1, 2. Tipagine du ani ti ni na nyemu agu apai du rogo Atambuahe 45?

BAKINDO taarimo naora rii gako farasi rogo rengo na rogo rurupai na kini ndu ku mbatayo ka diabe avurako. Fuo diako be avurako, ko di bawene diako. Aboro natingidapa ko na kini takipande ko fu arikaaboro dũ nyeanye kindi. Gure nga gu bangua riipai Atambuahe 45 afura tipaha.

² Ono tie, gupai du rogo Atambuahe 45, anga si ni gu pangbanga nafu kina ngbarago gbua te. Agu apai furayo tipaha yo narogo yo ti ni furani. Si nabipa gaani raka awere na ku mbatayo a. Ani gbenga berãrani awere tie ka wisigo agu apai du rogo atambuahe.

3, 4. (a) Gini “wenepai” nabi rani, na wai rengbehe ka manga ariapai ngbaduraniyo? (b) Ngba gini gene ani ‘agumbapa agu apai’ du ni wenehe tipa bakindo, na wai mirãrani ada wakina wiringua kepai?

³ Oni gedi Atambuahe 45:1. Gu “wenepai” nazi kpoto Bake papara Atambuahe yo, si adu tipa bakindo. Si du kpotoko yo ‘ahi’ ti ni be ngbarago na mirãko ki da wakina ‘gu wiringua waraga nga ga bakeapai.’

 ⁴ Na ginipai du tipa rani? Gu wene pangbanga du tipa gu Kindo nga ga Masiya nga gu wenepai nazio ngbadurani yo. Gu pangbanga nga ga Kindo ada ni “wenepai” nzunzu rogo 1914. Naatona ti gu regbo re, gu pangbanga re afuranga berewe tipa gu Kindo du ku mbatayo te ono si nafura tipa gu zogarago namanga amanga awere ngbangbaturũ yo. Gere nga gu “wene pangbanga nga ga ngbi” ani “atungusa ha rogo zegino dunduko.” (Mt. 24:14) Ya mo kpotorani yo nangi mbiko gu pangbanga nga ga Kindo? Ya mo ani natungusa gu wene pangbanga nga ga Kindo kakaka? Wakina bake papara Atambuahe, ani “nagumba pa agu apai” du ni wenehe tipa gaani Bakindo nga Yesu Kristo. Ani natakapande pako ya ko nga Masiya na ni Bakindo ngbangbaturũ yo. Kurigure, ani na yamba aboro dunduko na abazogo i ra fu gako zogarago. (Tam. 2:1, 2, 4-12) Na mirãrani nada wakina ‘gu wiringua waraga nga ga bakeapai’ ho ani amangasunge na afugo Ziazia Kekeapai ni gene tungusapai yo.

5. (a) Gini gene Yesu ‘angba’ rogoho? (b) Waigu Yesu anaamangasunge na “wene” afugo ka tungusapai, na wai rengbe ani ka pekafuo gako kpiapai?

⁵ Oni gedi Atambuahe 45:2. Ziazia Kekeapai fura gbua tooni tipa pa ngbanya Yesu. Ni rengo, wa ko angia rengberengbe boro, ko aima “ngba.” Ono tie, gako ngbanya aye be pa nye ko ni ruruko fu Yekova. Kurigure, ko amangisunge na “wene” afugo tipa ka tungusa gu pangbanga nga ga Kindo. (Rk. 4:22; Yo. 7:46) Ya mo ani naasada ka pekafuo ga Yesu kpiapai rogo gaani tungusapai yo na kini asadi ka mangasunge na agu afugo rengbe ka zio ngbadu aboro yo?—Koro. 4:6.

6. Wai Mbori afu maku fu Yesu nyeanye kindi?

⁶ Mbiko ga Yesu kakaka futise tipa ka manga gupai naangba ti Bako, bako afu maku kurii gako tungusapai na ki fu mosoro fuko fuo kpioko. Gu mokedi nangia Pauro akepai ki ya: “Pa bi ko [Yesu] adu wa pa boro. Ko ki umbasi tiko, nigi sangba dati kpio, ii, nga kina gu kpio nga ga wagiwagi ngua. Si du Mbori akiisi pako ti ni a gbe, ki fu gu rimo fu ko zogo arimo dũ; ya arukusue ninugadi ni rimo Yesu dunduko, agu ahe du ngbangbaturũ yo, agu ahe du auru kpotosende na agu ahe du tii kpotosende yo, ya miraahe ka kusa ha dunduko ya Yesu Kristo nga Gbia, sa ga Mbori taarimo nga Ba.” (Frp. 2:8-11) Fuo zingisa Yekova Yesu ni toro, ko afu maku fuko nyeanye kindi.—Rom. 6:9.

7. Ngba gini agene Mbori ambedi Yesu ‘susi akurako’?

⁷ Oni gedi Atambuahe 45:6 *, 7. Mbiko ga Yesu bakere nyemuse tipa rurupai na pa sogako agu apai rengbe ka gbarasarimo Bako, Yekova amoi ko ni Bakindo kurii gu Kindo nga ga Masiya. Yekova ambedi ko na “gu nzeme nga ga wasa” kisusi ‘akurako’ nangia agu abakindo aYudo  nangia atita Davide. Ngba gini gene? Bambata pai nga, Yekova nitiko nambedi Yesu. Kurigure, Yekova ambedi ko ni Bakindo na ni Gbiamotumo a. (Tam. 2:2; Eb. 5:5, 6) Ko aambedanga Yesu na nzeme te ono ni ziazia toro, na gako zogarago nga ga zegino te ono ga ngbangbaturũ.

8. Tipagine rengbe ani ti ni ka ya ‘Mbori nga ga Yesu mbatabakindo,’ na tipagine du ani ti ni na kido nga gako zogarago ni ruruhe?

⁸ Yekova amoi Wiriko ni Bakindo kurii ga Masiya Kindo ngbangbaturũ yo rogo 1914. Gu “ngbondo” nga ga ga Yesu zogarago, si nga “ngbondo rurupai,” si du rengbe ani ti ni kadu na kido nga gako zogarago nika du ni wenehe na ni ruruhe. Gako pagbia rẽarẽ mbiko ‘Mbori nga gako mbatabakindo.’ Gure nga Yekova nga mburu gako zogarago. Kurigure, ga Yesu mbatabakindo nika “nyeanye kindi.” Ya mo mo na ngbarago ka iriso Yekova tiibe gu bakere Bakindo ko namoiko te?

9, 10. (a) Gini regbo Kristo atapa gako basape ku padimoko, na wai ko amangisunge na ni nibasa ti gu regbo re? (b) Waigu Kristo nika mangasunge na ni ku mbatayo?

⁹ Oni gedi Atambuahe 45:3. Yekova rugu gako Bakindo ko ‘tapa gako basape ku padimoko,’ sidu, gure nga Mbori fu pagbia fuko ko sovura na ki sapungbanga agu aboro dunduko nasoga ga Mbori pagbia. (Tam. 110:2) Wa duhe nga Kristo nga gu Bakindo nyaki rogo sovura, si du i ayamba ko ti ni nga “iranyaka.” Ko atapa gako basape rogo 1914 na ki dibe Satana na gako adaimona ki bayo ku sende no.—Yugo. 12:7-9.

¹⁰ Gure angia tonatona ga Bakindo oto nga ga diabese. Ono ko duwa ka ko ndu ku mbatayo kindi “ka dia be apai.” (Yugo. 6:2) Yekova nika sapangbanga gi ga Satana zegino re naabaha, na ki gbarasi Satana na gako adaimona. Gu bambata he ko nika gbarasaha nga Bakere Babera nga bariwara ngbii zire pambori. Ga Yekova ringbisapai du nga ka mangasunge na abazogo i gbarasi gu “debari” re. (Yugo. 17:16, 17) Fuo gure, gu Bakindo re nika sovura kuti agu abazogo re na ki nyasi riipa yo. Kristo i ayamba ko a nga ‘maraika gu due zanga mburuhe’ nika digiso gako diabese ni kiso ko Satana na gako adaimona ku rogo gu due zanga mburuhe. (Yugo. 9:1, 11; 20:1-3) Ani bingo wai i aima gumbapa gi wene apai re rogo Atambuahe 45.

11. Waigu Kristo ‘aora rogo rengo’?

¹¹ Oni gedi Atambuahe 45:4. Gu Bakindo re asonga vura tipa ka zio adagbarago na ka sa aboro ni akanga te. Ko nasovura ni ruruhe na wene nduhe. Ko naora rogo “rengo na umbasiti na rurupai.” Gu rengo si aida ani songodihe nga pa ga Yekova bakere pagbia. Satana asamungu kuti ga Yekova zogarago nga Yekova na rengo beko ka zoga aboro te. Naatona ti gu regbo re, adaimona na aboro natikango gu rengo re ati. Regbo ima da awere tipa ga Yekova Bakindo oro ka sigira gu rengo du tipa ga Yekova bakere pagbia nyeanye kindi.

12. Gini gene Bakindo ‘aora rogo umbasitise’ ngbaha?

¹² Gu Bakindo re naora a ‘rogo umbasitise.’ Wangia ko bangisa Wiri Mbori, ko ima maa wene kpiapai furani nga ga umbasitise na ra fu ga Bako bakere pagbia. (Yes. 50:4, 5; Yo. 5:19) Si naida ga Bakindo amoyambu dunduko pekefuo  gako kpiapai na kini ra fu ga Yekova bakere pagbia ni umbasitise rogo apai dunduko. Kina agu aboro namanga gipai re nika raka rogo gu vovo zegino Mbori nakido paha re.—Zek. 14:16, 17.

13. Waigu Kristo aora ‘rogo rurupai’?

¹³ Kristo naora a ‘rogo rurupai.’ Gu rurupai Bakindo asongodaha nga ga Mbori arugute du tipa manga rurupai na irairaha. (Rom. 3:21; Pa Rug. 32:4) Yesaya aya tipa Bakindo Yesu Kristo wẽ: “Bakindo azóga rago na rurupai.” (Yes. 32:1) Ti regbo ga Yesu zogarago, ko nika ye na “vovo angbangbaturũ na vovo kpotosende, nga gu ruru apai nikanye rogo ho.” (2 Pet. 3:13) Agu aboro dunduko nika raka rogo gu vovo zegino re, i nika raka ringbisihe kuti ga Yekova arugute.—Yes. 11:1-5.

14. Wai kumbabe Kristo nika manga “kigikigi apai”? (Oni bi gu sura du ti tonatonaha.)

¹⁴ Wa Bakindo aora ku mbatayo, ko tapa gako basape padimoko. (Tam. 45:3) Ono regbo ima da tipa ko zi basape na kumbabeko na ki tona mangasunge na ni. Bake papara Atambuahe apepai ni sangbanebi ki ya: “Kumbabero yúgu kigikigi apai.” (Tam. 45:4) Ho Yesu nika ora ni ka sapangbanga aboro ti regbo aramegido, ko nika manga “kigikigi apai” kuti avurako. Ono ani ainongo guhe ko nika mangasunge na ni tipa ka gbarasa ga Satana zegino te. Gupai re nika fu bakere gunde fu agu aboro aidanga ka degatuyo sa gu zahe du tipa ka ranigose fu ga Bakindo zogarago ya. (Oni gedi Atambuahe 2:11, 12.) Yesu agumbapai rogo gako sangbanebi tipa yangara arame nga ome aboro nika ‘ru aru be gunde, mbiko agu apai nika ye ku zegino. Bambiko agu atandu nga ga ngbangbaturũ adu ni zigizozigizo ho.’ Ko ape kurapai nga: “I ki bi Wiri boro ko ayé rogo mai na tandu na bakere taarimo.”—Rk. 21:26, 27.

15, 16. Ada nika du dagba “agu arikavura” nika pekafuo Kristo kutingba vura yo?

¹⁵ Gu kitabu nga Yugoti natakapande paye Bakindo “na tandu na bakere taarimo” ka sapangbanga aboro niya: “Mi ki bi ngbangbaturũ ni zaza ha, oni ngére, pusi farasi ki du! Gu ko nasungu auru ru, i niya ti ko, Iranyaka, nga Irarengo; ko nasapa ngbanga ki so vura ni ruru he. Agu arikavura du ngbangbaturũ yo, apeka fuo ko auru pusi afarasi a, ni ukadiukadi yo ni nzaranzara pusi remu, du ni vuvuru he na ziazia ha a. Tĩtĩ basape ki kuru ngbako yo, ko di be arikaaboro na ni. Ko azóga yo na ngbondo marã; ko asímba he rogo bapirãahe yo, nga gu imekakue nga ga gu ngariangaria zinga nga ga Mbori, du na tandu apai dũ.”—Yugo. 19:11, 14, 15.

¹⁶ Ada nika du dagba “agu arikavura” du ngbangbaturũ yo nika pekafuo Yesu kutingba vura yo? Ho ko atapa gako basape ni ni bambataha tipa ka do Satana na gako adaimona ngbangbaturũ yo, “gako amaraika” asovura sa na ko. (Yugo. 12:7-9) Si ruaru tie ani dakuti gupai nga, ti regbo gu vura nga Aramegido re, ga Kristo rikavura nika koda amaraika. Ya mo gako rikavura akoda kura aboro? Yesu akido mbembedi awirinako ki ya: “Gu ni ka di be pai, ki ka kuti gi mangaapai ki da ti digida ha, mi aásia pa rika aboro fu ni, ni ki zogo yo ni ngbondo marã a wa ka i kuadi agu aakoro nga ga bamekehe rukutu, a wa mi adi he be Buba.” (Yugo. 2:26, 27) Sidu, ga Kristo rikavura nga ga ngbangbaturũ yo nika koda mbembedi awirinako nga aguyo nika dia gayo  mosoro ngbangbaturũ yo ti gu regbo re. Gu mbembedi awirinako re nika du kina patiko ho ko nikaa manga “kigikigi apai” ni ka gbarasa rikaaboro.

17. Gu pusi farasi Kristo aora riru narukuba gine? (b) Ginihe basape na mboto arukubaha?

¹⁷ Oni gedi Atambuahe 45:5. Bakindo naora ri pusi farasi nga gu narukuba gu vura du ni ziaziaha na ni ruruhe bangiri Yekova. (Yugo. 6:2; 19:11) Kupati basape, ko a na mboto beko. Ani nagedapai nga: “Oni ngére, mi ki bi farasi ni pusi ru, mboto ki du be gu ko nasungu auru ru; i ki fu kpakpari fu ko. Ko ki ta kura nidi be apai, ki ndu ka dia be apai.” Basape gbiati mboto narukuba guhe Kristo nika mangasunge na ni tipa ka gbarasa avurako.

18. Wai ga Kristo “asiida” nika du ‘tĩtĩhe’?

¹⁸ Bake papara Atambuahe apepai ni sangbanebi nga ga Bakindo ‘asiida du ni tĩtĩhe ku kpoto avurako yo’ na ‘aboro natiwa kutii ko.’ Gu gbarasahe re nika manga rogo zegino dunduko. Yeremaya apepai ni sangbanebi ki ya: “Agu yo Yekova ka imo yo ti gu uru re kangbayo adu tona ti digida kpotosende ku bani ki da ku bani.” (Yere. 25:33) Gu kura sangbanebi agumbapai wa gure ki ya: “Mi ki bi kura maraika, ko ru rogo uru; ko ki poi ni bakere fugo, ki ya fu azire dunduko nga agu ra nagu ari yo, ‘Oni yé ki dungura tironi sa gu bakere pumbo nga ga Mbori; oni ka ri pasio abakindo, na pasio abarutirivura, na pasio airaome, na pasio afarasi, na pasio agu yo nasungu auru ra, na pasio aboro dunduko, nga agu yo ra ni riyo na akanga a, nga umba pa yo na kikindigi pa yo a.’”—Yugo. 19:17, 18.

19. Wai Kristo nika “u au” na ki digisi gako diabese?

¹⁹ Fuo Bakindo taarimo nga Kristo gbarasi ga Satana zegino, ko nika “u au” du rogoyo nga ka du na diabese. (Tam. 45:4) Ko nika digiso gako diabese ho ko nika kiso Satana na gako adaimona ni ku rogo gu due zanga mburuhe Tipa Agarã Kutu. (Yugo. 20:2, 3) Ho i nika kiso Bakitingbanga na gako adaimona ni ku rogo gu due zanga mburuhe, si nika duwa i ima kpi mbiko i adunga na gene beyo ka manga aboro gbegberẽ te. Aboro dunduko nika du na ngbarago tiibe ga Bakindo zogarago zanga gu maapai nga ga Satana na adaimona. Ono tie, mbata fu i bi kpotosende si ni satihe ni paradizo, kura ndupai kinaho nika sayo i du na ngbarago be gayo Bakindo na agu aboro nika zogarago na ko. Ani nika wisigo gu wenepai re rogo gu kekeapai nika ye fuo gere.