5. Gbarasa Kpotosende

“[Mbori nika] gbarasa agu yo nagbarasa kpotosende.”​—YUGOTI 11:18.

● Kumba nga Pirri namangasunge buda-mbiro Nigeria yo. Gu benzimi na gu kura anzeme nga ga sende nakusuko ba girisoho yo ima gbarasa rago nibakerehe, na ki ima gberesapa gako sunge. Fugoko nga: “Si naimo gaani atĩo, kini gberesi kpotorani, kini gberesi gaani wiriadi. Sunge ho mi amangaha berewe tipa kaa raka te.”

GINI APAI NAMANGA ROGO ZEGINO? Abangbasia abawisigi apai nayawee akiro abirioni sita na beberehe nga ga biriko nandu ku baime yo na agarã dũ. Bebere gu biriko re nga kandi, nga guhe nadia badungu akama agarã mbata si kini ru ka zirã. Kurii gu nga ga gbarasa kpotosende, aboro nanyasa agu ahe du auruhe na tiihe yo nikerehe. Abangbasia abawisigi apai bi gupai nga, tipa ka karaga agu ahe nga ga kpotosende nagberã rogo garã sa, si naida bagizo regbo nga garã sa na adiwi bisue. Waraga apangbanga sa Australia yo ayaa: “Ka bange aboro ange kina kumbatayo kindi, na i kini gberesi agu ahe nga ga kpotosende kindi nibakerehe, si idi aida i kusi kura akpotosende ue rogo gu garã nga 2035 kuba gu gberẽ.”​—Sydney Morning Herald.

GINI BIPAI DU DUNGU ABORO NANI? Aboro ima tatamana kisusi. Ani rengbe arengba ka mbakada agi apai re ki banda gaani sende.

YA MO RENGO DU NGA GIPAI RE? Badungu agu aboro namangasunge nyanyakii gbiati ariigbu ima digo nigumba gupai nga kpotosende nagberã. Ono tie, aboro nagbarasaha kindi kina kumbatayo.

GAONI BIPAI NGA GINE SA GIPAI RE? Ya mo si naida aida Mbori ye ka batasa gaani sende a wa ko nagumbaha nga ko nika mangaha?

Kurii agu asangbaanebi du bisue ani nawisigihe re, Ziazia Kekeapai aima gumbapa gu wene apai a nikaa manga ti yangara arame. Ani bingo gu sa.

[Gu sura du ti kpewaraga 8]

“Mi nabi tire wa mi adu mbata rogo paradizo, ono awere, mi rogo kere gugudo nga ga kikpa ahe.”​—ERIN TAMBER, NARAKA AMERIKA YO NAGUMBA GIPAI RE NIBI GU BENZIMI NAGBERESI RAGO MEKISIKO YO ROGO 2010.

[Gu sura du ti kpewaraga 8]

Ya Mo ga Mbori Pai du Ngaha?

Wa duhe nga Ziazia Kekeapai aima gumbapa gu gbegberẽ apai ani abihe areme re, ya mo gure nayugo gupai nga Mbori du naye nani? Ya mo ko du nasarani ani naarungo? Oni rengbe ka gbia karagapai kuti agi asanahe re rogo kapita 11 nga ga gu buku nga Gini Apai Nzunzu Ziazia Kekeapai Ayugoho? ADezire Yekova akusihe.

[Gu sura du ti kpewaraga 8]

U.S. Coast Guard photo