1. Pa kusa Mbori rani rogo kpiako nafu gini tandu furani?

ABORO naaya dedede wẽ, “ko wakina bako, watadu ko wakina wiriko.” Nirengo, dungu agude niima wira avunguyo. Abaagude gbiati anaagude ninaasa gupai nga gude kuru. Yekova nga gu Barani du ngbangbaturũ yo, ko nga Bafu unga. (Tam. 36:9) Na ani nga agu awiriko nga aboro, ani wiriko awira tooni. Wa duhe nga ko akusi rani rogo kpiako yo, ani na tandu berani tipa ka berãkuriipai na ki da kuti digisopai na ki sonosi wene pagume na ko.—Bam. P. 1:26.

2. Riimburu gine rengbe Yekova kada ni bakurearani?

² Yekova rengbe arengba kadu ni wene bakurearani. Ngbatunga gu pa bakurea re mburuhe rii gu nyemuse du Mbori na ni tipa rani na gu idapase du ani na ni kuti Wiriko. Yesu aya: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yo. 3:16) Dungu akpiapai duho tipa agu aboro naadu na wene pagume dagbayo na Yekova. Ani wisigingo gu ue dagbaha yo.

3, 4. Gini kparakparapai naadu dagba gu pa bakure naadu dagba Abarayama na Mbori na gu nangia ga aYisaraere?

³ Yekova afura tipa gi ruru kumba nangia tita aYisaraere ki  ya, “Abarayama nangia wene badiare.” (Yes. 41:8) Ue Pekapai 20:7 nayamba Abarayama a nga bakurea Mbori. Mburu gi wene bakure naadu dagba gi ruru kumba re na Bakusiko angia gine? Gako idapase naadu.—Bam. P.15:6; oni gedi Yakoba 2:21-23.

⁴ Agu atita Abarayama nangia aYisaraere anaayamba Yekova nga Bayo na ni Bakureayo. Ono tie, si nafu kina gberarago nga i aabandanga gi gayo pa bakure re te. Tipagine? Mbiko i ambu maa gayo idapase kuti agu akidohe Yekova afuhe fuyo.

5, 6. (a) Waigu Yekova ada ni bakureamo? (b) Gini asanahe si aida ani berẽkuriihe?

⁵ Ka mo wirikipai tipa Yekova ni bakerehe, gamo idapase tipa ko nasona na gamo nyemuse. Mo berẽnga kusayo ti gu regbo mo aini gupai nga Mbori nga ndikidi Boro rengbe mo arengba ka zio bakure na ni. Mo awirikipai a nga ani dunduko i abatika rani kina rogo ingapai mbiko ga Adamu basasangba. Mo aye ka ruga tiro na gupai a nga aboro dunduko ima kparatiyo ti Mbori kusayo. (Koro. 1:21) Na mo aye ka ino gupai a nga gu Barani nga boro nyemuse du Ngbangbaturũ yo re, ko na kina nyemu rani tiko. Ho ani awirikapai ni tipa ga Yesu motumo na ki du na idapase kutini, ani natona ka sonosa pagume na Mbori.

⁶ Ho ani angerani kusayo ka bi wai ani aye ka ino Yekova, ani rengbe ka sana tirani nga: ‘Ya mo mi namanga sonakumbatayo rogo gimi pa bakure na ko? Ya mo mi na nyanyaki kido kutiko na ya mo gimi nyemuse tipa ko nasona na aˈuru dunduko?’ Gu kura boro naadu na wene pagume na Yekova mbata kusayo angia Gidiona. Ani wisigingo pai awere tipa gako wene kpiapai na ki bingo gupai rengbe ani ka wirikaha behe.

7-9. (a) Gini iiriwopai namangi fu Gidiona, na sangbanaha angia gine? (Oni bi gu sura du ti tonatonaha.) (b) Wai rengbe ani kadu na wene pagume na Yekova?

⁷ Gu basapungbanga nangia Gidiona amangisunge fu Yekova ti gu kere regbo aYisaraere arimi ku rogo Ringara Mokido. Abasapungbanga kapita 6 naya ga Yekova maraika ayugu tiko fu Gidiona Ofura yo. Ti gu regbo re, aMidiano angia avura aYisaraere. Mbiko gipai re, si asa Gidiona ka ko kpuruwanga nganu ati yo ya ono ba piro imekakue yo mbiko si adu fuko taata tipa ko igi gu nganu re yo. Maraika akuru na ki ya fuko ko nga “nyanyaki boro ni ngangarã” ko. Gidiona asana gu maraika re singia Yekova naabatasi aYisaraere Ezipeta yo nika batasa yo awere. Gu maraika re afura kuba Yekova na ki kido Gidiona nga Yekova nika songoda ko asongoda.

⁸ Gidiona abakibangiriko singia si adu fuko taata tipa “ka batasa aYisaraere be aMidiano.” Ko agbia karagapai be Yekova nibasa naaya: “Ono mi adú na mo ni rengo, mo amánga aMidiano wa boro sa.” (Abasa. 6:11-16) Si nawira wa Gidiona aabakabangiriko tipa wai gipai re nika manga na ki sanahe berewe tipa gu kura yuguyugupai. Oni kparia gupai nga, rogo gi sakapai re, Gidiona aatikango singia Yekova nga ndikidi Boro te.

⁹ Gupai namangi fuo gure anyakasi ga Gidiona idapase na ki mbedisi ko na Mbori. Gidiona amangi riahe na ki fuhe fu maraika. Maraika atai gako ngbondo kuti gu riahe re si ki gbi kusayo, Gidiona kini mo ka bihe nzunzu nga Yekova du nikedi gu maraika re. Gidiona aya: “Ako, so, Gbia Mbori! Ani ngere bangirani na ga Yekova maraika.” (Abasa. 6:17-22) Ya mo gupai namangi re agbarasipa ga Gidiona bakure na Mbori? Wagusa te! Gu kurapai kia si amangihe. Si asako ko ini Mbori na ki bi tiko wa ko rogo pazereda na Mbori. Ani naino gipai re mbiko ko adua  bamotumo rogo gu ba re ki yambu rimoho nga “Yekova nga zereda.” (Oni gedi Abasapungbanga 6:23, 24.) Ho ani aberã ni kurii agu apai Yekova amangaha furani na aˈuru dũ, ani nabiko wa ndikidi bakurearani. Ka ani aakpara fuko dedede, ani nika du rogo pazereda na ko na gaani pa bakure nikaa nyaka kina ku mbatayo.

10. Ringbisihe kuti Atambuahe 15:3, 5, ginipai Yekova aidaha berani ka si du nga ani naida ka du ni abakureako?

¹⁰ Ono tie, tipa Yekova du ni Bakurearani, pai kinaho si aida ani mangihe. A wa duhe ni kekehe rogo Atambuahe 15, Davide abi bia tipa gupai si aidaha berani tipa ani ‘sungu rogo ga Yekova bamburoko,’ nga kadu ni abakurea Mbori. (Tam. 15:1) Ani gbenga berãrani awere kuti agu apai ue si aidaha berani nga mbu gbegberẽ pe rimo na mangaapai dunduko ni ruruhe. Nibi agi apai re, Davide afura tipa gu boro naida ka sungo rogo ga Yekova bamburoko ki ya: ‘Ní agbarasanga rimo boro te, ní adia nga marã mabirimo be ruru boro a ya.’—Tam. 15:3, 5.

11. Tipagine si aida ani ne perimo aboro ti ni?

¹¹ Davide afu zahe rogo gu kura Atambuahe ki ya: “Mo bánda mirãro ti gbigbitapai.” (Tam. 34:13) Ka ani adeganga turani kuti agi arugute re ya, si rengbe ka gbarasa gaani pagume na gu Barani du ngbangbaturũ yo. Nirengo, gbegberẽ pe rimo nga sino vura Yekova nga Satana. Gu rimo nga “Bakitingbanga,” si rogo pa-Giriki nga gu boro “nape ziree.” Si naida ani du na rubangirise tipa agu apai ani apehe fu awirinarani na agu ani apehe barayo, manga anihe wo rengbe ka banda gaani pagume na Yekova. Kina gu bangisapai re si aida ani mangihe a na abaakumba rogo dungurati.—Oni gedi AEbere 13:17; Yuda 8.

12, 13. (a) Tipagine si aida ani pe rengo ti ni rogo apai dunduko? (b) Wai rengbe gaani ruru mangaapai kadu na ome kurii kura aboro?

¹² I naino ga Yekova amoyambu ti pe rengo. Gu mokedi nangia Pauro aya: “Oni kpári tipa rani, bambiko ya ani tigaani ani na wene sangba kpoto yo, nikpi nyemu ka sunga na rurupai rogo apai dunduko.” (Eb. 13:18) Wa duhe nga ani diberã tipa manga “rurupai rogo apai dunduko,” si aidanga ani mangi fu awirinarani nga aKristano gbegberẽ te. Ni kpiapai, ka si du nga i namangasunge furani, si naida ani mangi fuyo wenengai ringbisihe kina kuti gu giatise ani amangihe nayo. Wangia ani aKristano, si naida ani mangisunge ni ruru rani na gaani abaira sunge na gu kura aboro dunduko a. Kangia wirinarani nga Kristano di rani tipa sunge, si aidanga ani bihe nga si naida ní naamanga apai furani kia tigaani te.

¹³ Wo ani naagia wene afugo bara aDezire Yekova ngba agu aboro namangasunge nayo abasunge yo. Ni kpiapai, kumba sa naaruga pa sunge rogo gu kura basunge sa aima ino gupai nga aDezire Yekova naape rengo. Ko aya: “Oni naamanga kina gupai oni agumbaha dedede.” (Tam. 15:4) Ngbatunga gu sino re naundo rani tipa ani banda gaani pagume na Yekova. Kurigure, si nafu taarimo fu gu Barani du ngbangbaturũ yo.

14, 15. Wai rengbe ani ka undo kura aboro i da ni abakurea Yekova gene tungusapai yo?

¹⁴ Wa vura duhe nga gu dungu aboro ani agbiayo gene tungusapai yo naya Mbori kina ti ni, anga i dunduko nabiko wa ndikidi boro te. Wai rengbe ani ka undo yo? Ani bingo agu arugute Yesu afuhe fu gako abawiriki naadu 70 ho ko akediyo ni i ndu ka tungusapai. Ko aya: “Ka oni ndú nga ngba ga  aGendiria gene ya, ka oni rími nga ku rogo bakporo nga ga aSomorono wa sa ya; Ka gu irazereda du yo, gaoni zereda anye yo du ni ni; si ngia ni yo te, si ayéga fu roni berewe.” (Rk. 10:5, 6) Ani rengbe ka ye na aboro ku rogo rengo ni manga ani fuyo wenengai. Ka ani gbiatirani na asogorani, si rengbe ka zeresa ngbaduyo yo na ki zaki gene tipa i degetuyo furani.

¹⁵ Ho ani agbia gu boro ni du na gani pambori watadu guni napefuo agu asino andunga kuti Ziazia Kekeapai ya, si naida ani du funi wa abakure na kini fura zezeredi. Ani nidu na ngbarago ka dia agu aboro kugume nagbata gene tipa ka iriso Mbori mbiko i abingo wenepai ti gu vovo apai namanga dagba aboro awere te. Gu kekeapai nga “Ziazia Kekeapai Rengbe Arengba ka Aria Gaoni Raka” nafu dungu akpiapai furani tipa gipai re.

16. Rogo gini gene du ani nga abakurea Mbori na ni gako “abadiasunge”?

¹⁶ Agu aboro ninaamanga sunge sa, i nidu na wene ngbanya dagbatiyo. Agu aboro kpara gayo raka fu Yekova i nga abakureako na ki du a ni gako “abadiasunge.” (Oni gedi 1 Akorindo 3:9.) Nirengo, ka ani aatungusapai na kini sa aboro ni abawiriki, si nika sarani ani du na bakere inohe tipa gu wene asino nga ga gu Barani du ngbangbaturũ yo. Ani nabi wai abi gako ziazia toro aundo rani tipa ani mangisunge tungusa wene pangbanga wenengai.

17. Agu ariahe nga ga toro ani agbiaha ti regbo kikindigi adunguratise, wai si ayugo gupai nga Yekova nga Bakurearani?

¹⁷ Ka ani aatungusapai ni bakerehe, si nika mbedisa rani koyo du Yekova ni. Ni kpiapai, ani nabi wai abi Yekova aká na avurarani ka i rugusinga sunge tungusapai ya. Oni berẽnga bete agarã kusayo. Ya mo ani abingo wai Yekova aundo rani te? Kina iriworago ninaazio rani ka bi wai ko afu gu riahe nga ga toro furani kpaima. Gaani kikindigi adunguratise nayugo wai Barani aberã parani rogo nyemuse yo nibi agu akpakarapai na azingo du tirani. Kura aborokporo ake waraga ka tambuahe tipa bakere dunguratise ki ya: “Gu dunguratise re aima zio ngbaduraniyo. Ani ima inoho nga Yekova nakpinyemu rani ni basasa na ko naida ani du na diabese dunduko.” Fuo arogotise sa Germani yo ndu tipa bakere dunguratise ku Ireland yo, i ayugu gayo tambuahe tipa wai awirina adi yo kugume na ki ngerefuo yo ki ya: “Gaani bakere tambuahe nandu fu Yekova na gako Bakindo nga Yesu Kristo. I yambu rani tipa ani du ni papara gu rikaaboro du ni kodikodi yo rogo gi zegino re. Ani afunga tambuahe kina tipa kodatise sa te, ono ani rogoho na aˈuru dunduko. Agu apai namangi furani pati gi bakere dunguratise naadu  rogo gu gbata nga Dublin re nikaa tingida rani ti aregbo dunduko na gu momu du ani na ni tipa ka mangasunge fu Mbori wa sa na awirinarani.”

18. Ginipai si aida ani sana tirani na ni nibipa fugo na Yekova?

¹⁸ Gu nyemuse du dagba abakure nakio ho i afura ni wenengai dagbatiyo. Areme, dungu aboro namangasunge na Internet dedede gbiati kekeda waraga rogo terefuni. Ono ya mo wo du ani naafura na wene Bakurearani nga Yekova? Nirengo, ko “ninagia kpetambuahe!” (Tam. 65:2) Mo naafura na ko bara wai?

19. Kangia si ima kpakara furani tipa ani pe agu apai du kpotoraniyo fu Yekova, ginipai rengbe ka undo rani?

¹⁹ Si ima kpakara fu kura ga Mbori amoyambu i pe agu apai du kpotoyo yo fu Mbori. Ono wa vura duhe wo, gere nga gupai Yekova aida ani mangihe ho ani akpara ni fuko. (Tam. 119:145; Ga So. 3:11) Ka si vura du nga si ima kpakara furani ani peke agu apai du ngbaduraniyo, kurapai kinaho rengbe ka undo rani. Pauro aya fu agu aKristano naadu Roma yo wẽ: “Ani aina nga waĩ ka ani akpara te; ono kina Ziazia Toro ni tiko nakpara tipa rani niukaga ome nga gu ka i agumba nga ha agumba ya. Gu ko nawisiga kpoto yo ko ini ga Toro berã, bambiko ko nakpara tipa ga Mbori aboro ku sangba berã Mbori yo.” (Rom. 8:26, 27) Ka ani aberãkurii agu afugo du ni kekehe rogo agu akitabu nga ga Ziazia Kekeapai nga Eyobo, Atambuahe, na Asanza, si rengbe ka undo rani ani ini wai ka pe agu apai du kpotorani yo fu Yekova.

20, 21. Gini wasa ani agbiaha ti agu afugo Pauro du rogo AFiripoio 4:6, 7?

²⁰ Ho du ani rogo fudifudiapai, ani mangisunge na agu arugute Pauro afuhe fu Afiripoio ki ya: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe.” Ka ani afura wa gure na wene bakurearani, si rengbe kafu wasa furani mbiko Pauro aya: “Gu zereda nga ga Mbori nagasi rugatinapai dunduko, si abánda kpotoroni yo na gaoni berã rogo Kristo Yesu yo.” (Frp. 4:6, 7) Ani bingo gu “zereda nga ga Mbori” abi na nyanyakipa ha mbiko si rengbe ka banda kpotorani yo na gaani berãpai.

²¹ Kparakpee naundo rani tipa ani du na wene pagume na Yekova. Sidu, “ka oni pirigi nga ti kpara kpe ya.” (1 Tesa. 5:17) Gi wisigopai re nyakasingo gaani pagume na Mbori gbiati gaani diaberã tipa kaa raka ringbisihe kuti agu apai ko aidaha berani. Na ani dinga regbo adia tipa ka berãkurii agu amaku ani agbiaha mbiko wa du Yekova ni Barani na ni Bakurearani.