1, 2. Gini apai du tipa rani ni bakiakia rogo gaani ngbadimo akporo na gu gene ani aini rengo ngbaha?

YEKOVA naatona mburu gu mbakadapai nga ga maakporo. (Ef. 3:14, 15) Ono tie, ka si vura du nga ani dunduko asono kina rogo ngbadimo kporo sa, asino rani ni bakiakia na agu apai du tipa rani. Si rengbe kadu nga mo atona ka raka na avunguro tona kinaho mo adu ni gude. Gu kura aboro kinaho avunguyo aima kpi be kaza, béno, watadu gu kura kerepai. Ono tie, kura aboro kinaho ainongo avunguyo ya.

² Wa du ani ni agu aboro nairiso Yekova, agu agene ani aini rengo ngbaha ni bakiakia. Si rengbe kadu nga mo ‘asono ku rogo rengo,’ a wa gu kura aboro naapehe, na avunguro ki ima yugo gu bangua arugute nga ga Ziazia Kekeapai foro. (Pa Rug. 6:6, 7) Watadu mo rengbe kadu dagba agu akutu aboro ini rengo mbiko gu tungusapai nga ga ga Yekova amoyambu.—Rom. 10:13-15; 1 Tim. 2:3, 4.

3. Ginipai du tipa rani dunduko?

³ Wa vura duhe nga ani dunduko na apai tipa rani ni bakiakia,  apai kinaho nakoda rani. Ani dunduko narungo be surungba ga Adama basasangba na ani dũ nadi ingapai na kpio tiko. (Rom. 5:12) Ono wa vura duhe wo, wangia ani airisi Yekova, ani nayambako a nga “Barani.” Yesaya 64:8 afura tipa ga Yekova siasia aboro naadu mbata ki ya: “Ako Yekova, ono mo nga Barani.” Kurigure, Yesu atona gako kpee na agu afugo nga: “Barani du ngbangbaturũ yo, Ani írisi rimoro airisa.”—Mt. 6:9.

4, 5. Wa ani kaa wisigo pa kio gaani tambuahe fu Barani nga Yekova, gini nyanyakipa apai si aida ani wisigipai tipaha?

⁴ Gu Barani du ngbangbaturũ yo, ko nangerafuo rani na kini banda rani wa ani ayamba rimoko rogo idapase yo. Ringbisihe kuti Bake papara Atambuahe, Yekova aya: “Bambiko wa ko [ndikidi irisi Mbori] aka kuti re ni nyemuse, si du mi abátasa ko ti ni; mi abánda ko, bambiko ko ini rimore.” (Tam. 91:14) Nirengo, Yekova Mbori nabatasa rani be avurarani na kini banda rani ka i nyasingo riipa rani ya.

⁵ Tipa ka kiiso gaani tambuahe fu gu Barani du ngbangbaturũ yo, ani wisigingo pai tipa nyanyakipa apai biata: (1) Barani nga bagamu ahe furani. (2) Yekova nga babanda rani. (3) Na Mbori nga wene bakurearani. Wa ani nikaa wisigo agi apai re, si adu ni wenepai ka ani berẽkurii gaani pagume na Mbori na ki bi wai rengbe ani ka irisa ko wa Barani. Si aundo rani a gbe ka ani berẽkurii agu amaku Yekova nika fuhe fu agu aboro nambeda na ko.—Yak. 4:8.

6. Rogo gini gene Yekova afu ‘wene agamahe dunduko’ ngbaha?

⁶ Yakoba aya: “Wene gamahe dunduko, na ziazia ũgamahe dunduko i nagama ha, si naye ari yo du Ba ni, nga Bafu aimarago, adu nga na satise ti ko ya, na kirima satise a ya.” (Yak. 1:17) Unga nga wene gamahe be Yekova. (Tam. 36:9) Ka ani aamangasunge na gaani raka tipa manga gupai ko akpinyemuhe, ani nika gbia maku ni bakerehe awere na kidu na maabangirise tipa nyenye unga rogo vovo zegino. (Snz. 10:22; 2 Pet. 3:13) Ono wai rengbe gipai re ka manga wa du ani na ga Adamu ingapai tirani?

7. Wai Mbori azakigene furani tipa ani du na wene pagume na ko?

⁷ Dungu agene duho Yekova agamahe furani ngbaha. Ni kpiapai, gako weneringise arẽnga aboro tipaha ya nasa gupai nga ko nibanda rani. Nirengo, ani dunduko nga aboro ingapai wakina Adamu nangia bambata bavungu rani. (Rom. 3:23) Wa vura duhe wo, mbiko ga Yekova nyemuse, ko amangi ome tipa ka zaka gene furani wa ka ani du na wene pagume na ko. Gu mokedi nangia Yoane aya: “Gi i ayugu ga Mbori nyemuse tipa rani ti ni re, nga Mbori akedi bangisa Wiriko ku zegino, ani du ni ungarani mbiko ko. Gi nga nyemuse re, nga nyemu Mbori adu nga ti rani te, kina rani du nyemurani ti ko, ko akedi Wiriko ko du ni motumo gaani ingaapai.”—1 Yo. 4:9, 10.

8, 9. Wai Yekova adu nga Bagamu Ahe ti regbo Abarayama na Yisaka? (Oni bi gu sura du ti tonatonaha.)

⁸ Rogo 19 kama agarã M.B.K., agu agopai nga ga sangbanebi atona ka yugo wai ga Yekova wene agamahe fu aboro giasangba nika manga tipa nyenye unga. AEbere 11:17-19 naya: “Mbiko idapase Abarayama atumo ni Yisaka, ho i aasadi ko ni, ii, gu ko nadi akidohe ni ngbarago ti ko, kina ko natumo ni bangisa wiriko; nga kina gu ko i aya fu ko wẽ, ‘rogo Yisaka yo i ka yamba ngbatungaro ni.’ Ko ki idi he ya Mbori rengbe na zingisa boro, zavura kpio vurũ a; kina yo ko adi ko ni berewe ni sanza.” Si akpakaranga ka bi gu wiratise du dagba gipai re te. Yekova afu Wiriko nga Yesu  Kristo ko kpi tipa aboro dunduko.—Oni gedi Yoane 3:16, 36.

⁹ Nairiwo gu ngbarago Yisaka adu na ni tipa ka bi gupai nga ko bati be kpio! Zanga kapa, ko aima tambua Mbori tipa fuko gu kandoro i aimi ru kubako. (Bam. P. 22:10-13) Si du nga gupai rimo gu ba re ada ti ni nga “Yekovayire,” du rogoyo nga “Yekova Nika Gamaha.”—Bam. P. 22:14.

10, 11. Ada nangbembatayo rogo ‘gu mangapase nga zeresapai,’ na wai du i amangaha?

¹⁰ Wa ani kaa berãkurii pa wai du Yekova nga Bagamu Ahe, si naida ani bi gu nyanyakipa pai Yesu Kristo amangihe nga gu Pauro afura tipaha ki ya: “Bambiko ani naya wẽ, boro sa akpi tipa yo dunduko, si du i akpiki tie ti ni dunduko; ko akpi tipa yo dunduko, ya agu yo du ni ungayo ka i du nga ni ungayo fu tiyo ya, ono fu gu ko nakpi tipa yo ki zingi berewe.”—2 Kor. 5:14, 15.

¹¹ Mbiko gu nyemuse agu aKristano naadu mbata adu na ni tipa Mbori na gu bakere tambuahe i du na ni tipa gu momu naadu tipa ka mangasunge fuko, i adi ‘gu mangapase nga zeresapai’ kugume. Gayo sunge tungusapai na sunge sa aboro ni abawiriki azakigene fu agu aboro naadu na wene ngbaduyo yo i mbedi na Mbori na ki du na wene pagume na ko na ki da ni awiriko rogo toro yo. Areme, kina gu bangisapai sunge re mbedimbedi aKristano amangaha. Gu sunge i amangaha wa amokedi fu Mbori na fu Yesu nasaha taata fu agu aboro du na wene ngbaduyo yo i mbedi na Yekova na ki da ni aidipase.—Oni gedi 2 AKorindo 5:18-20; Yo. 6:44; Amo. 13:48.

12, 13. Wai rengbe ani ka yugo na ni nga ani na tambuahe tipa agu agamahe nga ga Yekova?

¹² Mbiko gu tambuahe du aKristano na ni tipa du Yekova nga Bagamu Ahe, aguyo dunduko du namaabangirise ka raka auru kpotosende natungusapai sa mbedimbedi aKristano. Rogo gi sunge re, ani namangasunge na Ziazia Kekeapai nga gu kura wene gamahe Mbori afuhe. (2 Tim. 3:16, 17) Ka ani mangisunge na Fugo Mbori ngba wene gene ba tungusapai yo, ani fu momu afu fu kura aboro i gbia nyenye unga. Ani dunduko nakido kuti gu kura ga Mbori gamahe nga ziazia toro tipa ka manga gi sunge re wenengai. (Zek. 4:6; Rk. 11:13) Surungbaha ima du ni bawenehe, a wa ani naabihe rogo gu buku nga Yearbook of Jehovah’s Witnesses. Nairiwo gu momu du ani na ni tipa ka manga gu sunge nataasarimo Barani re!

¹³ Nibi gu weneapai dunduko Mbori namangihe furani, si naida ani sana tirani nga: ‘Ya mo mi namanga bakere ome gene tungusapai yo tipa ka yugo gu bakere tambuahe du mi na ni fu Yekova tipa gako agamahe? Wai rengbe mi ka mbakada gimi gene tungusapai na ki da ni wene batungusi wene pangbanga?’ Si naida ani yugu gaani tambuahe tipa ga Mbori agamahe ni maa ani agu apai nga ga Kindo mbatayo rogo gaani raka. Ka ani mangihe wo, Yekova nikafu agu ahe afu furani ani azingo tipaha. (Mt. 6:25-33) Wa duhe nga nyemu rani ti Mbori, si naida ani mangi ome tipa ka manga gupai ngbatiko.—Snz. 27:11.

14. Wai du Yekova nibatasi fu gako aboro?

¹⁴ Davide aya: “Mi ni rungorungo re na zingoahe a; Yekova naberã pa re, mo nga gi moundo nga batasire.” (Tam. 40:17) Yekova aima digo nibatasi gako aboro wa du yo ni badona, gbe ti agu aregbo avurayo arungosiyo na kini fudi yo. Nairiwo gu tambuahe ani nidu na ni ti ngbatunga agu regbo re na tipa gu kura dungu agamahe nga ga toro ko naafuhe furani dedede!

15. Oni penga gu kpiapai nayugo wai rengbe bagude ka banda ru.

¹⁵ Gu baagude du na nyemuse nagama ahe fu awirini na kini gbata gene tipa ka bandayo. Ko ima rengba ka batasa yo ka si du nga kurani ho rogo kerepai. Kura wirina natingida gupai namangi mbuko kindi ni wiri gude. Ko ayego na bako gene tungusapai yo i ki bi gupai nga ime ima hi be gu mai naana rogo gu uru re. Gu yangara gene i arengba ka si ngbaha ku mbitiyo angia ka guka rii kindigi ambia. Wa ko apere mbatayo fu bako, nduko azerenge rii mbia ko ki ti ku ime yo na ki rindo bara ue. Nairiwo gu ngbarago gu gude re adu na ni tipa ka bi gupai nga bako aziko pagoroko na ki batasi ko ka ko rindo kutii ime yo ya! Gu Barani du ngbangbaturũ yo ima rengba ka batasa rani be gu kereapai du rogo gi gbegberẽ zegino re na be bazogoho nga Satana. Yekova nga wene Batasi, kura boro ho berewe wa ko ka ani ndu fuo ní te.—Mt. 6:13; 1 Yo. 5:19.

16, 17. Wai Yekova aundo na ki banda aYisaraere ti gu regbo i asovura na Amareko?

¹⁶ Ga Yekova wene bandahe ni yuguyuguhe rogo gu gene ko batasi aYisaraere be sunge kanga Ezipeta yo na wai ko aundo yo i asi Zamba Baime rogo gu garã nangia 1513 M.B.K. Fuo nduyo rogo gu ngbakungbo nga ga Bagangara Sinai, i ada Refidimi yo.

¹⁷ Nibi gu sangbanebi du rogo Bambata Pai 3:15, Satana aima du na bakere nyemu ka gbata momu tipa ka zubo aYisaraere. Ko amangisunge na Amareko nangia avura ga Mbori aboro. (Geda 24:20) Oni bingo gupai Yekova amangihe vurube gu ruru akumba nangia Yosua, Moize, Arona,  na Uru. Wa Yosua asovura kuti Amareko, Moize, Arona, na Uru aru kina mbedimbedi na ko. AYisaraere anidu na ome ba vurayo ho Moize anaatumba beko ni kuari. Ho beko anaazora ni, Arona na Uru anitumba beko kuari. Wo du si adu, na mbiko ga Yekova undo na bandahe, “Yosua ki imi Amareko na gako aboro.” (Gate 17:8-13) Moize adua bamotumo yo na ki yambu rimoho nga “Yekova nga gi bendere.”—Oni gedi Gate 17:14, 15.

18, 19. Gini bandahe Yekova nafuhe fu gako amoyambu ti gi gaani regbo re?

¹⁸ ekova nabanda agu aboro nakpinyemuko na kini gisangbako. A wa si adu tipa aYisaraere Refidimi yo, ani nangera ku be Mbori tipa ko banda rani ho ani agbia tirani ni na avurarani. Yekova ima banda rani wa du ani ni badona, na ko nabanda rani kindi be Satana. Oni berãnga kina bara wai Mbori abanda agu awirinarani na kakuti padu yo ni ruru yo fu Mbori. Gere nangia gupai namangi ti regbo aNazi Germani yo na rogo gu kura aringara rogo agu agarã nangia 1930 kuti tonatona 1940. Ho ani ageda agu apangbanga du tipa yo ni rogo Yearbook na kini berẽkurii wai Mbori aundo yo ti agu aregbo i arungosiyo, si nanyakasa gaani kido kuti Yekova.—Tam. 91:2.

¹⁹ Yekova nabanda rani ni fuko wene atingidapai furani vurube gako riigbu na agu awaraga gako riigbu akusaha. Ani bingo wai agi atingidapai re naundo rani rogo agu agarã asusi barambeda. Wa duhe nga bakere nyemu kodaba, mbirabuda, na agu ahe nazingisa nyemu kodaba ti aboro nakio kina ku mbatayo rogo gi zegino re, Yekova ima fu atingidapai furani tipa si banda rani na ki undo rani ti agi apai re. Ni kpiapai, ko nafu arugute furani tipa zio gbegberẽ abakure rogo Internet. *—1 Kor. 15:33.

20. Gini undo na bandahe du rogo dungurati?

²⁰ Wai rengbe ani ka yugo na ni nga Yekova ‘nayugopai’ furani? Ani rengbe ka yugoho ka ani adegaturani kuti gako arugute wenengai. (Yes. 54:13) Rogo gaani adungurati, ani nagbia arugute yo na bandahe mbiko ruru akumba kina yo nga abaakumba du tipa ka fu undo nga ga toro furani. (Gara. 6:1) Agi ‘agamahe rogo aboro yo’ re nga agu aboro Yekova amangasunge nayo tipa i nifu agi arugute re. (Ef. 4:7, 8) Si naida gaani karagapai du nga wai? Ka ani gisangbayo na kini mangi gupai i agumbaha Mbori fu maku afu furani.—Eb. 13:17.

21. (a) Ginipai si aida ani diberã tipa ka mangaha? (b) Ginipai ani nika wisigoho rogo gu kekeapai ngbefuo gere?

²¹ Ani dinga berã adia tipa ziazia toro undo rani na ki mbu gu Barani du ngbangbaturũ yo ko ningbe furani ku mbatayo. Si naida ani berẽ a kurii gupai Wiriko nga Yesu Kristo amangihe na ki asadi ka pekafuo gako kpiapai. Mbiko wa ko agisangba daho ko akpi ni, ko aima gbia mosoro tipaha ni bakerehe. (Frp. 2:5-11) Ka ani kido kuti Yekova na ngbaduraniyo dunduko, ani du wa kina ko. (Snz. 3:5, 6) Sidu, ani bingo Yekova abi nga Bagamu Ahe na ni gu Batasi adunga kurani wa ko ya. Nairiwo gu ngbarago na momu du ani na ni tipa ka mangasunge fuko! Gaani nyemuse tipa ko nika sona ni bakerehe ho ani nika wisigo gu biata pai nayugo wai gu Barani re angerafuo rani. Gu kekeapai ngbefuo gere nika wisigopai tipa wai du Yekova ni wene bakurearani.