4. Sakparakpa

‘Aboro adu ni airasakparakpa.’​—2 TIMOTEO 3:1-3.

● Chris namangasunge Ringara aNgirisi yo na gu riigbu nangerafuo agu aboro gayó aborokporo amangayó nizuũ. Ko nayaa: “Mi natingidapa kura dee sa kumbaari ata ri ka mi arengbanga ka ino ri berewe wai ri adu ti gu yangara regbo mi abi ri ya. Kura adee a kinaho i amangayó gbegberẽe si ki da nga ka i tumbanga riyo kuari te be zee.”

GINI APAI NAMANGA ROGO ZEGINO? Rogo ringara sa nga ga Afirika, sa dagba biata nga ga adee i agbirisi payo mbuyo kindi ni agude. Gu wisigopai i amangihe rogo kina gu bangisa ringara re akusi gupai nga, sa dagba biata nga ga akumba nayawee si daada i naata adiayo. Ono tie, anga kina adee sa i amangayó nizuũ kporo te. Nikpiapai, Kanada yo, akumba nambeda kuti 3 dagba 10 adiayo amangiyo ngba gbegberẽ gene.

GINI BIPAI DU DUNGU ABORO NANI? Zuũ aima digo nimangi kporo. Gupai du gbua nga awere aboro amaaberãyo tipaha susi gu nadumbata.

YA MO RENGO DU NGA GIPAI RE? Aboro ima rugatiyo awere gbe naapa gu zuũ namanga kporo susi gu nadu kusayo. Ono ya mo pa ruga aboro tiyo gbe naapa gipai re sa gupai nga agu azuũ namanga kporo zogosi tihe kusende? Wagusa te. Sakparakpa namaapai kina kumbatayo. Badungu aboro adunga na nyemuse tipa gayó aboro ya.

GAONI BIPAI NGA GINE SA GI PAI RE? Ya mo 2 Timoteo 3:1-3 nadigiso tihe? Ya mo dungu aboro na ndikidi nyemuse koyo du gayó aborokporo ni?

Gu bisue sangbanebi nadigo areme, si nabipa kpurani nga kpotosende. Ani wisigingo gupai Ziazia Kekeapai agumbaha tipaha.

[Gu sura du ti kpewaraga 7]

“Gu zuũ namanga kporo, si du dagba agu azuũ paha naakuranga gbaiga gbe ya. Badungu adee akumbayo ata yó ata mbata wa bara 35 i kini ru ka pehe fu aborisi.”​—GURE NGA FUGO GU DEE NAFURA TIPA GU ZUŨ NAMANGA KPORO RINGARA ANGIRISI YO.