1. Gini riigbu nadiba agu aYisaraere naadu na rimo Yekova riyo? (Oni bi gu sura du ti tonatonaha.)

SI NAIDA ani tambua Yekova atambua tipa wai ko asigira gu dungurati nga ga aKristano rogo bambata sa kama agarã na wai ko nakaraga ndikidi irisombori ti gi gaani regbo re. A wa ani afura tipaha rogo gu kekeapai naaye mbata fu gere, gu riigbu nangia ga agu apefuo Kristo naadu mbata adiba agu aYisaraere nangia asamungu rimo Yekova adu riyo. Mbori abi gi vovo riigbu re na paha kuari gbe, mbiko si abati ti regbo gbarasa Yerusarema rogo gu garã nangia 70 Fuo Batika Kristo. (Rk. 21:20, 21) Agu apai namangi rogo bambata sa kama agarã nabi gu ga Yekova amoyambu abi du areme. Gi ga Satana zegino re nika digo barambeda, ono ga Mbori riigbu nika bata abata be yangara arame. (2 Tim. 3:1) Ginihe nayugo na ni fura nga rengo du?

2. Ginipai Yesu apehe tipa “bakere gberãngbi,” na wai si nika tona?

² Yesu afura tipa padu ko ho na ome Kindo beko na tipa pa digo zegino ki ya: “Bakere gberãngbi nikadu, wa zegino aenge da awere si adu nga wo te, oó, si adú nga wo berewe a te.” (Mt. 24:3, 21) Gi bakere gberãngbi re nika tona ho Yekova nika gbarasa “Babera du ni bakere he,” nga ngbii ziree apambori  ni manga ko sunge na agbia gi zegino re. (Yugo. 17:3-5, 16) Ginipai nika manga fuo gure?

3. Fuo gbarasayo ziree pambori, gini zubohe si awira wa i nika zubo ga Yekova aboro na ni?

³ Fuo i gberesi aziree pambori kusayo, ga Satana aboro rogo gi zegino re nika zubo ga Mbori aboro. Ni kpiapai, Ziazia Kekeapai nafura tipa ‘Gogo du rogo gu ringara nga ga Magogo’ niya: “Mo andú ku mbata yo, niye wa bakamikami yuge, mo adú na gamo bakere rimbasa avura dunduko, na dungu aboro fuo ro.” Mbiko wadu he nga aDezire Yekova na aũvura beyo te, na i nga zezeredi aboro auru kpotosende ane, si nika du taata tipa i zubo yo. Nairiwo gu riko ingahe i nika mangaha re!—Yeze. 38:1, 2, 9-12.

4, 5. Ginipai Yekova nika mangaha tipa gu zubohe Satana nika ye na ni kuti gako aboro?

⁴ Ginipai Yekova nika mangaha tipa gu zubohe Satana nika ye na ni sa ga Yekova aboro? Yekova nika mangasunge na gu rengo du ko na ni nga Bakindo Zegino dunduko tipa ka sovura tipa yo. Gu zubohe kuti gako aboro re nika du wakina zubo ko. (Oni gedi Zakaraya 2:8.) Sidu, gu Barani du ngbangbaturũ yo nika mangapai niipo tipa ka batasa rani. Gu batasa rani re nika ye sa na pa gbarasa gi ga Satana zegino re ti regbo Aramegido nga “gu vura nga ga gu bakere rago nga ga Mbori, nga gu ko du na tandu apai dũ.”—Yugo. 16:14, 16.

⁵ Gu sangbaanebi nga ga Ziazia Kekeapai nafura furani tipa Aramegido niya: “‘Yekova du na pai kuti arikaaboro; ko tona sara ngbanga kuti aboro dunduko, gbegberẽ yo ko afú yo sa basape, wo poi Yekova.’ Ya Yekova nga ga arimbasa ko wẽ: Oni ngére, gbigbitapai nakura ti gu rika aboro sa gu rikaaboro, bagugugu mamu yuge nawo ti gu tuturũ papara arago nga ga kpotosende! ‘Agu yo Yekova ka imo yo ti gu uru re kangbayo adu tona ti digida kpotosende ku bani ki da ku bani. I akpara nga yo nita ngbaduse te, watadu kpisida yo a te; i adu wa regbo anya auru sende.’” (Yere. 25:31-33) Aramegido nika nyasa riipa gi gbegberẽ zegino re kusayo. Ga Satana zegino adu nga ti ni berewe te, ono gu papara ga Yekova riigbu du auru kpotosende nika bata abata.

6, 7. (a) Agi aboro nga “bakere rimbasa aboro” re naye wari? (b) Gini sona ku mbatayo mangi vuru agu agarã susi re?

⁶ Ga Yekova riigbu nikaa sono ku mbatayo mbiko si na agu aboro rogoho ko naidi na gayo pai. Ziazia Kekeapai nakido rani nga: “Bangiri Gbia du fuo ruru aboro, na tuko ni haha ha tipa gayo akpe.” (1 Pet. 3:12) Gu ruru aboro re nakoda gu “bakere rimbasa aboro” nga aguyo nika kura “rogo bakere gberãngbi.” (Yugo. 7:9, 14) Anga agi aboro nika bata re nga “rimbasa aboro” gbua te. I nga ‘bakere rimbasa aboro’ nga agu aboro adunga ba geda yo ti ni ya. Ya mo mo naabi tiro wa mo nika du dagba agu aboro nika bata ti “bakere gberãngbi”?

⁷ Agi aboro du rogo bakere rimbasa re naye wari? Gu he naye na yo nga gupai Yesu afura tipaha ku mbatayo ya si nika yugo padu ko na ome kindo beko. Ko aya: “Gi wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ; ragoho ki digi adiga.” (Mt. 24:14) Rogo gi yangara arame re, gi sunge re nga nyanyakipa sunge fu ga Mbori riigbu. Amirioni aboro ima wirika wai ka irisombori “ni toro na rengo”  mbiko gu sunge tungusapai gbiati gu yugopai nga ga aDezire Yekova rogo zegino dunduko. (Yo. 4:23, 24) Ni kpiapai, vuru agu agarã bawe susi kusayo, tona ti gu garã nga ga sunge nangia 2003 kada kuti 2012, agu aboro kpara gayo raka fu Yekova na ki zi bapatiza bangeyo ima susa 2,707,000. Rogo zegino dunduko, bange aDezire Yekova ima susa 7,900,000, na dungu amirioni aboro naye tipa gaani adunguratise, gbe ti regbo Tingida Pakpio Yesu. Ani atanga ngbadurani na pa namba te, mbiko “Mbori nazugasi he.” (1 Kor. 3:5-7) Wa vura duhe wo, si ziazia nga bakere rimbasa nasona kina ku mbatayo na agarã dunduko.

8. Ginihe nasa gupai nga ga Yekova aboro nge rogo gako riigbu areme?

⁸ Ga Mbori aboro nasona ku mbatayo mbiko ko du nasongoda yo na gi sunge re. (Oni gedi Yesaya 43:10-12.) Sangbanebi aima fura tipa gi sona ku mbatayo re ki ya: “Gu umba pa boro adú wa ngbatunga kutu sa, gu toni ni ki ngia nyanyaki rikaaboro; mi nga Yekova; mi nikaipisa paha ti ragoho.” (Yes. 60:22) Ti gu kura regbo sa, mbedimbedi aKristano adu wakina “gu umba pa boro” re, ono gayo namba atona ka nge ho gu kura aYisaraere nga ga toro yo atona ka ye ni ku rogo ga Mbori riigbu. (Gara. 6:16) Mbiko ga Yekova maku vuru dungu agarã yo, i atona ka nge wa bakere rimbasa aboro aange a.

9. Ginipai si aida ani mangihe ka si du nga ani naida ka gbia gu wene apai du ku mbatayo?

⁹ Singia ani nga mbedimbedi aKristano watadu bakere rimbasa, ani dunduko rengbe ka gbia gu wene akidohe du rogo Fugo Mbori tipa ku mbatayo. Tipa ani gbiaha, ani du wa ka ani mangi agu apai Yekova aidaha berani. (Yes. 48:17, 18) Ani bingo gupai naadu fu aYisaraere rogo ga Moize aNdiko yo. Gu kura ndupai Mbori afu agu aNdiko re ti ni fuyo adu tipa ka bandayo be gbegberẽ kodaba, mangasunge na marã, sonosa gude, manga wenengai fu akurase, na agu kuraha. (Gate 20:14; Pa Mot. 19:18, 35-37; Pa Rug. 6:6-9) Ka ani amanga gupai Mbori akpinyemuhe ani gbia undo agbia, na ani aidanga ka bi manga gupai ko akpinyemuhe wa tindiro te. (Oni gedi 1 Yoane 5:3.) Nirengo, a wa aNdiko abanda aYisaraere, ka ani amangapai kuti ga Yekova Mbori andiko na gu bangua arugute nga ga Ziazia Kekeapai, si nika banda rani na ki sarani ani “du nzunzu rogo idapase yo.”—Tito 1:13.

10. Tipagine si aida ani ngbe regbo ti ni tipa wisigo Ziazia Kekeapai na Gu Irisombori Nga ga Aborokporo?

¹⁰ Gu ga Yekova papara riigbu du auru kpotosende nandu ku mbatayo ngba agene ni bakiakia. Ni kpiapai, gaani giarogopai rogo Ziazia Kekeapai nakio kina ku mbatayo ti aregbo dunduko. Kina rengo du mbiko Ziazia Kekeapai naya: “Ga ruru aboro gene du wa gu imarago nga ga ngbawiso, nakĩ akĩ ki susi ki da ti kina bebere uru.” (Snz. 4:18) Ono si naida ani sana tirani nga: ‘Ya mo mi nandu sa na gu vovo giarogopai nga ga rengo rogo Ziazia Kekeapai? Ya mo sino re du nga kaa geda Ziazia Kekeapai naʹuru dunduko? Ya mo mi naageda gaani awaraga na aregbo dunduko? Ya mo mi na gimi aborokporo naamanga Gu Irisombori Nga ga Aborokporo na aposo dũ?’ Badungu rani ima rengbe ka ya si ima kpakara ka manga agi apai re. Dedede, gu he si naaidaha nga boro ngbe regbo tipaha. Na si ni nyanyakipa pai ani di gu inohe nga ga Ziazia Kekeapai kugume ki mangihe rogo gaani raka yo, na ki sono ku mbatayo rogo toro yo, wadu he nga bakere gberãngbi ima mbeda kada!

11. Rogo gini gene agu aboro naadu mbata anaagbia undo ti agu apumbo i anaamangaha, na wai gaani aundo rani areme?

 ¹¹ Ga Yekova riigbu na mangapai tipa kina gaani wenepai ho si angarasa rani tipa ani degeturani kuti ga Pauro arugute naya: “Ani bérẽ pa akuarani ka nyakasa yo kuti nyemuse na wene mangaapai. Ka ani hé nga dungura tirani na akuarani, wa du sino agu yo ya, ono ani rúgu akuarani aruga; ki nimangi he susi, wa bi oni he ya gu uru re si nambeda.” (Eb. 10:24, 25) Agu apumbo aYisaraere anaamangaha na agarã dunduko na adunguratise tipa ka irisombori anaanyakasa yo rogo toro yo. Kurigure, gu ngbatunga Pumbo Abasura namangi ti rago Nemaya angia regbo ngbarago. (Gate 23:15, 16; Nem. 8:9-18) Kina gu bangisa undo re ani agbiaha ti gaani kikindigi adunguratise na agu ani naamangaha rogo dungurati. Ka ani nginga mbaro na agi ambakadapai re ya, si nika sarani ani nyaki rogo toro na kidu na ngbarago.—Tito 2:2.

12. Si naida ani bi sunge tungusapa Kindo wai?

¹² Wangia ani agu aboro du rogo ga Yekova riigbu, ani na ngbarago tipa ka manga gu ziazia sunge nga ga “ga Mbori wene pangbanga.” (Rom. 15:16) Manga gi ziazia sunge re nasarani ani du ni “abadiasunge” na Yekova “du ni Ziazia Ko.” (1 Kor. 3:9; 1 Pet. 1:15) Tungusa wene pangbanga nasa rimo Yekova si du ni ziaziaha. Na nirengo, si ni nyanyakipa momu tipa ani mangisunge tipa “gu taarimo nga ga betedi Mbori.”—1 Tim. 1:11.

13. Padu ani wenengai rogo toro gbiati gaani raka naruriipa gine?

¹³ Mbori naida ani du wenengai rogo toro yo na ki zi tirani kutiko na kini songodi agu asunge gako riigbu amangaha. Moize aya fu aYisaraere wẽ: “Mi yambu ngbangbaturũ na kpotosende si du ni dezire kuti roni areme, ya mi ringbisi unga na kpio fu roni, maku na motiwa, si du oni sía unga, oni ki nye ni ungaroni, oni na awironi a, ka akpi nyemu Yekova gaoni Mbori, ka agia fugoko, ka aka kuti ko; bambiko ko nga gaoni unga, nga bagiza gaoni arame, oni ki niraki rogo gu ringara nga gu Yekova azunga he fu abaroni, fu Abarayama, fu Yisaka, na fu Yakoba a, ka fu he fu yo.” (Pa Rug. 30:19, 20) Gaani raka naruriipa manga gupai Yekova akpinyemuhe, giasangbako, nazio ani tirani kutiko.

14. Gini bipai kura wirina adu na ni tipa gu ga Yekova papara riigbu du auru kpotosende?

¹⁴ Wiriba Pryce Hughes nazi tiko kuti Mbori na kini ndu sa na gako riigbu aya: “Mi na ngbarago nga mi araki rogo gu inohe naadu ti agu agarã nangia ga 1914 . . . Gupai paha anyaki bangire angia kadu mbembedi na ga Yekova riigbu. Agu apai mi abihe kusayo aima yugo gupai fere nga si aidanga mi kido kuti ga aboro berãpai te. Ho mi anaabera gipai re ni, mi anaadia berã nibasa tipa ka nye na ga Yekova ruru riigbu. Gini kura gene berewe rengbe Yekova ka ida na boro na ki fu maku funi”?

15. Oni funga kpiapai rogo Ziazia Kekeapai nayugo wai si aida ani bi gu vovo sakarogopai nga ga Ziazia Kekeapai.

¹⁵ Ka ani aida Yekova idi na ani na ki fu maku furani ni basasa, si naida ani songodi gako riigbu na kini mangipai kuti gu vovo giarogopai nga ga Ziazia Kekeapai. Ni kpiapai, fuo kpio Yesu, badungu agu akutu aKristano nangia aYudo azi tiyo kindi kuti gupai nga ga aNdiko na ka i aidanga ka mbuhe ya. (Amo. 21:17-20) Ono tie, fuo ke Pauro waraga fuyo, i aye  ka ida kuti gupai nga i agirisongo yo na motumo nga ga anya wa ‘i atumo na agi ahe re wadu pa rugute’ te, ono i agirisi yo “bambiko fu boro Yesu Kristo ni motumo bara sa kindi.” (Eb. 10:5-10) Zanga kapa, badungu agu aKristano nangia aYudo re aima manga ariapai rogo gayo aberã tipa ka sona ku mbatayo rogo toro yo. Ani a si naida ani wisigipai nyanyaki na kini di gu vovo sakarogopai yo kugume nga ga Fugo Mbori watadu gu du tipa gaani tungusapai.

16. (a) Gini apai nika sa raka si du ni wenehe rogo vovo zegino? (b) Gini apai mo amaabangiro tipaha ku rogo vovo zegino?

¹⁶ Agu aboro dunduko nanye ni ruru yo fu Yekova na gako riigbu nika gbia gu maku anyasanga ya. Gu mbedimbedi aKristano nika nye ni ruru yo nika gbia gu momu nga ka zogarago na Kristo ngbangbaturũ yo. (Rom. 8:16, 17) Kangia ani namaa bangirani ka raka auru kpotosende, ani berẽnga kina wai raka nika ngba rogo Paradizo! Wangia ani agu aboro du rogo ga Yekova papara riigbu, nairiwo gu ngbarago du ani na ni awere tipa kaa fura na aboro tipa gu vovo zegino Mbori nakido paha! (2 Pet. 3:13) Atambuahe 37:11 naya: “Bayee aboro adía kumbo ringara, ki du na ngbarago tipa gu wenepia du kpaima.” Aboro “adúdua abambu ki niraki rogo” na ki du na ngbarago “mbiko gu mangapai nga ga beyo.” (Yes. 65:21, 22) Arungosi, zingo, na gomoro adunga berewe te. (Tam. 72:13-16) Ziree pambori adunga berewe tipa ka nanga aboro te. (Yugo. 18:8, 21) Kpikpi aboro nika zinga be kpio na ki gbia gu momu nga ga raka nyeanye kindi. (Yes. 25:8; Amo. 24:15) Nairiwo gu wene maabangirise du fu agu amirioni aboro kpara gayo raka fu Yekova re! Tipa ngbatunga agi akidohe nga ga Ziazia Kekeapai re da bangirani nirengo, si naida ani mangi sona ku mbatayo amanga rogo toro yo, na kini ndu sa na ga Yekova riigbu dedede.

17. Gini bipai si aida ani du na ni tipa irisombori gbiati gako riigbu?

¹⁷ Wa gi zegino re ambeda ka digo, ani nye ngutete rogo idapase yo na kini tambua Mbori tipa wai ko namangi mbakadapai ani irisiko. Gere nangia gu biapai gu bake papara Atambuahe nangia Davide apehe ki ya: “Pai sa sana mi Yekova tipa ha, si mi agbáta ha; nga mi nye tii ga Yekova bambu yo wa du mi ni ungare kindi, ka bi gu wene ngbanya nga ga Yekova, ki nimakia pai rogo gako yekaru yo.” (Tam. 27:4) Ani dunduko ni basasa zingo tirani azio kuti Mbori na kini ndu sa na gako aboro gbiati gako riigbu.