1, 2. Gini bandahe si aaidaha tipa tita dee, na tipagine?

GU BAMBATA sangbanebi du rogo Ziazia Kekeapai na nyanyakipa ha fu Yekova tipa gako ringbisapai digisitihe. Ho Mbori amangi kidohe ni ati Edene yo, ko aya: “Mi amáa sogote dagba [Satana] na de, dagba atitaro na atitari a.” Si adu nga banyaka gu sogote re nika du wai? Yekova aya: “Ko [tita dee] ki mburu riro [Satana], mo ki mburu gidako.” (Bam. P. 3:15) Si adu nga gu sogote du dagba Satana na dee nika igirã ni kerehe, na Satana ki mangi ome ka nyasariipa tita dee.

² Si airiwongo te ka bi gupai nga bake papara Atambuahe akpari fu Mbori tipa gako siasia aboro ki ya: “Bambiko, mo ngere, avuraro nata wawa; agu yo nasoga ro i tumba riyo ku ari. I nata bura dagba yo kuti gamo aboro; ki nigumba rondo dagba yo kuti gamo bandabanda aboro. Ya yo, ‘oni ye, ani gbarasi yo ka i adu nga ni rikaaboro berewe ya.’” (Tam. 83:2-4) Si aaida i banda ngbatunga tita dee abanda ka i gbarasingo ho ya. Tipa ka manga gipai re, Yekova amangi kura mbakadapai narengbe ka banda gako ringbisapai si digisitihe.

3, 4. (a) Gini regbo gu mozunga nga ga aNdiko atona mangasunge, na ginipai aYisaraere aidi ka mangaha? (b) Ginipai gu mozunga nga ga aNdiko adu tipa ka mangaha?

³ Ngbatunga Abarayama atona ti Yisaka, Yakobo na i ki tona ka nge gbe ki da ti amirioni, na Yekova ki sayo ni gu rikaaboro nangia aYisaraere. Yekova amangi kparakpara mozunga na yo vurube Moize ni fuko aNdiko fuyo, na aYisaraere aima ida ka ndu kuti gu mozunga re. Ziazia Kekeapai naya: “[Moize] ki di kitabu mokido, ki gedi he ku tu aboro yo; i ki ya, ‘Agu apai dunduko gumba Yekova ha ani amanga ha amanga, ani agia sangbako agia.’ Mose ki di bete kurera [agu abaabagara i anaafura ni motumo] ki migidi he ku ri aboro, ki ya, ‘Oni ngére, gu kure nga ga zungahe nga gu Yekova azunga fu roni rogo agi apai re dunduko.’”—Gate 24:3-8.

⁴ Gu mozunga nga ga aNdiko atona mangasunge pati Bagangara Sinai yo rogo 1513 M.B.K. Mbori amangisunge na gu mozunga re ka kpara aYisaraere ni gako siasia aboro. Yekova ada nga ‘gayo basaringbanga, bafurugute, na ni gayo bakindo.’ (Yes. 33:22) Gu pangbanga du tipa aYisaraere nayugo gupai naanimangi ho aboro animangi ga Mbori arugute ni watadu ho i anaamanganga ha ni ya. Agu aNdiko re adu tipa ka banda ngbatunga Abarayama mbiko si aaidanga ha fuyo i rogo apagano na kini irisi kungba ambori te.—Gate 20:4-6; 34:12-16.

5. (a) Gu mozunga nga ga aNdiko afu gini momu fu aYisaraere? (b) Tipagine Mbori aka aYisaraere ti ni?

⁵ Gu mozunga nga ga aNdiko amangi mbakadapai tipa aboromotumo, na si angia kpia gu bakere mbakadapai naadu ku mbatayo. (Eb. 7:11; 10:1) Nirengo, aYisaraere adu na kparakpara momu vurube gu mozunga re mbiko ka i aandu kuti ga Yekova andiko, ka i ada ni “ga bakindo aboromotumo” du rogoyo nzunzu nga agu abakindo nga aboromotumo. (Oni gedi Gate 19:5, 6.) Ono tie, aYisaraere aandunga kuti gipai re te. Kuba gupai nga i di Masiya kugume nangia bambata papara tita Abarayama, i aka ko. Ni sangbana gipai re, Mbori aka gu rikaaboro re.

6. Ginipai aNdiko amangihe?

⁶ Pa zanga nye aYisaraere ni ruruyo fu Yekova aarengbanga ka sayo i da ni agu abakindo nga aboromotumo te, na si aayugongo gupai a nga pa agu aNdiko re ima gberã te. Agu aNdiko re adu tipa ka banda tita dee na ki ndu na aboro koyo du Masiya ni. Agu aNdiko re adigisitihe fuo ye Kristo ku auru kpotosende ane. Ziazia Kekeapai naya: “Kristo nga digida rugute.” (Rom. 10:4) Gu sanahe du kindi nga: Ada tie narengbe kadu na gu  momu nga kada ni agu abakindo nga aboromotumo? Yekova amangi gu kura mbakadapai tipa ka kusa vovo rikaaboro.

7. Ginipai Yekova agumbaha vurube Yeremaya nibipa vovo mozunga?

⁷ Mbata fu Yekova digisi gu mozunga nga ga aNdiko, ko agumbapai vurube gu nebi nangia Yeremaya nga ko nika manga “vovo mokido” na aYisaraere. (Oni gedi Yeremaya 31:31-33.) Si adu nga gu mozunga re nika du kia ti gu mozunga nga ga aNdiko mbiko si asaha taata i mbupai fu aboro ti aingapai zanga i nifu anya ni motumo. Wai du ka si amangi gipai re?

8, 9. (a) Ginipai gu kure Yesu nauka amangaha? (b) Gini momu du fu aguyo du rogo vovo mozunga yo? (Oni bi gu sura du ti tonatonaha.)

⁸ Fuo kama agarã kusa, Yesu asigira ga Gbia Riahe rogo Nisana 14, rogo gu garã nangia 33. Ho ko aafura ni tipa gu inga naadu na imekakue, ko aya fu gu gako ruru amokedi naadu 11 wẽ: “Gi inga re, si nga vovo ndika [vovo mozunga] rogo kurere, nga kina gu nauka tipa roni.” (Rk. 22:20) Kina gu bangisapai re Matayo apehe tipa Yesu nibipa imekakue ki ya: “Gere nga kurere nga ga vovo ndika [vovo mozunga], i niuka ha tipa roni na dungu aboro sa dia gbegberẽapai ti yo.”—Mt. 26:27, 28.

⁹ Gu kure Yesu naauka re asa vovo mozunga si du na nyanyakipa ha. Gu kureko re nasaha a taata Mbori mbupai ti ingapai bara sa kindi. Vovo mozunga aabingo pa Yesu te, sidu, ndupai aadunga ho i mbupai fuko te mbiko ingapai aadunga tiko te. Mbori amangisunge na gu kure Yesu naauka re tipa ka mbupai fu awiri Adamu. Ko rengbe a ka dia kura ruru aboro ni ‘awiriko’ ni mbeda ko yo ni ziazia toro. (Oni gedi ARomo 8:14-17.) Wa duhe nga Mbori nabiyo wa agu aboro adunga na ingapai ya, ani rengbe ka ya i wakina Yesu nga Wiri Mbori adunga na ingapai ya. Gi mbedimbedi aboro re nika da “ni adikumbo na Kristo,” na i na gu momu beyo nga kada ni “ga bakindo aboromotumo” watadu agu abakindo nga aboromotumo. Gere nangia gu momu ka aYisaraere adu na ni tii aNdiko. Nibipa aguyo nika da “ni adikumbo na Kristo,” gu mokedi nangia Petero aya: “Oni nga siasia ngbatunga aboro, nga ga bakindo aboromotumo, nga ziazia rika aboro, nga aboro du ni kina ga Mbori yo, ya oni yugu gu wene sino gbayaga nga ga gu ko nayambu roni bitimo yo ku rogo gako iiriwo imarago yo.” (1 Pet. 2:9) Nairiwo wai nyakipa gu vovo mozunga re! Si nasa gupai nga ga Yesu abawiriki da ni ue papara tita Abarayama.

10. Gini regbo vovo mozunga atona mangasunge ti ni, na tipagine si atonaha ti ni ti gu regbo re?

¹⁰ Gini regbo vovo mozunga atona mangasunge ti ni? Si aatonanga mangasunge ho Yesu afura ni tipaha rogo gu yangara yuru ko adu auru kpotosende te. Tipa si tona mangasunge, si aidi kure Yesu uka mbata na Yesu ki ndu ku barabangiri Yekova ka yugopa nyaka gu kureko naauka. Kurigure, si aidi ziazia toro zoro kurii agu aboro kada “ni adikumbo na Kristo.” Sidu, vovo mozunga atona mangasunge rago Pendekote rogo gu garã nangia 33 ho i ambedi ga Yesu ruru abawiriki ni na ziazia toro.

11. Wai vovo mozunga asa aYudo na aGendiria i da ni papara agu aYisaraere nga ga toro yo, na bange agu aboro du rogo vovo mozunga wai?

¹¹ Wa vura duhe nga gu mozunga nga ga aNdiko ada “ni kuru he” ho Yekova  agumbapai ni vurube Yeremaya nga ko nika manga vovo mozunga na aYisaraere, si aadigongo nzunzu te da kinaho vovo mozunga atona ka mangasunge ni. (Eb. 8:13) Ho si atona mangasunge ni, Mbori aabi aYudo na agu aidipase nangia aGendiria kina sa mbiko gayo ‘yeratise nga ga kpoto yo rogo Toro yo, ni kekehe te.’ (Rom. 2:29) Pa manga Mbori vovo mozunga nayo arengbe ka maa andiko “ku rogo gayo aberã, [ko ake] he ngbaduyo yo a.” (Eb. 8:10) Bange agu aboro du rogo vovo mozunga yo nga 144,000, i du nga gu vovo rikaaboro nga “ga Mbori Yisaraere” nga agu aYisaraere nga ga toro yo.—Gara. 6:16; Yugo. 14:1, 4.

12. Gini wiratise du dagba gu mozunga nga ga aNdiko na vovo mozunga?

¹² Gini wiratise du dagba gu mozunga nga ga aNdiko na vovo mozunga? Gu mozunga nga ga aNdiko adu dagba Yekova na aYisaraere, vovo mozunga dagba Yekova na agu aYisaraere nga ga toro yo. Moize angia azarõ nga ga kuru mozunga, Yesu nga Azarõ nga ga vovo mozunga. Kure anya naasa gu mozunga nga ga aNdiko si du na nyanyakipa ha, kure Yesu nasa vovo mozunga si du na nyanyakipa ha. Gu mozunga nga ga aNdiko asa Moize ko ngbembatayo fu aYisaraere, vovo mozunga sa Yesu nga Barii dungurati ko ngbembatayo fu agu aboro du rogoho.—Ef. 1:22.

13, 14. (a) Rogo gini gene du vovo mozunga sa na Kindo ngbaha? (b) Ginipai si aidaha tipa agu aYisaraere nga ga toro yo zogarago na Kristo ngbangbaturũ yo?

¹³ Vovo mozunga sa na Kindo rogo gu gene nga si nakusa gu rikaaboro du ni ziazia yo du na momu kada ni abakindo na ni aboromotumo rogo gu Kindo nga ga ngbangbaturũ. Gu rikaaboro re nga ue papara tita Abarayama. (Gara. 3:29) Sidu, vovo mozunga nanyakasa gu mozunga Mbori amangihe na Abarayama.

¹⁴ Kurapai kinaho tipa Kindo si aida i sigiraha. Vovo mozunga nakusa agu aYisaraere nga ga toro yo na kini sa agu aboro du rogoho i da “ni adikumbo na Kristo.” Ono tie, gu kura mbakadapai kinaho nga ga mozunga si aidaha tipa i koditiyo na Yesu rogo gako Kindo ni abakindo na ni aboromotumo ngbangbaturũ yo.

15. Gini mozunga Yesu amangihe na gako ruru amokedi?

¹⁵ Fuo Yesu sigira Ga Gbia Riahe, ko amangi mozunga na gako ruru amokedi i ayambaha nga gu mozunga nga ga Kindo. (Rk. 22:28-30.) Vovo mozunga wa gu kura amozunga Yekova amangihe te, mbiko si nga gu mozunga kina Yesu amangihe na mbedimbedi apefuoko. Ho Yesu aya ni wẽ, “mi nafu ngbi [“mi mangi mozunga,” NW] fu roni a wa Buba afu he fere,” si nawira wa ko aafura tipa gu mozunga Yekova amangihe na ko tipa ko da ni ‘boromotumo nyeanye kindi wa Marekisedeke.’—Eb. 5:5, 6.

16. Ginipai gu mozunga nga ga Kindo asaha taata fu mbedimbedi aKristano?

¹⁶ Gu ruru amokedi naadu 11 ‘adu na Yesu ho i aʹasadi ko ni.’ Gu mozunga nga ga Kindo akido yo nga i nika du na ko ngbangbaturũ yo na kini zogorago ni abakindo na kini mangisunge ni aboromotumo. Ono tie, anga kina aguyo naadu 11 naadu na gi momu re te. Yesu ayugu tiko fu Yoane rogo yuguyugupai yo ki ya: “Gu ni ka di be pai, mi aásia pa sunga na mi fu ni auru gi mbatabakindo, wa mi adi be pai ki sungu na Buba auru gako mbatabakindo.” (Yugo. 3:21) Sidu, Yesu amangi gu mozunga nga ga Kindo  na mbedimbedi aKristano nga 144,000. (Yugo. 5:9, 10; 7:4) Gu mozunga re nasa yo i zogorago na ko ngbangbaturũ yo. Gipai re wakina gu dee bakindo nadi ri rogo kikiipa kporo ri naye ki tona ka zogarago sa na ko. Nirengo, Ziazia Kekeapai nafura tipa mbedimbedi aKristano wa “gu de” Kristo ka dia ri, nga “ziazia ngasu de” i nakido pa ri fu ko.—Yugo. 19:7, 8; 21:9; 2 Kor. 11:2.

17, 18. (a) Oni fugungo pai tipa agu amozunga sita ani nawisigihe du na agu apai nga ga Kindo rogoho. (b) Tipagine rengbe ani kadu ti ni na nyanyaki idapase kuti ga Mbori Kindo?

¹⁷ Agu amozunga dunduko ani nawisigihe rogo gu kekeapai du ue re, si na nyanyakipa pai sa rogoho watadu dungu apai tipa Kindo. (Oni bi gu sanduki nga “Gu Gene Mbori Nika Digiso Gako Ringbisapai Ngbaha.”) Gipai re nanyakasapa gu nyanyakipa mbakadapai nga ga Kindo. Sidu, ani na nyanyaki ndupai berani kadu na idapase kuti ga Masiya Kindo nga gu Mbori amangasunge na ni ka digiso gako ringbisapai tipa kpotosende na aboro.—Yugo. 11:15.

¹⁸ Ya mo oni rengbe ka tikango gupai nga agu apai Kindo amangaha nika ye na nyenye amaku fu aboro? Zanga kapa, ani rengbe arengba ka takapandepa ga Mbori kindo nga si nika nyasariipa gu kpakaraapai aboro agbiatiyo na ni dunduko. Ani takingo pande gi rengo re ataka zaaza fu kura aboro!—Mt. 24:14.