Agu Aborokporo Nga Akristano​—‘Ka Oni Ranga Ya’

“Ka ani raki nga wa agu yo ya, ono ani nikparia rago ki nirugu tirani.”​—1 TESA. 5:6.

1, 2. Tipa aborokporo dibe Satana kini ngere angera kindi rogo toro yo, ginipai si aida i mangihe?

GU MOKEDI nangia Pauro akepai fu agu aKristano nadu Tesaronike yo nibipa gu “bakere iiriwo rago nga ga Yekova” ki yaa: “Awirina, oni adu nga bitimo yo, gu rago ka dusia roni wa iradĩ te re. Bambiko oni nga awiri imarago dunduko, nga awiri haha rago. Ani nga ga yuru yo te, nga ga bitimo yo te.” Ko agbia gupai kuti fugoko nga: “Si du tie ka ani raki nga wa agu yo ya, ono ani nikparia rago ki nirugu tirani.”​—Yoe. 2:31; 1 Tesa. 5:4-6.

² Gu rugute Pauro afuhe fu aTesaroniko re daada tipa agu aKristano naraka awere ti ‘digida rago.’ (Dan. 12:4) Wa digida rago ambeda wa pai, Satana naʹasada tiko gbe ka gbe dungu ndikidi airisimbori kusayo ti Mbori a wa rengbe omeko nani. Si du si aida gupai ti ni nga, ani di ga Pauro rugute kugume kini ngere angera kindi. Ka agu aborokporo nga aKristano aida ka diabe Satana kini ngere angera kindi, i dunduko nibasasa si aida i naamanga agu asunge Ziazia Kekeapai aya i nimangihe. Gini asunge tie si aida akumbakuadee, na dereakumba, gbiati agude nimangihe tipa ka sa gayó kporo ka si ‘ranga’ rogo toro yo ya?

Akumbakuadee​—Oni Wiriki “Wene Babanda Akandoro”

3. Ringbisihe kuti 1 Timoteo 5:8, gini sunge du kurii kumba wangia ko bariikporo?

³ Ziazia Kekeapai nayawee ‘rii dee nga kumba.’ (1 Kor. 11:3) Wa duhe nga kumba nangerakurii kporo, gini asunge duho si aida ko nimangihe? Ziazia Kekeapai nafura tipa sunge sa nga ga kumba niyaa: “Gu ni ka aberã nga pa agumeni, na gani aboro kporo a ya, ni basa pa idapase, ki gberẽ susi gu ni aida nga pai ya.” (1 Tim. 5:8) Nirengo, si naida kumba ningere angera fuo gako aborokporo rogo borose yo. Ono ka ko aida ka undo gako aborokporo i ningere angera rogo toro yo, ko nimoingo berãko sa tipa kina gbia agu ahe nga ga borose tipa yó te. Si naida ko nyakasi gako kporo wenengai rogo toro yo, kini undo gako aborokporo dunduko i nyakasi gayó pagume na Mbori. (Snz. 24:3, 4) Wai rengbe ko ka manga gipai re?

4. Ginipai rengbe ka fu diabese fu gu kumba naida ka nyakasa gako aborokporo rogo toro yo?

⁴ Wa duhe nga ‘kumbakudee nga riri, a wa du Kristo nirii kanisa,’ si naida kumbakudee wisigi gu gene Yesu amangapai ngbaha na dungurati na kini wirikihe. (Ef. 5:23) Oni bingo wai Yesu agumbapa gu pagume du dagbako na apefuoko. (Oni gedi Yoane 10:14, 15.) Ginipai rengbe ka ye na diabese fu gu kumba naida ka nyakasa gako aboro kporo rogo toro yo? Si nga: Wisigo agu apai Yesu agumbaha na gu ko amangihe wa ko angia “wene babanda akandoro,” na kini “peke fuo ko” kpitikpiti.​—1 Pet. 2:21.

5. Wai Wene Babanda Akandoro naini dungurati?

⁵ Gupai nasa gupai nga wene pagume du dagba babanda akandoro na akandoro nga, inohe gbiati kido. Babanda akandoro ima ino agu apai dunduko du tipa gani akandoro,  na akandoro ima ino babandara na ami nakido akido kutiko. Ami ima ino fugoko na ami namangapai kina kuti gupai ko apehe. Yesu ayaa: “Mi ini gimi [akandoro], ami ki ini re a.” Anga ko ini agu apai du rogo dungurati gbua ngbarangbara te. Gu fugo Giriki i asaha nga ‘ino,’ si nayugopa ino he sirisiri wenengai. Sidu, Wene Babanda Akandoro ima ino gako akandoro dunduko nibasasa wenengai. Ko ima ino agu apai dũ ami aidaha wa du ami nibasasa, na ki ini pa gaami arungbura naapa omera. Pai ho du tipa gako kandoro ko ainongo paha ya te. Na agu akandoro re ima ino babandara wenengai na kini kido kutiko.

6. Wai rengbe akumbakuadee ka wirika Wene Babanda Akandoro nga Yesu?

⁶ Tipa kumbakudee niwiriki Kristo, si naida ko nibi tiko nibabanda akandoro, na kini bi agu aboro du tiibeko wa akandoro. Si naida ko asaditiko ka rugatiko wenengai na agu apai nga ga kpuko. Ya mo kumba rengbe ka rugatiko na agu apai nga ga kpuko sirisiri? Ii, ka ko afura wenengai na gako aborokporo, kini degetuko sa agu apai nafuda yó, kini ngbembatayo rogo agu apai nga ga kporo, kini berẽpa manga wene adiaberã nibi agu apai duwa gu irisombori nga ga aborokporo, nduge tipa adunguratise, tungusapai, gbiati agu apai nga ga wasa. Ho kumba awirika gupai ni Fugo Mbori agumbaha na ko kini asaditiko ka ino gako aborokporo wenengai, si nasa gupai nga gako aborokporo nikido kutiko na ko nadu na ngbarago ka biyo i nanye nikodikodiyo rogo ndikidi irisombori yo.

7, 8. Wai rengbe akumbakuadee ka wirika Wene Babanda Akandoro rogo yugo nyemuse yo fu agu aboro du kutii beyo?

⁷ Wene babanda akandoro na nyemu gani akandoro tiní. Ho ani awisigo agu apai ni du rogo Akitabu Wene Pangbanga nafura tipa ga Yesu raka na sunge, ngbaduraniyo nahi na tambuahe tipa gu nyemuse Yesu ayuguhe fu gako abawiriki. Ko afu ‘ungako a tipa gako akandoro.’ Si naida akumbakuadee niwiriki Yesu niyugoyo nyemuse tipa agu aboro du tiibeyo. Si aidanga kumba nimangipai na diako niome te, ono si naida ko nimangipai na ri ninyemuse “a wa Kristo akpi nyemu kanisa.” (Ef. 5:25) Si nika sa gupai nga Mbori idi naako. Si naida ko nimangi ri niweneringise na kini bipa omeri, bambiko ri rẽarẽ ko fu irisa furi.​—1 Pet. 3:7.

⁸ Ho kumba aruga awiriko ni, si naida ko ndu wenengai kuti agu abangua rugute nga ga Ziazia Kekeapai. Ono si aidanga ko he manga awiriko ninyemuse te. Si naida boro nifu rugute ninyemuse. Kura agude kinaho agianga pai niipo ya. Ka si duwo, si naida bara nihipai ahi fura. Ho akumba andu ni kuti gu kpiapai nga ga Yesu ti aregbo dũ, kpuyo nada niwene ba fu gayó aborokporo. Gayó aboro nadu nibandabandayó rogo toro yo, nga gu ngbatunga bandahe bake Atambuahe abibia tipaha.​—Oni gedi Atambuahe 23:1-6.

9. Wakina Noa, gini sunge du kurii agu akumbakuadee nga aKristano, na gine rengbe ka undoyo i mangihe wenengai?

⁹ Gu kumba nangia Noa araki ti gu yangara arame nangia ga gu regbo re. Ono Yekova ‘abatasi ko na kura aboro saba, ni gu rago i aye na bangirimo ku auru gu zegino nangia ga azangasinombori.’ (2 Pet. 2:5) Noa aduna gu sunge kuriko nga ga undo gako aborokporo i abati. Kina gu bangisa sunge re du kurii abariikporo areme a. (Mt. 24:37) Si ninyanyakipa pai fuyó i wiriki gu kpiapai nga ga “wene babanda akandoro” na kini asaditiyo nyanyakii ka pekafuoho!

Dereakumba​—Oni Nyakasi Gaoni Kporo

10. Pa ra dee fu kumba nayugo ginipai?

¹⁰ Gu mokedi nangia Pauro akepai ki yaa: “Dere akumba, oni nirá ara fu akumbaroni, wa fu Gbia.” (Ef. 5:22) Gu fugo re ayugongo gupai nga iringo pa dee te te. Mbata fu Mbori kusi bambata dee nangia Eva, ko ayaa: “Ngba nga ha kumba sungu ni sa ko te; mi ambákada mounda rengbe tipa ko.” (Bam. P. 2:18) Gu sunge nga ga dee, nga kadu ‘nimoundo’ fu kumbaari, iriiri sunge du.

11. Wai wene diakumba anyakasa gari kporo?

 ¹¹ Wene diakumba namangasunge wenengai ka nyakasa gari kporo. (Oni gedi Asanza 14:1.) Mumungo dee nga guri aranga fu kumbaari ya, ono tatamanatatamana dee nara fu kumbaari kini irisi gu mbakadapai nga ga Mbori re. Ri na gu sino nga ga basasangbaa gbiati ranirii du rogo zegino areme te. (Ef. 2:2) Mumungo dee nga guri nafura afura bau tipa kumbaari, ono tatamanatatamana dee nga guri naʹasada tiri ka kiiso gu irisa kumbaari agbiaha be awiriyo gbiati kura aboro a. Dee tatamana ayugongo zanga irisa tipa kumbaari nimangari totoroto naako watadu kaa papaya naako te. Nibipa aũkporo watadu marã, mumungo dee nagberesaha agberesa. Ono dee tatamana wo te. Ri namangapai na kumbaari sa nibipa agu apai nga ga marã. Ri agberesanga marã bau te, ono ri namangapai na marã nitatamana. Ri asanga kumbaari ko naamangasunge kisusi ome tipa kaa gbia bakere marã kaa ye nani furi te.

12. Ginipai rengbe dee ka mangaha tipa ka sa gari aborokporo ka i ‘ranga’ rogo toro yo ya?

¹² Wene dee naundo gari aborokporo ka i ‘ranga’ ya niundo ri kumbaari ti yugopai fu agude. (Snz. 1:8) Ri nasongoda gu mbakadapai wenengai nga ga Gu Irisombori Nga ga Aborokporo. Na kurigure, ri nasongoda kumbaari asongoda ho ko afu rugute ni fu awiriyo. Ri kia ti gu dee andunga kuti agu apai nga ga kumbaari ya, awiiri arungo rogo borose yo na rogo toro yo!

13. Tipagine duhe ti ni ninyanyakipa pai fu dee ri naasongoda kumbaari kuti agu asunge nga ga dungurati?

¹³ Wai wene dee abi gu sunge kumbaari amangaha rogo gu dungurati nga ga aKristano? Ri na bakere ngbarago tipaha! Singia kumbaari nga moundo abaakumba, bakumba, watadu ko na kura sunge beko nga gu nabipa dungurati, ri na ngbarago tipaha gbe. Ri nambupa kura apai ambu tipa ka songoda kumbaari rogo fugo yo na rogo mangaapai yo. Ri ini gupai nga pa manga kumbaari agu apai nga ga dungurati wenengai nasa gayó aborokporo i naangera angera rogo toro yo.

14. (a) Ginipai rengbe kadu nimbumbuhe fu diakumba, na wai rengbe ri ka mangapai sani? (b) Wai diakumba asa kporo si du niwene ba fu aborokporo dunduko?

¹⁴ Si rengbe arengba kadu nimbumbupai fu dee ri songodi kumbaari ho ko amanga gu diaberã ni ri aidanga nani ya. Ono ka si vura duwo, si naida ri duna “bayee toro” ki asadi ka songoda ko gako diaberã kusi wenepai. (1 Pet. 3:4) Wene diakumba naʹasada tiri ka wirika agu akpiapai nga ga gu wene adee nadumbata. Ngbatunga gu wene adee re nangia Sara, Ruta, Abigaira, gbiati na Yesu nangia Maria. (1 Pet. 3:5, 6) Ri nawirika gu sosono adee du areme a, nga aguyo adunga ‘niʹairasoapai ya.’ (Tito 2:3, 4) Ho dee akpinyemu kumbaari ni na kini irisiko, si nasa  gupai nga gayó ramukporo du wenengai na gayó aborokporo kidu wenengai dunduko. Kpuri nadu niba gbia wasa gbiati ngbabase. Gu dia Kristano naundo kumbaari, pari ima nyaka fu kumbaari gbe! Asanza 18:22 nayaa: “Gu boro di [wene] de, ni bi wenepai.”

Paranga Aboro​—‘Oni Ngere Tipa agu Ahe I Abinga Ha Ya’

15. Wai rengbe paranga aboro ka mangapai sa na avunguyo tipa ka gayó kporo ‘ranga’ rogo toro yo ya?

¹⁵ Wai rengbe aguroni nga paranga aboro ka mangapai sa na avunguroni tipa ka sa gaoni kporo ka si ‘ranga’ rogo toro yo ya? Oni berẽnga pa gu mosoro Yekova namoihe furoni kumbatayo. Isoke ho oni aduni kindi ni agude, avunguroni anaayugo agu akpia rago ayugo furoni nayugo wai raka nikadu Paradizo yo. Wa oni aasona, isoke i atona ka mangasunge na Ziazia Kekeapai gbiati agu awaraga nga ga aKristano tipa ka undo roni oni ini wai nyenye unga nikadu rogo vovo zegino. Ka oni amaa berãroni tipa mangasunge fu Yekova na ki ringbisi gaoni raka nani, si nika undo roni oni naangera angera kindi.

16, 17. Ginipai rengbe paranga aboro ka mangaha tipa ka ora gu oto nga ga unga ki gbia nyenye unga?

¹⁶ Oni di gu fugo Pauro kugume du rogo 1 AKorindo 9:24. (Oni gedihe.) Oni naaora gu oto nga ga unga tipa ka gbiaha agbia. Oni sia gu gene nika undo roni oni gbia nyenye unga agbia. Dungu aboro mere kina fuo gbata aũzegino, si ki tadu wo, i kini he maabangiriyo tipa mosoro. Nairiwo gu pamungo re! Ka boro moiberã ní tipa gbia kina aũkumuko rogo gani raka, ní gbianga ndikidi ngbarago te. Agu ahe rengbe marã ka ngbehe nago ago. Ono si naida mo naangera tipa ‘agu ahe i abinga ha ya.’ Tipagine? Bambiko “agu ahe i abi nga ha ya, si nanye anye kindi.”​—2 Kor. 4:18.

¹⁷ “Agu ahe i abi nga ha ya” nga agu amaku dunduko ga Mbori Kindo nika ye nani. Mo sogima gamo raka si du ngba gu gene nika sa ro mo gbia agu amaku re agbia. Mangasunge fu ndikidi Mbori nafu momu fu boro ní moi agu asásá rengbe ní ka da ti ni niipo na agu rengbe ní kada ti ni gizo kumbatayo. * Maa agu asásá rengbe mo arengba kada ti ni rengbe ka undo ro mo moiberãro tipa mangasunge fu Mbori kini berẽpa gbia nyenye unga.​—1 Yo, 2:17.

18, 19. Wai rengbe paranga boro ka diaberã ka sa rengo nigani?

¹⁸ Paranga aboro, gu bambatapai si aida oni mangihe wa oni andu ngbagene unga nga, ka sa rengo nigaoni. Ya mo oni mangi gupai re? Oni sananga tironi nga: ‘Ya mo mi nga gu boro naberãpa agu apai nga ga toro, watadu mi namanga agu asunge nga ga toro gbua mbiko abuba na nina? Ya mo mi sonosi agu asino tire ngba ti Mbori? Ya mo mi naʹasada tire kaa manga agu apai nga ga ndikidi irisombori wenengai, wa agu nga kparakpee dedede, wisigopai, nduge tipa adunguratise, na sunge tungusapai? Ya mo mi nambeda na Mbori nisonosa mi wene pagume naako?’​—Yak. 4:8.

¹⁹ Oni berẽnga kurii gu kpiapai nga ga Moize. Wa Moize avura sona rogo gu rago nangia ga apagano, ko asia gupai nga aboro iniko nigu boro nairiso Yekova angianga niwiri wiri Faro ya. (Oni gedi AEbere  11:24- 27.) Aguroni nga aparanga, oni diberã ka iriso Yekova wenengai. Ka oni mangihe wo, oni gbia ndikidi ngbarago agbia, na wene raka awere, na ki “nyeanye na gu unga nga ndikidi unga” kumbatayo.​—1 Tim. 6:19.

20. Rogo gu oto nga ga unga, da nika gbia mosoro?

²⁰ Rogo agu ambaro nadumbata kusayo, kina bangisa boro gbua i anaafu mosoro funi tipa gani oto. Ono anga wo duhe tipa gu oto nga ga unga te. Gupai Mbori akpinyemuhe nga “aboro bati dunduko, ki ye sa gu inahe nga ga rengo.” (1 Tim. 2:3, 4) Dungu aboro naima ora gu oto re ki digisihe wenengai, na dunguyo oni aora naayó awere. (Eb. 12:1, 2) Mosoro nikadu fu agu aboro dunduko nika ora ki da ti digidoho. Sidu, oni futironi ka ora da ti digidoho!

21. Ginipai ani ka wisigoho rogo gu kekeapai naye fuo gere?

²¹ Gu ‘bakere iiriwo rago nga ga Yekova’ duwa ka si ye. (Mara. 4:5) Si aidanga gu uru re gbia agu aborokporo nga aKristano zanga inoyo ho te. Si ninyanyakipa pai fu agu aboro du kporo dunduko i naamanga agu asunge du kuriyó. Gini kurapai berewe rengbe oni ka mangaha tipa kaa ngera angera rogo toro yo na ki nyakasi gaoni pagume na Mbori? Gu kekeapai naye fuo gere nika sakapai tipa apai biata rengbe ka undo aborokporo i du wenengai rogo toro yo.

[Gu rukutu kekeapai du bandu kpewaraga yo]

Ginipai Wiriki Oni He?

• Tipagine duhe ti ni ninyanyakipa pai fu agu aborokporo nga aKristano ka i ‘ranga’ rogo toro yo ya?

• Wai rengbe kumbakudee ka wirika Wene Babanda Akandoro?

• Gini apai rengbe wene dee kaa mangaha kaa songoda kumbaari?

• Wai rengbe paranga aboro ka mangapai tipa ka sa gayó aborokporo i ningere angera rogo toro yo?

[Asanahe nga ga wisigopai]

[Gu sura du ti kpewaraga 12]

Gu dia Kristano naundo kumbaari, pari ima nyaka fu kumbaari gbe