1, 2. (a) Gada rogatise nika ye na ngbarago ngbangbaturũ yo? (b) Gini asanahe nakura?

MBAKADATISE tipa rogatise nadia bakere regbo. Ono ani nika gbeberã rani awere tipa kparakpara rogatise, gu nga ga abakindo. Oni berẽnga kina berẽberẽ paha! Si ima dia agarã wa 2,000 wa i adigi nimbakadi tise tipaha. Regbo nambeda wa pai tipa badidee di diako. Wene amanzigo nika tona ka paya awere ngbanga kua Bakindo yo, na gu rimbasa aboro du ngbangbaturũ yo nika bibia ni ya: “Areruya! Bambiko Gbia nga gaani Mbori , du na tandu apai dũ, ko nazoga rago. Ani ngí angi ki du na bakere ngbarago, ani táasi rimoko, bambiko gu rago diade nga ga Wiri Kandoro da, diako aima mbakada tiri.”—Yugo. 19:6, 7.

² Gu “Wiri Kandoro” gako rogatise nika ye na ngbarago ngbangbaturũ yo re nga Yesu Kristo. (Yo. 1:29) I nayambako wai tipa gi rogatise re? Da nga gu dee nadia kumba re? Wai gu i nambakadi ri tipa rogatise? Gini regbo gi rogatise re nika manga ti ni? Gi rogatise re nika ye na ngbarago ngbangbaturũ yo, ya mo agu aboro du na maabangirise ka raka nyeanye kindi auru kpotosende adu na ngbarago a? Ani na nyemu ka inopai tipa  agu akaragapai du tipa agi asanahe re wa ani nikaa wisigo Atambuahe 45.

3, 4. (a) Gu roko rogatise nga ga Badidee wai, na ginihe nasa gupai nga ko du na ngbarago? (b) Ada nga “awiri abakindo nga ade” gbiati abakure Badidee nangi na ko?

³ Oni gedi Atambuahe 45:8, 9. Badidee nga Yesu Kristo vo gako roko abakindo nga ga rogatise. Si daada tie ka ya, gako roko nafũ wakina gu wene fuo nzeme nga ga “bawene fuõngua” duwa mure na kinanona, nga gu naanidu dagba agu angua i anaambakada ziazia nzeme nga ga mbeda aboro na ni ti regbo aYisaraere.—Gate 30:23-25.

⁴ Gu wene manzigo napaa ngbangbaturũ yo kua bakindo yo re nasa gupai nga badidee du na ngbarago wa gako pumbo diadee ambeda. Abakurea bakindo a nga agu aboro narukuba gu ga Yekova riigbu du ngbangbaturũ yo, i nangi sa na ko, kodihe na “awiri abakindo nga ade” nga amaraika. Wene afugo ngbarago napaa ngbangbaturũ yo niya: “Ani ngí angi ki du na bakere ngbarago, . . . bambiko gu rago diade nga ga Wiri Kandoro da”!

5. Da nga “dia Wiri Kandoro”?

⁵ Oni gedi Atambuahe 45:10, 11. Ani ima fura tipa badidee, ono da du nga gu dee ko aida ka diari re? Ri nga gu badona nga ga mbedimbedi aKristano du a ni agu aboro du rogo dungurati du Yesu Kristo ni bariihe. (Oni gedi AEfeso 5:23, 24.) I nika da ni papara ga Masiya Kindo. (Rk. 12:32) Gi mbedimbedi aKristano du bangeyo nga 144,000 re, i “naapeka Wiri Kandoro ku ho ko andu ku ho ni dunduko.” (Yugo. 14:1-4) I nada ni “dia Wiri Kandoro,” na ki sungu na ko ngbangbaturũ yo nga kpuko.—Yugo. 21:9; Yo. 14:2, 3.

6. Tipagine furayo ti ni tipa mbedimbedi aKristano nga “awiri bakindo nga de,” na tipagine duhe ti ni nga bangiriyo go ti gayo aboro?

⁶ Gu dee i nika diari re, i nayamba ri nga “wiri bakindo nga de.” (Tam. 45:13) Danga gu “bakindo” re? Yekova aima dia mbedimbedi aKristano ni ‘awiriko.’ (Rom. 8:15-17) Wadu he nga i nika da ni gu dee i nika diari ngbangbaturũ yo, i naruga yo nga: “Pa gamo aboro gó ti ro na pa ga bamo kporo a.” Si adu nga i moiberã yo “ti agu ahe du ari yo, ti agu ahe du sende no te.”—Koro. 3:1-4.

7. (a) Waigu Kristo adigi nimbakadi gu dee ko nika diari? (b) Gu dee i nika diari re nabi Badiri wai?

⁷ Tipa kama agarã, Kristo aima digo nimbakadi gi dee ko nika diari re tipa gayo rogatise mangi ngbangbaturũ yo. Gu mokedi nangia Pauro aya Kristo “akpi nyemu kanisa a, ki fu tiko tipa ha. Ko naziasi he, ko nagirisi he ni gu zundahe nga ga ime na pai, ko fu kanisa fu tiko ni taataa kanisa, ka wiri he adu nga ti ni na ngbadua na ngbatunga gu he wa sa ya; kina du he adu ziazia ki zanga sirõ.” (Ef. 5:25-27) Pauro aya fu gu mbedimbedi aKristano naadu Korinda yo wẽ: “Mi nade ringo roni ni gu deringo du na sino Mbori, mbiko mi apazua roni fu kumba sa, mi yugu roni wa ziazia ngasu de fu Kristo.” (2 Kor. 11:2) Badidee nga Yesu Kristo na tambuahe tipa gu ‘wene ngbaya’ nga ga toro nga ga gi dee ko nika diari re. Na gi dee re nabiko nga gari “gbia” na kini ‘irisiko’ ni gu kumba ri nika diako.

8. Tipagine daha ada ti ni ka sakapai tipa gu dee i nika diari nga ri “ni taasitaasi ri”?

⁸ Oni gedi Atambuahe 45:13, 14a. Gu dee i nika diari re “ni taasitaasi ri” rogo gu roko rogatise nga ga abakindo. Rogo Yugoti 21:2, i ringbisi gi dee re kuti gu gbata  nga Vovo Yerusarema, “i afongo ri nikadia kumbari.” Gi gbata du ngbangbaturũ yo re “na ga Mbori iiriwo taarimo ti ni” na si nakiko “wa mbia, kii pa genoho gbe, wa yasipi, wa ngenzerengenzere pusi mbia.” (Yugo. 21:10, 11) I sakipai tipa wai ngba gi Vovo Yerusarema re rogo gu kitabu nga Yugoti. (Yugo. 21:18-21) Gere nga ndu gupai bake papara Atambuahe aya ti ni wẽ ri “ni taasitaasi ri.” Nirengo, gi diadee nga ga bakindo re nika manga ngbangbaturũ yo.

9. Da nga gu “bakindo” i aye na dee fuko, na i vodiri wai?

⁹ Gu badidee i naye na dee fuko re nga Bakindo Masiya. Ko aima digo nimbakadi ri, ‘nigirisi ri ni gu zunda he nga ga ime na pai.’ Ri “ziazia ki zanga sirõ” tiri. (Ef. 5:26, 27) I vodi gi dee ko nika diari re wenengai a tipa pumbo. Na nirengo, ri ima voda tiri wenengai! Nirengo, “gari roko du ni tutu he na giri dahabu,” na i “nagasa ri ku bara bangiri bakindo na gu roko i arungu he ni dondidondi he.” I fura tipa gu rogatise nga ga Wiri Kandoro nga, i “asia ha fu ri ya ri ukadi tiri ni nzaranzara pusi remu, ni imaima ha ni gigiri he a” bambiko gu pusi remu re nga gu ruru mangaapai nga ga ga Mbori aboro.”—Yugo. 19:8.

10. Gini regbo ga Wiri Kandoro rogatise nika manga ti ni?

¹⁰ Oni gedi Yugoti 19:7. Gini regbo gu rogatise nga ga Wiri Kandoro nika manga ti ni? Wa vura duhe nga “diako aima mbakada tiri” tipa rogatise, gupai peyo ho tipa ri afuranga nzunzu tipa ndikidi rogatise te. Kuba gure, si nafura tipa gu yangarapai nika manga ti regbo bakere gberãngbi. (Yugo. 19:11-21) Ya mo gere nayugo gupai nga gi rogatise re nika manga mbata fu Badidee nga Bakindo digisi diabe avurako? Oó. Gu yuguyuguapai du rogo Yugoti, si ni tangaratangaraha ti genehe nzunzu te. Rogo Atambuahe 45, gi rogatise nga ga bakindo re namanga fuo Yesu Kristo nga Bakindo tapa gako basape ku padimoko ki ndu ka diabe avurako.—Tam. 45:3, 4.

11. Rogo gini agene Kristo nika digiso gako diabese ngbaha?

¹¹ Ani rengbe ka ya wẽ agi apai re nika tangaraha tihe wa gere: Bambata pai nga, i nika sapangbanga “debari” nga Bakere Babera nga bariwara ngbii zire pambori. (Yugo. 17:1, 5, 16, 17; 19:1, 2) Fuani, Kristo nika sapangbanga ga Satana gbegberẽ zegino re na ki gbarasihe ti regbo Aramegido nga “gu vura nga ga gu bakere rago nga ga Mbori, nga gu ko du na tandu apai dũ.” (Yugo. 16:14-16; 19:19-21) Ni yangaraha, gu Basovura nga Bakindo re nika digiso gako diabese ni kiisoko Satana na gako adaimona ku rogo gu due zanga mburuhe i ki du wakina agu aboro niima kpi adunga sunge tiyo ya.—Yugo. 20:1-3.

12, 13. (a) Gini regbo gu rogatise nga ga Wiri Kandoro nika manga ti ni? (b) Ada nika du na ngbarago ngbangbaturũ yo tipa ga Wiri Kandoro rogatise?

¹² Gu mbedimbedi aKristano nakpi ti gi regbo du Kristo na ome kindo beko re, i naga nibasa ku ngbangbaturũ yo. Si nawira wa fuo gbarasayo Bakere Babera, Yesu nika dungura yangara mbedimbedi aKristano ku ngbangbaturũ yo. (1 Tesa. 4:16, 17) Mbata fu tona Aramegido, agu aboro dunduko nga papara gu ‘dee i nika diari’ re nika du ngbangbaturũ yo. Fuo nyasa vura, gu diadee nga ga Wiri Kandoro ki mangi. Nairiwo wai gu regbo re ni kangia regbo ngbarago! Yugoti 19:9 naya: “Aboro maku nga agu yo yambu yo yo sa gu pumbo diade nga ga Wiri Kandoro.” Nirengo, agu aboro du bangeyo nga 144,000 re nika du na bakere ngbarago. Na Badidee nika du na ngbarago kisusi tipa ka bi gu rengberengbe namba nga ga akurako  abakindo i nasungu ‘niri riahe ki nimbiri he pati gako mbisa rogo gako ngbii.’ (Rk. 22:18, 28-30) Ono tie, anga kina Wiri Kandoro na agu aboro nika du na ko nika du na ngbarago sa te.

¹³ Awa ani nibihe mbata, gu rimbasa du ngbangbaturũ yo koditiyo sa kini bibia niya: “Ani ngí angi ki du na bakere ngbarago, ani táasi rimoko, bambiko gu rago diade nga ga Wiri Kandoro da, diako aima mbakada tiri.” (Yugo. 19:6, 7) Na ginipai du tipa gu ga Yekova amoyambu du auru kpotosende? Ya mo i dunduko nika du rogo gu ngbarago re?

14. A wa i nafura tipaha rogo Atambuahe 45, ada nga agu ‘akurari nga ngasu adee’?

¹⁴ Oni gedi Atambuahe 45:12, 14b, 15. Gu nebi nangia Zakaraya apepai ku mbatayo tipa yangara arame nga aboro zegino nika kodatiyo na yangara agu aYisaraere nga ga toro yo. Ko aya: “Ni gu rago re akumba bawe nikazada ga gu boro Ebere baukadi, ki ya, ‘Ani ndú na mo, bambiko ani gi he ya Mbori du na mo.’” (Zek. 8:23) Rogo Atambuahe 45:12, agi “akumba bawe” narukuba kurapai re, i afura tipa yo ya i nga “aboro Tura” na ni “kumukokumuko aboro dagba aboro” yo. I naye na agamahe kafu he fu yangara mbedimbedi aKristano tipa i idi nayo na ki undo yo rogo toro yo. Naatona rogo 1935, amirioni aboro aima mbugene fu mbedimbedi aKristano tipa i ‘sa dunguyo sa rurupai.’ (Dan. 12:3) Agi abakurea mbedimbedi aKristano du ni ruruyo re ima giriso gayo raka ti zire pambori. Si du nga ndu gupai  i ayambayo ti ni nga agu ‘akurari nga ngasu adee.’ I kpara gayo raka fu Yekova na ki yuguhe nga i nga ga Yesu Kristo ruru amoyambu.

15. Wai abakurea mbedimbedi aKristano amangasunge sa na gu yangarayo du auru kpotosende ane?

¹⁵ Mbedimbedi aKristano na bakere tambuahe tipa agi abakureayo re tipa gu nyanyaki undo i afuhe fuyo rogo tungusa gu “wene pangbanga nga ga ngbi” rogo zegino dunduko. (Mt. 24:14) Anga kina “Toro na gu de kumba nikadia ri, i niya, ‘Mo yé’” te, zavura kina aguyo nagiaha i naya a: “Mo yé.” (Yugo. 22:17) Nirengo, “kura akandoro” nagia mbedimbedi aKristano i niya “mo yé” na kini koditiyo nayo ka ya “mo yé” fu agu aboro naraka auru kpotosende.—Yo. 10:16.

16. Gini momu Yekova nafuhe fu kura kandoro?

¹⁶ Mbedimbedi aKristano ima kpinyemu abakureayo na i na ngbarago ka ino gupai nga Yekova fu momu fu kura akandoro auru kpotosende i koditiyo kuti gu ngbarago nga ga gu diadee nga ga Wiri Kandoro namanga ngbangbaturũ yo. Si adu nga i aye na agu ‘akurari nga ngasu adee’ “ngbarago pusiapusia.” Nirengo, kura akandoro na amaraika nika du ni kodikodi yo rogo ngbarago ti regbo gu rogatise nga ga Wiri Kandoro nika manga ngbangbaturũ yo. Yugoti nafura tipa “bakere rimbasa aboro” nga ‘i rundu barangba mbatabakindo, na barangba Wiri Kandoro.’ I namangasunge fu Yekova rogo gu vurukporo nga ga gu yekaru nga ga toro du auru kpotosende.—Yugo. 7:9, 15.

17, 18. Waigu ga Wiri Kandoro rogatise nika du ni wenehe, na ada Kristo nika da ni bayo ti regbo gako Zogarago Tipa Agarã Kutu?

¹⁷ Oni gedi Atambuahe 45:16. Agi abakurea awirina Kristo re nika du na bakere ngbarago ho i nika bi gu rogatise re si niye na aundo ku rogo zegino dunduko. Gi Bakindo nga Badidee re nika zingisa ‘agu akumba du kuba bako’ i ki da ni ‘awiriko.’ (Yo. 5:25-29; Eb. 11:35) Ko nika sia “abakindo” i zogarago auru kpotosende dunduko. Zanga kapa, Kristo nika sia kura ruru abaakumba dagba agu abaakumba du awere tipa i ningbe ku mbatayo rogo apai rogo vovo zegino.—Yes. 32:1.

¹⁸ Ti regbo ga Kristo Zogarago Tipa Agarã Kutu, ko nika da ni baa fu kura aboro a. Nirengo, agu aboro dunduko nika gbia nyeanye unga, i nika gbiaha mbiko i adu na idapase kuti ga Yesu motumo. (Yo. 3:16) Rogo gi gene re, ko nada ni “Nyenye Ba.”—Yes. 9:6, 7.

19, 20. Gu weneapai furayo tipaha rogo Atambuahe 45, wai si abi aKristano dunduko areme?

¹⁹ Oni gedi Atambuahe 45:1, 17. Nirengo, agu apai furayo tipaha rogo Atambuahe 45 nabi aKristano dunduko areme. Gu yangara mbedimbedi aKristano du auru kpotosende na ngbarago ka ino gupai nga i nika kodatiyo barambeda na awirinayo ngbangbaturũ yo gbiati Badidee. Gipai re nangarasa kura akandoro i du ni ruruyo fu gayo Bakindo na kidu na tambuahe tipa gu momu du yo na ni nga ka raka sa auru kpotosende na gu yangara aboro nga papara gu dee nadia kumba. Yesu Kristo na agi abakureako nika zogarago na ko re nika ye na bakere amaku fu agu aboro nika raka auru kpotosende fuo mangayo gayo rogatise.—Yugo. 7:17; 21:1-4.

²⁰ Wa ani angera ku mbatayo tipa gu regbo “wenepai” ka manga ti ni nibipa Bakindo Masiya, ya mo ngbaduraniyo afõnga rani ani ‘mbakadi rimoko’ te? Ani dunga adu dagba agu aboro nika ‘tambua Bakindo nyeanye kindi.’