“Oni Mbú Ti Ga Mbori Rimbasa Akandoro Du Dagba Roni”

“Oni mbú ti ga Mbori rimbasa akandoro du dagba roni, nimangi sunge barumbatayo, mbiko du oni ni zizi roni kuti ni te, ono ni nyemuhe.”​—1 PET. 5:2.

1. Gini kerepai aKristano adu rogoho ho Petero ake gako bambata waraga ni?

GU MOKEDI nangia Petero ake gako bambata waraga mbata fu gu bazogo Roma nangia Nero tona ka rungosi aKristano. Ko akehe tipa ka ngarasa aidipase. Bakitingbanga ‘aata ata,’ kini gbata gene ka rita aKristano. Tipa aKristano rengbe ka ru nyanyakii kutiko, si aidi i ‘duna rugatise’ na ki ‘umbasi tiyo kutii gu nyanyaki be nga ga Mbori.’ (1 Pet. 5:6, 8) Si aidi i du a nikpamiakpamiayo. Si adu nikerepai fuyó i ‘nirunduku tiyo kini riti tiyo,’ bambiko ka si asa gupai nga i ‘nyasi anyasa kusayo.’​—Gara. 5:15.

2, 3. Da si aida ani naasovura kuti ní, na gini apai ani ka wisigoho?

² Apai tipa rani areme wakina gure. Bakitingbanga nagbata amomu tipa ka rita rani. (Yugo. 12:12) Na fuo regbo ngbutuko, “bakere gberãngbi nikadu, wa zegino aenge da awere si adu nga wo te.” (Mt. 24:21) A wa si aidi agu aKristano nadu rogo bambata sa kama agarã bandatiyó ti papaya dagbayó, kinawo a si aida ani mangihe areme. Kura aregbo kinaho si aida abaakumba undo rani aundo tipa ani mangi gipai re.

³ Ani wisigingo wai rengbe abaakumba ka kiiso gayó tambuahe tipa gu momu nga ga mbuti “ga Mbori rimbasa akandoro.” (1 Pet. 5:2) Fuo gure, ani nika wisigo gu wene gene rengbe abaakumba ka mbuti akandoro ngbaha. Rogo gu papara kekeapai ngbe fuo gere, ani nika wisigo wai rengbe agu aboro du rogo dungurati kaa berãpa ‘aguyo namanga nyanyaki sunge dagbayó’ kini ngerekurii akandoro. (1 Tesa. 5:12) Pa wisigo ani agi apai re nika undo rani ani ru nyanyakii fu bakere Vurarani, ki ini gupai nga ko du ani asovura kutiko.​—Ef. 6:12.

Oni Mbuti ga Mbori Rimbasa Akandoro

4, 5. Wai si aida abaakumba naabi akandoro? Oni funga kpiapai tipa gipai re.

⁴ Petero azungodi agu abaakumba nadu dagba agu aKristano nadu rogo bambata sa kama agarã i duna gu bipai nga ga Mbori tipa gu rimbasa akandoro i amoiyo i ningere fuora. (Oni gedi 1 Petero 5:1, 2.) Wa Petero avura duwa gu boro nga songodi dungurati, ko aafuranga fu agu abaakumba re si kidu wa ko pako akii ti gayó te. Ono ko aruguyo wa agu aboro nadu wakina ko a. (Gara. 2:9) Riigbu Bipasunge nazungodi abaakumba areme i duna gu sino berã nadu ti Petero wa i aʹasadatiyo ka manga gu sunge nga ga mbuti ga Mbori akandoro.

⁵ Petero ayawee abaakumba ‘mbuti ti ga Mbori rimbasa akandoro.’ Si adu ninyanyakipa pai fuyó i ini gupai nga, gu rimbasa akandoro re, ga Yekova na Yesu Kristo ra du. Si adu nga i nika ringbisa patiyo aringbisa fu Mbori nibi wai i angerafuo gako akandoro. Ani bingo kpiapai: Ka si du nga wene bakurearoni sana roni oni ngerefuo awirini ho adunga ní ni kporo ya, ya mo oni ngerenga fuo awirini wenengai na kini rigiyo te? Ka guru awoka sa, ya mo oni asadingo ka gbata ngua furu te? Wakina gure a, si naida abaakumba “rígi ga Mbori kanisa nga gu ko angbe ni kureko.” (Amo. 20:28) Si naida i nitingidi gupai nga, agu akandoro re dunduko nibasasa i  angbera na kure Kristo Yesu. Si nika sayo i naariga akandoro, kini bandara, na kini ngerefuo ra.

6. Gini apai agu ababanda akandoro nadumbata anaamangaha?

⁶ Oni berẽnga pa gu sunge ndikidi ababanda akandoro anaamangaha ti agu aregbo i aake Ziazia Kekeapai. I anaahi faa uru na gu zere nga ga yuru tipa ka ngerafuo gayó akandoro. (Bam. P. 31:40) I animoi gayó unga a ngba pai tipa ka batasa akandoro. Gu gude nangia babanda akandoro nangia Davide abatasi gako akandoro be anyarinde, kodihe na bahu gbiati urusi. Davide azi agu anyarinde re ‘ti kina maingbara, ki nari ra, ki imi ra.’ (1 Sam. 17:34, 35) Nairiwo gu wingbaduse re! Ko aima mbeda na ngba nyarinde gbe! Ono ko aagundenga ki he batasa kandoro te.

7. Wai rengbe abaakumba ka tuka kandoro ngba bahu yo?

⁷ Areme, si naida abaakumba naangera angera tipa gu zubohe nga ga Bakitingbanga nga gu duwa ga bahu. Kura aregbo kinaho si aida i mangipai amanga nyanyakii tipa ka tuka kandoro ngba Bakitingbanga yo, si kidu wa ka i zi nyarinde ti maingbaru. Si rengbe ka ida i sakipai asaka na agu awirina naima mbeda ka zio ti ga Satana agbina tipa ka undoyo. (Oni gedi Yuda 22, 23.) Ono abaakumba namanga gipai re nigu undo nga ga Yekova. I namanga gu kandoro hõ ninyemuse, kini vodi gani aoro na kini uka gu nzeme nga Fugo Mbori kuti ni.

8. Wari abaakumba aundo aboro i nye ni, na tipagine?

⁸ Agu ababanda ndikidi akandoro nadumbata anaandu na ami a koyo du wene fogo nvuo ni na ime. Wakina gure a, abaakumba naundo akandoro i nye rogo dungurati, kini ngarasiyo i naaye tipa adunguratise dedede tipa wa ka i ri gu riahe wenengai nakura “ti ragoho.” (Mt. 24:45) Kura aregbo kinaho abaakumba adia regbo adia nibakerehe kuti undo agu aboro nawoka rogo toro yo tipa i di gu riahe du rogo Fugo Mbori yo. Si rengbe kadu nga gu kandoro ingi, u naʹasada tiru aʹasada ka karaga tiru fuo rimbasa akandoro. Abaakumba abanga gunde ti ngbatunga gu boro  re te, ono gupai i amangaha ka sakarogo agu arugute yo nga ga Ziazia Kekeapai funi ninyemuse na ki yugu wai funi rengbe ní ka mangasunge nani rogo gani raka.

9, 10. Wai si aida abaakumba mangi agu aboro nawoka rogo toro yo?

⁹ Ho mo naawoka ni, gini ngbatunga munganga mo naaida ka bi ní? Guni nadia regbo na mo gbua tooni ka giapa gamo kaza ní kini kepa zigaha nibasa tipa ka gbiso niipo sa kura borokaza? Watadu guni nadia regbo adia na mo wenengai tipa ka giapa gamo kaza, ki saki gupai foro rengbe ka ye na gamo kaza re, na ki gumba agu apai rengbe ka husaha?

¹⁰ Wakina gure a, si naida abaakumba gi agu apai dunduko gu boro nawoka rogo toro yo agumbaha na ki undo ní ka husa gani aoro, gure kidu wa i ‘nauka nzeme ku auru ni nirimo Gbia.’ (Oni gedi Yakoba 5:14, 15.) Wakina gu tome ngua nga ngua kaza Girada yo, Fugo Mbori rengbe ka husa gu boro nawoka. (Yere. 8:22; Yeze. 34:16) Agu arugute nga ga Ziazia Kekeapai rengbe ka undo gu boro nawoka ní hu rogo toro yo. Nirengo, abaakumba namanga wenepai amanga ho i agia agu apai ni nga ga gu boro nawoka i ki kpari na ní.

Mbiko Du Oni Nizizi Roni Kuti Ni Te, ono Ninyemuhe

11. Gine nafõngbadu abaakumba yo i naambu ti ga Mbori rimbasa akandoro ninyemuhe?

¹¹ Petero agumbapa wai a si aida abaakumba naamanga sunge mbuti akandoro na wai si aidanga i naamangaha ya. Si naida abaakumba mbuti ga Mbori rimbasa akandoro angianga ‘mbiko du yó niziziyo kuti ni ya, ono ninyemuhe.’ Gine nafõngbadu abaakumba yo i naaundo awirina ninyemuhe? Si nga kina gu bangisapai nasa Petero ko mbuti ga Yesu akandoro na kini rigi ra. Gu banguapai nasako nga nyemuse tipa Gbia. (Yo. 21:15-17) Mbiko nyemuse, abaakumba ‘niungayo fu tiyo te, ono fu guko nakpi tipa yó.’ (2 Kor. 5:14, 15) Gi nyemuse re, kodihe na nyemu Mbori gbiati nyemu awirina, nasayo i naamangasunge ka undo akandoro, ki fu omeyo tipaha, na gayó ahe, gbiati gayó regbo. (Mt. 22:37-39) I namangaha wo angianga wa i niziziyo kuti ni ya, oni ninyemuhe.

12. Wai Pauro afutiko ka mbuti akandoro?

¹² Si naida abaakumba futiyo wai tipa gi sunge re? Si naida i wiriki gu mokedi nangia Pauro, a wa ko awiriki Yesu. (1 Kor. 11:1) Wa ko gbiati kura amokedi aduna bakere nyemuse tipa agu awirina nadu Tesaronike yo, anga kina ‘fu ga Mbori wene pangbanga fuyó nangba tiyo sa te, ono fu mbisimoyo a.’ Ho i aamanga ni wo, i adu naayó wesewese, “a wa de namanga pa awiriri.” (1 Tesa 2:7, 8) Pauro aima rugatiko na wai nagude naambu ti awiiri. Ri rengbe na manga ai pai tipa yó, kodihe na gu nga ka guari yuru ka riga yó ka si idihe wo.

13. Gini asunge duho si aida abaakumba nimangihe amanga dunduko wenengai?

¹³ Si aidanga abaakumba futiyo sa kina sunge mbuti akandoro bangiriyo ki go ti gayó aborokporo te. (1 Tim. 5:8) Gu regbo abaakumba adiaha na dungurati nga gu nyanyakipa regbo ka i naadiaha na gayó aborokporo. Gene sa rengbeyó ngbaha kaa manga agu asunge re amanga dunduko wenengai nga, kaa yamba kura aboro ti kura aregbo tipa gu gayó Irisombori Nga ga Aborokporo. Bakumba sa Yapani yo nga Masanao aima digo niyambu agu aboro adunga na abadiarogatise beyo ya gbiati agu aborokporo adunga na bariikporo nga Kristano ya tipa gayó wisigopai nga ga aborokporo. Fuo regbo kusa, bete agu aboro nagbia undo ti gipai re adani abaakumba na kini pekefuo gu wene kpiapai nga ga Masanao.

Oni Ne Gbegberẽ Ũkumuko​—Oni Mbuti Akandoro Niʹidapaha Kpotoroniyo

14, 15. Tipagine si aida abaakumba bandatiyó ti ni ti nyemu “gbegberẽ ũkumuko,” na wai rengbeyó ka wirika Pauro rogo gi bangiriba re?

¹⁴ Petero azungodi abaakumba a ka i mbunga ti akandoro ‘tipa gbegberẽ ũkumuko ya, ono niʹidapaha kpotoyo yo.’ Gu sunge abaakumba amangaha nadia bakere regbo adia,  ono i aberãnga gupai nga i fu marã afu fuyó tipaha te. Petero abihe nga si naida aida ko rugu abaakumba ti mbuti akandoro “tipa gbegberẽ ũkumuko.” Ani nabi gupai areme nga agu abarumbatayo nga ga ‘Bakere Babera’ naraka dodoroma raka baraho badungu gayó aboro araka rungorungo raka ni mbiko yó. (Yugo. 18:2, 3) Si ruaru tie tipa agu abaakumba du areme duna rugatise nyemu gupai re andu ka rimo kurogo yó yo.

¹⁵ Pauro amoi wene kpiapai fu agu aKristano nga abaakumba. Wa ko avurangia mokedi na ki rengbe arengba kadu nibakere tindiro fu agu aKristano nadu Tesaronike yo, ko “ari nga riahe be gu boro gbua a te.” Ono kuba gure, ko “amangi nyanyaki sunge na kenahe.” (2 Tesa. 3:8) Badungu agu abaakumba du ti gi gaani regbo re, kodihe na aguyo nata ata na gayó sunge, i namaa wene kpiapai rogo gi bangiriba re. Wa vura duhe nga i naida aida aboro di yó kugume, i amaanga bakere tindiro kurii boro te.​—1 Tesa. 2:9.

16. Gine nga mbuti akandoro ‘niʹidapaha kpotoseyo’?

¹⁶ Abaakumba nambuti rimbasa akandoro ‘niʹidayo paha kpotoyo yo.’ Ani naino gupai nga i ima idapaha ti gupai nga, i nambu kura gayó apai ambu tipa ka undo akandoro. Ono tie, i amanganga akandoro ngbaome i irisi Yekova te; na i angarasanga akandoro i mangisunge fu Mbori niʹabaangira te. (Gara. 5:26) Abaakumba ima ino gupai nga akandoro nibakiakia ti akurara. I na nyemu ka undo awirinayo i naairiso Yekova na ngbarago.

Ka Oni Dunga ni Abazogo Ya ono Nikpiapai

17, 18. (a) Tipagine si adu ti ni nikpakarapai ti kura aregbo fu amokedi i girogo gu ga Yesu yugopai yo nadu tipa umbasitise? (b) Ginipai rengbe kadu areme tipa rani wakina gure?

¹⁷ A wa ani nabihe, si naida abaakumba duna gupai berãyo yo nga, agu akandoro i ambu tira nga ga Mbori ra, angianga gayó ra ya. Si aidanga i ‘du ni abazogo aguyo i aʹasia payo fuyó te.’ (Oni gedi 1 Petero 5:3.) Ti kura aregbo, ga Yesu amokedi aidi rimoyo niwo. I aidi kadu wakina agu abazogo nga ga zegino yo, kini idi rimoyo niwo.​—Oni gedi Marako 10:42-45.

¹⁸ Areme, agu awirina ‘nagbata sunge babipai,’ si ngbaangba i wisigi ndu gupai i agbataha ti ni. (1 Tim. 3:1) Agu aboro duni abaakumba awere rengbe arengba ka sana tiyo singia i na nyemu pagbia watadu worimo a wa kura amokedi nadumbata adu nani. Ka si du nga si adu nikpakarapai fu amokedi i ne gupai re, si naida agu abaakumba du awere ini gupai nga si naida aida i asaditiyo nyanyakii tipa ka ne gu bipai nga ga du na pagbia kurii aboro.

19. Ginipai si aida abaakumba tingidihe ho i amangapai ni ka banda akandoro?

¹⁹ Kura aregbo kinaho si naaida abaakumba mangipai amanga na ome, wa ho i abanda akandoro ni be “awaru.” (Amo. 20:28-30) Pauro aya fu Tito wee ko ‘nizungadi aboro niruguyo na tandu.’ (Tito 2:15) Ono wa vura duhe wo, zavura ho si aida abaakumba mangipai ni wa gure, si naida i irisi gu boro airisa i afura na ní. I rugutiyo na gupai nga, kuba gupai nga ka bisira ní gbegberẽe, gupai ngba nga i mangi ní zezeredii mbiko si nika sani pai zi ngbaduniyo na ki mbu gbegberẽ gene.

20. Wai rengbe abaakumba ka wirika Yesu nimaa yó wene kpiapai fu akandoro?

²⁰ Ga Yesu wene kpiapai nafõngbadu abaakumba yo i kpinyemu akandoro. (Yo. 13:12-15) Ani nagbia bakere ngbarago ho ani agedapa wai ni ko ayugupai fu gako abawiriki i  nitungusipai wenengai na kini sa aboro ni abawiriki. Gako umbasitise afõngbadu gako abawiriki yo i wiriki ko nidu yó na ‘umbasitise nga ga berã kini berẽ gupai nga akurayó ngba susi yó.’ (Frp. 2:3) Areme a, ga Yesu gene mangaapai nafõngbadu abaakumba yo i peke gako kpiapai, na kidu ‘nikpiapai fu rimbasa akandoro.’

21. Gini mosoro abaakumba amaabangiriyo tipaha?

²¹ Petero adigisi gako rugute fu abaakumba na kidohe tipa kumbatayo. (Oni gedi 1 Petero 5:4.) Agu abaakumba nga mbedimbedi akandoro ‘nika dia gu kpakpari taarimo apayanga ya’ ngbangbaturũ yo na Kristo. Agu abaakumba nga “kura akandoro” nika ngbembatayo fu akandoro kurogo vovo zegino tiibe gu zogarago nga ga “baira ababanda akandoro.” (Yo. 10:16) Gu kekeapai naye fuo gere nika sakapa agu agene rengbe agu aboro du rogo dungurati ngbaha ka songoda agu aboro i namoi yó i naangbembatayo.

Fugöpai

• Tipagine si adaada ti ni fu Petero ko rugu abaakumba i naambu ti ga Mbori rimbasa akandoro?

• Wai si aida abaakumba naambu ti agu aboro nawoka rogo toro yo?

• Gine nafõngbadu abaakumba yo i naambu ti gu ga Mbori akandoro du tiibeyo?

[Asanahe nga ga wisigopai]

[Gu sura du ti kpewaraga 25]

Wakina agu ababanda akandoro nadumbata, si naida agu abaakumba du areme banda “akandoro”