Agu aboro nambu be kere fuo anzeme, i nagbiatiyo na kere kpakaraapai. Si nawira wa, pai ho rengbe yo ka mangaha tipa ka bandatiyo be agu aboro navudo tiyo na agi anzeme re te. Ono tie, bete aguyo asanahe singia i rengbe ka za awirina ti mbida kere fuo anzeme ho i anduni ku ba dunguratise yo, watadu ti regbo bakere adunguratise.

Nirengo, Kristano ho nata inoaino kini saha ni kpakarapai fu kura boro ka ni yengo kupati adunguratise ya te. Ani dunduko naida na gu ngarasaro ani agbiaha ba adunguratise yo. (Eb. 10:24, 25) Sidu, gu boro nagbia kpakarapai be kere fuo anzeme si ki sa gupai nga ka ni yengo kupati adunguratise ya rengbe ka sakaha na abaakumba. Wa vura duhe nga si arunga ani ru andiko ka za aboro ka i vudingo anzeme ho i aye ni tipa adunguratise ya, abaakumba rengbe arengba ka undo aboro rogo dungurati tipa i ini gu kpakaraapai kura aboro agbiatiyo na ni be fuo anzeme. Ni bi agu apai du tipa gaoni dungurati, abaakumba rengbe ka diaberã ka wisigo agu apai du rogo gaani awaraga nafura tipa gupai re ti regbo Gu Dunguratise Nga ga Sunge. * Ono tie, si aidanga abaakumba nimangi gu ngbatunga atingidapai re dedede te. Ti regbo gaani adunguratise, vovo aboro gbiati ageno ni kaa yeaye nga aguyo ainongo pai tipa gupai re ya, na ani aidanga ka ba gberãrago tiyo te. Si aidanga boro ba gberãrago ti kurani mbiko gupai nga ni mbidi gu nzeme du na fuoho ti ni te.

Rogo agu aba du gi kpakaraapai re rogoho, ka si daada, gu gbuu nga ga abaakumba rengbe ka manga mbakadapai tipa agu aboro nawoka be fuo kere anzeme i sungu ni kparakparayo Bambu Kindo yo. Ni kpiapai, si rengbe ka du nga gaoni Bambu Kindo na wiri kparakpara vuruhe yo ti ni rengbe aboro arengba ka sungo yo ki ni gipai. Ka si dunga si ima kpakara ka ruga gipai re na kura aboro nagbia kpakaraapai kindi, dungurati rengbe ka manga mbakadapai ka defugo dunguratise watadu ka zaka terefuni ni gihe rogoho kpuni yo.

Vuru agu agarã susi kusayo, Gaani Sunge Nga ga Kindo angarasi awirina i ni berẽpa akurayo nibi gipai re ti regbo bakere adunguratise. I nangarasa rani ani berẽpa kura aboro gbe ti regbo bakere adunguratise, wa duhe nga rengba ho tipa kadu na kparakpara ba nga gu fuo anzeme ni ka dunga rogoho ya te. Ono tie, anga si naida gi rugapai re da ni agu andiko du tipa adunguratise te, na si aidanga si du wo a te.

Wa ani araka rogo gi zegino re, ani dunduko na ima aima mbiko gu zanga rengba i avungu rani na ni. Ani nafu tambuahe fu agu aboro nafubee ka zeresa gaani a imisiri. Kura aboro rengbe ka mbupa manga sunge na agu anzeme du na fuoho ti ni tipa ka saha taata fu kura awirina i du pati adunguratise. Wa vura duhe wo, nyemuse rengbe ka sa rani ani mangihe wo.