1. Wai rengbe gu kitabu nga Pa Amotumo ka undo rani?

I FURA bara dunguhe tipa padu ziazia rogo Pa Amotumo kisusi kura akitabu rogo Ziazia Kekeapai. Wa duhe nga gi sino re nga gu sino si aidaha be ndikidi airisi Yekova, ka ani rugutirani na gupai Pa Amotumo afura tipaha, si nika undo rani ani du ziazia.

2. Gini apai gu kitabu nga Pa Amotumo afura tipaha?

² Gu kitabu nga Pa Amotumo, gu nebi nangia Moize naakehe na si nga papara “Ziazia Kekeapai” na si ni wenehe tipa yugopai. (2 Tim. 3:16) Rogo gaha akapita ni basasa, rimo Yekova rogoho wa bara bawe. Ka ani rugutirani na gupai si apehe, si nika undo rani ka ani yengo na gbarasarimo kuti Yekova ya. (Pa Mot. 22:32) Gi kitabu re mangisunge na agu afugo nga “Mi nga Yekova,” si naida agu afugo re tingidi rani ani gisangbako. Rogo gi kekeapai re gbiati gu ngbefuoho, ani nika gbianga ngbarago be wisigo gu weneapai du rogo gu kitabu nga Pa Amotumo, mbiko si nga gu gamahe Mbori nafuhe furani ani irisiko ziazia.

3, 4. Pa zunda Arona na wiriko narukuba gine? (Oni bi gu sura du ti tonatonaha.)

³ Oni gedi Pa Amotumo 8:5, 6. Yekova asia Arona ko  mangisunge ni gbiamotumo fu aYisaraere, na si adu nga awiriko du ni aboromotumo fu aboro. Arona narukuba Yesu Kristo na awiriko narukuba Mbedimbedi aKristano. Ya mo pa zunda Arona tiko narukuba pa giriso Yesu? Oó, ingapai aadunga ti Yesu te na ko adu “ni ziazia ko,” ndupai aadunga ho i girisi ko te. (Eb. 7:26; 9:14) Ono tie, pa zunda Arona tiko aarunga kuba padu Yesu ni gigiri ko watadu gako ruru mangapai te. Ginihe tie pa zunda awiri Arona ayugoho?

⁴ Pa zunda awiri Arona narukuba pa giriso agu aboro i nasia yo i du ni aboromotumo ngbangbaturũ yo. Ya mo gu bapatiza mbedimbedi aKristano azihe narukuba pa giriso awiri Arona? Oó, bapatiza azundanga ingapai kusayo te; kuba gure, si nayugo gupai nga gu boro re ima kpara gani raka fu Yekova Mbori. I nazunda mbedimbedi aKristano rogo “pai” watadu fugo, na gure nga i nadia ga Kristo ayugopai dunduko kugume na kini mangihe rogo gayo raka yo. (Ef. 5:25-27) Rogo gi gene re, i nagiriso yo na kini sayo ziazia. Ono ginipai du tipa “kura akandoro”?—Yo. 10:16.

5. Wai rengbe ani ka ya tie wẽ Fugo Mbori nagiriso kura akandoro?

⁵ Awiri Arona aarunga kuba ga Yesu “bakere rimbasa” kura akandoro te. (Yugo. 7:9) Ya mo i dunduko ni basasa i nasayo ni ziazia yo na ki girisiyo mbiko Fugo Mbori? Ii, wo duhe! Ho agu aboro du na maabangirise ka raka auru kpotosende ageda gupai Ziazia Kekeapai apehe ni tipa pa nyaka ga Yesu motumo, i naida kutini na ki tona ka ‘mangapa ko uru na yuru.’ (Yugo. 7:13-15) Pa giriso mbedimbedi aKristano tiyo gbiati kura akandoro ni yuguyuguhe ho du gayo ‘mangapai ni ni wenehe’ ku bangiri aboro. (1 Pet. 2:12) Yekova na ngbarago ka bi kura akandoro na mbedimbedi aKristano ni gigiri yo na ni kodikodi yo wa i adegatuyo na kini ra ni goyo fu Yesu nga Babanda-akandoro.

6. Gini ngbatunga wisigotise rengbe ka undo boro?

⁶ Pa ya Yekova fu ga aYisaraere aboromotumo i girisi tiyo, si narogo yo ti ni areme fu gako aboro. Agu aboro ani awisigo Ziazia Kekeapai na yo nabi wai abi du gaani aba-irisombori ni gigirihe na wai ani avoda tirani ni gigiri rani. Ono tie, gu girisotise nangia ga aboromotumo naundo rani ani bi gupai nga, gu boro naida ka ye kurii ga Yekova bagangara nga ga irisombori du ni tumbatumbaha, ni duwa ka ni du “na ziazia kpotoni yo.” (Oni gedi Atambuahe 24:3, 4; Yes. 2:2, 3.) Si naida ani mangisunge fu Mbori na gigiri berãrani gbiati ngbadurani yo kodihe na bororani a. Gere naida na gupai nga ani niwisigi tirani ti aregbo dunduko, mbiko si rengbe ka undo rani ani mangi bakere ariapai tipa kadu ni ziazia rani. (2 Kor. 13:5) Ni kpiapai, gu Kristano saha ni sino ni kaa bi agu ahe nazingisa nyemu kodaba, si naida ni sana tiní nga, ‘Ya mo mi ni ziazia re?’ Fuani, ni gbata undo ka diabe gu gbegberẽ mangapai re.—Yak. 5:14.

7. Ringbisihe kuti Pa Amotumo 8:22-24, gini kpiapai Yesu amoihe?

⁷ Ho i asia Arona ni ko du ni Gbiamotumo na awiriko du ni aboromotumo fu aYisaraere, i akpe kure kandoro ti kumba tuyo, bawiribe yo, na ti bawirindu yo. (Oni gedi Pa Amotumo 8:22-24.) Gi kure i akpehe tiyo re aayugo gupai nga i nika giasangba na kini mangi gayo sunge wenengai. Wakina gure a, gu Gbiamotumo nga Yesu aima maa wene kpiapai fu mbedimbedi aKristano na kura akandoro. Ko anaadegatuko adega kuti wai Mbori aangbembatayo fuko.  Yesu amangisunge na beko tipa ka manga gupai Mbori akpinyemuhe, na nduko aaguaringa ngbagene ziazia pai te.—Yo. 4:31-34.

8. Ginipai si aida airisi Yekova dunduko mangihe?

⁸ Mbedimbedi aKristano gbiati ga Yesu kura akandoro duwa ka i pekefuo wai Gbiamotumo adu ni ruru ko. Airisi Yekova dunduko si aida i mangipai kuti agu arugapai du rogo Fugo Mbori yo tipa ka zanga rungosi ziazia toro. (Ef. 4:30) Si naida i ‘mbakadi ruru agene tipa nduyo.’—Eb. 12:13.

9. Ginipai agu awirina biata namangisunge na agu awirina du rogo Riigbu Bipasunge agumbaha, na wai rengbe afugoyo ka undo rani ani du ni ziazia rani?

⁹ Ani bingo afugo agu awirina biata du na maabangirise ka raka auru kpotosende ane nga aguyo namangisunge rogo bangisa ba na agu awirina du rogo Riigbu Bipasunge. Gu kurako sa aya: “Wa vura duhe nga gipai re aima du ni wene momu fere, padu mi mbembedi na mbedimbedi aKristano yugu gupai fere nga agi awirina re nga kpakpa aboro. Ono tie, vuru agu agarã dunduko susi, gimi sasa angia ka giasangba agu aboro nangbembatayo rogo apai yo.” Gu ue wirina aya: “Agu averesi du wa 2 AKorindo 10:5, nafura tipa ‘giasangba Kristo’ ima undo re mi ni gisangba na kidu na giatise na agu awirina nangbembatayo rogo apai. Gere nga gu giasangba naye kpotose yo.” Gu biata wirina aya: ‘Si ngba angba ka kpinyemu guhe Yekova akpinyemuhe na ka soga guhe ko asogaha. Ngbaha angba ka gbata gako arugapai dedede na kini mangi gupai ngbatiko, na ka mangapai kuti agu apai gako riigbu apehe gbiati gu agu aboro ko amangasunge nayo tipa gako ringbisapai nindu ku mbatayo.’ Gi wirina re aye ka ino gupai nga Nathan Knorr naye kada kusa dagba agu awirina naamangasunge rogo Riigbu Bipasunge, ko aidi kuti gu kekeapai naadu rogo gu Ngbaõbambu Sinziri nangia ga 1925 riihe aya “Birth of the Nation” wa si avura du nga kura aboro aidanga na ni te vurũ. Gu gako giasangba re aima zio ngbadu gi wirina re. Berãkurii afugo agu awirina re ima rengba ka undo rani ani du ni ziazia rani wa du ani ni agisangba.

10. Tipagine duhe ti ni ni nyanyakipa pai nga ani gisangba ga Mbori andiko tipa kure?

¹⁰ Oni gedi Pa Amotumo 17:10. Yekova azinahe fu aYisaraere ka i ‘ringa kure’ ya. Kina gu bangisapai re du fu aKristano areme nga ka i ringa kure nya watadu ka dia kure boro ya. (Amo. 15:28, 29) Si furani ni gbegberẽpai ka Yekova ‘zingi’ kuti rani na ki di rani kusayo rogo gako dungurati. Ani nakpinyemu ko na ani naida ka giasangbako. Zavura ho ani agbiatirani ni na agu apai namaa gaani raka ngbapai, si aidanga ani degeturani kuti agu apai agu aboro akpingo nyemu Yekova ya na aberẽnga pa ko ya apehe furani ani mangihe. Nirengo, ani ima inoho nga aboro asawia rani asawia tipa ka ani kure, ono ani nasia ka giasangba Yekova. (Yuda 17, 18) Gini bipai rengbe ka nyakasa rani ani ‘rugu tirani nyanyaki’ na gipai re zanga ri kure watadu ka diaha kutii kpotorani yo?—Pa Rug. 12:23.

11. Tipagine rengbe ani ka ya Uru Dada Ingapai aangianga kungbo sino mangapai nga ga pambori te?

¹¹ Pa manga ga aYisaraere gbiamotumo sunge na kure anya ti regbo Uru Dada Ingapai naundo rani ani rugutirani na pa ga Yekova bipai tipa kure. I anaabanda kure tipa gu kura sunge kia. Si anidu tipa ka dada ga agu aboro ingapai naaida Yekova mbupai fuyo. I anaamigido kure  abaabagara gbiati kure ameme kuti sanduki mokido na barabangirihe. (Pa Mot. 16:14, 15, 19) Gi mangapai re anaazaka gene tipa Yekova mbupai tipa ga aYisaraere ingapai. Kurigure, Yekova arũndiko nga ka boro imi nya ka riru, ni du wa ka ni kusuko kureru na ki dadihe ni nvutu, “bambiko unga unga ahe dunduko du kina rogo kure he yo.” (Pa Mot. 17:11-14) Ya mo agi apai re dunduko angia kungbo agu amangapai nga ga sino pambori? Oó. Pa mangasunge na kure ti regbo Uru Dada Ingapai, kodihe na gu zinahe du tipa uka kure kusande, si na ngbanya na gu ga Yekova arugute ko afuhe fu Noa na fu atitako tipa kure. (Bam. P. 9:3-6) Yekova aima zahe ti ri kure. Ginipai gupai re ayugoho fu aKristano?

12. Wai ga Pauro waraga fu agu aEbere nangia aKristano ayugopa wai du kure tipa mbupai?

¹² Ho gu mokedi nangia Pauro ake waraga ni fu agu aKristano nangia aEbere tipa gu ome du kure na ni tipa ka giriso boro, ko aya: “I nagirisa ahe ni dungu he ni kure, wa du pa rugute, ka i auka nga kure ya, ka hepai adu nga te.” (Eb. 9:22) Pauro aya gu motumo nangia ga anya, paha aanyakanga gbe te, ono si aatingida yo na gupai nga aboro ingapai nangia yo na i naida na gu motumo nika dia ingapai tiyo bara sa kindi. Nirengo, Ndiko angia “kirima gu wene apai nikaye, angia nga ndikidi kpiaha ya.” (Eb. 10:1-4) Wai ka mbupai ti ingapai arengbe kadu taata?

13. Pa yugo Yesu pa nyaka kureko fu Yekova nayugo gine?

¹³ Oni gedi AEfeso 1:7. Pa kpi Yesu Kristo ni motumo na pa ida ko ‘ka fu tiko tipa rani’ na nyanyakipa ha fu agu aboro dunduko nakpinyemu ko gbiati Bako. (Gara. 2:20) Wa vura duhe wo, gupai Yesu amangihe fuo kpiko na fuo zingako be kpio nga gupai nzunzu batasirani na ki sa gupai nga pa mbupai ti gaani ingapai du taata. Yesu adigisi gupai nanaamanga rogo ga Moize aNdiko ti regbo Uru Dada Ingapai. Rogo gu uru re, gbiamotumo anaadia bete kure gu  nya i atumo na u ki ndu na ni ku rogo Kparakpara Ziazia Ba Kisusi tii banye yo, na ki yuguhe fu Mbori si ki du wa ka i ya ni barabangiriko. Kusa, kina gu bangisapai re i anaamangaha rogo ga Soromo yekaru. (Pa Mot. 16:11-15) Wa kina gure a, Yesu aga ku ngbangbaturũ yo ki ndu ka yugo pa nyaka kureko fu Yekova. (Eb. 9:6, 7, 11-14, 24-28) Nangbaha nga i ima rengba ka mbupai furani ti gaani ingapai, na sangbakpotoraniyo ni gigirihe mbiko ani na idapase kuti kure Yesu!

14, 15. Tipagine duhe ti ni ni nyanyakipa pai ka rugatise na pa ga Yekova andiko tipa kure na kini irisihe?

¹⁴ Ya mo mo rugutiro awere na ndu gupai Yekova azinahe ti ni nga ka ani ringa “kure” ya? (Pa Mot. 17:10) Ya mo mo rugutiro na ndupai Mbori abi kure ti ni ni ziaziaha? Ko nabi kure wa kina unga. (Bam. P. 9:4) Ya mo mo idi kuti gupai nga si naida ani di gu bipai nga ga Mbori kugume na kini gisangba gako zinahe du tipa ne kure? Gu yangara gene rengbe ani kadu na zereda dagbarani na Mbori ngbaha nga kadu na idapase kuti ga Yesu motumo na kini bi kureko na kikiipaha kina wai Bakusirani abihe.—Koro. 1:19, 20.

¹⁵ Ani dunduko ima rengba ka gbiatirani na gu kpakarapai nabipa kure. Gume rani watadu bakurearani ima rengba ka gbia tiní ni na gupai nabipa dia kure kutii kpotoseyo. Ti regbo ngbatunga kpakaraapai wa gure, si niidi boro mangi diaberã amanga tipa gu ngbatunga adawa du na papara kure rogoho na gu ngbatunga ngerafuo kaza ni aidaha. Sidu tie, ngbaha angba ka manga wetekapai tipa ka ino gupai rengbe ani ka mangaha ti regbo tunguotunguo pai. Kparakpee rengbe ka undo rani ani ru nyanyaki zanga mbupa gaani idapase. Nirengo, ani aidanga ka fu gberãrago fu Yekova ni manga ani gupai nika sa gupai nga ko sogo rani te. Dungu amunganga namanga ome tipa ka zomia aboro i nifu kure fu kura aboro ka batasa gayo unga. Ono tie, ga Yekova ziazia aboro idi kuti gupai nga Bakusirani nga Yekova na rengo beko tipa ka yugo wai si aida ani mangisunge na kure. Ko nabi “kure” ni ziaziaha bangiriko. Si naida ani diberã ka irisa gu gako andiko du tipa kure. Ani yuguhe rogo gaani mangapai yo nga ani nabi gu kure Yesu ko afuhe ka batasa rani na nyanyakipa ha, mbiko si nasaha taata i mbupai furani ti gaani ingapai na ani gbia nyenye unga.—Yo. 3:16.

16. Tipagine si aida ga Yekova aboro du ti ni ziazia?

¹⁶ Ho Mbori akusi aYisaraere ni be sunge kanga ringara Ezipeta yo, ko aya fuyo wẽ: “Mi nga Yekova naakusi roni ringara Ezipeta yo, ka du ni gaoni Mbori; si oni ka du ti ni ni kparakpara roni ziazia a wa du mi ni kparakpara re ziazia.” (Pa Mot. 11:45) Yekova aida aYisaraere du ni ziazia yo mbiko ko ziazia. Wangia ani aDezire Yekova, si naida ani du a ni ziazia rani. Gu kitabu nga Pa Amotumo si ima fura tipa gipai re kpadio.

17. Gini bipai du mo na ni tipa gu kitabu nga Pa Amotumo?

¹⁷ Ani ima gbia undo ti wisigo ani papara Pa Amotumo. Si nawira wa gu wisigopai re ima saro mo bi gu kitabu re nga ga Mbori toro naadu kugii pa kehe. Berãkurii bete gu nyanyakipa apai du rogo Pa Amotumo ima kiiso gamo rugatinapai tipa ndu gupai si aida mo du ti ni ziazia. Ono tie, gini kura weneapai napido rani rogo gi kitabu du na Fugo Mbori rogoho re? Gini kurapai rengbe ani ka wirikaha behe nibipa mangasunge fu Yekova? Ani nika wisigopai tipa agi apai re rogo gu kekeapai naye fuo gere.