1. Ginipai abarumbatayo nga ga pambori yo amangihe ti regbo vura?

YA MO Mbori naida ndikidi aKristano ndu ku ba vura yo tipa ka imo gu kura aboro ringara? Gere nga gupai dungu agu aboro nayamba tiyo nga aKristano namangihe vuru agu agarã 100 susi kusayo. Ga aKatoriko barumbatayo aima fu maku kurii gayo asekere na gayo aũvura tipa i sovura kuti gu aKatoriko du rogo kura ringara. Kina gu bangisapai re du tipa Aboona a. Gu Ue Vura Nga ga Zegino nga gu kpiapai nayugo wai aboro aimi tiyo.

2, 3. Ga aDezire Yekova bangiriba angia gine ti regbo gu Ue Vura Nga ga Zegino na kusa, na tipagine?

² Ginipai aDezire Yekova amangihe tigayo ti regbo gu vura re? Kuru apangbanga nayugo gupai nga i aarimisongo tiyo ku rogo gu vura re te. Ginipai naasa yo i mangi gipai re? Ga Yesu yugopai na kpiapai naundoyo. Ko aya: “Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yo. 13:35) I adi gupai kugume Pauro apehe fu agu aKristano naadu Korinda yo na ki mangihe rogo mangimangipai yo.—Oni gedi 2 AKorindo 10:3, 4.

³ Sidu tie, gu ndikidi aKristano Ziazia Kekeapai naraba sangbakpotoyo yo, asonga vura te. Mbiko gipai re, si aye na  rungosiro kuti akutu aDezire Yekova nga aparanga na sosono aboro gbiati akumba na adee. Dunguyo i arungosi yo rogo abataya na abambukiso. I aimi aguyo ti gu regbo nangia ga aNazi Germani yo. Wa i avura gbiatiyo na kere arungosiro Putu yo, bangiriyo aagonga ti gu gayo nyanyakipa sunge nga ga tungusa wene pangbanga nga ga ga Mbori Kindo te. I anaatungusaha bambukiso yo, rogo agu abataya nangia ga zizi aboro na rogo agu aringara i aga nayo ku rogoho. * Kusa, ti regbo gu vura imo angbatunga namangi Rwanda yo rogo 1994, i aarimisongo tiyo ku rogoho te. I aarimisongo tiyo ku rogo gu vura mangi barambeda ho gu ringara nga Yugoslavia akpara tihe ni ti kura aringara kusayo te.

4. Pa zanga rimiso aDezire Yekova tiyo ku rogo vura sa kura aboro i nibi yo wai?

⁴ Pa zanga rimiso aDezire Yekova tiyo ku rogo avura ima sa dungu akutu aboro rogo zegino dunduko i idi kuti gupai nga aDezire Yekova na ndikidi nyemuse tipa Mbori na gayo amurakporo. Ka pepai ni wiri guruhe, i namanga ndikidi pambori. Ono tie, gu kura apai kinaho tipa gaani irisombori sa dungu aboro i idi kuti gupai nga ani nga ndikidi aKristano.

5. Gini ariapai namangi fu agu apefuo Yesu naadu mbata?

⁵ Tona kinaho Yesu atona gako sunge tungusapai ni, ko anyakasipa tungusa wene pangbanga nga ga ga Mbori Kindo. Ko asia gako abawiriki 12 tipa i moimburu tungusapai rogo zegino dũ, na fuo gure, ko ki raba kura badona abawiriki berewe 70. (Rk. 6:13; 10:1) Si adu nga i mbakaditiyo tipa ka tungusa wene pangbanga fu kura aboro, na i atonaha na aYudo. Fuani, iiriwopai amangi nga, ga Yesu abawiriki andu ka tungusaha a fu azanga yeratise. Nairiwo gu ariapai naadu fu gu zaaza abawiriki nangia aYudo re!—Amo. 1:8.

6. Ginihe naasa Petero ko ini gupai nga Yekova akparanga aboro te?

⁶ Mbori akedi gu mokedi nangia Petero ko ndu kua gu Gendiria yo nangia Korunerio. Petero abi gupai nga Mbori akparanga aboro te. I abapatiza Korunerio na gako aborokporo. Gu pambori nga ga aKristano atona ka gbandaka; ngbatunga aboro dunduko agihe na ki dihe kugume. (Amo. 10:9-48) Zegino dunduko nangia gu ati si adu nga i nika mangaha sunge rogoho.

7, 8. Ginipai ga Yekova riigbu namangihe tipa kura aboro gi wene pangbanga? (Oni bi gu sura du ti tonatonaha.)

⁷ Rogo gu pangbanga nga ga agu aDezire Yekova du ti gi gaani regbo re, agu aboro nangbembatayo rogo apai rogo gayo adungurati, i natungusa wene pangbanga na kini yugupai rogo zegino dunduko. Areme, aboro bangeyo naima mbeda kuti amirioni muambe namanga ome ka gbandaka ga Kristo pangbanga rogo afugo naima susa 600, na agi afugo re nikaa nge kina ku mbatayo. I naino aDezire Yekova ti gayo tungusapai kporo na kporo, bangiri agene na ti kura aregbo, i na gbaraga awaraga rii ambisa pangba agene.

⁸ Abasafugo bangeyo naima susa 2,900 ima gbia rabahe tipa wai ka sa Ziazia Kekeapai na gu kura awaraga. I asanga agi awaraga re sa kina ku rogo agu afugo dungu aboro nainihe te. Gi gayo sunge re nakoda gu kura akama afugo nga gu kina bete amirioni aboro apehe. Ni kpiapai, Sepania yo, amirioni aboro nape gu fugo nga Catalan na aʹuru dũ. Vuru agu  aregbo susi barambeda, aboro atona ka pe pa-Catalan rogo dungu angbatungaha na rogo dungu agbata. ADezire Yekova nakusa dungu awaraga awere rogo pa-Catalan, na agu aboro napehe namanga adunguratise kina rogoho.

9, 10. Ginipai nayugo gupai nga ga Mbori riigbu naida aboro ini rengo?

⁹ Gi sunge nga ga safugo na yugopai re namanga rogo zegino dunduko. Mexico nga gu ringara aboro ape pa aboro Sepania rogoho, ono gu kura afugo kinaho dungu aboro apehe yo a. Aboro Maya nga agu aboro nape ngbatunga agu afugo re. Gu be-basunge du Mexico yo akedi agu aboro nasa gu fugo nga ga Maya i ndu ka raka rogo gu rago i arengbe kaa gia gu fugo re na kini pehe dedede. Gu kura kpiapai nga pa-Nepali, nga gu fugo aboro bangeyo naima susa amirioni 29 apehe rogo gu ringara nga Nepal. Afugo wa 120 i apehe rogo gu ringara re, ono aboro bangeyo naima susa amirioni bawe nape pa-Nepali na kura aboro ima wirikaha a. I ima kusa gaani awaraga rogo gu fugo re a.

¹⁰ Ga Yekova riigbu nabi gu gaha sunge nga ga tungusa gu wene pangbanga nga ga Kindo rogo zegino dunduko na nyanyakipa ha a wa duhe ni yuguyuguhe rogo gu gene i aundo abasa gaani awaraga rogo zegino dunduko. Dungu amirioni atrakte, aburosua, na amagazini i nakparakaha rogo zegino dunduko fu aboro zanga i tumo tipaha. I nakusa agi awaraga re na gu marã aDezire Yekova agamaha mbiko peka yo fuo ga Yesu rugapai nga gu naya: “[Oni adihe gbua,” NW], oni fúku he tigaoni kinawo.”—Mt. 10:8.

11, 12. Wai gu tungusapai aDezire Yekova amangaha rogo zegino dũ aye na wene sangbanaha kurii kura aboro?

¹¹ ADezire Yekova ima da kuti gupai nga i na rengo beyo, na i nambu pa kura gayo apai tipa ka tungusapai fu ngbatunga aboro dunduko. Dunguyo ima sa gayo raka taata, ki wiriki kura afugo, na ki inidi tiyo na gu kura ngbatunga raka tipa ka manga gi nyanyakipa sunge nga ga aKristano re. Gu sunge tungusapai na yugopai namanga rogo zegino dunduko re nga gu kura ndupai nasa dungu aboro i idi kuti gupai nga aDezire Yekova nga ndikidi apefuo Yesu Kristo.

¹² ADezire Yekova namanga agi apai re dunduko mbiko i ima ida kuti gupai nga  i ima gbia rengo. Ono gini kurapai berewe sa dungu aboro i idi kuti gupai nga ADezire Yekova du na rengo beyo?—Oni gedi ARomo 14:17, 18.

13. Wai aDezire Yekova abanda gayo riigbu si nye ni gigirihe rogo toro yo?

¹³ Ani ima rengba ka gbia undo ti agu apai agu aKristano du ti gaani regbo re apehe, nga aguyo idi kuti gupai nga i ima gbia rengo. Gu kura wirina sa niima mangasunge fu Yekova tipa gbanga regbo aya, “I namanga ome tipa ka banda ga Yekova riigbu ni gigirihe, zanga bi pa gu boro si aida i fu rugute funi.” Wai i amanga gipai re? Ni peka yo fuo agu arugute du rogo Fugo Mbori yo na ni peka yo fuo gu kpiapai Yesu na gako abawiriki amoihe. Sidu, rogo gu pangbanga nga ga agu aDezire Yekova du awere, kina bete aboro i akusayo rogo dungurati bambiko gupai nga i andunga kuti ga Mbori arugute te. Dungu aboro kodihe na aguyo naaraka ngba gu gene Mbori aidanga na ni ya aima aria gayo sino raka na i nga wene kpiapai fu kura aboro awere.—Oni gedi 1 AKorindo 6:9-11.

14. Agu aboro i nakusiyo rogo dungurati, ginipai i namangihe, na sangbanaha nga gine?

¹⁴ Na ginipai du tipa aguyo i akusayo kusayo rogo dungurati ringbisihe kuti agu arugute nga ga Ziazia Kekeapai? Dungu akutu yo ima saberã yo na i ki di yo kugume ku rogo dungurati. (Oni gedi 2 AKorindo 2:6-8.) Pa peka yo fuo agu arugute nga ga Ziazia Kekeapai nibi pa ruru mangapai sa gayo dungurati si du ni gigirihe na ki sayo i du na kido kutini. Wa vura duhe nga gu kura apambori nambu gayo aboro i nimangi agu apai ngbatiyo, aDezire Yekova nakakuti ga Mbori arugute, na gipai re ima sa dungu aboro i idi kuti gupai nga, agi aboro re namanga rengo.

15. Gine naasa wirina sa ko da kuti gupai nga ko rogo rengo yo?

¹⁵ Tipagine agu aDezire Yekova naima ima ku rogo dungurati naidi ti ni kuti gupai nga i ima gbia rengo? Wirina sa garãko naima susa 50 aya: “Mi aima ida kuti gupai mbu re tooni nga gi idapase narurii apai biata nga: (1) Mbori kina ti ni; (2) ko naadu kugii pa ke Ziazia Kekeapai; na (3) ko namangasunge na gu dungurati nga ga aKristano areme na kini fu maku kuriihe. Wa mi nawisigipai tipa dungu agarã, mi na aʹasada agi apai du biata re na kini sana tire singia agu apai re mburu he nzunzu rii rengo. Agu agopai du tipa ha dunduko ni kina ruruhe rogo agarã dunduko, na si nanyakasa gimi idapase nga ani na rengo berani.”

16. Ginipai naasa gu kura wirinarani sa ri idi kuti gupai nga ri rogo rengo yo?

¹⁶ Kura wirina sa namangasunge rogo gaani rii-basunge nga ga zegino New York yo aya tipa ga Yekova riigbu wẽ: “Si nga gu  yangara riigbu natakapande pa rimo Yekova. Ruhe aru tie ho ani aya ni wẽ rimo Mbori nga Yekova wa bara 7,000 rogo Ziazia Kekeapai yo. Mi na bakere ngbarago mbiko gu ngarasaro du rogo 2 Pekapai 16:9 naya: ‘Bangiri Yekova naora koyo na kono auru kpotosende no dunduko, ka yugo tiko na pa nyaka fu agu yo du kpotoyo yo ziazia koyo du ko ni.’” Ri agbia kurapai kutini nga: “Rengo ima yugo wai fere si aida kpotore yo du dunduko koyo du Yekova ni tipa ko yugopa gako nyaka koyo du mi ni. Gimi pagume na Yekova na nyanyakipa ha fere. Na mi na bakere tambuahe tipa gupai Yesu amangaha ka undo rani ani du na dudunguro inohe tipa Mbori na si nabanda re.”

17. Ginipai naasa gu kura wirina naaidanga kuti Mbori mbata ya ko idi kuti gupai nga ko gbia rengo, na tipagine?

¹⁷ Gu kura wirina sa naaidanga mbata kuti gupai nga Mbori ti ni ya, aya: “Kusikusiahe ima sa re mi idi kuti gupai nga Mbori naida aboro gbia ngbarago be raka na ko ambunga aboro i ni rungo arungo kindi te. Kura pai nga, wa gi zegino re agberã kina ku mbatayo be azanga sinombori, ga Yekova aboro nasona kina ku mbatayo rogo idapase yo na nyemuse. Kina ga Yekova toro sa rengbe ka sa gi iriwopai re si nimangi ti gi gaani regbo re.”—Oni gedi 1 Petero 4:1-4.

18. Gaoni bipai nga gine tipa gupai awirina ue agumbaha?

¹⁸ Gu kura wirina naima ima ku rogo rengo ape ndu gupai ko naidi ti ni kuti gu rengo ani atungusaha ki ya: “Gimi wisigopai vuru gu dungu agarã susi re ima sa re mi idi kuti gupai nga aDezire Yekova ima manga bakere ome tipa ka karaga gu pambori nga ga aKristano naadu rogo bambata sa kama agarã kubaha. Wa mi nata rogo zegino, mi ima bi gu kodatise du dagba aDezire Yekova rogo zegino dunduko. Gu rengo du rogo Ziazia Kekeapai nafu ngbarago fere.” Ho i asana gu wirina ni garãko naima susa 60 tipa ndu gupai ko naidi ti ni kuti gupai nga ko ima gbia rengo, ko afura tipa Yesu ki ya: “Ani ima wisigo gu raka na gu tungusapai nangia ga Yesu na kidu na bakere tambuahe tipaha. Ani ima manga ariapai rogo gaani raka yo tipa ka mbeda na Mbori vurube Yesu Kristo. Ani ima bi gupai nga ga Yesu motumo tumori nga guhe rengbe kafu bata furani. Na ani ima ino gupai nga i aima zingisako dagba akangba. Ani na dungu aDezire tipa gipai re.”—Oni gedi 1 AKorindo 15:3-8.

19, 20. (a) Gini sunge Pauro anyakasipaha fu agu awirina naadu Roma yo? (b) Nidu ani ni agu aKristano naima kpara gaani raka fu Mbori, gini mamu du berani?

¹⁹ Nidu ani ni agu aKristano nakpinyemu gaani amurakporo, ani arengbanga ka banda gu bawene rengo du berani tipa kina tirani te. Pauro aya fu agu awirina naadu Roma yo wẽ: “Ka mo kusi pa Yesu ya Gbia nga ko ni ngbaro, ki idi pa gu pai kpotoro yo nga Mbori azingisi ko be kpio dagba akangba, mo bati abata. Bambiko boro naida pase kpotoni yo, Mbori ki sa ni ni ruru ni, ni ki kusi pase ni ngbani sa bata.”—Rom. 10:9, 10.

²⁰ Wa du ani ni agu aDezire Yekova naima kpara gaani raka fuko, ani ima ida kuti gupai nga ani na rengo berani na ani ima ino pa gu mamu du berani nga ka yugo gu wene pangbanga nga ga ga Mbori Kindo fu kura aboro. Wa ani kaa tungusapai, ani moingoho amaa ni gaani sasa ka yugo gu rengo nga ga Ziazia Kekeapai fu kura aboro na kini yuguhe fuyo nga ani na rengo berani.