Si ni taatapai boro berẽ gupai nga Satana nga kungbo kpia gbegberẽ apai nabaha. Ya mo gere nga gupai nzunzu Ziazia Kekeapai ayugoho? Ka singia wo du duhe, tipagine tie Ziazia Kekeapai asakapai ti ni tipa ko nga ko afura na Yesu Kristo gbiati gu Mbori du na Tanduapai Dũ? Mo bingo wai ko afura na Mbori gbiati Yesu.

Ho Yesu atona gako sunge tungusapai ni, Bakitingbanga aasadi ko bara biata. Ni bambataha, ko aasadi ka sõa Yesu ko mangisunge na gu ome Mbori afuhe fuko ngba gbegberẽ gene ka kusa riahe. Fuo gure, ko aaida Yesu moi gako raka ngbapai tipa ka gbeberã aboro fuoko. Ni yangaraha, ko aya fu Yesu ka ko irisiko, ko nika fu agu zogarago nga ga zegino dunduko fuko. Yesu aka agu apai biata Satana azubo ko na ni re na ki karagapai fuko rogo Ziazia Kekeapai yo.—Matayo 4:1-11; Ruka 4:1-13.

Da du Yesu aafura na ni? Ya mo ko aafura na gu gbegberẽpai naadu rogo ko yo? Ringbisihe kuti Ziazia Kekeapai, “I aima asada [Yesu] rogo apai dunduko wa kina rani, ono ko adu nga na ingapai te.” (AEbere 4:15) Ziazia Kekeapai naya: “Ko nga gu ko namanga nga gbegberẽpai ya, i abi nga biriki ngbako yo te.” (1 Petero 2:22) Yesu anye ni rengberengbe ko, na ki ka kuti gako padu ni ruruse.  Ko aambunga gbegberẽpai si sono rogo ko yo te. Si tie ziazia nga, gbegberẽpai aadunga rogo Yesu yo ko aafura na ni te; ko aafura fu ndikidi boro.

Gu fugodagbase re nayugo gupai nga Satana nga ndikidi boro.

• Mo tingidi gupai nga Bakitingbanga aaida kafu gu zogarago nga ga zegino fu Yesu ka ko airisiko. (Matayo 4:8, 9) Ka Satana aangianga ndikidi boro ya, ka gi gamahe re adu nga na sunge ti ni te. Kurigure, Yesu aatinga kango gupai nga Satana na pagbia beko te te.

• Tingbafuo Yesu ka agi aˈasada re, Bakitingbanga “ki guari pati ko tipa toni rago.” (Ruka 4:13) Ya mo gi pangbanga re nayugo gupai nga Satana nga gu gbegberẽpai du rogo boro yo, watadu ko nga gu kere vura boro nabanga kuti ni?

• Mo kparia gupai nga ‘amaraika aye ki mangi pa’ Yesu. (Matayo 4:11) Ya mo agu amaraika re angia agu aboro nga atoro naafu wasa na undo fu Yesu? Ii, rengo du. Tipagine tie rengbe ani ti ni ka berã gupai nga Satana nga kura he kia angianga gu boro nga toro ya?

Gu ue kpiapai nabipa gu pangbanga du tipa gu kumba naagunde ti Mbori nangia Eyobo. Gu pangbanga re nafura tipa gu sakapai ue naadu dagba Bakitingbanga na Mbori. Rogo agi apai re dunduko, Mbori atambua Eyobo tipa gako padu ni ruruse. Satana aya Eyobo aairiso Mbori mbiko agu ahe mbori afuhe fuko, na ki ya berewe Mbori nangbe ko angbe ko ni irisiko. Gupai nzunzu Satana aaida ka gumbaha nga ko ini Eyobo gbe ti Mbori. Yekova ambu Satana ko gbarasipa ga Eyobo ahe, ki imi awiriko, na ki gbarasi kpotoko. * Fuo bete aregbo kusa, si ayugu tihe nga gupai Yekova apehe tipa Eyobo angia rengo, na Satana ki ngia irazire. Yekova afu maku fu Eyobo tipa pa nye ko ni ruruko.—Eyobo 1:6-12; 2:1-7.

Ya mo gi sakapai naadu dagba Yekova na Satana re nayugo gupai nga Yekova aafura na gu gbegberẽpai naadu rogoko yo? Ziazia Kekeapai naya: “Gako pai du ziazia.” (2 Samuere 22:31) Si nape gupai a berewe nga: “Ziazia, ziazia, ziazia, Gbia Mbori du na tandu apai dũ.” (Yugoti 4:8) Rogo gu fugo yo nga ziazia nga, guhe du ni gigirihe watadu du ni kparakparaha ti ingapai. Yekova ni rengberengbe ko na ingapai ti ko te. Gbegberẽ sino tiko kandara tooni te.

Ono tie, kura aboro rengbe ka ya Eyobo aangianga ndikidi boro te, na gu fugo naadu dagbako na Mbori re angia kungbo paturẽ. Ya mo gu gayo bipai re nga rengo? Gu kura averesi nayugo gupai nga Eyobo angia ndikidi boro. Ni kpiapai, rogo Yakoba 5:7-11, i mangisunge na Eyobo ni kpiapai tipa ka ngarasa aKristano i hipai ti regbo kpakarapai na si natingida yo na gupai nga Yekova nafu mosoro afu tipa gu ngbatunga hipai re. Ka Eyobo aangianga ndikidi boro ya, gini ome ka gi kpiapai re adu na ni, nibi gu zubohe Satana aye na ni ka si adu nga kungbo paturẽ gbua naadu? Kurigure, rogo Yezekere 14:14, 20, rimo Eyobo dagba gu ruru akumba nangia Noa na Daniere. Eyobo angia ndikidi boro naadu na bakere idapase wakina Noa na Daniere. Ka si du nga Eyobo angia ndikidi boro, anga gu boro naarungosi ko re angia kina ndikidi boro te?

Si tie ziazia nga, Ziazia Kekeapai nafura tipa Satana ni ndikidi boro. Mo ima rengba ka bakabangiro nga, ‘Ya mo kerepai ho rengbe ko ka manga re na gimi aborokporo na ni rogo gi zegino ani araka rogoho re?’

Mo moingo gupai ku berã ro yo nga kere amangi gbegberẽ apai ye ku rogo gaoni gbata. Nirengo, ga aboro raka ima rengba kadu ngba pai na i ki du na bakere gunde. Awere tie, ani bingo kpiapai wakina gure nga: Satana na gako adaimona nga ndikidi aboro ni atoro naasa mungu kuti Mbori gu du auru kpotosende ane. Sangbana gipai re rengbe kangia gine? Mo berẽnga kurii gupai mo abihe rogo apangbanga rogo gamo dagbarago na gu namanga rogo zegino dunduko.

• Ya mo mo nabi wai gbegberẽ apai akio kina ku mbatayo wa vura duhe nga i namanga ome ka nyasariipa ha?

• Ya mo mo nabi wai agu apai nga ga sangbaatoro akio kina ku mbatayo, si ki vura du nga  dungu avunguagude na bakabangiriyo tipa gipai re?

• Ya mo mo nabi wai aboro agbarasa rago, wa vura duhe nga kura aboro namanga ome tipa ka bandaha?

• Ya mo si nawira gupai nga gbegberẽpai kinaho aboro amangaha nga gu nayugo gupai nga kura boro kinaho nasa yo i nimangi gi gbegberẽ apai re?

Ziazia Kekeapai nayugo gu boro du kugii gi gbegberẽ apai namanga re niya: “Were i ki ba bakere daragona ku sende yo, nga gu bakuru wo, nga gu ko i aniya ti ko, Bakitingbanga nga Satana, nga banangi aboro kpotosende yo dunduko; i ki niba ko ku sende yo na gako amaraika a. . . . Rungo du fu kpotosende na baime, bambiko bakitingbanga azorõ koyo du oni ni na bakere zinga, bambiko ko ini he ya kina bete rago nye fu ko.” (Yugoti 12:9, 12) Fuo dungu aboro wisigi agi agopai re, i dakuti gupai nga Satana nga gbegberẽ boro ni toro nasa gbegberẽ apai si nimangi pati rani.

Mo ima rengba ka bakabangiro tipa wai rengbe mo ka gbia bandahe. Gere nga nyanyakipa pai si aida ani berẽkuriihe. Gu yangara kekeapai nika sakapai tipa gupai rengbe ka undo rani.