1-3. Gini akpakarapai arogotise naagbiatiyo na ni? (Oni bi gu sura du ti tonatonaha.)

KUMBAKUDEE mangi agarã 38 ku rogo rogatise aya: “Ka mo mangi ome na kini yuguhe nga mo naida gamu rogatise du na diabese, Yekova nafu maku afu foro.” Nirengo, kumbakudee na diakumba na kina gene beyo tipa kadu na wene aregbo beyo na kini songodi tiyo ti regbo akpakarapai.​—Snz. 18:22.

² Ono tie, ‘apai naafuda’ arogotise afuda. (1 Kor. 7:28) Tipagine? Mangapai kuti agu akpakarapai nga ga raka naambusa arogotise ambusa. Imisiri, zanga giatise, na gu zanga fugodagbase naye mbiko gu mirãse nga ga zangarengba ima rengba ka ye na kpakaraapai ku rogo rogatise. (Yak. 3:2, 5, 8) Dungu arogotise nagbiatiyo na akpakarapai mbiko zingo gbia sunge tipa ka ngerafuo agude. Du arogotise ni fudifudi yo berãyo yo gbiati du na mbugo rengbe ka saha fuyo ni kpakarapai i gbia gu regbo i aidaha tipa ka sungo sa ka nyakasa gayo ramukporo. Zingo marã, akaza, na gu kura akpakarapai ima rengba ka gbarasapa gayo nyemuse na gu irisa du yo na ni. Kurigure, agu aramukporo du wa si ni nyanyakihe, paha ima rengba ka gberã be ‘agu apai nga ga borose’ du wa wasiwasi  kodaba, wasiwasi mangaapai, asogote, kpikopai, zizinga, na tagbagaapai.​—Gara. 5:19-21.

³ Gu gberẽ agberã gbe nga, gi “kusa rago” re na agu asino rogoho nga ga gbangbati, gbiati agu abipai angianga ga Mbori ya nagbarasa rogatise agbarasa. (2 Tim. 3:1-4) Ni yangaraha, gu kura kere vura aboro kinaho naida ka gbarasapa rogatise. Gu mokedi nangia Petero aza rani ki ya: “Wa bahu nata ki nipoi, nigbata boro ka rita ni, kina wo vuraroni nga bakitingbanga nata.”​—1 Pet. 5:8; Yugo. 12:12.

4. Rogo gini gene duhe taata tipa ramukporo du ni nyanyakihe na ngbarago?

⁴ Kumbakudee sa Japan yo aya: “Mi adu ni fudifudi re be zingo marã. Mbiko wa mi aapenga ha fu diare ya, si asari ri du a ni fudifudi ri a. Kurigure, ri woki barambeda awere nyanyaki. Ti kura aregbo, si nasarani ani du na akpakarapai.” Akpakarapai tigaha nikaa manga amanga rogo rogotise, ono ani ima rengba ka diabehe. Mbiko ga Yekova undo, arogotise ima rengba kadu na gu ramukporo nga ga ngbarago. (Oni gedi Atambuahe 127:1.) Ani sakingo pai tipa agu abiriki dua bambu watadu atubu bisue nga ga toro rengbe ka nyakasa ramukporo na ki saha si ima gbe. Fuani, ani nika bi wai rengbe nyemuse ka voda agu abiriki re kuti kuraha.

5, 6. Ginipai rengbe kumbakudee na diakumba ka mangaha tipa ka rimiso Yekova ku rogo gayo ramukporo?

⁵ Gupai rengbe ka sa rogatise si du ni nyanyakihe nga du ni ruruse fu gu boro naatona mburu rogatise na kini gi sangbani. (Oni gedi Batungusipai 4:12.) Kumbakuadee na dereakumba rengbe ka rimiso Yekova ku rogo gayo ramukporo ni peka yo fuo ga Yekova arugute. Ziazia Kekeapai nafura tipa gu ga Mbori aboro naadu mbata niya: “Turoni agía pai agia ku gii roni yo, naya, ‘Gene du re, oni ndú ngba ha,’ ho ka oni sa tironi ni ku kumbabe, watadu ho ka oni sa tironi ni ku garebe.” (Yes. 30:20, 21) Areme, arogotise rengbe ka ‘gia’ fugo Yekova ni geda yo Ziazia Kekeapai kina sa. (Tam. 1:1-3) I rengbe ka nyakasa gayo ramukporo ni mangayo Gu Irisombori Nga ga Aborokporo nga gu nazambuasi aborokporo. Kparakpee dedede nga kurapai rengbe ka nyakasa gayo ramukporo na ki sayo i ru nyanyaki sa agu aasada Satana nikaa ye na ni kutiyo.

⁶ Gerhard du Germani yo aya: “Ho akpakarapai na azanga giatise aida ka agbarasapa gaani ngbarago ni, agu arugute du rogo Fugo Mbori naundo rani tipa ani du na hipai gbiati mbupai. Agi asino re na nyanyaki paha tipa rogatise du na diabese.” Ho arogotise amanga ome ni nyanyaki tipa Mbori du rogo gayo ramukporo ni mangayo agu apai nga ga toro kina sa, i na du ni kpamiakpamia yo na Mbori na kidu mbembedi na gayo badiarogatise na ngbarago.

7. Wai si aida akumbakuadee mangisunge na gayo pagbia?

⁷ Gu gene kumbakudee amangasunge na gako pagbia ngbaha ima rengba ka nyakasa gayo ramukporo na ki sayo i du na ngbarago. Ziazia Kekeapai naya: “Ri akumba dunduko nga Kristo; ri de ki ngia kumba; ri Kristo ki ngia Mbori.” (1 Kor. 11:3) Gu banguapai du rogo agu afugo re nayugo wai si aida akumbakuadee mangisunge na gayo pagbia kina wai Kristo amangasunge na gako pagbia kurii akumba. Yesu aamanganga sunge na gako pagbia gbegberẽ  te, ko adu na nyemuse, weneringise, ni bayee ko, na ki du na umbasitise.​—Mt. 11:28-30.

8. Wai rengbe kumbakudee ka sa diako ri niirisiko?

⁸ Si aidanga agu akumbakuadee nga aKristano mangi adiayo dedede ngbaome i ni irisiyo te. Kuba gure, “oni rá kporo na yo na rugatinapai, nifu irisa fu de wa arengba nga ome de na ga kumba ya.” (1 Pet. 3:7) Si naida akumbakuadee yuguhe ayugo rogo gayo mangapai na afugo yo gbaiga dagba aboro na ho du yo ni nisayo nga i nabi adiayo na kikiipayo. (Snz. 31:28) Mangasunge na pagbia wa gure nasa dee ri kpinyemu kumbari na kini irisiko na kini sa Yekova ko fu maku kurii gayo ramukporo.

9. Wai rengbe diakumba kadu na umbasitise ka giasangba kumbari?

⁹ Du ani na nyemu Yekova nasarani dunduko ani umbasi tirani kutii nyanyaki beko. (1 Pet. 5:6) Gu nyanyakipa gene rengbe diakumba ka giasangba na kini yugu irisa tipa gu pagbia Yekova nafuhe fu kumbari ngbanga nga ka gia tiri nako na kini songodi agu apai namanga rogo gayo ngbadimokporo. Ziazia Kekeapai naya: “Dere akumba, oni rá fu kina akumbaroni, wa re he rogo Gbia yo.” (Koro. 3:18) Ka pe kina rengo, anga agu adiaberã dunduko kumba amangaha nangba ti diako te. Wa vura duhe wo, ka si du nga gako diaberã atagbaganga tihe na ga Yekova andiko te, gu diakumba nagiasangba na nyemu ka mangaha.​—1 Pet. 3:1.

10. Tipagine duhe ti ni ni nyanyakipa pai ka giasangba?

¹⁰ Pa adee ni iriirihe mbiko i nga ‘abadiata’ nga ga akumbaayo. (Mara. 2:14) Ri nasongoda kumbari nibipa agu adiaberã ko amangaha kporo ni peka ri gari aberãpai rogo irisa, ono si ki vura du wo, ri kini irisiko kindi. Gu kumba du na tatamana nadegatuko wenengai fu diako ho ri afura ni. (Snz. 31:10-31) Nyemuse kini sayo i du na ngbarago, zereda, kodatise rogo gayo  ngbadimokporo, na kumba na dee kidu na ngbarago mbiko inoyo gupai nga i nafu ngbarago fu Mbori.​—Ef. 5:22.

11. Tipagine du mbupai ti ni na nyanyaki paha?

¹¹ Gu nyanyakipa abiriki dua bambu nasa rogatise si raki ni gbangaha nga mbupai. Gayo ramukporo nanyaka ka si du nga kumbakudee na diakumba ‘nahipai fu akurayo, na nivu akurayo.’ (Koro. 3:13) Ono gu wene pagume du rogo rogatise rengbe ka gberã ka si du nga i nazio pai ku ngbaduyo yo na kini kpipai kuti akurayo na kini mangisunge na agu apai re ni gu bundu i nikaa zubo akurayo na ni. Ho bambu asara ni, si ima rengba ka saha si ti, wakina gure a, aimisiri gbiati kpikopai rengbe ka sona ngbaduraniyo na ki saha ni mbumbupai tipa ani mbupai fu boro. Ramukporo nadu ni nyanyakihe ho kumbakudee na diako ambupai ni dagbatiyo a wa Yekova ambupai fuyo.​—Mika 7:18, 19.

12. Wai ‘nyemuse adada badungu ingaapai’?

¹² Ndikidi nyemuse akanga kuti “gbegberẽpai kuti boro te.” Nirengo, “nyemuse nadada badungu ingaapai.” (1 Kor. 13:4, 5; oni gedi 1 Petero 4:8.) Ka pepai rogo kura gene, nyemuse agedanga agu aingapai ageda si aida ani mbupai tipaha te. Ho gu mokedi nangia Petero asanahe ni tipa bara wai si aida ko mbupai fu boro, Yesu aya: “Bara saba bawe [na saba] bara saba.” (Mt. 18:21, 22) Gupai ko aaida ka pehe nga, ga Kristano mbupai fu akurani na digidoho ti ni te.​—Snz. 10:12. *

13. Wai rengbe ani ka sovura kuti gu sino nga ga zanga mbupai?

¹³ Annette aya: “Ka arogotise aidanga ka mbupai dagbatiyo ya, kpikopai gbiati zanga du na kido kuti kurase rengbe ka gbarasapa gayo ramukporo. Mbupai nanyakasa gu pagume du dagba arogotise na kini sayo i du mbembedi na gayo badiarogatise.” Tipa ka sovura kuti gu sino nga ga zanga mbupai, si naida i mangi ome ka tambua akurayo na ki du na wene bipai tipa yo. Oni asadi dedede ka tambua gaoni abadiarogatise kina boro ngbaduroniyo. (Koro. 3:15) Agu aboro nambupai fu akurayo i nazereda berãyo yo, kodatise, na kini Mbori nafu maku fuyo.​—Rom. 14:19.

14, 15. Ginihe nga Gu Rugute Duwa Dahabu, na wai duhe na nyanyaki paha rogo rogatise?

¹⁴ Zanga kapa, oni naida aboro nimangi furoni na irisa gbiati kiki. Oni nidu na ngbarago ho boro abi gaoni aberãpai ni na kikiipaha. Ya mo oni aginga pai ku ngba boro ni niya, “Mi nika manga fuko kina wai ko amangi fere”? Wa vura duhe nga aboro nabi ngbatunga gi bipai re nga si rẽarẽ, Ziazia Kekeapai naya: ‘Ka mo yá nga “mi amánga fu ni a wa ni amangi he fere”’ ya. (Snz. 24:29) Nirengo, Yesu ayugu dungu agene tipa ka mangapai ngbaha sa akpakarapai. Gi rugute nga ga mangapai re, aboro nayambaha nga Gu Rugute Duwa Dahabu, si naya: “Wa oni akpi nyemu aboro nimangi fu roni, oni mángi he fu yo kina wo a.” (Rk. 6:31) Gupai Yesu aaida ka pehe nga, si naida ani mangi fu aboro kina wai ani aida i mangi furani na si aidanga ani karaga gbegberẽpai fu boro kuba gbegberẽpai te. Rogo rogatise, si naida ani mangi gupai rogo gaani ramukporo ani aida kura aboro nimangihe furani.

 ¹⁵ Arogotise nanyakasa gayo ramukporo ho i aberãpa agu apai ni du tipa gayo badiarogatise. Kumbakudee du South Afrika yo aya, “Ani naasada ka mangapai kuti Gu Rugute Duwa Dahabu. Nirengo, aregbo kinaho ani nidu na gberãrago, ono ani naamangapai dagbarani kina wai ani aida boro mangi furani rogo irisa na kiki.”

16. Gini apai si aidanga arogotise mangihe fu akurayo ya?

¹⁶ Ka oni nikusi nga agu arungbura nga ga gaoni badiarogatise watadu kaa sawia ni dagba aboro ya. Oni tingidi gupai nga, anga rogatise nga abaangira tipa ka ino da du na ome, da ini ka paya wenengai, watadu rengbe ka yera fugo ti kurani wenengai te. Nirengo, ani dunduko du na aingahe tirani, na ti kura aregbo ani naimisa akuarani aimisa. Ono tie, ndupai ho si aida kumbakudee watadu diakumba nipe gbegberẽ afugo, ka bisira pani, ka siko rini, watadu ka nara ni te.​—Oni gedi Asanza 17:27; 31:26.

17. Wai rengbe kumbakuadee ka raka ringbisihe kuti Gu Rugute Duwa Dahabu?

¹⁷ Wa vura duhe nga rogo gu kura angbatunga, agu akumba nawingba adiayo watadu na takayo i nabiyo nga i nga akumba, Ziazia Kekeapai naya: ‘Gu boro nga bayee ni tipa zinga ngba ki susi gu ni nga iraome, na gu ni naruga toroni ngba ki susi gu ni nadia bakporo.’ (Snz. 16:32) Ka boro adunga na wingbaduse ya ni arengbanga ka wirika gu zatise naadu ti gu babakerepa kumba kisusi naraki nga Yesu Kristo te. Gu kumba nata diako, gbegberẽ boro du nga ko, na ko nagbarasa gako pagume na Yekova. Gu bake papara Atambuahe nangia Davide nangia boro wingbaduse aya: “Oni rú na gunde, ka oni niíngi nga pai ya; oni bérẽ pai kpotoroni yo auru gaoni abarame, ki sungu zaa.”​—Tam. 4:4.

18. Tipagine duhe ti ni ni nyanyakipa pai ka sonosa gu sino nga nyemuse?

¹⁸ Oni gedi 1 AKorindo 13:4-7. Nyemuse nga nyanyakipa sino rogo rogatise. “Oni úkadi ngbadu inapai, na weneringise, na umbasitise, na zera, na gbanga hipai. Ku ri agi apai re dũ oni úkadi nyemuse, nga gu ũvodatise nga ga ziaziapai.” (Koro. 3:12, 14) Gu nyemuse nga ga aKristano wa gu sende i amaaha ku dagba abiriki dua bambu tipa si voho kuti akuraha. Ka boro vura ingahe, kere kaza ki vura zio ni, zingo marã ki du na ni, na ni kini gbiati tiní na akpakarapai be agbio ni, gu nyemuse re nasa rogotise ka si gburuwanga ya.

19, 20. (a) Wai rengbe arogotise kadu na diabese ka sa gayo ramukporo si du ni nyanyakihe na ngbarago? (b) Ginipai ani nika wisigoho rogo gu kekeapai naye fuo gere?

¹⁹ Nirengo, nyemuse, kakuti badiangbase, gbiati manga bakere ome nga agu apai nasa rogatise si du na diabese. Kuba gupai nga boro kparaka na gani badiarogatise ti gu regbo du akpakarapai, si naida arogotise diberã ka sa gayo ramukporo si ninyaki kina ku mbatayo. Agu arogotise nga aKristano kakuti Yekova na kuti gayo badiarogatise, gu nyemu Yekova du tiyo nasayo i asadi ka mbakada agu akpakarapai du dagbayo mbiko “nyemuse adíga nga te.”​—1 Kor. 13:8; Mt. 19:5, 6; Eb. 13:4.

²⁰ Si ima kpakara rogatise du ni nyanyakihe na ngbarago rogo gi “gbegberẽ rago” ani araka ti ni re. (2 Tim. 3:1) Ono mbiko ga Yekova undohe, si rengbe arengba kadu taata. Wa vura duhe wo, si naida arogotise sovura aso kuti gu gbegberẽ mangapai du rogo gi ga Satana zegino re. Gu kekeapai naye fuo gere nika fura tipa wai rengbe kumbakudee na diako ka nyakasa tiyo rogo toro yo tipa ka banda gayo rogatise.