DA NZUNZU NGA Yesu Kristo?

“Ho ko aye ni ku Yerusarema yo bakporo ki wo awo dunduko, i ki ya, ‘Da nga gi boro re?’ Rimbasa aboro ki ya, ‘Nebi nga gi ko re nga Yesu, ye Nazareta yo, du Gariraya yo.’”​—MATAYO 21:10, 11.

TIPAGINE rago awo awo ti ni ho Yesu Kristo * arimi ni ku Yerusarema yo ti gu tonatona kitö nangia ga gu garã nangia 33 F.B.K.? Badungu agu aboro nadu Yerusarema yo aima giapa Yesu na gu iiriwoapai ko amangihe. I aima digo nigumba pako fu akurayó. (Yoane 12:17-19) Ono tie, gu ndurumo aboro re aainongo nzunzu nga Yesu Kristo angia gu kumba nika manga ariapai rogo zegino dunduko tona ti gu regbo re ki da ku areme te!

Oni bingo bete agu akpiapai nayugo nani nga Yesu nga gu boro naima manga bakerepai rogo zegino da ku areme.

▪ Gu karendaria badungu aboro amangasunge nani gbe rogo apapara zegino dunduko, si tona geda agarã ti kina gu garã i aberãha nga si i avungu Yesu rogoho.

▪ Aboro wa abirioni ue naya aKristano nga yó. Gi namba re mbedi kadu nga bebere bange agu aboro dunduko du auru kpotosende.

▪ Gu pambori nga ga aMasarami, du bange aboro rogoho naima susa birioni sa, si naayugo gupai nga Yesu nangia “gu nebi pako akii gbe kisusi Abarayama, Noa, na Moize.”

▪ Badungu aboro ninaagumba agu afugo Yesu agumbaha rogo gayó kungbo afugo yo. Bete agu afugo re nga:

‘Mo sa kura pangbaro.’​—MATAYO 5:39.

‘Mo ndu ki ba ngbii ue.’​—MATAYO 5:41.

‘I naaranga fu abaira ue te.’​—MATAYO 6:24.

‘Ka mo banga ambia fongo fu amukuru ya.’​—MATAYO 7:6.

‘Oni ngoka ngbadimo, i ki uruhe furoni.’​—MATAYO 7:7.

‘Mo di gu bakere he du bangiriyo mbata mo nika dia gu tooni he du bangiri wirinamo yo.’​—MATAYO 7:3.

Nirengo, Yesu nga gu boro pani aima rimo kurogo aboro yo dũ. Ono tie, aboro na dungu aberãpai gbiati aida tipa Yesu. Sidu, boro rengbe ka sanahe nga, ‘Da du nangia Yesu Kristo nzunzu?’ Kina Ziazia Kekeapai nagumbapa wari furani Yesu ayeni, wai gako raka adu, na gupai ko akpi ti ni. Pa ino oni rengo tipa ko rengbe ka aria gaoni raka niwenehe awere, na kumbatayo a.

[Gu rukutu kekeapai du bandu kpewaraga yo]