Ziazia Kekeapai nape gupai furani aYekova nika mangaha na Wiriko nga Yesu Kristo tipa gu rungo Satana Bakitingbanga aye na ni. Ziazia Kekeapai naya: “I ayugu Wiri Mbori tipa gi pai re, nga ko gbarasi ga bakitingbangamangaapai.”(1 Yoane 3:8) I nika nyasariipa gi zegino hi be ngbaduse, sogote, gbiati gbegberẽ mangaapai re. Yesu kidohe nga ‘ko nika ba’ “gbia gi zegino re” kusayo nga Satana Bakitingbanga. (Yoane 12:31) Fuo dia yo Satana kusayo, gu vovo zegino du ni ruruhe nika tona zogarago na kpotosende ki da ni wene zezeredi rago.—2 Petero3:13.

Na ginipai nika manga tipa agu aboro aidanga ka aria gayo gene raka ya gbiati aguyo nye kuti manga gbegberẽ apai? Ziazia Kekeapai naya: “Ruru aboro aráka zegino, airarengo ki nye rogo ho; ono i aróga gbegberẽ aboro ku sa yo zegino, agu yo namanga pai ni biriki i amófa yo amofa zegino.” (Asanza 2:21, 22) Gu surungba gbegberẽ mangaapai nga ga gbegberẽ aboro adunga berewe te. Rogo gu wene zezeredi raka re, i nikaa dia ingapai kusayo tooni tooni ti aboro giasangba.—ARomo 6:17, 18; 8:21.

Mbori nika dia gbegberẽ apai wai rogo vovo zegino? Pa dia ko ho kusayo agbarasanga pa ga aboro ranirii te. Kuba gure, ko nika yugo gako agene fu aboro giasangba na ki undo yo i mbu gbegberẽ aberã gbiati mangaapai.

Ginipai Mbori nika mangaha tipa agu agberango namanga aboro ni tunguotunguo ho? Ko ima kidohe nga gako Kindo nika tona zoga zegino barambeda. Gaha Bakindo nga Yesu Kristo, ko na ome beko tipa ka husa akaza. (Matayo 14:14) Yesu aima du na ome beko tipa ka rugusa ahe wa wege. (Marako 4:35-41) Sidu, agu arungo naye be “rago gbia kuti mamu” adunga berewe te. (Batungusipai 9:11) Tii ga Yesu zogarago, gbegberẽ apai amanganga aboro te.—Asanza 1:33.

Na ginipai nika manga tipa agu amirioni aboro kpiki? Fuo Yesu zingisi bakureako nangia Razaro be kpio, ko aya: “Mi nga zingabekpio, nga unga.” (Yoane 11:25) Nirengo, Yesu na ome beko tipa ka zingisa aboro be kpio, watadu ka karaga agu aboro kpiki i da ni ungayo berewe.

Kangia pa rakawene aboro rogo gu zegino gbegberẽ apai nika du nga rogoho ya ima ngba tiro, mo asadi ka manga ome ka wirikapai tipa ndikidi Mbori na gako ringbisapai rogo Ziazia Kekeapai. Agu aDezire Yekova du rogo gamo dagbarago nika du na ngbarago ka undo ro mo gbia gi inohe re. Ani nasana ro mo gbatayo watadu mo ke waraga fuyo ni manga mo sunge na adresi sa dagba agu adresi du ti kpoto gi waraga re.