Oni Wirikipai Rogo Fugo Mbori Yo

Tipagine Mbori Ambugene ti ni fu Gbegberẽ Apai na Arungo?

Gi kekeapai re nasakapai tipa agu asanahe dungu aboro naamakiaha berãyo yo na si nayugo bara akaragapai kuti agu asanahe re rogo Ziazia Kekeapai. ADezire Yekova nikadu na ngbarago ka wisigo agi akaragapai re na oni.

1. Wai gbegberẽpai aenge?

Gbegberẽpai aenge auru kpotosende ho Satana agumba bambata ziree ni. Satana aadunga nigbegberẽ boro ho i akusi ko ni te. Ko angia rengberengbe maraika, ono ko “anye nga na rengo te.” (Yoane 8:44) Ko asonosi nyemu gupai rogoko yo nga i nifu iriso fuko nga gu narẽ tipa kina Mbori sa. Satana agumba ziree fu bambata dee nangia Eva, na ki zomia ri ri gisangbako kuba giasangba Mbori. Adamu angbe na ri rogo basasangba Mbori a. Sangbana ga Adamu diaberã angia rungo na kpio.​—Oni gedi Bambata Pai 3:1-6, 17-19.

Ho Satana aya ni Eva basasangba Mbori, ko aidi ri samungu kuti ga Mbori bakere pagbia. Dungu aboro koditiyo na Satana ka soga gupai nga Mbori du nigayo Bazogo. Satana kini da ‘nibakindo zegino.’​—Oni gedi Yoane 14:30; Yugoti 12:9.

2. Ya mo Mbori akusi aboro watadu amaraika na gbegberẽpai tiyo?

Agu aboro na amaraika Mbori amangiyo aduadu na rengba beyo ka ndu kuti ga Mbori arugute. (Pa Fu Rugute ni Ue he 32:5) Mbori amangi rani ki fu gu ranirii furani nga ga siapai dagba wenepai na gbegberẽpai. Gu ranirii re nasa rani ani yugu gaani nyemuse tipa Mbori.​—Oni gedi Yakoba 1:13-15; 1 Yoane 5:3.

3. Tipagine Mbori nambu arungo ti ni?

Natona ti gu samungu nadu ati Edene yo, Yekova mbugene fu gu samungu du kuti gako bakere pagbia. Tipagine mbuko gene ti ni? Ko ambugene tipa ka yugoho nga boro ho rengbe ka zogarago ngba gani ome si ki fu undo fu aboro zanga ga Mbori ome te. (Yeremaya 10:23) Tingbafuo agu agarã 6,000 aboro narakihe, si ima yugotihe gbaiga nga ka aboro zogonga tiyo nisayo te. Agu abazogo nga awiri aboro arengbanga ka nyasariipa vura, gbegberẽ mangaapai, iraira sarangbanga, na kaza ta.​—Oni gedi Batungusipai 7:29; 8:9; ARomo 9:17.

Gu bakparakparapai du ho nga, agu aboro idi Mbori nigayo Bazogo, i nagbia undo agbia. (Yesaya  48:17, 18) Barambeda, Yekova nika nyasariipa agu azogarago nga ga awiri aboro. Kina agu aboro sia Mbori nigayo Bazogo nika raka auru kpotosende.​—Yesaya 2:3, 4; 11:9; oni gedi Daniere 2:44.

4. Gini momu ga Mbori zerangbaduse afuhe?

Satana aya ka boro nyenga niruruni fu Yekova te. Ga Mbori zerangbaduse nafu momu furani ani yugu singia ani naida Mbori nigaani Bazogo watadu awiri aboro. Ani nayugo gaani siapai rogo gu gene ani araka ngbaha.​—Oni gedi Eyobo 1:8-11; Asanza 27:11.

5. Wai du ani asia Mbori nigaani Bazogo?

Ani nasia Mbori nigaani Bazogo ho ani agbata ndikidi irisombori ni na kini mangihe nga gu narurii Fugoko, nga Ziazia Kekeapai. (Yoane 4:23) Na ani nane kodatise kurogo agu apai nga ga biri-zogarago na vura, a wa Yesu amangihe.​—Oni gedi Yoane 17:14.

Satana namangasunge na gako pagbia ka sonosa wasiwasi gbegberẽ apai. Ho ani asoga ngbatunga gu gene raka ni re, kura abakurearani na agumerani rengbe arengba ka sawia rani watadu ka soga rani. (1 Petero 4:3, 4) Sidu, si naida ani mangi siapai. Ya mo ani akodatirani na agu aboro nakpinyemu Mbori? Ya mo ani amangapai kuti gako andiko nga ga nyemuse? Ka ani mangihe wo, ani yugu gupai nga, ziree du Satana agumbaha nga boro ho ka gisangba Mbori te.​—Oni gedi 1 AKorindo 6:9, 10; 15:33.

Ka oni aida ka ino kura apai, oni bi kapita 11 nga ga gi buku re, aDezire Yekova akusihe.

[Gu sura du ti kpewaraga 12]

Adamu amangi gbigbita diaberã

[Gu sura du ti kpewaraga 13]

Gaani diaberã nayugo singia ani naida Mbori nigaani Bazogo