. Ho oni adani mbata fu regbo, i nabi bambata bia na ki mangi bambata kparakpee mbu roni kinaho. Agi apai re nga apapara gaani iriso fu Yekova.

Oni ye na gaoni ahe dunduko. Oni ye na gaoni Ziazia Kekeapai na gu waraga oni ka wirikapai rogoho na ki mangisunge nani ti regbo wirikaha.

Oni mbu agu apai ka gbe berãroni. Nikpiapai, oni mbu nonofa terefuni ti regbo dunguratise. Ka boro kedi kekepai furoni kurogo gaoni terefuni, si angbaangba oni gedihe fuo nyasa dunguratise. Ka oni mangihe wo, gure nga oni namanga apai dunduko ti aregboho.

Oni fu akaragapai. Ho dungu aboro afu karagapai ni, si nangarasa dungu aboro na ki nyakasi gayó idapase.

Oni fu karagapai niguruhe. Si nika fu momu fu dungu aboro i fu karagapai.

Oni mangi gu sunge fuuyó ho furoni. Ka si du nga i fu sunge furoni rogo Gu Sukuru Nga ga Siokrasia watadu rogo Gu Dunguratise Nga ga Sunge, si naida oni mbakadihe mbu regbo koyo kindi, ki wiriki mangaha, na ki asaditironi ka zanga kpa ti mangaha.

Oni tambua aboro. Oni yugu gaoni tambuahe fu agu aboro mangi apapara dunguratise watadu aguyo fu karagapai.

Oni fura na aboro. Fu sene besemene, na gu fugo nafu nyakasaro mbata fu dunguratise na tingbafuoho nga agu apai nakiiso gu ngbarago na agu aundo aboro agbiaha pati dunguratise.