Umbasitise nga zanga kiisopatise watadu rukö. Boro umbasitise abingo kura aboro naapa yó kusende te. Gu kpakpa boro duna umbasitise, si naida ní du na ruru bipai tipa tiní na ki inipa gaani azangarengba.

Moize aadunga na rukö ho i afu pagbia ni fuko te. Dedede, ho i afu pagbia ni fu boro, si nayugo tihe nikina ipo singia umbasitise tiní watadu si tiní te. Bakeapai sa naraki rogo bawe na ribua kama agarã nangia Robert G. Ingersoll ayawee: “Badungu aboro rengbe arengba ka hi rungosiro. Ono ka mo aida ka ino sino boro nzunzu, mo funga pagbia funi.” Moize aima maa wene kpiapai nga ga umbasitise rogo gipai re. Rogo gini gene?

Yekova afu bakere pagbia fu Moize nga ko ngbembatayo fu aYisaraere. Wa si avura duwo, Moize aambunga gu pagbia ko adu nani re si sako niirarukö te. Nikpiapai, ani makianga gu gene ko amangipai ngbaha tipa gu nyanyakipa sanahe nakuru tipa ũkumbo. (Pa Geda Aboro 27:1-11) Gi diaberã re aduna nyanyakipaha bambiko anga kina agu adee nasanahe re sa ka si adu na ome kuriyo te, ono kurii kura aboro a kumbatayo.

Ginipai si aida Moize mangihe? Ya mo si aida ko berẽhe nga wangia ko bangbembatayo fu aYisaraere, ko ima rẽ ka diaberã tipaha? Ya mo si aidi ko kido kina kuti gako birĩ, gako bakere inohe, watadu pa inoko Yekova wenengai?

Isoke ka si angia irarukö du naadu, ka ní aima mangaha wo. Ono Moize amanganga ha wo te. Ziazia Kekeapai naya furani wee: “Mose ki ndu na gayo pai ku bara bangiri Yekova.” (Pa Geda Aboro 27:5) Oni berẽnga kurii gipai re! Wa Moize avura ngbembatayo fu aYisaraere tipa agarã 40, ko akidongo kina kuti tiko te ono kuti Yekova. Si ziazia nga Moize aima duna bakere umbasitise.

Moize aaberãnga gupai nga kina ko sa si aaida ko duna pagbia beko te. Ko angi ho Yekova aidihe ni fu kura aYisaraere i du ni anebi naako wa sa. (Pa Geda Aboro 11:24-29) Ho gbioko afu gu berãpai ni fuko nga ko sia akumba i niiundo ko ti sunge, ko amangipai kuti gipai re nibasa. (Gate 18:13-24) Wa ko avura du kindi nyanyaki ti kpotoko, ho ko aambeda ni ka kpi, ko asana Yekova ko sia boro kubako. Ho Yekova asia Yosua ni, Moize aundoko wenengai, na ki zungodi aboro i degetuyo fu Yosua wa ko angbe fuyo mbatayo kurogo Ringara Mokido. (Pa Geda Aboro 27:15-18; Pa Fu Rugute ni Ue he 31:3-6; 34:7) Nirengo, si adu nimomu fu Moize ko ngbembatayo fu aYisaraere rogo irisombori. Ono ko aaperesanga kina pa gu pagbia ko adu nani kisusi pa gu du wenengai nga ga aboro te.

Si aidanga ani mbu pagbia, watadu gu birĩ du ani nani si sarani ni airarukö te. Ani tingidi gupai nga: Tipa Yekova mangisunge na ani, padu ani na umbasitise nga guhe du na nyanyakipaha kisusi gaani birĩ inohe. (1 Samuere 15:17) Ho du ani ni na ndikidi umbasitise, ani namanga asadatise tipa ka mangasunge na gu rugute nga ga Ziazia Kekeapai nayaa: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya.”—Asanza 3:5, 6.

Ga Moize kpiapai nayugo gupai furani nga, si aidanga ani peresi kina pa gu bangiriba watadu gu pagbia du ani nani kisusi te.

Ya mo ani nagbia undo ti wirika ani gu ga Moize kpiapai nga ga umbasitise re? Zanga kapa, ani nagbiaha agbiaha! Ho ani asonosa gu sino ni nga ga umbasitise, ani nasa raka si du taata fu agu aboro du pati rani na si nasarani ani ngba bangiriyo. Gu nyakipaha anyaka gbe nga, ani nangba bangiri Yekova Mbori nga gu boro nayugo gi wene sino re. (Atambuahe 18:35) “Mbori naka fu aboro rekangose, ono ko nafu undahe fu agu yo naumbasi tiyo.” (1 Petero 5:5) Nairiwo gu wene gopai du berani ka wirika ga Moize kpiapai nga ga umbasitise re!