Ndikidi Kido Kuti Yekova Nado Gunde Kusayo

“Ho mi nakpara ni fu Yekova ko nagia ha agia.”​—TAM. 4:3.

1, 2. (a) Gini kereapai Davide agbiatiko nani? (b) Ani ka wisigo gini abia atambuahe?

FUO Bakindo Davide zogo Yisaraere tipa dungu agarã, ko agbiatiko na dungu kereapai. Wiriko nangia Abisaroma ataburo ki moi tiko nibakindo, Davide ki kuru Yerusarema yo ngbaome. Gako bafurugute agberẽ kutiko a. Kina wiri bete abadiangbako gbua ko akuru naayó, ko ki ta ndu ninduko nikpari nidakpa Bagangara Aeraya. Fuo gure, Simi nangia ga Bakindo Saura borokporo azumudi Davide na mbia, kini mi nvutu kutiko, na kini tiwako.​—2 Sam. 15:30, 31; 16:5-14.

² Ya mo agi apai re andu na Davide ku muro yo rogo pawasiro? Oó, bambiko ko aduna kido kuti Yekova. Gipai re niyuguyuguhe rogo agu afugo Davide du rogo gu biata bia nga ga Atambuahe, nga gu ko akehe ho ko aaora ni be Abisaroma. Kinako a nake gu biama bia nga ga Atambuahe. Agu afugo dunduko du rogoho nayugo gupai nga Mbori nadega tuko adega na kini karagapai sa gaani akpee. (Tam. 3:4; 4:3) Agi abia atambuahe re nakido rani nga Yekova nangera angera fuo gako ruru aboro uru na yuru, kini fu maku fuyó niundoko yó, kini fu zereda fuyó na kini bandayo. (Tam. 3:5; 4:8) Sidu tie, ani wisigingo agi abia re ka bingo wai si afu kido furani kuti Mbori na kini do gunde tirani kusayo.

Ho ‘Dunguyo Nika Mo ni Kuti Rani’

3. A wa bi ani he rogo Atambuahe 3:1 2, gini kerepai Davide adu rogoho?

³ Pangbanga aye fu Davide ki yaa: “Kpoto aboro aYisaraere yo sa tihe fuo kina Abisaroma.” (2 Sam. 15:13) Ho Davide amakia gupai ni riko yo nga wai Abisaroma nagbe dungu aboro wa gure fuoko, ko akpari ki yaa: “Ako Yekova, nange agu yo nafuda re! Agu yo mo kuti re i ni dungu yo; agu yo ho ni dungu yo niya tipa re, undahe yo du Mbori ni fu ko te.” (Tam. 3:1, 2) Dungu aYisaraere aaberã gupai nga Yekova abatasanga Davide be  gu gberãngbi Abisaroma na abakureako aye nani re te.

4, 5. (a) Gine Davide adu na kido tipaha? (b) Rogo gu fugo nga “tumba rire” nga gine?

⁴ Ono Davide aagundenga te mbiko ko amoi ndikidi kido kuti Mbori. Ko abibia ki yaa: “Ako Yekova, ono mo nga vurakube pati re, nga gi taarimo, nga tumba rire.” (Tam. 3:3) Davide aduna kido nga Yekova nika bandako abanda kina wai vurakube naabanda banzengere. Gi sosono bakumba re aaora na riko ni dadidadihe na ki nugo ku sende na zee. Ono gu ko nga Bahe Kisusi aima aria ga Davide raka kurogo ga irisa. Yekova aima undoko berewe ki tumba riko. Davide akpari fu Mbori naa kido nga ko nika undoko aundo. Ya mo mo na gu ngbatunga kido re kuti Yekova?

⁵ Gu fugo Davide nga “tumba rire” nayugo gupai nga ko aima du na kido nga Yekova du nika undoko. Buku sa aya tipa gu fugo nga “tumba rire” wee: “Ho Mbori atumba . . . ri boro ni, Ko na hiso ní na maabangirise gbiati kido.” Davide aduadu na ndupai beko kadu na gberarago mbiko i ado ko ri ga aYisaraere mbatabakindo. Ono wa si avura duwo, sangbana pa ‘tumba riko’ kuari angia padu ko berewe na wingbaduse, maabangirise, na gbiati ndikidi kido kuti Yekova.

‘Yekova Nika Karagapai Fere!’

6. Tipagine Davide aya ti ni wee Yekova nika karagapai akaraga kuti gako kpee rii gako ziazia bagangara yo?

⁶ Wa Davide aduna kido kuti Yekova na kidu na maabangirise nga ko nika undoko aundo, ko andu na fugo kumbatayo ki yaa: “Mi nakpara fu Yekova ni fugore, ko ki nikaraga pai fere rogo gako kparakpara ziazia bagangara yo.” (Tam. 3:4) Mbiko ga Davide rugapai, i andu na sanduki mokido ku rii Bagangara Siona yo, nga gu sanduki naayugo gupai nga Mbori kinaho. (Oni gedi 2 Samuere 15:23-25.) Si arẽarẽ tie Davide ya tipa gako kpee wee Yekova nika karagapai kutini rii gako ziazia bagangara yo.

7. Tipagine Davide anaagundenga ti ni ya?

⁷ Gu kido Davide aduna nani nga Yekova nika karagapai akaraga kuti gako kparakpee asako ka ko gundenga ya. Kuba gure, ko abibia ki yaa: “Mi naapi ki nira; mi ki nizingi, bambiko Yekova naasongoda re.” (Tam. 3:5) Zavura yuru i narengbe ka tunguo boro niipo, Davide anaagundenga ka ra te. Ko aduna kido nga ko nika zinga azinga rameyo, mbiko agu apai namangiko mbata kusayo aima sako ko duna kido nga Mbori nika undoko aundo. Sidu, ani rengbe arengba kadu wo ka ani “aka kuti agu apai nga ga Yekova” na ka ani ambunga ko ya.​—Oni gedi 2 Samuere 22:21, 22.

8. Wai Atambuahe 27:1-4 ayugo gupai nga Davide aduna kido kuti Mbori?

⁸ Ga Davide zanga gunde na ndikidi kido kuti Mbori niyuguyuguhe rogo gi kura bia nga gu duna agi afugo re rogoho: “Yekova nga gi imarago nga gi bata; da ka mi gunde be ni? Yekova nga gu gbata nga ga ungare; da ka mi gunde be ni? . . . Ka rimbasa sovura vura ye kuti re vurũ, kpotore yo agúnde nga te; ka vura vura guari kuti re vurũ, mi adú zukazuka. Pai sa sana mi Yekova tipa ha, si mi agbáta ha; nga mi nye tii ga Yekova bambu yo wa du mi ni ungare kindi, ka bi gu wene ngbanya nga ga Yekova, ki nimakia pai rogo gako yekaru yo.” (Tam. 27:1-4) Ka oni duna gu ngbatunga bipai re, oni nikaa dungura tironi ti aregbo dunduko na agu aboro oni airiso Yekova naayó.​—Eb. 10:23-25.

9, 10. Wa vura du agu afugo du rogo Atambuahe 3:6, 7 vurũ, tipagine rengbe ani ti ni ka yawee Davide aadunga na gu toro tiko nga ga irobape te?

⁹ Wa Abisaroma afura taburo kuti Davide, na dungu ga Davide aboro ki samungu kutiko, ko abibia ki yaa: “Mi agunde nga be agu aboro du bawe kuti tangara tiyo sa re kirikiri te. Ako Yekova, mo gúari! Ako gi Mbori, mo bátasi re! Bambiko mo nataka avurare dunduko ti biringa ngbayo, mo nakuadi rindi gbegberẽ aboro.”​—Tam. 3:6, 7.

 ¹⁰ Davide aadunga na gu toro tiko ga nga irobape te. Ka i ‘ataki avurako ti biringa ngbayo,’ Mbori du ka takiyo. Bakindo Davide aima ke buku nga ga ga Yekova andiko tipa tiko na ki ima ino nga rogo gu buku re, Yekova ayaa: “Pa irabape nga gimi, na pa fu mosoro.” (Pa Rug. 17:14, 15, 18; 32:35) Na kina Mbori ka diberã nitiko ka ‘kuadi rindi gbegberẽ aboro.’ Ka kuadi rindiyo nga ka zeresayo ka i mangingo gbegberẽpai ya. Yekova ima ino ada nga gbegberẽ aboro bambiko ko “nangera ku kpoto aboro yo.” (1 Sam. 16:7) Si nipa ngbarago tie ka ino nga Mbori nafu idapase na ome tipa ani ru ngutete barangba baira gbegberẽ aboro, nga Satana, nga guko i nika bako barambeda kurogo gu due zanga mburuhe wa gu bahũ zanga rinde nga guru rẽ tipa kina gbarasahe.​—1 Pet. 5:8, 9; Yugo. 20:1, 2, 7-10.

“Bata Kina be Yekova”

11. Tipagine si aida ti ni ani kpari tipa akuarani aidipase?

¹¹ Davide aima ino nga kina Yekova sa rengbe ka fu gu bata ko aidaha. Ono ko aaberãnga tipa kina pa tiko te. Na agu aboro Yekova aida naayó wa du yó nibadona? Si arẽarẽ tie Davide digisi gu gako bia ga Mbori toro adu kugiipa kehe na agi afugo re: “Bata kina be Yekova; ga maku dú ku ri gamo aboro.” (Tam. 3:8) Nirengo, Davide aima duna bakere kpakaraapai, ono ko aima tingida pa ga Yekova aboro dunduko na kidu naa kido nga Yekova nika fu maku afu fuyó. Ya mo si aidanga ani kpari tipa agu akuarani nga aidipase te? Si naida ani naatingida payo atingida rogo gaani akpee, kini sana Yekova ko fu gako ziazia toro fuyó tipa i duna ngara na kini tungusi wene pangbanga zanga gunde.​—Ef. 6:17-20.

12, 13. Ginipai namangi Abisaroma, na wai Davide amangipai kuti ni?

¹² Ga Abisaroma raka anyasi rogo pa wasiro, na si nga zahe fu agu aboro nasawia akurayó, gbe ga Mbori mbedimbedi aboro, wa Davide. (Oni gedi Asanza 3:31-35.) Vura amangi i ki dibe ga Abisaroma aborovura. Abisaroma nitiko aaora rii gako dongi, ngua ki ngorã riko. Ko ki nye ni asiasi ko niungako ono ka gene adunga beko wa ka ko mangipai ya, daho Yoaba anofoko ni na asiida biata ko ki kpi.​—2 Sam. 18:6-17.

¹³ Ya mo Davide aduna ngbarago ho ko agi gupai ni nga wiriko kpi? Oó. Kuba gure, ko atandu kusayo na kumbatayo kini kpari nitangbako niyaa: “Ako Abisaroma wire, ako Abisaroma wire, wire! Ka Mbori aidi he mi kpi ku ba ro, Ako Abisaroma wire, wire!” (2 Sam. 18:24-33) Kina fugo Yoaba sa nakusi Davide rogo gu gberarago omehe aima mbeda ka fu riko re. Nairiwo gu kerepai namangi Abisaroma re, nga gu boro bakere nyemu pagbia akisi bangirini ní ki sovura kina boro kuti bani, nangia ga Yekova mbedimbedi boro, ki ye na gberãngbi kina kuriko!​—2 Sam. 19:1-8; Snz. 12:21; 24:21, 22.

Davide Ayugu Gako Kido Kuti Mbori Berewe

14. Ginipai rengbe ani ka pehe tipa gu biama bia nga ga Atambuahe?

¹⁴ A wa ani nibihe rogo biata bia Atambuahe, gu biamaha na ga Davide akpee rogoho nga gu nayugo pa gu ndikidi kido ko adu nani kuti Yekova. (Tam. 3:4; 4:3) Si rengbe kadu nga Davide asari gi bia re ka yugo gako tambuahe fu Mbori tingbafuo ti ga Abisaroma buro ku ime yo. Watadu i akehe naapa agu abibia berã yo nangia aRevi. Singia ginigu nga rengo, berãkuriihe rengbe arengba ka nyakasa gaani kido kuti Yekova.

15. Tipagine rengbe ani ka kpara fu Yekova rogo Wiriko yo ti ni na kido nga ko agia gaani kpee agia?

¹⁵ Davide ayugu gako ndikidi kido kuti Mbori berewe na ki yuguhe nga ko naa kido nga Mbori ima gia gako kpee na ki karagapai kutini. Ko abibia ki yaa: “Ako Mbori gu pai ru fere, mo karaga pai fere ho mi nikpari ni foro! Ho pai afudi re ni, mo akusi re. Mo ini pai fere, ki gi gi kpetambuahe.” (Tam.  4:1) Ani rengbe arengba kadu na kina gu bangisa kido re ka ani amanga rurupai. Wa ani nainihe nga Yekova nafu maku afu fu gako ruru aboro, ani rengbe arengba ka kpara fuko naa kido rogo Wiriko yo na kidu na idapase kuti ga Yesu motumo tumorii. (Yo. 3:16, 36) Nairiwo gu zereda gipai re afuhe furani!

16. Ginipai nanaazeresa Davide ti kura aregbo?

¹⁶ Ti kura aregbo, ani rengbe arengba ka gbiatirani na agu apai rengbe ka zeresa gaani kido. Kura aregbo kinaho si aduwo tipa Davide, mbiko ko abibia ki yaa: “Ako awiri aboro, rame adú waĩ i nisa gi taarimo ni wasiro? Rame adú waĩ oni nikpi nyemu kungba apai, ki nigbata zire?” (Tam. 4:2) Gu fugo nga “awiri aboro” re nayugo gupai nga i aadunga niwene aboro te. Avura Davide akpinyemu “kungba apai.” Gu sasa fugo Ziazia Kekeapai nga New International Version nayaa: “Rago adu wai oni kpinyemu agu apai nga ziree na kini gbata kungbo ambori?” Ka agu apai kura aboro mangaha vura kaa ba gberarago tirani vurũ, ani nikpari akpara kindi na kini yugu gaani ndikidi kido kuti bangisa ndikidi Mbori.

17. Oni sakingo wai rengbe ani ka mangapai ringbisihe kuti Atambuahe 4:3.

¹⁷ Ga Davide kido kuti Mbori niyuguyuguhe rogo agi afugo re: “Ono oni íni he ya Yekova kpara gu ni mangi sino Mbori tipa ko; ho mi nakpara ni fu Yekova ko nagia ha agia.” (Tam. 4:3) Tipa boro nye niruruni fu Yekova, si naida wingbaduse na ndikidi kido kuti ko. Nikpiapai, si naida agu aborokporo nga aKristano duadu na agi asino re ho i nakusi gu gumeyo ni aidanga ka sa gani berã ya rogo dungurati kusayo. Mbori nafu maku fu agu aboro du niruruyo fuko na kini peke gako agene. Kurigure, du niruruse na ndikidi kido kuti Yekova nakiiso ngbarago dagba gako aboro.​—Tam. 84:11, 12.

18. Ringbisihe kuti Atambuahe 4:4, ginipai rengbe ani ka mangaha ka si du nga ani gbiatirani na gbegberẽ afugo watadu mangapai?

¹⁸ Na ka boro pe gupai watadu ka manga gupai nika ba gberarago tirani? Ani rengbe arengba ka nye na ngbarago ka ani mangi gupai Davide apehe nga: “Oni rú na gunde, ka oni niíngi nga pai ya; oni bérẽ pai kpotoroni yo auru gaoni abarame, ki sungu zaa.” (Tam. 4:4) Ka si du nga ani gbiatirani na gbegberẽ afugo watadu gbegberẽ mangapai, ka ani inginga pai nikaraga ani gbegberẽpai kuba gbegberẽpai ya. (Rom. 12:17-19) Ani rengbe ka kusaha ho du ani ni rigaani barame rogo kpee yo. Kparakpee rengbe ka undo rani ani bihe rogo gu kura gene si ki sarani ani mbupai rogo nyemuse yo. (1 Pet. 4:8) Gipai re nagbeberã rani kuti gu rugute Pauro afuhe ki yaa: “Oni zingi, ka oni ingi nga ya; ka uru ti nga gaoni zinga ya. Ka oni mbákadi nga gene fu bakitingbanga ya.” (Ef. 4:26, 27) Na si nawira ko adi gi rugute re Atambuahe 4:4.

19. Wai rengbe Atambuahe 4:5 ka undo rani nibipa gaani irisombori?

¹⁹ Davide anyakasi pa wai si aida ani kido kuti Mbori ho ko abibia ni ki yaa: “Oni túmo ni agu amotumo nga rurupai, ki nikida kuti Yekova.” (Tam. 4:5) Agu amotumo aYisaraere anaafuhe, Mbori anaaida nani kinaho agu aboro nanaafuhe anidu ni na wene ngbaduyó yo. (Yes. 1:11-17) Tipa Mbori idi na gaani iriso, si naida ani duna  wene ngbaduraniyo na kidu na ndikidi kido kutiko.​—Oni gedi Asanza 3:5, 6; AEbere 13:15, 16.

20. Gine nga ‘ima kpakpu Yekova?’

²⁰ Davide andu kumbatayo na fugo ki yaa: “Dungu aboro ninaya, ‘Ako da ka yugu wenepai fu rani?’ Ako Yekova, mo túmba ima kpakpuro ku ri rani!” (Tam. 4:6) ‘Ima kpakpu Yekova’ narukuba pa idako na boro. (Tam. 89:15) Sidu tie, ho Davide akpari ni nga: “Mo túmba ima kpakpuro ku rirani,” rogoyo nga ‘mo idi parani.’ Wa duhe nga ani nakido kuti Yekova, ko ima ida parani ani kini gbia bakere ngbarago wa ani amanga gupai ko akpinyemuhe.

21. Ginipai ani amaabangirani ka gbiaha wa ani afu tirani tipa gu sunge keahe nga ga toro?

²¹ Wa Davide aangera kumbatayo tipa gu ngbarago Mbori nika fuhe nga gu susi gu nidu ti regbo keahe, ko abibia ki yaa: “Mo amoi ngbarago ku kpotore yo, bakere ti ga agu yo ninangba ho gayo zende ahe namaa pai ni na imekakue a.” (Tam. 4:7) Ani rengbe arengba kadu naa kido tipa gu ngbatunga ngbarago re ka ani afu tirani wenengai tipa gu sunge keahe nga ga toro du areme. (Rk. 10:2) Mbedimbedi aKristano nga agu aboro nangbembatayo rogo gi sunge keahe re, na ani na ngbarago ka bi gupai nga bange akeahe nange kina kumbatayo. Ya mo mo nafu tiro sa gi sunge re wenengai?

Ani Nikido Kuti Mbori Kindi

22. Nibi Atambuaha 4:8, wai aYisaraere anaaraka ho i anaabanda ga Mbori andiko ni?

²² Davide adigisi gi gako bia re na gu fugo nga: “Mi ata pi ki nira a zezeredi; bambiko kina mo, Yekova, kina ro naya mi niraki ni bandabanda re.” (Tam. 4:8) Ho aYisaraere anaabanda ga Yekova aNdiko ni, i anidu rogo zereda nibandabandayo. Nikpiapai, ‘aYuda asungu zezeredi na aYisaraere’ ho Soromo atona zogarago ni. (1 Aba. 4:25) Agu aboro nakido kuti Mbori naraka rogo zereda zavura ho du gayo amurakporo ni na tagbagaapai dagbayó. Wakina Davide, ani nara zezeredi mbiko Mbori nabanda rani abanda.

23. Ginihe rengbe ani ka gbiaha ka ani duna ndikidi kido kuti Mbori?

²³ Ani ndu kindi kumbatayo na manga ga Yekova sunge. Na ani nikpari akpara kindi na idapase tipa ka gbia “gu zereda nga ga Mbori nagasi rugatinapai dunduko.” (Frp. 4:6, 7) Nairiwo gu ngbarago si afuhe furani! Na ani rengbe arengba kadu na diabese rogo gaani raka kumbatayo ka ani duna ndikidi kido kuti Yekova.

Gaoni Karagapai Nga Gine?

• Gini kparakapai Davide agbiatiko nani be Abisaroma?

• Wai gu biata bia nga ga Atambuahe ado gunde kusayo?

• Rogo gini agene gu biama bia nga ga Atambuaha anyakasa gaani kido kuti Yekova?

• Wai rengbe ani ka gbia undo ti ndikidi kido kuti Mbori?

[Asanahe nga ga wisigopai]

[Gu sura du ti kpewaraga 32]

Ya mo mo na ndikidi kido kuti Yekova?