Mbori Amoi Dezire Gako Nyemuse Furani

‘Undahe akindo rogo rurupai yo sa nyenye unga.’​—ROM. 5:21.

1, 2. Gini agamunihe duho ue gumbayo paha ane, na ginigu kiipaha kisusi kuraha?

BAKERE bayugupai sa nga ga yunivasiti ko Australia yo, na kingia basafugo Ziazia Kekeapai, akepai ki yaa: “Gu bakere . . . gamunihe aRomo anaambuhe fu atitayo kumbatayo angia gayo andiko gbiati gu gayo bera nga si naida aboro niraki ringbisihe kuti ndiko.” Ono tie, bakere gamunihe kinaho kiipaha kisusi gure. Gu gamunihe re nga gupai Mbori namangihe tipa ka sa aboro i duna wene pagume naako na kidu na maabangirise ka gbia bata na nyenye unga.

² Mbori afu gi gamunihe re ringbisihe kuti gako rurupai, watadu ruru sarangbanga. Rogo ARomo kapita 5, gu mokedi nangia Pauro aasakanga pa gu ga Yekova andiko nasako ko fu gi gamunihe re te. Ono ko atona fugo na gu fugo nga: “Wa di yo pai ri rani mbiko idapase tie, ani zezeredi na Mbori rogo gaani Gbia Yesu Kristo yo.” Agu aboro nagbia ga Mbori gamunihe re, si nasayo i kpinyemu Mbori a wa ko akpinyemuyo. Pauro nga boro sa dagba aguyo nakpinyemu Mbori. Ko akepai ki yaa: “Ga Mbori nyemuse i niuka ku kpotorani yo be gu Ziazia Toro fu ko ko fu rani.”—Rom. 5:1, 5.

3. Gini asanahe duho ani ka bi akaragapai kuti ni?

³ Tipagine si aidi Mbori fu gi gamunihe re ti ni? Rogo gini gene Mbori afu gu  gamunihe re ngba ruru gene na ngba gu gene nika undo aboro aundo dunduko? Na ginipai si aida aboro mangihe dunduko nibasasa tipa ka re tipa gu gamunihe re? Ani bingo agu akaragapai du kuti agu asanahe re na wai si ayugopa ga Mbori nyemuse.

Ga Mbori Nyemuse

4, 5. (a) Gini bakere gene Yekova ayugu gako nyemuse ngbaha? (b) Ginipai namangi naundo rani ani girogo gupai yo ARomo 5:12 apehe?

⁴ Mbiko ga Yekova bakere nyemuse, ko akedi bangisa Wiriko ko ye ka undo aboro. Pauro agumba gipai re ngba gi gene re: “Mbori amoi dezire gako nyemuse fu rani nikpi Kristo tipa rani wa ani adu ni aboro ingapai.” (Rom. 5:8) Oni berenga kurii gupai gumbayo ho rogo gu veresi re nga: “Ani adu ni aboro ingapai.” Aboro dunduko si aida i ini wai ani ada ni aboro ingapai.

⁵ Pauro agumbapa wai si amangi ki yaa: “Gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro bambiko i aingi ainga du.” (Rom. 5:12) Ani rengbe arengba ka giarogo gipai yo re bambiko pa wai ga aboro raka atona dunduko nikina kekehe. Yekova akusi aboro ue, nangia Adamu na Eva. Bakusirani nga Yekova nirengberengbeko, na kinawo agu atitarani re adu a. Mbori afu ndiko fuyo gbua sa na ki ya fuyo wee ka i kuo gu ndiko te, sangbanaha ngia kpio. (Bam. P. 2:17) Ono tie, i adibera ka kuo ga Mbori ndiko, gure kini yugu gupai nga i aima ka ko nigayo Barundiko na Bakere Gbia.—Pa Rug. 32:4, 5.

6. (a) Tipagine awiri Adamu akpi ti ni mbata fu Mbori fu aNdiko fu Moize na tingbafuoho? (b) Gine rengbe ani ka ringbisaha kuti gu kere kaza boro adiaha ti avunguni?

⁶ Adamu avungu agude ko naima da niboro ingapai, ko kini fu ingapai fu awiriko na asangbanaha dunduko. Kina rengo du ngaha nga awiri Adamu aakuongo ga Mbori ndiko wa bayo na nayo te; na gu regbo nangiaha re, Mbori aarungo andiko fu aboro te. (Bam. P. 2:17) Ono wa si avura duwo, i avunguyo na kina ingapai tiyo mbiko bayo na nayo. Si ki tadu were, ingapai na kpio kini zogorago kurii aboro daho Mbori afu andiko ni fu aYisaraere, nga gu nayugu gupai fuyo ziazia nga i angia aboro ingapai. (Oni gedi ARomo 5:13, 14.) Ani rengbe na ringbisapa ingapai kuti gu kaza boro adiaha ti avunguni. Ka si vura du nga kura agude di gu kaza re, agura kinaho rengbeyo arengba ka vungara zanga gu kaza re tira. Ono anga wo duhe tipa ingapai te. Ani dunduko naima dia ingapai ti Adamu, na si du ani akpi akpi ti ni dunduko. Ya mo pai ho narengbe ka undo rani ani dibe gu kere kaza re?

Guhe Mbori Afuhe Rogo Yesu Kristo Yo

7, 8. Wai gu mangaapai nga ga rengberengbe akumba ue akusi asurungbaha nibakiakia?

⁷ Yekova amangipai ninyemuse ki fu guhe narengbe ka sa aboro i dibe ingapai. Pauro asakirogoyo ki yawee Yekova afu guhe re rogo kura rengberengbe kumba yo, nga ue Adamu. (1 Kor. 15:45) Ono gu mangaapai nga ga agu akumba ue re aduna asurungbaha nibakiakia. Wai si aduwo?—Oni gedi ARomo 5:15, 16.

⁸ Pauro ayaa: “Gamunihe a wa tindika te.” Adamu atindika, Mbori ki saringbangako niruruhe sa kpio. Ono anga kinako sa nakpi mbiko gako tindika te. Ziazia Kekeapai nayaa: ‘Dungu aboro akpiki mbiko gu tindika sa re.’ Awiri Adamu dunduko nakpi akpi, bambiko i nga aboro ingapai dunduko. Ono gupai nafu wasa furani nga, gu ue rengberengbe kumba nangia Yesu aye na wenepai. Gini wenepai? Ani nainoho rogo gupai Pauro apehe ki ya ‘diapai rii [aboro dunduko] nga ga unga.’—Rom. 5:18.

9. Ginipai Mbori aamangaha tipa ka diapai rii aboro, a wa gumbayo ho rogo ARomo 5:16, 18?

⁹ Gine nga rogo gu fugo yo nga ‘diapairii’? Gu basafugo Ziazia Kekeapai ani nigumba pako mbata kusayo aya tipaha wee: “Si nga  gu fugo masaku nayugopa gu ariapai namanga nibipa ga boro pagume na Mbori, angianga gu ariapai namanga rogo boro yo ya . . . . Si wa ka i ya Mbori sungu nibasapungbanga, ki dibera tipa gu boro ye yo na ni ku ngbangayo tipa Mbori saringbanga ni tipa gu gbegberepai ya yo ni mangihe. Mbori kini yawee gu boro re aamanganga gbegberepai te.”

10. Ginipai Yesu amangihe nga gu nasa Mbori ko dipai rii aboro?

¹⁰ Gine nasa gupai nga ruru “Basapungbanga zegino dunduko” dipai rii iraira aboro? (Bam. P. 18:25) Gu bambatapai Mbori amangihe nga ka keda bangisa Wiriko ku sende no. Yesu amangi gupai Bako akpinyemuhe nirengberengbehe, ko ki vura gbiatiko na aasada vuru, na kere sawiahe, gbiati kere rungosi. Ko anye niruruko dati kpiko ti ngbunduru ngua-rungosi. (Eb. 2:10) Yesu afu gako rengberengbe unga nimotumo tipa ka kusa, watadu batasa awiri Adamu be ingapai na kpio.—Mt. 20:28; Rom. 5:6-8.

11. Gu motumo Yesu afuhe arengbe arengba na gine?

¹¹ Gu motumo Yesu afuhe re arengbe arengba na guhe paha agbere. Wai si arengbe arengba? Adamu aye na zangarengba gbiati kpio kurii abirioni atitako dunduko. Ka si adu a nga Yesu nangia rengberengbe kumba aidi ka vunga agude, ka ko avungu badungu abirioni rengberengbe agude zanga ingapai tira. * Mbiko gipai re, mbata kusayo, giarogopaiyo adu nga, ga Yesu raka gbiati gu nga ga agu agude ka ko avungura nakusi gu motumo narengbe arengba na guhe Adamu agberesipaha. Ono tie, Ziazia Kekeapai ayanga wee wo si adu te. ARomo 5:15-19 nape gupai nga kpio ‘boro sa’ nafu motumo. Ga Yesu unga arengbe arengba na ga Adamu. Si naida ani naabera kina pa Yesu Kristo sa nigu boro nafu motumo. Aboro ngba arikayo dunduko rengbe ka gbia undahe na unga mbiko gu “manga rurupai” nga ga bangisa boro, nga Yesu, wa ko agisangbaa ki nye niruruko dati kpio. (2 Kor. 5:14, 15; 1 Pet. 3:18) Wai Mbori adiapai rii boro?

Diapairii Mbiko Tumorii

12, 13. Gine nasa Mbori ko dipai rii aboro kini biyo niruruyo?

¹² Yekova Mbori aima ida na gu motumo tumorii Wiriko afuhe. (Eb. 9:24; 10:10, 12) Ono tie, ga Yesu abawiriki, kodihe na gako amokedi, anye kindi nikpakpa aboro auru kpotosende ane. Wa i avura kaa asadatiyo ka he manga irairapai, i aamanga irairapai amanga. Tipagine? Bambiko i aima dia ingapai ti atitayo. (Rom. 7:18-20) Ono Mbori arengbe arengba ka mangapai sa gupai re, na ko aima mangaha. Ko aidi na gu “motumo” Yesu afuhe ki idi ka mangasunge nani ka undo gako amoyambu.

 ¹³ Anga Mbori amangisunge na ga Yesu motumo ka undo amokedi na kura aboro a mbiko gupai nga i amangi weneapai amanga tipa ka re tipaha te. Ono Mbori amangihe wo mbiko gako inapai na nunga. Ko adibera ka dia gu sapangbanga kusayo nadu rii amokedi na kura aboro, kini biyo ni agu aboro naadianga ingapai ya. Pauro agumba gipai re ziazia ki yaa: “Oni abati mbiko undahe mbiko idapase; mbiko roni tigaoni te, ga Mbori gamunihe du.—Ef. 2:8.

14, 15. Gini mosoro Mbori amoihe fu agu aboro ko adiapai riyo, ono ginipai si aidi i mangihe tipa ka gbia gu mosoro re?

¹⁴ Oni berenga pa gu gamunihe Mbori afuhe nga ka mbupai fu boro ti gu ingapai i avunguni na kinaha na gu ni namangihe! Mo arengbanga ka ino bange aingapai wai boro amangihe mbata fu da ni nikristano te; ono mbiko ga Yesu motumo, Mbori rengbe arengba ka mbupai ti agu aingapai re dunduko. Pauro ayaa: “Gamunihe aye mbiko dungu tiandika sa diapari.” (Rom. 5:16) Si aidi agu amokedi na kura aboro i adipai riyo niirisi ndikidi Mbori kindi niidapase. Kini moi bangiriyo tipa gini mosoro? “Agu yo nadia ba undahe ku gume na gu gamunihe nga rurupai ki kindo na unga mbiko gu boro sa nga Yesu Kristo.” Nirengo, gu gamunihe nga rurupai namangasunge kia ti ingapai. Agu aboro nagbia gi gamunihe re nagbia unga.—Rom. 5:17; oni gedi Ruka 22:28-30.

¹⁵ Agu aboro nagbia gi gamunihe re, nga kadu ni agu aboro Mbori nadipai riyo, i nada ni agu awiri Mbori mbediyo yo nitoro. I nazingisayo bekpio i ga ku ngbangbaturu yo ka zogarago ni abakindo na Yesu Kristo.—Oni gedi ARomo 8:15-17, 23.

Ga Mbori Nyemuse Tipa Kura Aboro

16. Gini gamunihe rengbe agu aboro duna maabangirise ka raka auru kpotosende ka gbiaha zavura awere?

¹⁶ Anga agu aboro dunduko duna idapase na kini mangisunge niruru aKristano namaabangiriyo ka zogarago ni abakindo na Kristo ngbangbaturu yo te. Badunguyo duna maabangirise wakina gu ga Mbori amoyambu naraki mbata fu rago aKristano. I namaabangiriyo ka raka nyeanye kindi auru kpotosende. Ya mo Mbori rengbe ka biyo niruruyo zavura awere? Ringbisihe kuti gupai Pauro akehe fu aRomo, karagapai nga ii!

17, 18. (a) Wai Mbori abi Abarayama mbiko gako idapase? (b) Tipagine Yekova abi Abarayama ti ni niruru boro?

¹⁷ Pauro afura tipa boro nangia bangua kpiapai, nga Abarayama, nga gu boro idapase naraki mbata fu Yekova fu andiko fu aYisaraere na bakuru kusayo mbata fu Kristo zaki gene ku ngbangbaturu yo. (Eb. 10:19, 20) Ani nagedapai tipa Abarayama nga: “Bambiko gu kidohe Mbori afu he fu Abarayama na ngbatungako ya zegino adu ni gako, si adu nga mbiko rugute te, ono mbiko ko aidi pa Mbori, Mbori ki ya ruru boro nga ko.” (Rom. 4:13; Yak. 2:23, 24) Mbori aya ti Abarayama ruru boro nga ko.—Oni gedi ARomo 4:20-22.

¹⁸ Gure ayugongo gupai nga Abarayama ahe manga ingapai wa ko aairiso Yekova te. Ko aadunga niruru boro ngba gu gene re te.

(Rom. 3:10, 23) Ono tie, Yekova angere nigako bakere tatamana ki bi ga Abarayama bakere idapase gbiati agu apai ko amangihe

mbiko idapase. Abarayama aima duna idapase a tipa gu ‘tunga’ si adu nga si nika ye rogoko yo. Gu Tunga re akuru nga Masiya, watadu Kristo. (Bam. P. 15:6; 22:15-18) Sidu tie, mbiko ‘gu tumori du rogo Kristo Yesu yo,’ bakere Basapungbanga nga Yekova arengbe arengba ka mbupai ti agu aingapai aboro amangihe mbata fu Yesu fu motumo tumorii. Sidu, Abarayama gbiati gu kura ruru aboro naraki mbata fu rago aKristano nika zinga azinga bekpio.—Oni gedi ARomo 3:24, 25; Tam. 32:1, 2.

 Oni Du Niruru Boro Bangiri Mbori Awere

19. Tipagine gu bipai Mbori adu nani tipa Abarayama afu wasa ti ni furani?

¹⁹ Gupai nga Mbori nyemuse aya ti Abarayama rur u boro nga ko nafu wasa afu fu gu ndikidi aKristano du areme. Yekova aabingo ko niruru boro kina wai ko abi agu aboro ko ambedayo niziazia toro i duni “adikumbo na Kristo” te. Aguyo du nikina beteyo re gu nga “ziazia yo” na Mbori nadiayo ni awiriko. (Rom. 1:7, NW; 8:14, 17, 33) Ono tipa Abarayama, ko ada ‘nibadiangba Mbori,’ na gure adu mbata fu Yesu fu motumo. (Yak. 2:23; Yes. 41:8) Na ginipai du tipa gu ndikidi aKristano duna maabangirise ka raka rogo vovo Paradizo auru kpotosende?

20. Ginipai Mbori akpinyemuhe be agu aboro ko abiyo areme niruruyo, a wa ko aabi Abarayama?

²⁰ Agiyo re agbianga gu “gamunihe nga rurupai” kini moibangiriyo ka ga ku ngbangbaturu yo ‘mbiko gu tumori du rogo Kristo Yesu yo’ te. (Rom. 3:24; 5:15, 17) Ono wa vura duhe wo, i na bakere idapase kuti Mbori na kuti gu motumo ko afuhe, na i nayugopa gayo idapase rogo wene mangaapai yo. Wenepai sa i amangaha nga ‘tungusapa ga Mbori ngbii, na kini yugupai tipa Gbia Yesu Kristo.’ (Amo. 28:31) Sidu tie, Yekova nabiyo niruru aboro, watadu agu aboro adunga pai riyo ya, a wa ko aabi Abarayama. Gu gamunihe agu aboro re agbiaha awere, nga bakure na Mbori, si kia ti gu ‘gamunihe du gbua’ mbedimbedi aKristano agbiaha. Ono wa vura duhe wo, i nadia gu gamunihe re na bakere tambuahe.

21. Wai ani agbia undo mbiko ga Yekova nyemuse na rurupai?

²¹ Ka si du nga oni namaabangironi ka raka nyeanye kindi auru kpotosende, oni ini ya Yekova du nika fu gu unga re furoni angianga kungbo bazogo nga ga zegino ni ya. Bakere Bakindo du namangi ringbisapai tipa ani gbia nyenye unga. Yekova ima manga dungu apai tipa ka digiso gu gako ringbisapai re. Ko mangi agi apai re dunduko ringbisihe kuti gako rurupai. Na gu susi gure nga, ko mangihe mbiko gako bakere nyemuse. Si du Pauro aya ti ni wee: “Mbori amoi dezire gako nyemuse fu rani nikpi Kristo tipa rani wa ani adu ni aboro ingapai.”—Rom. 5:8.

[Gu rukutu kekeapai du bandu kpewaraga yo]

Oni Natingidaha?

• Awiri Adamu adi gine beko umbo, na sangbanaha kingia gine?

• Wai i afu gu motumo narengbe arengba na guhe Adamu agberesipaha, na wai si arengbe arengba?

• Gu gamunihe nga diapairii fu gini maabangirise furoni?

[Asanahe nga ga wisigopai]

Oni Natingidaha?

[Gu sura du ti kpewaraga 21]

Gu rengberengbe kumba nangia Adamu aingipai. Gu ruru kumba nangia Yesu ki fu “motumo” narengbe arengba nani

[Gu sura du ti kpewaraga 23]

Wene pangbanga nga, Mbori rengbe arengba ka birani niruru aboro mbiko Yesu!