Davide ake gupai nga ko “ata bi nga ruru boro i nambu ni te, na ngbatungani i nio riahe a te.” Ko ape gipai re nibi gupai namangi tipa ko. Ko aima ino wai Mbori aangerafuo ko dedede. (Tam. 37:25) Ono tie, afugo Davide ayugongo gupai nga zingo ahe amanganga ga Yekova amoyambu te te.

Aregbo adu kinaho Davide adu rogo kpakarapai. Gu adu ti gu regbo ko anaazubo be Saura. Gu riahe naadu be Davide aima nyasa, ko ki sanahe i fu kpakuto fuko na agu aboro naadu na ko. (1 Sam. 21:1-6) Sidu, ti gu regbo re, Davide ‘ahõ riahe.’ Ono wa ko avura du rogo gu kpakarapai re, ko aima ino gupai nga Yekova aambunga ko te. Gu rengo duho nga, ba ho ani agedapai rogoho nga Davide ahõ he tipa kaa raka te.

Rogo Matayo 6:33, ani nabi gu kidohe Yesu apehe nga Mbori nika ngera angerafuo azingo nga ga gu gako ruru amoyambu naperesapa gako Kindo mbatayo. Ko aya: “Oni gbáta gako ngbi mbata, na gako rurupai; i ki kpamia agi ahe re [nakoda riahe, agu i ambiraha ambira, na roko] dunduko fu roni kuti ni.” Ono tie, Yesu ape gupai re mbiko gomoro ima rengba ka manga ‘awirinako’ ka i du rogo rungosi. (Mt. 25:35, 37, 40) Gipai re aima manga gu mokedi nangia Pauro. Ti kura regbo, gomoro amangiko na gomoro ime.—2 Kor. 11:27.

Yekova nape gupai furani nga i nika rungosi rani ngba dungu agene. Ko ima rengba ka mbu rani zingo mangi rani wa ka ani karagapai kuti gu kitangbangase Bakitingbanga aye na ni kuti rani. (Eyo. 2:3-5) Ni kpiapai, gu kura awirinarani wa aguyo i akisi yo ku rogo ga aNazi bataya naadu tipa zizi aboro abi tiyo rogo kpakarapai mbiko arungosiro. I aka na riahe beyo kini berẽ gupai nga manga yo wo nika sayo i mbupa gayo idapase. Agu aDezire naadu ni ruruyo fu Yekova na ki gisangba, ko aambunga yo te. Ko ambuyo i gbiatiyo na agu aʹasada re, kina wai ko ambu aKristano dunduko i gbiatiyo na dungu aʹasada ni bakiakia. Ono tie, rengo du nga Yekova nangera angerafuo agu aboro dunduko nambu tipa rimoko. (1 Kor. 10:13) Ani ima rengba ka maa afugo AFiripoio 1:29 ku berãrani yo naya: “I aidi he fu roni tipa Kristo kina ida pa ko sa te, ono hi pai a tipa ko.”

Yekova nakidohe nga ko nika duadu na gako amoyambu. Ni kpiapai Yesaya 54:17 naya: “Gu ũvura i ka mbakada ha kuti ro si adía nga be ro wa sa te.” Gi kidohe re nafu maabangirise fu ga Mbori aboro nabayo dunduko. Ono tie, wa du aKristano ni basasa, i ima rengba ka gbiatiyo na akpakarapai, rengbe ka ye na kpio.