1. (a) Tipagine duhe ti ni ni nyanyakipa pai ani sovura kuti Satana awere? (b) Wai du ini ani gupai nga ani rengbe arengba ka diabe Satana?

SATANA nasovura na yangara mbedimbedi aKristano gbiati “kura akandoro.” (Yo. 10:16) Ga Bakitingbanga sasa nga ka rita badungu ga Yekova amoyambu vuru gu wiri umba regbo nye fuko re. (Oni gedi Yugoti 12:9, 12.) Ya mo ani rengbe ka dia beko? Ii, ani ima rengba! Ziazia Kekeapai naya: “Oni ká fu bakitingbanga, ko ki oro be roni.”—Yak. 4:7.

2, 3. (a) Wai du gu berãpai nga ga Satana ti ni te asongoda gupai ko aida kaa mangaha? (b) Wai du ani ainoho nga Satana nga ndikidi boro?

² Badungu aboro na moma gupai amoma nga Satana kina ti ni. I nabi Satana na gako adaimona nga kungbo paturẽ gbua. Ngbatunga agu aboro re naberãha nga ruru rii boro yo ho rengbe ka ida kuti gupai nga gbegberẽ atoro kina ti ni te. Awere tie, ya mo mo naberãha nga rago nagberã agberã ti Satana na adaimona ka bi gupai nga aboro naberã payo ni kungbo paturẽ gbua? Si awira ngaha wo te! Nirengo, si taata fu Satana tipa ko kisi berã agu aboro naberãha nga ko ti ni te. (2 Kor. 4:4) Gene sa dagba gu dungu agene Satana ananga aboro ngbaha nga ka sayo i bihe nga gbegberẽ atoro ti ni te.

 ³ Wangia ani ga Yekova amoyambu, ani dagba agu aboro yo ko ananga yo te. Ani ima ino gupai nga Bakitingbanga kina ti ni, mbiko Satana du naafura fu Eva rogo wo yo. (Bam. P. 3:1-5) Satana aye na soapai kuti Yekova nibipa Eyobo. (Eyo. 1:9-12) Kina ko du a naʹasadi Yesu. (Mt. 4:1-10) Tingbafuo i sigira ga Mbori Kindo rogo 1914, kina Satana du naatona ka “so vura” kuti yangara mbedimbedi aKristano. (Yugo. 12:17) Gu vura re nandu kindi ku mbatayo wa Satana aida ka gbarasapa gu idapase nga ga mbedimbedi aKristano nga 144,000 na kura akandoro. Tipa ka diabe gi vura re, ani du wa ka ani ka fu Satana na ki ru nyanyaki rogo idapase. Gi Kekeapai re nafura tipa agene biata rengbe ani ka mangaha wo ngbaha.

4. Wai du Satana nayugu tiko nga kere irarukö nga ko?

⁴ Satana nga kere irarukö. Nirengo, tipa gu boro nga toro sovura kuti ga Yekova bakere pagbia na ki sa tiní ni kura mbori nayugoho ayugo nga ni na rukö gbiati gbangbati. Sidu tie, gene sa dagba agene yo rengbe ani ka ka fu Satana ngbaha nga ka soga rukö na ki sonosi umbasitise.—Oni gedi 1 Petero 5:5.

5, 6. (a) Ya mo si gberẽ agberã boro kido kuti tiní watadu ka gbia irisa? Oni sakingo rogoyo. (b) Gini akpiapai du rogo Ziazia Kekeapai nayugoho nga rukö nga gbegberẽ he?

⁵ Si agberẽnga ani kido kuti tirani na ka gbia irisa te, na si agberẽnga a ka du na ngbarago mbiko gupai nga ani watadu gaani aboro mangi wenepai watadu i na wenehe beyo te. Pai ho gberẽ ti ni te. Gu mokedi nangia Pauro aya fu agu awirina naadu Tesaronike yo wẽ: “Ani nataka pande roni tigaani ti ni fu ga Mbori akanisa tipa gaoni hipai na idapase rogo gaoni rungosi dunduko na rogo gu gberãngbi oni nahi” he. (2 Tesa. 1:4) Sidu tie, ka du na ngbarago mbiko gupai kura aboro namangihe watadu gu ani na mangihe agberẽnga te. Si aidanga ani du na zee mbiko gaani aborokporo, gaani sino mangaapai watadu gu rago ani asono rogoho te.—Amo. 21:39.

⁶ Rukö rengbe ka gbarasa gaani pagume na aboro na ki gbarasi gaani pabakure na Yekova. Si ima rengba ka sarani ani ka rugute kuba gupai nga ka diaha na umbasitise. (Tam. 141:5) Rukö nga “bakere berãpatise” watadu “gu sino nga ga enda du ti agu aboro nabi tiyo nga i ngba kisusi akurayo.” Yekova ima soga rukö. (Yeze. 33:28; Amosa 6:8) Ono Satana na ngbarago ho ko abi aboro ni i ni mangipai na rukö, bambiko gure nayugopa gako rukö. Nairiwo gu ngbarago naadu ti Satana ka bi agu akumba nangia Nimeroda, Faro na Abisaroma i ni mangipai ni rukö! (Bam. P. 10:8, 9; Gate 5:1, 2; 2 Sam. 15:4-6) Rukö du a naaye na gberango kurii Kaina. Kina boro Mbori nisako naaza ko ono mbiko gako rukö ka ko aidanga i rugu ko ya. Ko aka ga Yekova rugute na ki rimisi tiko ku rogo kerepai.—Bam. P. 4:6-8.

7, 8. (a) Gine nga sogote kura angbatunga, na wai du rengbe he kadu nga rukö? (b) Oni sakingo pa wai rengbe rukö ka gbarasapa gu zereda nga ga dungurati.

⁷ Areme, aboro namangapai ni rukö ngba badungu agene. Kura regbo rukö nandu sa na gu sino nga ga sogote kura angbatunga. Kura buku sa nasakapai tipa sogote kura angbatunga aya si nga “ngbe na kina kura aboro watadu ka soga gu kura aboro du rangi kpotoyo kia” na “ka ida kuti gupai nga kura aboro du rangi kpotoyo kia i na asino gbiati abirĩ kia, na kura angbatunga kinaho ngba kisusi akuraha.” Sogote kura angbatunga ima ye na waawaa, vura gbiati bakere imo aboro.

 ⁸ Rengo ngaha nga, ngbatunga apai wa gure si aidanga si du rogo gu dungurati nga ga aKristano te. Ono wa vura duhe wo, ka ani mbu rukö si kusi atagbagapai dagbarani, si ima rengba ka siro bee. Si tie ziazia nga, gure nangia gupai naadu tipa agu aKristano naadu rogo bambata sa kama agarã Yakoba ake nyanyaki sanahe fuyo ki ya: “Agu avura du dagba roni na akpata, si naye wari?” (Yak. 4:1) Nirengo, kere sogote kpotoseyo gbiati bi tise nga mo ngba ki susi ima rengba ka gberesa gu gene ani afura ngbaha fu aboro watadu gaani mangaapai, na si ki ye na badungu aigirã fu kura aboro. (Snz. 12:18) Nirengo, rukö ima rengba ka gbarasapa gu zereda nga ga dungurati.

9. Wai du Ziazia Kekeapai aundo rani tipa ani sovura kuti sogote kura angbatunga gbiati rukö? (Oni bi gu sura du ti tonatonaha.)

⁹ Ka ani du na gu sino nga kaa bi tirani nga ani ngba kisusi kura aboro, si naida ani tingidi gupai nga “agu aboro dunduko nakiisa pa tiyo nga kere gbegberẽ aboro bangiri Yekova.” (Snz. 16:5) Si adu ni wenehe ka ani wisigi gaani bipai tipa agu aboro du rangi kpotoyo kia, du rogo kura ringara, watadu du gayo sino mangaapai kia. Ka ani mbu gu sino ku kpotoraniyo nga ngbatungarani watadu gaani ringara ngba kisusi, gure nga bangirani ima go ti gupai nga Mbori ‘amangi arikaaboro dunduko wa sa i ima auru kpotosende dunduko.’ (Amo. 17:26) Ngba gi gene re, aboro dunduko dũ ngbatunga yo kina sa bambiko i dũ naenge ti titayo nga Adamu. Sidu tie, Nagberẽhe ka berã gupai nga kura angbatunga ngba kisusi akuraha. Ngbatunga agu aberã re nga ga Satana abirĩ tipa ka gbarasapa gaani nyemuse na kodatise nga ga aKristano. (Yo. 13:35) Tipa ka sovura kuti Satana na ki di beko, si naida ani sogo rukö.—Snz. 16:18.

10, 11. (a) Tipagine rengbehe ti ni kadu taata tipa boro sonosi nyemu zegino? (b) Wai du Dema arengbe ka kpinyemu zegino?

¹⁰ Satana nga “gbia gi zegino re,” na si ni zogozogoho kutii gako ome. (Yo. 12:31; 1 Yo. 5:19) Sidu tie, badungu agu pai du rogo gi zegino re andunga sa na agu abangua arugute du rogo Ziazia Kekeapai te. Rengo ngaha nga, anga agu ahe du rogo zegino dunduko du ni gbegberẽhe te. Ono tie, gupai si aida ani inihe nga Satana nika mangasunge amanga na gi zegino re tipa ka sa gaani nyemupai si sosodi rani ani mangi ingapai watadu ka sonosa nyemu zegino na bangirani ki go ti iriso Yekova.—Oni gedi 1 Yoane 2:15, 16.

¹¹ Si tie ziazia nga, nyemu zegino aima du na gbegberẽ sangbanaha kurii aKristano rogo bambata sa kama agarã. Ni kpiapai, Pauro aya: “Dema aguari pati re, nikpi nyemu gi zegino re.” (2 Tim. 4:10) Ziazia Kekeapai apenga pa agu aũzegino nzunzu Dema akpinyemuhe nga gu nasako ko mbu sunge na Pauro te. Si rengbe kadu nga Dema atona ka kpinyemu aũzegino kisusi agu apai nga ga toro. Ka singia wo si adu, Dema aima zanga wene amomu nga ga toro tipa kungboapai gbua. Ya mo he ho ka zegino afuhe fu Dema nga gu ka susi agu amaku ka Yekova afuhe fuko wa ka ko aamangasunge na Pauro?—Snz. 10:22.

12. Ngba gini agene du rengbe ani ka zio ti “gu nanga he nga ga ũkumuko”?

¹² Pai wa gure ima rengba ka manga rani. Wangia ani aKristano, ani na nyemu ka gbata aũborose tipa tirani na gaani aborokporo. (1 Tim. 5:8) Yekova naida ani raki wene raka, na si ni yuguyuguhe rogo gu gene ko ambakadi wene rago fu Adamu na Eva i ni raki rogoho. (Bam. P. 2:9) Satana ima rengba ka mangasunge na gaani nyemupai ka zio rani na “gu nanga he nga ga  ũkumuko.” (Mt. 13:22) Badungu aboro naberãha nga marã nika ye na ngbarago fuyo watadu aũkumuko rengbe ka sayo i du na diabese. Gu ngbatunga aberã re nga kungbo nangahe, na si ima rengba ka sa rani ani zanga gu nyanyakipa he du berani nga gaani pagume na Yekova. Yesu aza apefuoko nga: “A nga boro sa ka ra fu abaira ue te; bambiko ni asóga gu ni sa, ki kpi nyemu gu ni; watadu ni aká kuti gu ni sa, ki payasi pa gu ni. Ka oni ata ra nga fu Mbori nira fu ũzegino” ya. (Mt. 6:24) Ka ani du ni akanga fu aũkumuko, gure nga ani ima mbu mangasunge fu Yekova, na si nga gupai Satana aida ani mangihe! Ka ani ya mbunga marã watadu agu ahe marã na rengbe ka ngbehe si furii gaani pabakure na Yekova ya. Tipa ka sovura kuti Satana, ani du wa ka ani du na ruru bipai tipa aũborose.—Oni gedi 1 Timoteo 6:6-10.

13. Wai du gi zegino re asonosa iraira bipai tipa rogatise na kodaba?

¹³ Gu kura gbina du rogo gi ga Satana zegino re nga wasiwasi kodaba. Areme, badungu aboro nabipa du ni ruruse rogo rogatise watadu rogatise nitihe wa guhe naka na boro ti manga kura apai na wa gupai garãha naima susa. Ni kpiapai, kura dee sa badungu aboro na ini ri mbiko gari sunge ngi ambaro aya: “Si ima kpakara tipa boro di dee watadu kumba kina sa. Mi ainongo gu boro du ni ruru ni rogo rogatise watadu naida kadu ni ruru ni te.” Guko aya: “Mi ainongo singia i avungurani na gu sino nga ka raka na ngisa boro sa tipa gaani raka dũ te.” Satana na ngbarago ho ko abi agu aboro ni du na ome kurii akurayo i ni gbarasipa ga Mbori gamunihe nga ga rogatise. Bakitingbanga na nyemu gu mbakadapai re te, na ko aidanga si du na diabese a te. Sidu tie, tipa ka sovura kuti Satana na ki dibe ko, ani du wa ka ani kakuti ga Mbori mbakadapai tipa rogatise.

14, 15. Wai du rengbe ani ka sovura kuti wasiwasi kodaba?

¹⁴ Singia ani mangi rogatise watadu ani aata manganga ha te, si naida ani sogo ngbatunga wasiwasi akodaba dũ. Ya mo gu vura re taata? Wagusa te! Ni kpiapai, kangia mo sukuru yo, mo rengbe ka bi akuaro i ni ta ngbaduyo tipa kodaba watadu tipa wai i akekapa kodaba fu akurayo rogo terefuni, nga gupai du rogo kura arago wakina kekeda sura kundiri-aboro fu rukutu agude. Ziazia Kekeapai naya: “Gu ni namanga pa bari ni nainga pai kuti boroni.” (1 Kor. 6:18) Arungo na kpio ye ni sangbana agu agbiro naye be kodaba. Na gu paranga aboro naatona kodaba mbuyo kindi rukutu nabira kina tiyo tipa gupai i amangihe re. Gu rengo du tipa wasiwasi kodaba si kia ti agu apai aboro apehe rogo aterevizioni na avidio nga gu rengbe ka sarani ani bere gupai nga ka ani kuo ga Mbori andiko sangbanaha dunga ti ni te. Gu ngbatunga aberã re nasa aboro i zi ti “gu nangahe nga ga ingapai.”—Eb. 3:13.

¹⁵ Kangia mo nasovura na nyemu wasiwasi kodaba, ginipai rengbe mo ka mangaha? Mo inipa ga rungbura. (Rom. 7:22, 23) Mo kpari fu Mbori ko fu ome foro. (Frp. 4:6, 7, 13) Mo ne agu aba rengbehe ka du foro taata mo mangi wasiwasi kodaba rogoho. (Snz. 22:3) Na ho asada akura ni saro, mo kaha ni kina boro ipo.—Bam. P. 39:12.

16. Wai du Yesu akaragapai ho Satana aʹasadi ko ni, na ginipai rengbe ani ka wirikaha ti gu kpiapai re?

¹⁶ Yesu amoi wene kpiapai furani tipa wai rengbe ani ka sovura kuti asada. Ga Satana akidohe aananganga ko te, na regbo aadunga beko ka berã kurii gu weneapai gbiati gbegberẽ apai naadu ti agu akidohe re te. Kuba gure, ko akaragapai ni kina boro ipo nga: “Si ni keke he ya.”  (Oni gedi Matayo 4:4-10.) Yesu aima ino Fugo Mbori wenengai, na si naasaha fuko taata ko mangipai ni kina boro ipo na ki karagapai rogo Ziazia Kekeapai ho ko agbia tiko ni na asada. Tipa ani sovura kuti Satana na ki di beko, si aidanga ani mbu tirani fu asada ka manga wasiwasi kodaba te.—1 Kor. 6:9, 10.

17, 18. (a) Gini kura aũvura du be Satana, na tipa gine si aidanga ti ni si zeresi ngbarani ya? (b) Ginipai napido Satana, na wai du si angarasa rani tipa ani hipai?

¹⁷ Rukö, nyemu aũzegino, gbiati wasiwasi kodaba nga agu apai biata du dagba ga Satana aũvura yo. Kura dungu apai kinaho. Ni kpiapai, kura aKristano nagbia sogote be gayo aborokporo, sawiahe be akurayo sukuru yo, watadu irangbii aidanga pa gayo sunge tungusapai te. Agu angbatunga akpakarapai re azeresanga ngbarani te, bambiko Yesu aima pehe fu apefuoko nga: “I asóga roni dunduko tipa rimore. Ono gu ni ka hi pai dati yangara rago kindi, i abátasa gu ni abatasa re.”—Mt. 10:22.

¹⁸ Wai du rengbe ani ka sovura kuti Satana na ki dibe ko? Yesu aya fu gako abawiriki wẽ: “Rogo gaoni hipai oni abátasa ungaroni abatasa.” (Rk. 21:19) Pai ho rengbe boro ka mangaha nga gu rengbe ka gbarasapa rani nyeanye kindi te. Boro ho rengbe ka gbarasapa gaani wene pagume na Mbori te, kina gu ka ani mbugene fuhe si mangi. (Rom. 8:38, 39) Zavura ho ga Yekova amoyambu akpi ni, si nga diabese fu Satana te, bambiko Yekova nika zingisa yo azingisa! (Yo. 5:28, 29) Ono tipa Satana tigako, wenepai ho du tipa ko ku mbatayo te. Tingbafuo i gbarasi gi zegino nga ga azangasinombori re, i nika ba Satana ku rogo gu due zanga mburuhe tipa agarã 1,000. (Yugo. 20:1-3) Ti digido ga Yesu Zogarago Tipa Agarã Kutu, “i akúsa Satana rogo gako bambukisa yo” tipa bete regbo ko asadi ka nanga rengberengbe aboro. Tingbafuo gure, i ki gbarasi ko. (Yugo. 20:7-10) Kerepai du wa ka si ye kurii Satana, ono anga wo duhe tipa roni te! Mo ka fu Satana, ki ru nyanyaki rogo idapase yo. Mo ima rengba ka sovura kuti Satana na ki dibe ko!