Mi asono rogo gu gbata nga Rmaysh, mbembedi na gu ngbanda aringara ue nga Yisaraere na Rebanona ti regbo vura. Mi ima ino wai agu abundu i aruhe sande yo aimi aboro na dungu aboro ki zanga anduyo. Raka aima du ni kpakarakpakaraha, gbegberẽ mangapai na zuu ki moipai.

Gimi aborokporo angia agu aboro pambori nga Maronite nga papara gu pambori nga ga Katoriko. Buba anaamangasunge kakaka tipa ka ngerafuo aboro 12 kporo, ono nina kini mangi ome nga ani nindu ku kanisa yo. Kusa, mi atona kaa bi kanisa nga si aundongo rungorungo aboro te.

Ti agu aregbo mi angia wiri tooni paranga, nyemu wirika gu kpata nga kung fu azi re. Mi amoi gimi raka ngbapai tipa ka wirika gi kpata re na mi ki ima ino wai rengbe mi ka saka bere na ni wenengai na ndure gbiati mangasunge na gu kura ahe tipa ka ta kpata na ni. Mi atona kaa berã nga, ‘Mi arengbanga ka rugusa vura te, ono mi ima rengba ka za aboro ti zuu.’ Ho mi anibi aboro ni ue i ni takpata, mi anaarimiso tire nibasa ku rogoho. Ngbadure anaaima niipo, na si anaadianga re na gbanga regbo tipa mi zingi te. Aboro naabayo rogo gu papara Rebanona du ku sudiyo yo nanaagunde tire, mi aasovura nitire kuti iraira mangapai na zuu.

Rogo gu garã nangia 1980, mi arimi gu bayugo kung fu naadu Beirut yo. Abundu anaatiwa na auru dunduko, ono mi ki nindu kindi tipa ka wirika gi kpata re. Gi raka naabaha angia rihe, rame, na kini raki wa gu kura bata-kpata nangia ­Bruce Lee, nangia boro China. Mi atona mbakada rire wa gako, kaa ndu wa ko, na kini taki ngbare wa kina ko. Mi anaamomanga te.

Gimi sasa angia kadu ni wene bata gu kpata nga kung fu China yo. Rogo nyemu sa, ho mi aambakada tire ni tipa ka ndu ku China yo, boro angoka gimi ngbadimo. Bakureami sa aye na aDezire Yekova ue fuoko. Mi avodi tire na bibiri roko, randimo kini ga ti kpotore, mi ki ya fuyo wẽ, “Mi ainongo pai kandara tooni tipa Ziazia Kekeapai te.” Mi  aainongo nga gure nangia tonatona ariapai rogo gimi raka te.

ADezire Yekova ayugu ndu gupai fere rogo Ziazia Kekeapai aboro arengbanga ti ni ka dia iraira mangapai na zuu kusayo ya. I ayugu gupai fere nga Satana Bakitingbanga nga mburu agu apai re. (Yugoti 12:12) Ngbare aima zera ka bi gu zereda na idapase naadu ti aDezire Yekova. Mi adu na ngbarago ti gu regbo i ayugu rimo Mbori fere rogo Ziazia Kekeapai. (Atambuahe 83:18) I ayugu 1 Timoteo 4:8, naya: “Mbiko nyakasa borose nakiisa pai ni umba ha, ono sinombori kiisi pai fu ahe dunduko, ki nidu na gu kidohe nga ga gu unga du awere, na gu nikaye.” Agu afugo re aima du na bakere ome kurii gimi raka.

Sidu, mi azanga gbia tire na aDezire Yekova wa avungure aya ka mi yegongo bere kusa no ya. Ono wa si avura duwo, mi adiberã ka mbu wirika kung fu ka tona wirika Ziazia Kekeapai. Aũnvurami na atamere aaidanga gupai re te, ono mi adiberã tipa ka gbia aDezire Yekova berewe na ki tona wirika Ziazia Kekeapai nayo.

Mi aagbata aDezire Yekova kindi ono ka mi agbianga yo ya. Ti kina gu regbo re, rago aima gberã tire ni kerehe mbiko pakpio buba, kodihe na gu kura agberango naamanga rogo gaani kporo. Mi atona mangasunge rogo gu basunge nameka arago, rogo kura uru, gimi badiasunge nga Adel asana re tipa ndu gupai mi adu ti ni na bakere gberarago. Ko atona ka fura tipa gu maabangirise nga ga zinga be kpio du rogo Ziazia Kekeapai. Gi wirina re awiriki Ziazia Kekeapai na mi zezeredi tipa adiwi ribua.

Wa gi wirikapai re aandu ku mbatayo, mi atona ka bi gupai nga si naida mi mangi bakere ariapai rogo asino re. Si aadunga ni taatapai te. Mi angia zingizingi boro dedede na ngbadure kini imi ni kina ipo. Mi awiriki wai ka banda tire ti zinga na ki he gba sa apai. Ni kpiapai, Matayo 5:44 na ga Yesu arugute rogoyo naya: “Oni kpí nyemu avuraroni, ki kpari tipa aguyo narungosi roni.” Na ARomo 12:19 nazahe nga: “Ka oni mangi nga boro ti pai fu roni ya . . . bambiko si ni keke he ya, ‘Pa ira bape nga gimi, mi akaraga pai, Gbia nipoi wo.’” Agi averesi re gbiati agu akuraha aundo re tooni tooni imisiringbaduse ki tona guari tire.

Wa vura duhe nga ti tonatonaha gimi aborokporo aaidanga na gi diaberã ka wirikapai na aDezire Yekova te, i nairisa aDezire Yekova airisa awere. Tamere ima kodatiko na mi rogo iriso Yekova, na nina anaafura wenengai tipa gaani idapase fu kura aboro daho ri akpi ni.

Mi ima gbia bawene dee a nga Anita, ri nga gu boro mi naatungusapai na ni ti aregbo dunduko. Natona rogo gu garã nangia 2000, ani naraka na Anita rogo gu gbata nga Eskilstuna Sweden yo, na ani nayugo Ziazia Kekeapai fu agu aboro nape pa-Arabi.

Rungo agu aboro nambu mbiko zuu namanga re kindi. Ono pa ino mi ndu gupai si amanga ti ni, na pa ino mi gupai nga Mbori nika digisoho barambeda, nafu bakere ngbarago fere na zereda.—Atambuahe 37:29.