Agu Aborokporo Nga Akristano​—“Oni Mbakadi Tironi”

“Oni mbákadi tironi a wo; bambiko Wiri boro naye ti gu saa oni aberã nga pa ha ya.”​—RK. 12:40.

1, 2. Tipagine si aida ani irisi gu ga Yesu rugute ti ni du tipa ‘mbakada ani tirani’?

“HO WIRI boro ka ye ni rogo gako taarimo” ki kparaka ‘aboro ti akurayó,’ ginipai nikadu tipa roni na gaoni aborokporo? (Mt. 25:31, 32) Wa duhe nga gipai re nika manga ti gu saa ani ainongo nga si nika manga ti ni ya, si ninyanyakipa pai gbe ani irisi gu rugute Yesu afuhe ki yawee ani ‘mbakaditirani.’​—Rk. 12:40.

² Gu kekeapai naye mbata fu gere afura tipa wai rengbe aborokporo dunduko nibasasa ka kodabeyo tipa ka sa gupai nga ka i ranga rogo toro yo ya nimangayó agu asunge wenengai du kuriyó. Ono ani wisigingo gu kura apai rengbe ka sa gupai nga aborokporo du wenengai rogo toro yo.

Bangironi Du ‘Niruruhe’

3, 4. (a) Ginipai si aida agu aborokporo nga aKristano bandatiyó ti ni? (b) Gine nga banda bangirise si du ‘niruruhe’?

³ Tipa aborokporo mbakaditiyo tipa paye Kristo, si naida i duna rugatise i andu ka mbu agu apai nga ga ndikidi irisombori. Si naida i bandatiyó ti agu apai rengbe ka gbe berãyo kusayo. Wa duhe nga nyemu aũzegino nga  gu gbina badungu aboro azio ti ni, oni berẽnga kurii gupai Yesu apehe tipa banda bangirani si du ‘niruruhe.’ (Oni gedi Matayo 6:22, 23.) A wa imarago naasa gupai nga boro nindu wenengai yuru ka ní akotanga ka ti ya, gupai ani adiaha na ‘bangiri kpotoraniyo’ rengbe ka undo rani ka ani tinga kurogo ingapai ya.​—Ef. 1:18.

⁴ Tipa bangirise bi he wenengai, si naida si duadu wenengai zanga kaza ti ni na ki kparia guhe si abihe. Kinawo duhe a tipa gu bangirise nga ga kpotoseyo. Ka si du niruruhe, si nikaa ngera tipa bangisapai. Kuba gupai nga ani naaberã kina pa aũzegino gbe na kini bakibangirani tipa kina agu apai nga ga borose, si naida ani naabakabangirani gbe tipa agu apai nga ga toro. (Mt. 6:33) Ani rengbe be kina agu ahe Mbori afuhe furani na kini peresi pa manga gako sunge mbatayo rogo gaani raka.​—Eb. 13:5.

5. Wai degude sa ayugu gupai nga ‘bangiiri’ adu tipa mangasunge fu Yekova?

⁵ Weneapai namanga amanga ho avunguagude araba awiriyo ni bangiriyo du niruruhe. Oni bingo gu kpiapai du tipa degude du Etiopia yo. Ri aima susa wenengai rogo wirikapai sukuru yo i ki idi ka diari kurogo bakere sukuru tipa ri ndu kumbatayo na gari wirikapai. Ono wa pa mangasunge fu Yekova adu berãri yo, ri akáha aká. Ngbutuko fuo gure, i afu sunge furi nga gu ka ri aazio adorari 4,200 ti ni rogo diwi sa, nga bakere marã kisusi ti gu aboro azioho rogo gu ringara re. Ono tie, ‘bangiiri’ adu tipa sunge abazakigene. Ri aká gu sunge re aká, zanga ri sana avunguri mbata. Ya mo rago agberẽ ti avunguri ho i agi gupai ni ri amangihe re? Oó. Rago aima ngbatiyo gbe na i ki pe gupai nga ri ima ngbatiyo gbe!

6, 7. Ginipai si aida ani bandatirani ti ni?

⁶ Gu fugo Yesu du rogo Matayo 6:22, 23 nazahe aza a ti ngbaduse. Gu bangirise du ‘niirairaha,’ si nga gu duna ngbaduse. (Mt. 6:23) Wai Yekova abi ngbaduse? Ziazia Kekeapai nayaa: “Bari, na pa meteka dũ, na kpihe [ngbaduse], ka oni yámbu nga rimoho dagba roni wa sa ya.”​—Ef. 5:3.

⁷ Boro rengbe arengba ka ino gupai niipo nga kurani na ngbaduse, ono ní arengbanga ka inoho niipo kutini nitini te. Si du si aida ani irisi gu rugute ti ni Yesu afuhe ki yaa: “Oni gí he, ka oni dí nga ngbiti ahe ya.” (Rk. 12:15) Pa manga ani he wo naida gupai nga ani wisigi tirani awisigo ka bihe singia gu sino nga ga ngbaduse tirani. Agu aborokporo nga aKristano, si naida i berẽ aberã gbe kuriipa gu marã na regbo i agberesaha gene agu apai yo nga ga wasa watadu gene gbata aũzegino yo.

8. Wai rengbe ani kadu na rugatise nibipa ngbe ahe?

⁸ Ho oni aida ka ngbe he ni, ka oni berẽnga tipa kina bakio gu marã du beroni sa ya. Ono oni berẽpa kura apai aberã wa agu nga: ‘Ya mo mi aduna regbo bere ka mangasunge na gihe re dedede na kini ngerefuoho? Si nika dia re na regbo wai mi ini mangasunge nani wenengai?’ Paranga aboro, ka oni idinga kuti gu takapande vovo ahe namanga rogo zegino dũ ya, na ka oni asadingo tironi ka ngbe gu vovo ngbatunga arokoo gbiati kura ahe dunduko nakura ya. Oni zatironi aza. Na berewe a, oni berẽpa wai pa ngbe oni kura ahe narengbe ka sa gupai nga ka gaoni aborokporo mbakadingo tiyo tipa paye Wiri Boro ya. Oni duna idapase kuti gu fugo Yekova nga: “Mi ahe nga unda ro wa sa te, mi ambú nga ro a wa sa te.”​—Eb. 13:5.

Oni Asadi Kada ti agu Asásá Nga ga Toro

9. Ginipai maa agu asásá nga ga toro narengbe ka mangaha fu aborokporo?

⁹ Gu kura gene rengbe aborokporo ka nyakasa gayó idapase ngbaha na kidu wenengai rogo toro yo nga, maa agu asásá nga ga toro na kini mangi asadatise kada ti ni. Gipai re rengbe ka undo aborokporo i ini wai i amangasunge fu Yekova nzunzu na i ki diberã a tipa agu apai si aida i peresipaha mbatayo.  Ziazia Kekeapai nangarasa rani ani berẽpa agu apai ‘ngbaa’ gbe, watadu duna nyanyakipaha gbe.​—Frp. 1:10.

10, 11. Gini asásá nga ga toro oni na gaoni aborokporo namoihe, na gini asásá oni aida ka maaha kumbatayo?

¹⁰ Ka aborokporo vura maa rukutu asásá nga gu rengbe aborokporo arengba dunduko kada ti ni, si undo aundo gbe. Nikpiapai, gu sásá nga ga wisigo gu veresi nga ga uru wa sa. Gupai aborokporo agumbaha tipa gu veresi nga ga gu uru re, si rengbe ka sa bariikporo ko ini wai i nasono rogo toro yo. Ka aborokporo ageda Ziazia Kekeapai dedede sa, si rengbe ka undo agude ami ini gedapai wenengai na ki rugutiyo a na agu apangbanga du rogo Ziazia Kekeapai. (Tam. 1:1, 2) Na si ngbaangba ani moi gu sásá nga ga mbakada gaani akpee. Sonosa agu asino nga zuzu toro bakere gbe nga gu kura wene sásá a rengbe aborokporo ka maaha. (Gara. 5:22, 23) Gu kura sásá nga kaa bi agu aboro na nungayo ani agbiayo ba tungusapai yo. Ka oni koditironi akoda ka manga gipai re, si rengbe ka undo awironi ami duna nunga aboro, na ami rengbe arengba ka sonosa nyemu mangasunge ni abazakigene watadu amokedi.

¹¹ Si ngbaangba oni berẽpa agu asásá rengbe oni na gaoni aborokporo ka maaha. Ya mo oni na gaoni aborokporo rengbe ka maa gu sásá nga ga dia gbanga regbo ku ba tungusapai yo? Ya mo oni rengbe ka maa gu sásá nga ga do gunde kusayo ba tungusapai yo bangiri gene, rogo akporo, watadu babagaahe yo? Ya mo oni rengbe ka maa sásá ka tungusapai rogo gu rago duna zingo abatungusipai rogoho gbe? Ya mo boro ho dagba gaoni aborokporo rengbe ka wirika kura fugo aboro tipa kaa tungusa wene pangbanga fu agu aboro nape gu fugo re?

12. Ginipai rengbe abariikporo ka mangaha tipa gayó aborokporo sono rogo toro yo?

¹² Aguroni nga abarii kporo, oni asadi ka ino agu abangiriba si aida gaoni aborokporo sono rogo yo rogo toro yo. Fuoho, oni ki moi agu asásá rengbe ka undoyo i sono. Agu asásá oni amaaha na gaoni aborokporo, si naida si du ni agu asásá rengbe oni arengba kada ti ni. (Snz. 13:12) Si nadia regbo adia boro dati gani sásá. Sidu, oni kpara regbo ti gu oni adiaha kupati agu apai duwa bi terevizioni tipa ka manga agu apai nga ga toro rogoho. (Ef. 5:15, 16) Oni asaditironi nyanyakii tipa kada ti agu asásá oni amaaha fu gaoni kporo. (Gara. 6:9) Agu aborokporo namaa agu asásá nga ga toro na kini asaditiyo kada ti ni, i nasa gayó sonakumbatayo si du “ni yuguyugu he fu aboro dũ.”​—1 Tim. 4:15.

Oni Nimangi Gu Irisombori Nga ga Aborokporo

13. Gini ariapai i amangihe nibipa gaani adunguratise, na gini asanahe si aida ani sana tirani nani?

¹³ Wene mbakadapai i amangihe nga gu rengbe ka undo aborokporo i ‘mbakaditiyo’ tipa ye Wiri Boro nga, gu ariapai i amangihe tipa adunguratise nga gu natona rogo Ngi 1, 2009. Gupai ani anaamangaha mbata nga kaa ndu tipa dunguratise na aposo dunduko, nga gu dunguratise i anaayambaha nga Gu Wisigo Buku Nga ga Dungurati, i adihe kusayo ki gbiaha sa na gu nga Gu Sukuru Nga ga Siokrasia na Gu Dunguratise Nga ga Sunge. I amangi gi ariapai re tipa ka fu momu fu agu aborokporo nga aKristano i nyakasitiyo rogo toro yo nisiayo nyemu sa rogo poso tipa gu irisombori nga ga aborokporo. Awere tie gbanga regbo naima susa fuo mangayó gu ariapai re, ani sananga tirani nga: ‘Ya mo mi namangasunge na gu regbo duho awere tipa Gu Irisombori Nga ga Aborokporo watadu wisigopai nisase? Ya mo mi nagbia undo ti gi mbakadapai re?’

14. (a) Gini banguapai si aida ti ni ani naamanga Gu Irisombori Nga ga Aborokporo watadu wisigopai nisase na aposo dũ? (b) Tipagine nyakipa kpara nyemu sa ti ni tipa wisigopai?

¹⁴ Gu banguapai si aida ani naamanga Gu Irisombori Nga ga Aborokporo ti ni watadu wisigopai nisase nga ka mbeda na Mbori gbe.  (Yak. 4:8) Ho ani adia regbo ni dedede kaa wisigo Ziazia Kekeapai na kini ini dungu apai tipa Bakusirani, gaani pagume naako nanyaka anyaka. Ho ani ambeda ni gbe na Yekova, ani naye ka ‘kpinyemuko gbe na kpotoraniyo dunduko, na mbisimorani dũ, na gaani berã dũ, gbiati omerani dũ.’ (Mk. 12:30) Nirengo, ani na nyemu ka giasangba Mbori na kini wirikiko. (Ef. 5:1) Sidu tie, ka ani amanga Gu Irisombori Nga ga Aborokporo na aposo dũ, si undo rani aundo gbe na gaani aborokporo ‘ani mbakaditirani’ rogo toro yo wa ani asungudo “bakere gberãngbi.” (Mt. 24:21) Si rengbe ka sa rani ani bati.

15. Gu Irisombori Nga ga Aborokporo rengbe ka sa aborokporo i du wai dagbayó?

¹⁵ Gu kurapai kinaho berewe a Gu Irisombori Nga ga Aborokporo amangaha, nga, si naundo aborokporo i du nikpamiakpamiayo wenengai. Ka aborokporo adia regbo na aposo dunduko ka wisigo agu apai nga ga toro, si nasa gupai asa nga i duna wene pagume dagbayó. Na ho arogotise agbia ngbarago ni mbiko agu apai i awirikaha sa rogo Ziazia Kekeapai, i nadu nikpamiakpamiayo gbe. (Oni gedi Batungusipai 4:12.) Agu avunguagude nairisombori sa na awiriyo, i nadu nikpamiakpamiayo rogo nyemuse yo, nga “gu ũvodatise nga ga ziaziapai.”​—Koro. 3:14.

16. Oni gumbanga pa wai awirina biata agbia undo mbiko gu nyemu i akparaha tipa wisigo Ziazia Kekeapai.

¹⁶ Oni bingo wai adekurugbo biata nga aDezire Yekova nagbia undo be gu mbakadapai nga ga kpara nyemu tipa wisigo Ziazia Kekeapai. Wa vura duhe nga agume nga agi adee re te, i naraka rogo bangisa gbata na i nga wene abakure tipa badungu agarã. Wa i aduna nyemu kaa sungo dedede na ki idi kaa saka agu apai asaka nga ga toro a, i adiberã ka kpara nyemu sa kaa dunguratiyo tipa ka wisigo Ziazia Kekeapai. I atonaha na gu buku nga “Bearing Thorough Witness” About God’s Kingdom. Fugo guri nga: “Ani naagbia bakere ngbarago ti regbo gu gaani wisigo Ziazia Kekeapai re, na bagizoho naadia regbo naima susa saa sa. Ani naaberãkurii agu apai namangi agu awirina nadu rogo bambata sa kama agarã na ki gumba agu apai ka ani mangihe ka apai mangi tipa rani wa gu nadu tipa yó. Ho ani nindu ni tipa tungusapai, ani niʹasadi ka manga agu apai yo ani nawirikihe kporoyo. Gipai re sa gaani sunge tungusapa Kindo si du nigupai nafu ngbarago furani na kidu na zuzuhe ti ni susi gu nadumbata.” Gi mbakadapai re ima sayo i ini dungu apai nga ga toro, na si sayo a i du na wene ngbanya dagbayó susi gu nadumbata. Fugoyo dunduko nga: “Ani nabi gi mbakadapai re na nyanyakipaha gbe.”

17. Gini apai rengbe ka sa Gu Irisombori Nga ga Aborokporo si du niwenehe?

¹⁷ Na oni tigaoni? Ya mo oni nagbia undo ti gu nyemu oni akparaha tipa Gu Irisombori Nga ga Aborokporo watadu wisigopai nisase? Ka si du nga oni namanga gipai re gbua nibasasa angianga ti aregboho dunduko ya, oni gbianga undo ti ni gbe te. Aborokporo dunduko nibasasa si aida i ima mbakadatiyo tipa gu irisombori re ti gu regbo i aringbisihe kuti ni. Si aidanga rukutu apai gberesipa gu irisombori re te. Kurigure, oni sia gupai ka wisigoho rengbe arengba ka undo gaoni aborokporo. Ginipai rengbe oni ka mangaha tipa ka sa gu wisigopai re si du nigupai nafu ngbarago afu? Oni sia dungu agene yugopai, na oni ki mangihe rogo pazereda na irisa.​—Yak. 3:18. *

‘Ka Oni Ranga Ya,’ na ‘Oni Mbakaditironi’

18, 19. Ginipai si aida pa ino gupai nga Wiri Boro nika ye awere mangihe na oni gbiati gaoni aborokporo?

¹⁸ Agu apai nagberã kina kumbatayo du rogo gi zegino re, si nayugo gupai ziazia nga,  ga Satana zegino aima rimo kurogo gaha yangara arame tona rogo gu garã nangia 1914. Turũngo ngime Aramegido berewe te. Fuo regbo ngbutuko, Wiri Boro nika ye ka sapangbanga azangasinombori dunduko. (Tam. 37:10; Snz. 2:21, 22) Anga si naida gipai re sa roni oni mangipai na gaoni aborokporo te?

¹⁹ Ya mo oni nairisa gu ga Yesu rugute du tipa banda bangirise si du ‘niruruhe’? Baraho agu aboro du rogo gi zegino re agbata aũkumuko ni, worimo, na kiopase, ya mo gaoni aborokporo namaa agu asásá nga ga toro na kini pekefuoho? Ya mo gu mbakadapai nga ga Gu Irisombori Nga ga Aborokporo watadu wisigopai nisase, oni namangaha wenengai? Oni nagbia gu undo ti ni i amangihe tipaha? A wa ani abihe rogo gu kekeapai du mbata fu gere, ya mo oni namanga agu asunge nga gaoni, ka oni ngia kumbakudee, diakumba, watadu gude, tipa si undo roni na gaoni aborokporo oni naangera angera kindi? (1 Tesa. 5:6) Ka si duwo, gure nga oni ‘nambakadatironi’ tipa paye Wiri Boro.

[Gu rukutu kekeapai du bandu kpewaraga yo]

Ginipai Wiriki Oni He?

• Oni sakingo pa wai rengbe agu aborokporo nga aKristano ka ‘mbakadatiyo’ . . .

niduyo na “ruru” bangiriyo.

nimaayo agu asásá nga ga toro na kini asadi kada ti ni.

nimangayo Gu Irisombori Nga ga Aborokporo zanga rugusaha.

[Asanahe nga ga wisigopai]