Ya mo Mbori Naida Ani Kusi Gaani Aingapai?

Kusa ingapai fu bavugahe watadu fu kura barumbatayo nga ga kanisa ko nga gupai ninaamanga rogo dungu akanisa. Ono ya mo rogo gi zegino duna gbegberẽ apai dunduko rogoho re, ndupai kinaho si aida boro kusi gani aingapai ti ni?

DUNGU aberãpai duho tipa gipai re. Nikpiapai, gu ba peka apangbanga du Kanada yo apepa kura boro nape gupai nga, wa vura duhe nimbumbupai boro pe gupai mangi ní he nigbegberẽhe fu kura boro, “boro nagbia ngbarago agbia ho ní ape gupai ni mangi ní he fu boro i ki kparikpee na ní na ní ki pe gupai si aida ní mangihe.” Ono buku sa ape gupai kura kumba sa apehe ki yaa: “Pa kusa ingapai nga pai sa dagba agu apai nga ga Kanisa gberẽ gbe. Si nasa aboro i naaberã aberã gbe kurii gupai i amangihe.” (Bless Me, Father, for I Have Sinned) Ginipai Ziazia Kekeapai apehe tipa gipai re?

Gupai Ziazia Kekeapai Apehe

Rogo agu aNdiko Mbori afuhe fu awiri aYisaraere, ani nabi agu apai si aidi boro ndu kutini ho ní namangi ingapai ni. Nikpiapai, ho boro aniʹingipai ni kuti wirinani watadu ka kuo ga Mbori ndiko sa, si anidu nga ní kusi gani ingapai fu gu boro i amoi ní niboromotumo dagba awiri Revi yo; gu boromotumo re ki fu motumo fu Mbori tipa ka dada gu ingapai re Mbori ki vu ní.—Pa Amotumo 5:1-6.

Fuo badungu agarã kusa, ho gu nebi nangia Natana afu rugute ni fu Bakindo Davide tipa gako aingapai, ga Davide karagapai angia gine? Ko aidihe nibasa ki yaa: “Mi ingi pai kuti Yekova.” (2 Samuere 12:13) Ko ki kpari a nizungodi Mbori ko mbupai fuko. Sangbanaha angia gine? Davide nitiko akepai kusa ki yaa: “Mi aidi pa gi ingapai foro, mi aoka nga gi irairapai te; mi aya, ‘Mi akusa pa gi samungu fu Yekova’; mo ki vu gu irairapai nga ga gi ingapai.”—Atambuahe 32:5; 51:1-4.

Zavura rogo bambata sa kama agarã Fuo Batikayo Kristo, kusa ingapai adu kindi nigupai Mbori akpinyemuhe be aKristano. Yakoba nangia wirina Yesu na kingia bakumba sa dagba agu abaakumba nadu rogo gu dungurati nadu Yerusarema yo angarasi akurako aKristano ki yaa: “Gu ni kúsi gani ingaapai fu gu ni, gu ni fu gu ni, oni kpári tipa akuaroni, ya i husi roni.” (Yakoba 5:16) Ono gini ngbatunga aingapai du si aida aKristano naakusaha, na da si aida i naakusaha funi?

Gini Ingapai Si Aida Ani Kusihe?

Gaani zangarengba nasa rani na aʹuru dunduko ani mangi agu apai ani asonga gimaha aso ya watadu ani ingipai kuti akuarani rogo fugo yo. (ARomo 3:23) Ya mo gere nayugo gupai nga si naida ani kusi gu wiri tiandika dunduko ani amangaha fu agu aboro duna pagbia?

Wa vura duhe nga agu aingapai dunduko ani amangaha naba gberarago aba ti Mbori,  ko nainapai aina furani mbiko ko ima inopa gu zangarengba ani adihe ti atitarani. Bake apapara Atambuahe ake gupai nga: “Ako Yekova, ka si nidu wa mo nakparia pa irairaapai, Ako Gbia, da rengbe na ru? Ono pa vuboro ti ingapai du be ro, ya i nigunde ti ro.” (Atambuahe 130:3, 4) Wa duhe tie wo, ginipai si aida ani mangihe ka si du nga ani ingipai kuti akuarani angianga niwia ya? Si naida ani tingidi gupai nga, gu kpia kparakpee Yesu ayuguhe fu apefuoko si na gupai rogoho nga: “Mo vú rani ti gaani ingaapai; bambiko ani a tigaani navu agu yo ninainga pai furani.” (Ruka 11:4) Nirengo, Mbori nambupai ambu furani ka ani sanahe nirimo Yesu.—Yoane 14:​13, 14.

Yesu ape gupai a nga si naida ani ‘navu aguyo avu naingapai kuti rani.’ Gu mokedi nangia Pauro atingidi akurako aidipase na gupai nga: “Ringironi ngbá angba fu akuaroni, yee kpotoroni yo, oni nivú akuaroni avu, a wa Mbori avu roni rogo Kristo yo a.” (AEfeso 4:32) Ho ani ambupai ni fu akuarani, ani na wene ndupai berani ka ida Mbori mbupai furani.

Na gu kere aingapai duwa dĩ, kita ino aino nipe ziree, wasiwasi kodaba, kpibuda, na agu akuraha? Gu boro namanga ngbatunga agu aingapai re, ní nakuo ga Mbori andiko na kini ingipai kuti Mbori. Ya mo si naida boro kusi ngbatunga agu aingapai re?

Da Si Aida I Kusi Ingapai Funi?

Kina Mbori sa rengbe ka vu boro ti gu ingapai ní namangihe kutiko. Ziazia Kekeapai naya furani ziazia wee: “Ka ani kusi gaani ingaapai, ko nga irarengo, du na rurupai, ko vu rani avu ti gaani ingaapai, ki girisi rani agirisa be irairaapai dũ.” (1 Yoane 1:9) Da tie si aida ani kusi gu ingapai re funi?

Wa duhe nga kina Mbori sa rengbe ka mbupai fu boro ti ingapai, kinako a sa si aida ani kusi gaani ingapai fuko. Gure nga gupai Davide amangihe a wa ani nibihe. Riimburu ginipai rengbe Mbori ka vu boro ti ingapai? Ziazia Kekeapai nayaa: “Oni zúngadi tironi bambiko gere ki sa tironi berewe, i gbandaka gaoni ingaapai, zereda ye yo du Gbia ni.” (Amokedi 3:19) Nirengo, i avungo boro ti gani ingapai mbiko kina gupai gbua nga ní inipa gani ingapai na ki kusihe te, ono mbiko ka ní sa gani berã ki mbu gu gbegberẽpai re. Si nitaatapai boro mbu gu gbegberẽpai ní amangaha te. Ono pai kinaho rengbe ka undo.

Oni berẽnga kurii gu fugo Yakoba ani nifura tipaha mbata: “Gu ni kúsi gani ingaapai fu gu ni, gu ni fu gu ni, oni kpári tipa akuaroni, ya i husi roni.” Ko ape kurapai berewe nga: “Gu nyanyaki kpe nga ga ruru boro du na bakere tandu.” (Yakoba 5:16) Gu ‘ruru boro’ re rengbe kadu nga boro sa dagba “ga kanisa abaakumba,” nga aguyo Yakoba ape payo rogo veresi 14. Gu dungurati nga ga aKristano na “abaakumba” rogoho nga aguyo du tipa ka undo agu aboro naida ka gbia ga Mbori mbupai. Agu “abaakumba” re arengbanga ka sarangbanga boro te, bambiko boro ho fuuyó gu sunge funi nga ga mbupai fu boro ti gu ingapai ní namangihe kuti Mbori te. * Ono tie, gayó sunge nga ka fu rugute, na ka undo boro ní inipa gu gbegberẽpai ní namangihe wenengai, na ní saberã ní.—AGaratio 6:1

 Tipagine Si Aida Boro Kusi Gani Ingapai ti Ni?

Singia boro mangi kere ingapai watadu si nikerehe gbe te, gu boro mangihe ima gberesa gani pagume na akurani gbiati Mbori. Nisangbana gipai re, ní rengbe kadu nifudifudi ní. Gure nga sangbakpotoniyo namangasunge, nga guhe Bakusirani amoihe ku rogoraniyo. (ARomo 2:14, 15) Ginipai tie rengbe ní ka mangaha?

Ani karaganga tirani berewe kurogo gu kitabu Yakoba akehe. Yakoba agumba afugo wasa ki yaa: “Gu ni du dagba roni yo na kaza [rogo toro yo]? Ni yámbu ga kanisa abaakumba i ki kpari auru ni, niuka nzeme ku auru ni ni rimo Gbia. Gu kpe nga ga idapase abátasa gu ni nakaza, Gbia atúmba ni ku ari; si ngia ni amangi ingaapai, i avù ni avu ti ni.”—Yakoba 5:14, 15.

Herẽ berewe, ga abaakumba sunge nga ka undo rimbasa akandoro. Wai du rengbeyó ka manga gipai re? Anga gayó sunge nga ka sungo gbua aboro nikusi ingapai i nigi kina gigihe te. Ono wa duhe nga ingapai nasa boro niwoki rogo toro yo, pai kinaho si aidaha tipa ka ‘batasa guni nakaza.’ Yakoba ape apai ue rengbe yó ka mangaha.

Bambatapai nga, ‘uka nzeme ku auru ní.’ Gure narukuba gu ome du Fugo Mbori nani ka husa boro. Gu mokedi nangia Pauro ayaa: “Gu pai nga ga Mbori du na unga, ki du na tandu . . . si ki ipi ka ina agu aberã nga ga ngbaduse na gaha nyemuhe,” ki rimi kina boro ku berã yo na ku ngbadu boro yo. (AEbere 4:12) Ho abaakumba amangasunge ni na Ziazia Kekeapai ngba ruru gene, i rengbe ka undo gu boro nakaza rogo toro yo ní ini gupai sani ní mangi ingapai na ki undo ní ní mbakadipai dagbani na Mbori.

Uepai nga, “gu kpe nga ga idapase.” Wa vura duhe nga gu kpee nga ga abaakumba arengbanga ka sa ga Mbori ruru sarangbanga te, gu kparakpee re na nyanyakipaha fu Mbori, nga guko rengbe na vu boro ti gani ingapai mbiko ga Kristo motumo tumorii. (1 Yoane 2:2) Mbori ti aregbo dunduko na nyemu ka undo gu boro ingapai naʹasada ka saberã ní, na ní “ki nimangi agu apai rengbe na saberã.”—Amokedi 26:20.

Gu banyanyaki ndupai si aida ani kusi gaani ingapai ti ni nga gu mangi ani he kuti akuarani watadu kuti Mbori, si nga, kadu gigirii bangiri Mbori. Yesu Kristo ape gupai nga si naida ani mbakadipai dagbarani na akuarani mbata na ki mangi zereda naayó ani kini ka irisombori na wene sangbakpotoseyo. (Matayo 5:23, 24) Asanza 28:13 nayaa: “Gu boro naoka gani tiandika ni aú nga te, ono gu ni nakusa ha ki nimbu he, ni abí inapai.” Ho ani aumbasipa tirani ni fu Yekova na ki sanako tipa ko vu rani, ani nangba bangiriko ko ki inipai furani na ki tumba rani kuari.—1 Petero 5:6.

[Gu rukutu kekeapai du bandu kpewaraga yo]

[Gu kpiahe du ti kpewaraga 30]

Mbori rengbe ka vu rani ti gaani aingapai ka ani sanako tipa mbupai nirimo Yesu

[Gu kpiahe du ti kpewaraga 31]

Gu banyanyaki ndupai si aida ani kusi gaani ingapai ti ni nga kadu gigirii bangiri Mbori