‘Ako Gu Dungura Nga Ga Ga Mbori Tatamana!’

“Ako gu dungura nga ga gu ũkumuko nga ga Mbori tatamana na inahe! Na gasi wisiga gako andika, na gasi rugatise na gako mangaapai!”​—ROM. 11:33.

1. Gini bakere momu duho fu agu aKristano naima zio bapatiza?

GINI bakere momu duho oni agbianga ha? Ti tonatonaha, oni rengbe ka berãpa gu sunge i afuhe furoni rogo dungurati watadu gu mosoro i afuhe furoni sukuru yo watadu basunge yo. Ono tipa agu aKristano naima zio bapatiza, gu bakere momu du ani nani nga padu ani na dawedawe pagume na bangisa ndikidi Mbori nga Yekova. Gipai re sa gupai nga ‘ko ini rani.’​—1 Kor. 8:3; Gara. 4:9.

2. Tipagine duhe ti ni nibakerepa momu ani ini Yekova na ko ki ini rani?

² Tipagine duhe ti ni nibakere pa momu ani ini Yekova na ko ki ini rani? Si wo mbiko ko nga bakerepa Boro rogo haurago kisusi, na ko nabanda agu aboro abanda ko akpinyemuyo. Ga Mbori toro asa gu nebi nangia Nauma ko kepai ki yaa: “Yekova du ni wene  ko, nga nyanyaki gbata rago fudifudipai; ko ini agu yo nakida kuti ko.” (Nau. 1:7; Tam. 1:6) Nirengo, gu maabangirise du ani nani tipa ka gbia nyenye unga naruriipa ino ani ndikidi Mbori na Wiriko nga Yesu Kristo.​—Yo. 17:3.

3. Gini apai pa ino Mbori akodaha?

³ Pa ino Mbori nakoda dungu apai susi gu gbua nga ka ino rimoko. Si naida ani iniko wa bakurearani, ki rugutirani na agu apai ko aidaha na gu ko asogaha. Pa raka ani ringbisihe kuti gu inohe re nayugo gupai nga ani ima ino Mbori wenengai. (1 Yo. 2:4) Ono kurapai kinaho si aidaha ka si du nga ani naida aida nzunzu ka ino Yekova. Si naida ani ini agu apai ko amangihe, wai ko amangihe, na ndu gupai ko amangihe ti ni wo. Ho ani arugatirani naapa ga Yekova aringbisapai gbe, kina iriwo ‘gu dungura nga ga gako tatamana’ nati tirani.​—Rom. 11:33.

Yekova Nga gu Mbori Duna Ringbisapai Beko

4, 5. (a) Gu fugo nga “ringbisapai” i namangisunge nani rogo Ziazia Kekeapai, si nayugo ginipai? (b) Oni funga kpiapai tipa wai rengbe boro kada ti gani ringbisapai ngba dungu agene.

⁴ Yekova nga gu Mbori duna ringbisapai beko, na Ziazia Kekeapai napepa gako “nyenye berã [“nyenye ringbisapai,” NW].” (Ef. 3:10, 11) Ginipai nzunzu gipai re ayugoho? Gu fugo nga “ringbisapai” i namangisunge nani rogo Ziazia Kekeapai, si nayugopa gupai du berã boro yo ní aida si mangi, nga gu ní narengbe arengba ka ndu ngba dungu agene si ki mangi kina wai ní akpinyemuhe.

⁵ Ani yugungo ho na kpiapai: Boro rengbe ka ida ka ndu kurogo kura ba. Pa da ní rogo gu ba re nga gani sásá, watadu gani ringbisapai. Ní ima rengba ka sia ai ũnduge tipa ka ndu nani kurogo gu ba re na gu gene rengbe ní nika ndu ngbaha. Wa ní andu ngba gu gene sia ní he, ní ima rengba ka gbia tiní na kpakarapai wa gu nga atarambiri hiisi gene, i ima kiso gene, watadu gene ima nigbegberẽhe, si kini sa gupai nga ní kama tiní ka ndu ngba kura gene. Ono tie, ka si vura du nga ní nika manga ariapai nibipa gani nduge, ní ki sia kura gene ki ndu ki da ada rogo gu ba ní aida ka da rogoho, gure nga ní ima da ti gani sásá.

6. Wai Yekova amangi ariapai tipa ka digiso gako ringbisapai?

⁶ Wakina gure a, Yekova amangi ariapai tipa ka digiso gako nyenye ringbisapai. Yekova aberẽpa gu ranirii du aboro nani ka siapai ko ki aria gu gene ko nika digiso gako nyenye ringbisapai ngbaha. Ti tonatonaha, Yekova aya fu bambata arogotise nangia Adamu na Eva wee: “Oni zúga azuga, ki nge ange, ki hisi kpotosende berewe ki zogo ho.” (Bam. P. 1:28) Ya mo gako ringbisapai ati ku ime yo mbiko gayó samungu? Wagusa te! Yekova amangipai nikina ipo kuti gipai re nisiako kura gene tipa ka da ti gako ringbisapai ngbaha. Ko afura tipa ‘tita dee’ kumbatayo nga guko narengbe ka dia surungba gu mangaapai kusayo nga ga agu asamungu re.​—Bam. P. 3:15; Eb. 2:14-17; 1 Yo. 3:8.

7. Ginipai ani awirikaha nibipa wai Yekova aringbisipa tiko a wa duhe rogo Gate 3:14?

⁷ Gu sino Yekova nga ka manga ariapai nibipa agu apai nakura tipa ka digiso gako ringbisapai, si na ngbanya dagbaha naapa rimoko. Ho Moize apepa kpakara gu sunge ni Yekova afuhe fuko, Yekova akido ko ki yaa: “‘Mi nikadu nigu boro mi nika ida kadu nga ní.’ Mbori ki ya berewe fuko wee: ‘Mo ya fu awiri aYisaraere wee, “Mi nikadu kedire fuoroni.”’” (Gate 3:14, NW) Nirengo, Yekova ima rengba ka sa tiko nigu boro ko aida ka da nga ní tipa ka digiso gako ringbisapai naabaha! Gu mokedi nangia Pauro ayugu gipai re na kpiapai rogo gu kitabu nga ARomo, kapita 11. Ko afura tipa gu ngua eraya narukuba kurapai. Pa wisigo ani gi kpiapai re nika kiiso gaani inohe tipa gu dunguro nga ga ga Yekova tatamana, singia ani na gu maabangirise nga ka ga ku ngbangbaturũ yo watadu ka gbia nyenye unga kina auru kpotosende ane.

 Ga Yekova Ringbisapai Nibipa gu Tunga I Afura Tipaha Kumbatayo

8, 9. (a) Gini arengo du biama nika undo rani ani rugatirani na gu kpiapai du tipa ngua eraya? (b) Karagapai kuti gini sanahe nayugopa ga Yekova ariapai tipa ka digiso gako ringbisapai?

⁸ Mbata fu ani rengbe ka rugatirani naapa gu kpiapai du tipa ngua eraya, si naida ani ini agu arengo du biama tipa gu sona kumbatayo du tipa ga Yekova ringbisapai nibipa gu ‘tita dee’ i agumba pani. Bambatapai nga, Yekova akido Abarayama nga, “i ka fu maku . . . fu arikaaboro zegino dunduko” rogo ngbatungako yo, watadu atitako. (Bam. P. 22:17, 18) Uepai nga, i afu gu momu nga ga duni “ga bakindo aboromotumo” watadu “agu abakindo nga aboromotumo” (NW) fu agu aYisaraere naenge ti Abarayama. (Gate 19:5, 6) Biatapai nga, ho badungu ndikidi aYisaraere aká Masiya ni, Yekova amangi kurapai tipa ka kusa “agu abakindo nga aboromotumo.” (Mt. 21:43; Rom. 9:27-29) Biamapai nga, wa vura duhe nga Yesu nga gu ngbatunga Abarayama nyaki pani gbe, i ima fu gu momu re a fu kura aboro i duni papara gu ngbatunga re.​—Gara. 3:16, 29.

⁹ Kurigure, ani nawirika gupai rogo gu kitabu nga Yugoti nga bange agu aboro nika zogarago na Yesu ngbangbaturũ yo ni abakindo na aboromotumo nga 144,000. (Yugo. 14:1-4) I naya ti agiyo re a i nga “awiri aYisaraere.” (Yugo. 7:4-8) Ono ya mo agu aboro du bangeyo nga 144,000 re dunduko nga ndikidi aYisaraere, watadu aYuda? Gu karagapai du kuti gu sanahe re nayugopa ga Yekova ariapai tipa ka digiso gako ringbisapai. Ani bingo wai gu waraga Pauro akehe fu aRomo aundo rani ani gbia gu karagapai re.

“Agu Abakindo Nga Aboromotumo”

10. Gini maabangirise nadu sa fu kina aYisaraere?

¹⁰ A wa ani nigumbaha mbata kusayo, kina aYisaraere sa nadu na gu maabangirise nga aboro kuru dagbayó ni ‘agu abakindo nga aboromotumo na nikparakpara ziazia rikaaboro.’ (Oni gedi ARomo 9:4, 5.) Ono ginipai narengbe ka manga ho gu tunga i akidopaha adani? Ya mo si adu nga kina ndikidi aYisaraere sa i nika siayo i ringbisi gu namba nga 144,000 i duni agu aYisaraere nga ga toro yo nga aguyo nga ue papara ngbatunga Abarayama?

11, 12. (a) Gini regbo i atona sia agu aboro nikadu ni abakindo ngbangbaturũ, na gini mangapai nangia ga gu dungu aYuda naaraka ti gu regbo re? (b) Wai Yekova arengbe ka ‘ringbisa’ gu namba nga ga agu aboro nada ningbatunga Abarayama?

¹¹ Oni gedi ARomo 11:7-10. Agu aYuda nadu rogo bambata sa kama agarã aima ká Yesu. Gu momu kini digi i adu nani nga ka kusa ngbatunga Abarayama. Ono tie, ho i atona sia agu aboro ni naga ku ngbangbaturũ yo kadu ni ‘abakindo gbiati aboromotumo’ rago Pendekote rogo gu garã nangia 33, F.B.K., kura aYuda adu kinaho nga aguyo nadu na ruru ngbaduyó yo nadi gu yambahe re kugume. I adu gbua niwiri ‘zogoroyo’ ka ani ringbisiyo kuti bange aYuda dunduko.​—Rom. 11:5.

¹² Ono wai tie Yekova arengbe ka ‘ringbisa’ gu namba nga ga agu aboro nada ningbatunga Abarayama? (Rom. 11:12, 25) Oni bingo gu karagapai gu mokedi nangia Pauro afuhe nga: “A nga si wa ga Mbori pai ti gbua te. Bambiko agu yo nga [ndikidi] awiri aYisaraere, i nga aYisaraere dunduko te; mbiko wa du yo ni ngbatunga Abarayama a, i nga awiri dunduko te, . . . Si wa ka i ya awiri borose nga awiri Mbori te, kina awiri kidohe, i ageda yo ni ngbatunga.” (Rom. 9:6-8) Anga gupai Yekova aaidaha nga kina agu aboro sa naenge ti Abarayama digisi gako ringbisapai nga gudu tipa gu tunga i akidopaha te.

Ngua Eraya

13. Gine agi ahe re arukubaha (a) ngua eraya, (b) tarãha, (d) katakpaha, na (e) abehe?

¹³ Gu mokedi nangia Pauro aringbisipa  agu aboro nada ningbatunga Abarayama kuti abe ngua eraya. * (Rom. 11:21) Gi ngua eraya re nayugopa digiso Mbori gako ringbisapai nga gu nabipa gu mozunga ko amangihe na Abarayama. Tarã gu ngua re niziaziaha na si narukuba Yekova nga gu boro nafu unga fu agu aYisaraere nga ga toro yo. (Yes. 10:20; Rom. 11:16) Katakpaha narukuba Yesu nga bambata ngbatunga Abarayama. Abehe nga gu ‘ringbisi ringbisi’ aboro nga ue papara ngbatunga Abarayama.

14, 15. Ada i “akuadi” yó ti gu ngua eraya i arũhe na ada i azunguyo kubaha?

¹⁴ Rogo gu kpiapai du tipa ngua eraya, i ringbisipa ndikidi aYuda nga aguyo naká Yesu kuti be eraya nga gu i ‘akuadi he akuadi.’ (Rom. 11:17) Si du i kini zanga gu momu nga ka da nipapara ngbatunga Abarayama. Ono ada si aidi i di bayo? Kuti gu bipai nangia ga ndikidi aYuda nga aguyo nanaaʹabia tiyo nga i aenge ti Abarayama, si aarunga bangiriyo i yawee aGendiria ima dia bayo te. Ono Yoane Bafu Bapatiza aima ya fuyó wee ka Yekova aida ka sa ambia si duni awiri Abarayama, ko saha asa.​—Rk. 3:8.

¹⁵ Ginipai tie Yekova amangihe tipa ka digiso gako ringbisapai? Pauro asakirogoyo nga i akua abe eraya nga ga nvuo ki zunguhe kuba gu i akuadihe re. (Oni gedi ARomo 11:17, 18.) Si tie du, i azungu agu aKristano naangianga aYuda ya, wa ngbatunga aguyo nadu Roma yo, wa ka i zungu ngua eraya kuti gu azungo ya. Rogo gi gene re, i adani papara ngbatunga Abarayama. Ti tonatonaha, i adu wakina abe ngua eraya nga ga nvuo, mbiko i aadunga na momu beyo tipa  kadu rogo gi mozunga re te. Ono Yekova azaki gene fuyó i duni agu aYuda nga ga toro yo.​—Rom. 2:28, 29.

16. Wai gu mokedi nangia Petero asaki pa tona gu vovo rikaaboro nga ga toro yó?

¹⁶ Gu mokedi nangia Petero asakirogoyo ngba gi gene re: ‘Sidu agu roni [aYisaraere nga ga toro yo kodihe na agu aKristano nangia aGendiria] idipa [Yesu Kristo] irisa du fu roni; ono fu aguyo nabasa pako, “Gu mbia abaduabambu agindigaha, kinaha duni mbia tukpuhe ku ri bambu,” na “si ki duni mbia kota, nga mbia tigo fuyó a;” . . . Ono oni nga siasia ngbatunga aboro, nga ga bakindo aboromotumo, nga ziazia rikaaboro, nga aboro duni kina ga Mbori yó, ya oni yugu gu wene sino gbayaga nga ga gu ko nayambu roni bitimo yo kurogo gako iiriwo imarago yo. Oni adunga nirikaaboro mbata te, ono awere oni nga gu rikaaboro nga ga Mbori yo; oni adianga inapai mbata te, ono awere oni aima dia inapai.’​—1 Pet. 2:7-10.

17. Wai gupai Yekova amangihe adu ‘kia ti sino’?

¹⁷ Yekova amangi gupai badungu aboro arengbe ka bihe wa gupai kaa manganga ya. Pauro naringbisapa gupai namangi re wa gupai du ‘kia ti sino.’ (Rom. 11:24) Wai si adu wo? Si adu wakina gupai ninaamanganga dedede ya, nga ka kuo bengua nvuo yo kini ka zungaha kuti gu i arũhe arũ; ono gure nga gupai kura abasopobino anaamangaha amanga rogo bambata sa kama agarã. * Wakina gure a, Yekova amangi iiriwopai. Ringbisihe kuti gu bipai nga ga aYuda, aGendiria aarengbanga ka kusa wene zuzu he te. Ono tie, Yekova asa agi aboro re i du nipapara gu “rika aboro” nakusi zuzu Kindo. (Mt. 21:43) Si atona nimbedayo Korunerio niziazia toro rogo 36 F.B.K., nga gu bambata Gendiria nada ni Kristano. Rogo gu garã re, gene azaki fu agu azangayeratise naangianga aYuda ya i di ba ndikidi aYuda wa ka i di ngua eraya nvuo ka zungaha kuti gu nga ga ati.​—Amo.10:44-48. *

18. Gini momu ndikidi aYuda adu nani tingbafuo gu garã nangia 36 F.B.K.?

¹⁸ Ya mo gipai re nayugo gupai nga tingbafuo gu garã nangia 36 F.B.K., ndikidi aYuda aadunga berewe na gu momu beyo nga kadu nipapara ngbatunga Abarayama te? Oó. Pauro asakirogoyo ki yaa: ‘Ka ndikidi aYuda anyenga na gayo zanga idapase ya, i azungayo azunga ti ni, mbiko ka Mbori zunguyo azunga berewe. Bambiko singia i akati ro ti gu ngua eraya du ti sinoho ni ga nvuo, ki zunguro kuti gu wene ngua eraya akia ti sinoho; angbatika i tigayo, ka i zungunga yó kuti gayo ngua eraya wa du yó nga ngbatunga abehe te?’​—Rom. 11:23, 24.

‘AYisaraere Nika Bata Abata Dunduko’

19, 20. Ginipai Yekova adigisihe nga gu i ayuguhe na gu kpiapai du tipa ngua eraya?

¹⁹ Nirengo, ga Yekova ringbisapai nibipa “ga Mbori Yisaraere” nadigisotihe ngba iiriwo gene. (Gara. 6:16) A wa Pauro agumbaha, ‘aYisaraere nika bata abata dunduko,’ nga  agu aYisaraere nga ga toro yó. (Rom. 11:26) Ti ga Yekova ringbisiringbisi regbo, ‘aYisaraere dunduko’ nika mangasunge ni abakindo na aboromotumo ngbangbaturũ yo. Pai ho rengbe ka sa ga Yekova ringbisapai si ti ku ime yo te!

²⁰ A wa i agumbaha, ngbatunga Abarayama, nga Yesu Kristo kodihe na aguyo du bangeyo nga 144,000, nika fu amaku “fu arikaaboro.” (Rom. 11:12; Bam. P. 22:18) Rogo gi gene re, ga Mbori aboro dunduko nagbia undo be gi mbakadapai re. Wa ani nawisigipai tipa wai Yekova adigiso gako nyenye ringbisipai, kina iriwo “gu dungura nga ga gu ũkumuko nga ga Mbori tatamana na inahe” nati tirani.​—Rom. 11:33.

[Gu rukutu kekepai du bandu waraga yos]

Oni Natingidaha?

• Ginipai ani awirikaha tipa Yekova nibi gu gene ko adigiso gako ringbisapai ngbaha?

• Rogo ARomo kapita 11, gine agi ahe re arukubaha . . .

ngua eraya?

tarãha?

katakpaha?

abehe?

• Tipagine pa zunga ngua eraya adu ti ni nigupai du ‘kia ti sino’?

[Asanahe nga ga wisigopai]

[Gu sura du ti kpewaraga 26]

Tipagine I Azungu Be Eraya ti ni Na ga Nvuo?

 ▪ Rukio Yunio Modereto Korumera angia ga aRomo banzengere na kingia basopobino rogo bambata sa kama agarã Fuo Batikayo Kristo. Aboro aima inoko wenengai ti agu abuku 12 ko akehe tipa raka gbaria na tipa sunge ati.

Rogo gako bisue buku, ko adipai rogo kuru sanza ki kehe ki yaa: “Guni nasopa ba eraya, ní nasanaha tipa zuzuhe; guni narigaha na mirĩ anyaa watadu zirĩ ahe, ní nazungodihe tipa zuzuhe; guni nakafa kura abehe tipa si funo, ní nasaha ngbaome si kusi zuzuhe.”

Tifuo gumbako pa gu ngua i nangerefuoho wenengai si ki sono ono ka si azungo ya, ko aya gupai ngba i mangihe tipaha nga: “I koroho na gazua ki dua be gu eraya nga ga nvuo kurogo gu yaro re wenengai; gupai nika manga nga gu eraya re nika zu azu wenengai, si ki duwa gu ngua i aduaha ti ni re fu vuse fuhe.”