“Yekova Mbori ki di gu kumba re ki moi ko ku ati Edene yo ko nisópo ho ki nibanda ha. Yekova Mbori ki ta ruga kumba, niya, ‘Agu angua du ati yo dunduko mo nirí zuzuhe ari a wa mo akpi nyemu he; ono gu ngua nga ngua ina wenepai na gbegberẽpai ka mo rí nga zuzuhe ya, bambiko ni gu rago ka mo ri zuzuhe mo akpí akpi ni rengo.’”—Bambata Pai 2:15-17.

Mbori amoi bambata kumba nangia Adamu ku ati Edene yo, gu paradizo naadu auru kpotosende re aima du na anya rogoho gbiati wene ambumbudo na angua. Angua adu kina yo naazuko arindihe ka Adamu arengbe ka rihe. Ono tie, Yekova Mbori apepa ngua fuko sa nga ka ko ringa ha ya, na ki zako nga ka ko rihe ko nika kpi akpi.

Ya mo Adamu agirogo gu zahe re? Ko aima ino guhe nga kpio; ko aima bi anya ami nikpiki. Ka si adu nga Mbori akusi Adamu ko kpi ni yangaraha, ka sunge adunga ti gu zahe Mbori afuhe fuko te. Kuba gure, Adamu aima ino gupai nga ka ko gisangba Mbori na ki zanga ri gu ngua ko aza ko ti ni, ko nika raka nyeanye kindi zanga kpio.

Kura aboro naya gi ngua re narukuba kodaba, si arengbanga kadu nga rengo te. Nirengo, Yekova aaida Adamu na diako nangia Eva “zúga azuga, ki nge ange” na ki “hisi kpotosende berewe ki zogo ho.” (Bambata Pai 1:28) Gu zahe re adu tipa kina boro ndikidi ngua. Yekova ayambu gu ngua re nga “gu ngua nga ngua ina wenepai na gbegberẽpai” mbiko si aarukuba gu rengo du ko na ni ka diaberã tipa rurupai na irairaha fu aboro. Ka Adamu aaringa gu zuzungua re ya, si ka yugu gako giasangba fu Mbori na gu tambuahe ko adu na ni fu gu Boro nakusi ko na ki fu bakere maku fuko.

“[Mbori] ki ya fu Adama, ‘Wa . . . ri [mo] gu ngua nga gu mi arugu ro ya, “ka mo rí nga ha ya,” . . . Mo arí riahe mbiko kina gu randimo nikakura kpakpuro yo daho mo ka káraga tiro ni ku sende yo, bambiko mi adi ro kina rogo ho; mbiko mo nga kina nvutu, kina ku nvutu yo mo ka karaga tiro ku ho ni.’”—Bambata Pai 3:17, 19.

Adamu ari gu ngua i aza ko ka ko ringa ha ya. Mbori aabingo gu gako ingahe re ni taatapai te. Ko abihe nga samungu du, nga mangapai niwia sa gu weneapai dunduko Yekova amangihe fuko. Ni ri Adamu gu zuzungua re, ko asogo Yekova, na ki sia ranirii nga gu naaye na gbegberẽ sangbanaha.

A wa Yekova apehe fuko, ko akpi ni yangaraha. Mbori akusi Adamu “rogo nvutu sende” na ko aya fuko kina koyo ko ka ‘karaga tiko ku ho ni.’ Adamu aarakanga ni gu kura ngbatunga he watadu rogo gu kura rago te. Fuo kpiko, ko ada ni guhe adunga sunge ti ni ya wakina nvutu nga gu Mbori adi ko rogoho.—Bambata Pai 2:7; Batungusipai 9:5, 10.

“Wa gbegberẽpai akuru ku zegino mbiko boro sa, kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.”—ARomo 5:12.

Ga Adamu basasangba watadu ingapai aima du na bakere sangbanaha. Ni mangako ingapai, ko azanga ungako, angianga gu unga nga ga raka tipa agarã 70 watadu 80 ya, ono nyenye unga. Kurigure, ho Adamu aingipai ni, ko aadunga ni rengberengbe ko berewe te, ko aarengbanga ka vunga awiriko zanga ingapai te.

Ani dunduko nga atita Adamu. Ko du ani adi gu kpoto nga ga ingapai tiko gaani siapai nangiaha te, si du ani adi aingapai ti ni na kini kpiki. Pauro aima sakapai tipa gipai re wenengai. Ko aya: Mi “ni zizi boro fu ingapai. Ako, rungorungo boro nga mi! Da ka batasi re ti gi boro kpio re?” Ko akaragapai kuti gi sanahe re ki ya: “Mi natambua Mbori mbiko Yesu Kristo gaani Gbia.”—ARomo 7:14, 24, 25.

“Ba akedi Wiriko ko du ni Batasi zegino.”—1 Yoane 4:14.

Yekova Mbori amangi mbakadapai tipa ka kusa rani be surungba ingapai na ka batasarani be nyenye kpio. Rogo gini gene? Ko akedi Wiriko ngbangbaturũ yo i vunguko zanga ingapai tiko kina wai Adamu adu. Ono Yesu aadunga wa Adamu te, ko ‘aamanganga gbegberẽpai’ te. (1 Petero 2:22) Mbiko wa Yesu adu ni rengberengbe ko, gu sarangbanga nangia ga kpio aadunga tipa ko te, na ko arengbe arengba ka raka nyeanye kindi ni rengberengbe ko auru kpotosende.

Ono tie, Yekova ambu Yesu avurako imiko. Fuo arame biata, Yekova azingisiko ni toro tipa ko ga ku ngbangbaturũ yo fuo bete regbo. Ngbangbaturũ yo, Yesu ayugupa nyaka gu kpotoko ingapai aadunga ti ni ya nabatasi aboro be guhe Adamu agbarasipaha. Yekova adi gu motumo re kugume, na ki saha taata fu agu aboro namaa idapase kuti Yesu i gbia nyenye unga.—ARomo 3:23, 24; 1 Yoane 2:2.

Rogo gi gene re, Yesu akaraga guhe Adamu agbarasipaha. Ko akpi tipa wa ka ani raki nyeanye kindi. Ziazia Kekeapai naya: “Yesu . . . [a]hia kpio tipa aboro dunduko be ga Mbori undahe.”—AEbere 2:9.

Gi gamunihe re nayugopai ni bakerehe tipa Yekova. Gu gako nyanyakipa andiko nga ga mangapai aasanga ha taata fu aboro ingapai i batasi tiyo te. Ono tie, gako nyemuse na inopai naasa gupai nga ko idi Wiriko ye ka kpi tipa ka fu motumo ka batasa aboro.—ARomo 5:6-8.

“Ni rengo i azingisi Kristo dagba kangba aboro, ni makawa agu yo nara ara. Bambiko wa kpio aye be boro, a wo zinga kangba aboro be kpio aye be boro. Bambiko wa aboro nakpi akpi dunduko rogo Adama yo, a wo rogo Kristo yo i adu adu ni ungayo dunduko.”—1 AKorindo 15:20-22.

Kango ti ni te nga Yesu aima raka na ki kpi, ono gini gopai duho nayugo na ni nga ko aima zinga be kpio? Gu nyanyaki gopai duho nga fuo zinga Yesu be kpio, ko ayugu tiko fu dungu aboro rogo aba ni bakiakia. Ti kura regbo, ko ayugu tiko fu aboro naima susa 500. Gu mokedi nangia Pauro aima ke gipai re rogo gako waraga yo fu agu aboro naadu Korinda yo, na mo ini gupai nga, bete agu aboro re adu kina ti unga ti gu regbo ko akehe ti ni, gere nayugo gupai nga i aima rengba kadu ni adezire gupai i agihe na ki bihe.—1 AKorindo 15:3-8.

Gu nyaki anyaka gbe nga, ho Pauro ake waraga ni nga Kristo nga “makawa” aguyo nazingi be kpio, ko aaida ka pe gupai nga kura aboro nika zinga azinga be kpio a. Yesu nitiko aima ya regbo nika daada ho agu aboro “dunduko du rogo amurã yo” ka kura ni.—Yoane 5:28, 29.

“Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.”—Yoane 3:16.

Tonatona akpewaraga nga ga Ziazia Kekeapai nafura tipa gu regbo kpio aenge ti ni na Paradizo ki ingi. Yangara akpewaraga nga ga Ziazia Kekeapai nafura tipa gu regbo i nika gbarasa kpio kusayo na Mbori ki karaga Paradizo kubaha. Aboro nika raka wene raka na ngbarago ti gu regbo re. Yugoti 21:4 naya: “Kpio adú nga berewe te.” Tipa ka yugo na ni nga rengo du nga gu pai re, veresi 5 naya: Agi apai “si nga ruru he nga rengo a.” Gupai Yekova nakidohe tipaha, ko du wa ka ko mangihe.

Ya mo mo idi kuti gupai nga agi apai re “si nga ruru he nga rengo a”? Mo wirikipai ni bakerehe tipa Yesu Kristo na ki moi idapase kutiko. Ka mo mangihe wo, Yekova nika ida aida na mo. Ko nika fu maku foro ni bakerehe na mo nika du na maabangirise tipa ka raka nyeanye kindi rogo Paradizo auru kpotosende, nga gu ba ‘kpio nika du nga ni berewe ya, akpe na ima a te.’