1. Oni sakingo wai toro sa ada ni Satana.

TI KURA REGBO SA, ko adu na wene pagume na Yekova. Ono tie, gi toro re atona ka kpinyemu iriso be aboro. Kuba gupai nga ko ká gu gbegberẽ nyemupai re, ko asonosihe si ki sono daho si akusi ingapai ni. (Yak. 1:14, 15) Gu boro re nga Satana nga gu boro ‘naa nyenga na rengo’ ya. Ko asamungu kuti Yekova na ki da ni ‘irazire nga, baha.’—Yo. 8:44.

2, 3. Agu arimo nga “Satana,” “Bakitingbanga,” “wo,” na “daragona” nayugo ginihe tipa bakere vura Yekova?

² Natona ti gu regbo Satana asamungu re, ko aima yugo tiko nga kere vura Yekova, na ko a nga bakurea aboro te. Agu arimo i afuhe fuko nasakapai tipa gu birĩki du ko na ni. Satana rogoyo nga “Gu boro nasovura kuti kurani,” si nayugo gupai nga gi gbegberẽ toro re aidanga na ga Mbori pagbia te, ono kuba gure, ko nasogaha na kini sovura kuti ga Yekova pagbia. Kurapai ho Satana aida ka bihe susi gu nga ga Yekova pagbia digi te.

³ A wa duhe rogo Yugoti 12:9, i nayamba Satana nga Bakitingbanga du rogo yo nga “Bape ziree.” Gere natingida rani na wai Satana agbarasi rimo Yekova ni yamba ko nga iraziree. Gu  fugo nga “gu bakuru wo” natingida rani na gupai namangi Edene yo ho Satana amangisunge ni na wo ka nanga Eva. Gu fugo nga “bakere daragona” naye na pa kere gbegberẽ nya ku berãrani yo na gipai re rẽarẽ na Satana bambiko ko naida ka gbarasapa ga Mbori aboro.

4. Ginipai ani ka wisigoho rogo gi kekeapai re?

⁴ Si tie ziazia nga, Satana aidanga ani du ni rururani te. Wene ndupai kinaho Ziazia Kekeapai azungodi rani ti ni nga: “Oni dú na rugatise ki ningere; bambiko wa bahu nata ki nipoi, nigbata boro ka rita ni, kina wo vuraroni nga bakitingbanga nata.” (1 Pet. 5:8) Rogo gi kekeapai re, ani nika wisigo asinoko biata sia aida ani banda tirani be gi vura Yekova na vura aboro re.

5, 6. (a) Oni funga akpiapai nayugo gupai nga amaraika “na nyaka na tandu.” (b) Ngba gini gene du Satana “na tandu kpio” beko?

⁵ Agu atoro i ayamba yo nga amaraika i “na nyaka na tandu.” (Tam. 103:20) Payo ima kio kisusi aboro rogo gu gene nga, i nga airatatamana na kidu na ome. Rengo ngaha nga, ruru amaraika namangasunge na gayo ome tipa wenepai. Ni kpiapai, ti kura regbo sa, maraika aimi ga aAsuro abanzengere nga 185,000, nga gupai ka boro aarengbanga ka mangaha ya watadu rimbasa abanzengere a ya. (2 Aba. 19:35) Ti kura regbo, maraika amangisunge na gako ome gbiati tatamana tipa ka kusa ga Yesu amokedi bambukiso yo. Gu maraika re azaki ngbadimo na ki kusi agu amokedi re, na kisi ngbadimo bambukiso zanga agu ababandarago naadu ho ini gupai namangi!—Amo. 5:18-23.

⁶ Baraho ruru amaraika amangasunge ni na gayo ome tipa wenepai, Satana namangasunge na gako ome tipa gbegberẽpai. Nirengo ko ima du na ome gbiati maapai kurii aboro! Ziazia Kekeapai naya ko nga “gbia gi zegino re” na “mbori gi zegino re” a. (Yo. 12:31; 2 Kor. 4:4) Satana Bakitingbanga “na tandu kpio” beko. (Eb. 2:14) Gere ayugongo gupai nga kina Satana naye ka imo aboro nitiko te. Ono tie, zegino ima hi be gako sino nga ga imo aboro. Kurigure, kpio aye kurii aboro dũ mbiko Eva aidi kuti gu ziree Satana agumbaha na Adamu ki basasangba Mbori. (Rom. 5:12) Ngba gi gene re, Bakitingbanga ada “na tandu kpio” beko. Gu rimo Yesu afuhe fuko nga “baimiaboro” re ima rẽ na ko. (Yo. 8:44) Nairiwo gu kere vurarani nga Satana re!

7. Wai du adaimona ayugo tiyo nga i na bakere ome?

⁷ Ho ani azinga kutiko ni, gure nga ani nazinga kuti agu aboro nasongoda ko na gu sakapai du tipa ga Yekova bakere pagbia. Agi aboro re nakoda gu dungu amaraika watadu adaimona naasamungu. (Yugo. 12:3, 4) Dedede, adaimona namangasunge na gayo bakere ome ka imisa aboro. (Mt. 8:28-32; Mk. 5:1-5) Ka oni bingo gu ome du gu gbegberẽ amaraika re na ni na taata paha ya watadu gu du “gbia adaimona” na ni a ya. (Mt. 9:34) Ani arengbanga kadu na diabese ka si du nga Yekova aundonga rani te te.

8. (a) Ga Satana sasa nga gine? (Oni bi gu sura du ti tonatonaha.) (b) Kuti gaoni bipai, wai du gi zegino re ayugo gu toro nga ga Satana?

⁸ Gu mokedi nangia Petero aringbisi Satana kuti gu “bahu nata ki nipoi.” Ringbisihe kuti kura buku sa, gu pa-Giriki i asaha nga “nipoi,” si nayugopa gu “kere nyarinde zingi be gomoro.” Gipai re ima rẽ na ga Satana zinga! Wa vura duhe nga gi zegino re  kutii gu ome nga ga Satana, ko na nyemu ka rita dungu aboro. (1 Yo. 5:19) Kuti gako bipai, gi zegino re fuko wakina “gu wiri he boro arihe si zingisi nyemu riahe tiní.” Gure wa ka i ya Satana namaaberã ko fuo gako “riahe” awere nga gu yangara mbedimbedi aKristano, na agu awirinayo nga “gu kura akandoro” naundo yo. (Yo. 10:16; Yugo. 12:17) Satana naida ka rita ga Yekova aboro. Gu gene ko atona rungosi ga Yesu abawiriki ngbaha naatona rogo bambata sa kama agarã kada ku awere nayugopa gako kere sino.

9, 10. (a) Wai du Satana aidi ka gbarasapa ga Mbori mbakadapai nibi gupai naadu tipa aYisaraere? (Oni funga akpiapai.) (b) Tipagine Satana adu ti ni na kparakpara ndupai tipa maaberãko fuo aYisaraere? (d) Oni nabihe nga Satana nidu wai ti gu regbo ga Yekova moyambu amanga kere ingapai?

⁹ Satana naida ka gbarasapa ga Mbori mbakadapai ngba gu kura gene, ni du ko ni kere boro. Ko wakina gu bahu nakoba be gomoro adunga nunga anya tiru ya. Gu bahu re na nunga nya tiru mbata fu imi ru te, na u abiranga tiru tingbafuo u imi ru a te. Wakina gure a, Satana na nunga agu aboro ko aida ka rita yo te. Ni kpiapai, oni berẽnga pa wai Satana Bakitingbanga anaaigo tiko dedede ti agu aregbo aYisaraere anaamanga meteka na kidu na ngbaduse. Ho mo agedapa gu gbegberẽ sangbanapai ni naye kurii Zimiri mbiko wasiwasi kodaba na gupai namangi Geazi mbiko ngbaduse, ya mo mo ‘nabi’ gu bahu nga Satana re ko ningi mbiko gako diabese?—Geda 25:6-8, 14, 15; 2 Aba. 5:20-27.

¹⁰ Ndupai adu kinaho Satana amoiberã ko ti ni fuo aYisaraere. Kurigure, gu rika re du si adu nga si nika kusa Masiya nga gu boro si adu nga ni nika gbarasa Satana na ki tumbapa ga Yekova bakere pagbia. (Bam. P. 3:15) Satana aaidanga aYisaraere du na wene pagume dagbayo na Yekova te, si du ko aamanga ome ti ni i nimangi ingapai. Ka mo berẽnga ha nga Satana adu na gberãrago ho Davide amangi bari ni watadu rungo Moize aziko ho gu nebi re aarẽnga ni tipa ka rimo ku rogo Ringara Mokido ya te. Kuba gure, Satana na ngbarago ho ga Mbori moyambu amanga kere ingapai  ni. Nirengo, ngbatunga agu adiabese re du du dagba agu apai yo Bakitingbanga amangasunge na ni ka soapai kuti Yekova.—Snz. 27:11.

11. Ginipai Satana aaida ka manga Sara na ni?

¹¹ Satana aima du na kere sogote kuti gu ngbatunga si adu nga Masiya nika kura rogoho. Ni kpiapai, oni bingo gupai namangi ngbutuko ti gu regbo i aya fu Abarayama ko nika da ni “bakere rikaaboro.” (Bam. P. 12:1-3) Ho Abarayama na Sara adu ni Ezipeta yo, Faro aya i ye na Sara ku kpuko yo, na si tie ziazia nga ko aaida ka sa ri ni diako. Ono tie, Yekova aima batasa ri be gi gbegberẽ wasiwasi pai re. (Oni gedi Bambata Pai 12:14-20.) Ngbutuko mbata fu i batika Yisaka pai wa gure amangi Gerara yo. (Bam. P. 20:1-7) Ya mo Satana naadu kugii agi apai namangi re? Ya mo ko aberẽhe nga gu wene raka naadu kua agu abakindo yo nangia Faro na Abimereke arengbe ka nanga Sara nga gu boro naguari rogo gu kumukokumuko gbata nangia Ura ka ga kaa raka rogo bamburoko? Ya mo ko aaberãha nga Sara nika samungu kuti kumbari na Yekova ki rimi ku rogo gu rogotise nga ga bäri? Ziazia Kekeapai apenga ha wo te, ono ani na wene nduapai berani ka ida kuti gupai nga Bakitingbanga arengbe arengba kadu na ngbarago ka si adu nga Sara aarẽnga ka batika gu gude si adu nga Masiya nika ye rogo ko yo ya. Ka pa gari rogatise agbere na gu wene rimo ri adu na ni gbiati gari pagume na Yekova ka si abanga gberãrago ti Satana te. Na gberẽ sino Satana!

12, 13. (a) Wai du Satana ayugupa du ko ni kere boro tingbafuo batika Yesu? (b) Oni nabihe nga Satana wai ho ko abi paranga aboro ni i nikpinyemu Yekova na kini asadi ka irisiko areme?

¹² I avungu Yesu fuo dungu kama agarã fuo Abarayama. Ka oni berẽnga gupai nga Satana abi gu gude re ni wene ru, ni gu gude si aaida i kpinyemu ru, watadu i bi ru kikiipa ru ya. Bambiko ko aima ino gupai nga gu gude re nika sona na ki da ni gu Masiya i akidopa ko. Nirengo, Yesu angia gu papara ngbatunga Abarayama pako anyaki gbe narengbe ka ‘gbarasa ga Bakitingbanga mangaapai.’ (1 Yo. 3:8) Ya mo Satana aberẽ gupai nga dia gu raka nga ga pa imo gu gude re angia gbegberẽpai? Ko aberãnga tipa gupai du ni wenehe na gbegberẽhe te. Nibipa pa gu gude nangia Yesu, ko amangipai ni kina boro ipo. Ngba gini gene?

¹³ Bakindo Erode adu na bakere gberãrago ho abinza-akerekuru asanahe ni tipa ‘guko i abatika ko ni Bakindo aYudo,’ na ko adiberã ka imo ko. (Mt. 2:1-3, 13) Tipa ka da ti gako sasa nga ga imo gu gude re, ko afu zinahe nga i imi agu akumbagude dunduko garãyo adu ue na kusende naaraka Betereme yo na agu agbata naadu pa ti ni. (Oni gedi Matayo 2:13-18.) Yesu abati ti gu regbo i aimi agu agude re, ginipai gipai re ayugoho tipa gu vurarani nga Satana re? Si tie ziazia nga, Bakitingbanga abingo raka aboro na nyanyakipaha te. Ko na nyemu agude a tiko te. Satana nirengo nga “bahu nata ki nipoi.” Ka oni umbasinga padu ko ni kere boro ya!

14, 15. Wai du Satana na ‘nakisi berã aguyo zanga idapase’?

¹⁴ Gu yangada gene rengbe Satana ngbaha ka aria aboro kusayo ti Yekova Mbori nga ka nanga yo. (1 Yo. 4:8) Satana nananga aboro ka i ininga pa “gayó azingo nga ga toro” ya. (Mt. 5:3, NW.) Ko ima ‘kisa berã aguyo zanga idapase, ya ka gu imarago ahasanga rago kuriyo nga ga gu wene pangbanga nga ga gu taarimo nga ga Kristo, nga kpia Mbori, ya.’—2 Kor. 4:4.

 ¹⁵ Gu bakere gene Satana ananga aboro ngbaha nga zire pambori. Nairiwo gu ngbarago du ko na ni ka bi gupai nga aboro nairiso atita yo, gu kura ahe, anya watadu kura ahe angianga Yekova ya “nga iraringo Mbori”! (Gate 20:5) Zavura gu dungu aboro naberãha nga i nairiso Mbori ngba ruru gene i ni ziziyo kuti ziree aida na agu avugahe adunga na sunge ti ni ya. I wakina agu aboro Yekova aya tipa yo wẽ: “Tipagine oni [a]baga gaoni marã ti ni tipa agu ahe adu nga ni riahe ya? ki bagi omeroni sa gu he ambisa nga roni a ya? Oni dége turoni kono du mi ni wenengaĩ, ki ri gu he ngba angba, mbisimoroni ki du na ngbarago ti he be nzeme.”—Yes. 55:2.

16, 17. (a) Tipagine Yesu aya ti ni fu Petero wẽ: “Mo ké ku gii re yo, Satana”? (b) Wai Satana narengbe ka nanga rani ka ani naangeranga angera kindi ya?

¹⁶ Satana ima rengba ka nanga ga Yekova amoyambu. Ni kpiapai, oni berẽnga gupai namangi ti gu regbo Yesu aya fu gako abawiriki avurako nika imo ko. Zanga kapa gu mokedi nangia Petero adu na wene bipai ti gu regbo ko aya: “Si turũ atura ti ro, Gbia; gi pai ayé nga sa ro wa sa te re.” Gako karagapai adu fu ko nga: “Mo ké ku gii re yo, Satana!” (Mt. 16:22, 23) Tipagine Yesu ayambu Petero ti ni nga “Satana”? Mbiko Yesu aima ino gupai naandu ka manga. Regbo aima da tipa ko kpi kafu motumo na ki yuguhe nga Bakitingbanga nga iraziree. Gu kere regbo re angianga gu regbo si aaida Yesu ‘turũsi’ gipai re tiko te. Satana aida gupai nga Yesu zanga ka ngera angera kindi te.

¹⁷ A wa ani ambeda kuti digido gi sino raka re, ani a naraka ti kere regbo. Satana aidanga ani banda tirani te, ko naida ani ‘turũsi’ bakabangirise tirani kusayo na ki tona ka gbata wene raka rogo gi zegino re, rogo gi gene re, ka ani angeranga kaa ngera angera kindi ya. Ka oni mbunga gipai re si mangi roni ya! Kuba gure, si naida “oni ngére” angera kindi. (Mt. 24:42) Ka oni idinga kuti gupai Satana ananga aboro na ni nga, digido gi zegino re kindi tuturũ watadu si ayengo ya te.

18, 19. (a) Wai du rengbe Satana ka nanga rani ani berẽhe nga Yekova akpinga nyemu rani te? (b) Wai du Yekova aundo rani ani ni ngere angera kindi?

¹⁸ Satana naida ka nanga rani berewe ngba kura gene. Ko naida ani idi kuti gupai nga Mbori akpinga nyemu rani te, na ko arengbanga ka mbupai furani te. Agi apai re dunduko nga gu nangahe nga ga Satana. Nirengo, da nzunzu Yekova akpinga nyemu ni ya? Satana du. Da nzunzu ka i ambunga pai funi ya? Berewe kina Satana du. Ono Ziazia Kekeapai nakido rani nga: “Bambiko Mbori ni iraira ko te. Bangiriko ago nga ti gaoni sunge te, na ti gu nyemuse oni ayugu ti rimoko” te. (Eb. 6:10) Yekova nabi gu asadatise ani amangaha tipa irisoko na nyanyakipaha, na gaani iriso fuko gbua te. (Oni gedi 1 AKorindo 15:58.) Ka ani mbunga Satana ko nangi rani ya.

¹⁹ A wa bi ani he, Satana nga boro ome, kere boro na ni banangi aboro. Wai rengbe ani ka diabe gu kere vurarani re? Yekova ambunga rani zanga banda rani te. Fugoko nayugopai furani tipa ga Satana abirĩ, na “zingo ina gako bawagi ti rani te.” (2 Kor. 2:11) Ho ani aino gako abirĩ ni, ani ima rengba ka banda tirani beko na ki nye kaa ngera angera kindi. Ono kina ino ga Satana abirĩ nga gupai si aida te. Ziazia Kekeapai naya: ‘Oni ká fu bakitingbanga, ko ki oro be roni.’ (Yak. 4:7) Gu kekeapai ngbefuo gere nika sakapai tipa abangiriaba biata rengbe ani ka sovura kutiko na ki di beko ngbaha.