Oni Mbedi Na Mbori

“Yekova Nga Babandare”

ONI bingo gu sura du ti gi kpewaraga re. Ya mo oni bi wai du gu kandoro re nibandabanda ru ti ngbadu bairaru? Rogo Atambuahe 23, Ziazia Kekeapai mangisunge na gu masaku du tipa babanda akandoro na gako akandoro nga gu narukuba wai Yekova angera fuo airisiko. Ko naida ani gbia ngbatunga gu bandahe agu aboro agbiaha duwa bake Atambuahe nangia Davide, nga guko nayaa: “Yekova nga babandare.”​—Veresi 1.

Bake gi bia atambuahe re angia Davide, naangerafuo akandoro ho ko aduni nigude. Ko aima ino agu apai si aidaha tipa akandoro na gu sunge du rii babanda akandoro. Davide, nga gu boro Mbori aima bandako rogo gako raka, ake gupai i ayambaha nga “bia nga ga kido.” Rimo Mbori nga Yekova rogo gu bambata veresi nga ga gu bia re na rogo yangara veresi. (Veresi 1, 6) Agu afugo du bangbandaha napepa agene biata nga gu Yekova angera ngbaha fuo gako aboro wa babanda akandoro naangera fuo gani akandoro.​—Atambuahe 100:3.

Yekova nangbe fu gako akandoro mbatayo. Ka akandoro du zanga babandara, ami nainga ainga. Wakina gure a, ani naida undo aida tipa ka ndu ngba ruru gene rogo gaani raka yo. (Yeremaya 10:23) Yekova aya fu Davide wee, ko ngbe fu gako aboro kumbatayo kurogo “wesewese banambu” na “kupati ruru ime.” Ko nangbe fuyó “ku mbata yo ngba gene rurupai.” (Veresi 2, 3) Gipai re nayugo gupai furani nga ani rengbe arengba kadu naa kido kuti Yekova. Pa peka ani fuo ga Mbori rugapai nga gu du rogo Ziazia Kekeapai yo ima rengba ka sarani ani gbia gu gene raka nika mbiisa gaani nyemuapai, ki zambuasi rani, na ki banda rani.

Yekova nabanda gako akandoro. Ho adunga babanda akandoro ni ya, ami nagunde agunde na kini ngbuo angbuo. Yekova naya fu gako aboro wee ka i gunde ya, zavura ho i ‘ata rogo ngbungumu kirima kpio’ ni vurũ, nga agu aregbo du raka nigbegberẽhe fu boro gbe. (Veresi 4) Yekova nasinziri yó asinziri, na ko ti aregbo dũ na nyemu ka undoyo. Ko ima rengba ka fu tatamana fu airisiko na ome tipa i sovura kuti gu fudifudiapai i agbiatiyo nani.​—AFiripoio 4:13; Yakoba 1:2-5.

Yekova nariga gako akandoro. Akandoro naagbia riahe sa kina mbiko baira ra. Ani na zingo agu ariahe nga ga toro nga gu kina Mbori sa narengbe ka mbiisaha nigako undo. (Matayo 5:3) Ani na tambuahe mbiko Yekova nga bagamu wene ahe nambakada ariahe kpaima rii mbisa fu gako amoyambu. (Veresi 5) Ziazia Kekeapai na agu awaraga duwa gi oni agedaha re nga mburu agu ariahe nga ga toro rengbe ka mbiisa gaani gomoro ani ini ndu gupai ani araka ti ni na ga Mbori ringbisapai tipa rani.

Davide adu nibandabanda ko, na ko aima ino gupai nga ka ko nye mbembedi i na Yekova, ko bi ga Gako bandahe abi ‘wa du ko ni ungako.’ (Veresi 6) Ya mo oni naida ngbatunga gu bandaha re? Kangia wo duhe, oni wiriki wai rengbe oni ka mbeda na Yekova. Ka oni mangihe wo, oni rengbe ka bi tironi nibandabanda roni rogo gu bee nga ga Bakerepa Babanda akandoro, nga guko nangbe mbatayo fu aguyo nanye niruruyo fuko, kini bandayo, na kini rigiyo.​—Yesaya 40:11.