1, 2. Ginihe nayugo na ni nga Yesu adu na dudunguro nyemuse tipa aboro?

GU Bambata boro Mbori akusi ni angia bambata Wiriko na ko nayugopa gu ga ko tatamana adunga digidoho ti ni ya. I fura tipa ko ya ko nga tatamana, na ni “bangbasia boro sunge” pati Bako. Ani ima inoho nga ko adu na ngbarago wa ko aabi Bako ko ni ‘nyakasi angbangbaturũ’ na “ho ko amoi ba amburu kpotosende ni.” Ono tie, kupati agi ahe Bako ambakadihe re, rago angba ti bambata Wiri Mbori “mbiko awiri aboro.” (Snz. 8:22-31) Nirengo, ko aima kpinyemu aboro mbata fu ko ye ku auru kpotosende no.

² Kusa, tipa Bambata Wiri Mbori yugu gu giasangba na nyemuse ko adu na ni tipa Bako gbiati gu dudunguro nyemuse ko adu na ni tipa “awiri aboro,” ko “auka pa tiko” na ki ye ni boro. Ko amangihe wo tipa “ka tumo dungu yo ni ungako.” (Frp. 2:5-8; Mt. 20:28) Nairiwo gu nyemuse du ko na ni tipa aboro re! Ho Yesu adu ni auru kpotosende, Mbori afu tandu fuko ko mangi iˈiriwoapai nga gu naayugo gu bakere nyemuse du ko na ni tipa aboro. Rogo gi gene re, Yesu ayugu gu wene iˈiriwoapai ni ka manga barambeda rogo zegino dũ.

3. Ginihe ani nika gbeberã rani kuti ni awere?

 ³ Paye Yesu ku auru kpotosende aza gene fuko tipa ko tungusi “gu wene pangbanga nga ga ga Mbori ngbi.” (Rk. 4:43) Yesu aima inoho nga gu Kindo re nika ziasi rimo Bako na si nika ngia nyenye ziga kuti agu apai dunduko narungosi aboro. Si airiwongo te nga, gu dendekere apai Yesu amangihe ti regbo gako tua nangia ga tungusapai aayugo gupai nga ko adu na ndikidi nyemuse tipa aboro. Tipagine si aida ti ni ani bi gipai re na nyanyakipaha? Bambiko gupai ani nika wirikaha nika sarani ani du na kido gbiati maabangirise ku mbatayo. Ani wisigingo ga Yesu iˈiriwoapai biama.

4. Oni sakingo pai tipa wai Yesu agbia boro ngbataka.

⁴ Yesu adu gene gako sunge tungusapai yo, na gu dagbarago ko aatungusapai rogoho re angia Gariraya. Rogo kura gbata yo sa, ko abi gupai kina nunga aziko behe. (Mk. 1:39, 40) Kumba adu barabangiriko naadu na kere ngbataka tiko. Tipa ka yugo wai gu kaza re adu ni kerehe, gu munganga nake Ziazia Kekeapai nangia Ruka aya, gu kumba re adu na “kinaku ngbataka” tiko. (Rk. 5:12) “Ho ko abi Yesu ni, [gu boro ngbataka re] ki vagadi sande, ki ta kpara fu ko, niya, ‘Gbia, ka mo kpi nyemu he mo húsi re ahusa.’ ” Gu kumba re aima inoho nga Yesu na ome beko tipa ka husa ko, ono gupai ko aaida ka inoho nga, ya mo Yesu na nyemu ka mangaha wo? Wai du ka Yesu akaragapai kuti gi sanahe re? Ginipai Yesu aaberãha wa ko aabi gi kumba si awira wa bibi ko aima gberã re? Ya mo Yesu arengbe kadu wakina aFarusi nunga aboro anaadunga tiyo ya? Ginipai ka mo amangihe tigamo?

5. Ginihe nafõngbadu Yesu yo ko ya “mi nakpi nyemu he” ho ko ahusi boro ngbataka ni?

⁵ Si nawira wa, gi boro ngbataka re aatanga ngbako nga “Birikosibirikosi boro, birikosibirikosi boro” wa si anidu rogo ga Moize aNdiko te. Yesu aatingidanga ko na pa gupai re a te. Kuba gure, ko agbeberã ko kuti gu kumba re ka manga gupai ko aaida na ni. (Pa Mot. 13:43-​46) Ani ainongo gupai nzunzu Yesu aaberãha te, ono ani ima ino gupai naadu ngbaduko yo. Nunga afõngbadu Yesu yo ko mangi banarupai. Yesu atãi beko ki zadi gu boro ngbataka re na ko ki pe gu fugo naayugo pa gako nunga na ome ki ya: “Mi nakpi nyemu he, mo hú.” Fuani, “ngbataka ki go ago ti ko ni ba sa.” (Rk. 5:13) Nirengo, ga Yekova ome adu ti Kristo tipa ko mangi iˈiriwoapai wa gure na tipa ko yugu gako nyemuse na ni fu aboro.​—Rk. 5:17.

6. Ginipai ini anihe tipa agu iˈiriwoapai Yesu amangihe, na ginipai si ayugoho?

⁶ Ga Mbori ome asa Yesu Kristo ko mangi badungu iˈiriwoapai. Anga kina ngbataka gbua ko ahusi he te ono ko ahusi ngbatunga akaza dunduko kodihe na gbarĩgbarĩ aboro dũ. Fugo Mbori napehe furani nga: “Si ki iriwo airiwo ti rimbasa, ho i abi kisikisi ngba aboro ni i nifura, na gbarĩgbarĩ yo i ki du na ba yo, na airaterenga i nita, na airavurari i ningere.” (Mt. 15:31) Tipa Yesu mangipai ni nyemuse wa gure, ko aaidanga aboro niye na abarapa kpotoyo tipa ko ta rogaha ni moihe ti aguyo ko anaahusa yo te. Ko anaahusa kina gu barapa boro naanidu na kaza ti ni! Na ko anaahusa aboro ni kina boro ipo, ti gu kura aregbo ko ani ru kina bako ki husi boro tuturũ. (Yo. 4:46-​54) Gi iˈiriwo akpiapai re nayugo gine? Si nayugo gupai nga Yesu awere ni Bakindo ngbangbaturũ yo na ko na ome beko gbiati nyemu ka ye na nyenye  ziga tipa ga aboro arungo. Wirikapai tipa wai Yesu anaahusa aboro nafu gu kido furani nga, rogo vovo zegino, gu sangbanebi du rogo Ziazia Kekeapai nika digiso tihe, si naya: “Nunga rurungbura boro du ti ko na irazingo ahe a.” (Tam. 72:13) Nirengo, Yesu nika manga gupai ko akpinyemuhe ka undo rungorungo aboro dũ.

7, 8. Oni ringbisinga pa gupai naasa Yesu ko gbia gu gbarĩgbarĩ kumba naadu pati gu munga nga Beteseda.

⁷ Bete adiwi aima susa fuo Yesu husi gu boro ngbataka naadu Gariraya yo. Ko aguari Gariraya yo ka ndu ku Yuda yo ka tungusa gu wene pangbanga nga ga ga Mbori Kindo. Agu aboro ga Yesu tungusapai azi ngbaduyo yo na gako mangaapai, i aima da ti akutu. Si ziazia nga ko adu na nyemu ka tungusa wene pangbanga fu rungorungo aboro, ka takapandepa ranirii fu ziziaboro, na ka voda aguyo ngbaduyo yo akua.​—Yes. 61:1, 2; Rk. 4:18-​21.

⁸ Fuani gu diwi nga Nisana ki da. Yesu ki ndu ku Yerusarema yo tipa Pumbo Susiri ka yugo gako giasangba kuti ga Bako zinahe. Badungu apai naamanga rogo gu gbata re wa aboro aaye tipa gi pumbo re. Munga adu pavuru yekaru ku nodiyo rimoho angia Beteseda, na Yesu ki gbiatiko yo na kazakaza kumba.

9, 10. (a) Ginihe nanaandu na aboro ku rogo gu munga nga Beteseda? (b) Ginipai Yesu amangihe pati gu munga re, na ginipai si ayugoho furani? (Oni bi gu sura du ti tonatonaha.)

⁹ Ndurumo kazakaza aboro na gbarĩgbarĩ yo naana dunguratiyo ku Beteseda yo. Ginihe naana ndu nayo koyo? I aidi kuti gupai nga ka kazakaza boro rimi ku rogo gu ime munga re ho si asungburo ni, ni ima rengba ka hu. Oni berẽnga pa wai aboro adu yo! Du na nyemu ka hu, bakabangirise gbiati zanga maabangirise angia agu apai naadu riyo yo. Ono ginihe naandu na Yesu koyo, wa ko aadunga na kaza ya? Nunga azi ngbadu Yesu yo ko ki ye fuo gu kumba naima raka na kaza tipa gbanga regbo kisusi agarã Yesu ku auru kpotosende.​—Oni gedi Yoane 5:5-9.

¹⁰ Ya mo oni rengbe ka berãpa gu gberãrago gu kumba re adu na ni ho Yesu aye ka sanako ni singia ko naida ka hu? Ko akaragapai ni kina boro ipo. Gu kumba re aida ka hu ono ka gene adunga beko ya, mbiko boro aadunga ho ka zogo ko ku rogo ime munga te. Yesu ki zinahe fuko ko mangi gupai ka boro amanganga ha ya nga ko di gako ira ki tona ka ndu. Mbu gupai re kina ku ngba Yesu yo, gu kumba re ki guari ki tona nduge. Nangba gi wenepai nayugo agu apai Yesu nika mangaha rogo vovo zegino re! Rogo gi iˈiriwopai re, ani nabi ga Yesu nunga. Ko aagbata agu aboro naadu na rungo. Si naida ga Yesu kpiapai fõngbaduraniyo ani ndu kaa gbata agu aboro du na bakere gberãrago tiyo be agu apai namanga rogo zegino du rogo gaani dagbarago.

11. Wai du Marako 5:25-​34 ayugopa ga Yesu nunga tipa agu aboro narungo be akaza?

¹¹ Oni gedi Marako 5:25-​34. Tipa agarã 12, gu dee re aaraka na pazee. Gu kaza naadu tiri re aima rungosi gari raka kodihe na gari irisombori. Wa vura duhe nga, “ri aimi be dungu amunganga gbe, ri ki bagi agu ahe naadu be ri dũ,” gari kaza aagberã kina ku mbatayo. Rogo gu kura uru, gi dee re aberẽpa gu kurapai kia tipa ka hu. Ri amangi ome ka mbeda na Yesu. Ri arimi ku dagba ndurumo aboro yo ki zadi gako roko. (Pa Mot. 15:19, 25) Yesu ki ini gupai nga ome ima kura rogoko yo, ko  ki sanahe nga da du zadi ko. Gu dee re ki ‘ta gunde nikio, ri ki ti sande barangba ko, ki gumba kinaku rengo fu ko dũ.’ Ho Yesu aini gupai ni nga Bako du nga Yekova husi gu dee re, ko amangi furi ngba wene gene ki ya: “Vungu, ga idapase batasi ro; mo ndu zezeredi ki bati be ga kere kaza.”

12. (a) Nibi gupai ani nawisigihe ki da ku ane, wai du rengbe mo ka ringbisapa Yesu? (b) Gini kpiapai Yesu amoihe furani?

¹² Nairiwo gu weneringise du ti Yesu re! Ani nabi gupai nga ko na nunga agu aboro narungo be akaza. Satana naida ani idi kuti gupai nga Mbori akpingo nyemurani te na sunge tirani a te. Ga Yesu iˈiriwo mangaapai nayugoho nga ko nakpinyemu rani na kini berãpa gaani fudifudiapai aberã. Nangba sino gu Bakindo du ni Gbiamotumo re! (Eb. 4:15) Si arengbanga ka du taata furani ani ini gu bipai du ti agu aboro naima ima na kaza tipa gbanga regbo te, gbe ka si dunga si aamanganga rani mbata te. Si naida ani ini gupai nga, Yesu aduadu na nunga agu aboro naana woka wasi avura du nga ko aawokanga te. Ga Yesu kpiapai fõnga ngbaduraniyo afõ tipa ani mangi kina bangisapai na omerani dũ.​—1 Pet. 3:8.

13. Ginipai gu zinga be kpio nangia ga Razaro ayugoho tipa gu sino du ti Yesu?

¹³ Ga aboro arungo aima zio ngbadu Yesu yo. Ho ko abi aboro ni i ni kpari tipa pa kpio bakureako nangia Razaro, nungayo ‘aziko toroko yo,’ na “ko ki nirungo a.” Ko akpari akpara wa ko avura inoho nga ko nika zingisa Razaro azingisa be kpio. (Oni gedi Yoane 11:33-​36.) Zee aziongo Yesu tipa ka kpara te. Agu aboro naadu ho arengbe arengba ka bi gu nyemuse Yesu adu na ni tipa Razaro na gako aborokporo.  Nairiwo gu nyemuse Yesu ayuguhe re ni manga ko sunge na gu ome Mbori afuhe fuko ka zingisa bakureako be kpio!​—Yo. 11:43, 44.

14, 15. (a) Ginihe nayugoho nga Yekova na bakere nyemu ka dia agu rungo kusayo nga ga aboro? (b) Tipagine Yesu amangisunge ti ni na gu fugo nga “amurã”?

¹⁴ Ziazia Kekeapai naringbisa Yesu nga ko “du ni ndikidi kpia [Bakusiahe].” (Eb. 1:3) Rogo gi gene re, Yesu ayuguhe na gako iˈiriwo mangaapai nga ko na Bako na nyemu ka dia gu imisiri naye be akaza na kpio kusayo. Gu nyemupai du yo na ni re anga si fu kina gu bete aboro i azingisiyo du payo rogo Ziazia Kekeapai te. Yesu aya: “Ragoho nada, ho agu yo ka gia fugoko ni dunduko du rogo amurã yo . . . ki kuru.”​—Yo. 5:28, 29.

¹⁵ Pa manga Yesu sunge na gu fugo nga “amurã” nayugo gupai nga Mbori atingidapa yo atingida. Gu Mbori Duna Tanduapai Dũ, nakusi zegino ima rengba ka tingida agu apai dunduko naadu tipa gu gaani aboro nakpiki, kodihe na asinoyo dunduko. (Yes. 40:26) Anga si gbua nga ko ima rengba ka tingidaha te ono ko na Wiriko naida aida ka mangaha wo. Gu zingabekpio nangia ga Razaro na ga gu kura aboro du payo rogo Ziazia Kekeapai nayugopa gupai nika manga auru kpotosende dũ rogo vovo zegino.

16. Gini momu nika du be agu aKristano nika kakuti gayo ruru mangaapai?

¹⁶ Ka ani ka kuti gaani ruru mangaapai nga ga aKristano, ani nika bi gu bakere iˈiriwopai naamanganga mbata ya nga ka bata be bakere gberãngbi. Barambeda tingbafuo gu vura nga Aramegido, dungu iˈiriwoapai nika manga nga ka karaga kpoto aboro berewe ni bawenehe kubaha. (Yes. 33:24; 35:5, 6; Yugo. 21:4) Oni berẽnga pa aboro i ni bafu gayo amandara kusayo, atope, ngbagida gbarĩgbarĩ aboro, airangbiongo kini gipai na gu kura weneapai nimangi. Wene ndupai kinaho Yekova nika sa agu aboro nika bata be Aramegido ti ni i du na wene kpotoyo. Agu aboro nika bata re nika duadu na sunge beyo ka mangaha. I nika mangapai zaaza ka sa gi kpotosende nga gamunihe be Mbori re ni paradizo.​—Tam. 115:16.

17, 18. (a) Ginipai nasa Yesu ko nimangi iˈiriwoapai? (b) Tipagine si aida ti ni mo mangi ome ka du rogo vovo zegino?

¹⁷ Wai Yesu ahusi aboro bakuru kusayo nangarasa “bakere rimbasa aboro” areme na si nanyakasa gayo maabangirise ka hu be awokote dũ. (Yugo. 7:9) Gu gene bambata Wiri Mbori ahusi aboro ngbaha nayugopa gako nyemuse tipa ngbatunga aboro dunduko. (Yo. 10:11; 15:12, 13) Gu nunga du ti Yesu nayugopa wai Yekova aberãpa gako amoyambu ni basasa dunduko.​—Yo. 5:19.

¹⁸ Aboro dunduko nauko auko areme, kini igirã na kini kpiki. (Rom. 8:22) Ani naida ga Mbori vovo zegino ye, yo du i nika husa aboro ni dũ awa ko nakido paha. Maraki 4:2 nafu ndupai furani ani kido nga agu aboro i nika husayo nika ‘guka wa wiri abagara,’ na kidu na ngbarago mbiko i zaki yo be gu zio nga ga zangarengba. Gaani tambuahe fu Mbori gbiati gu bakere idapase du ani na ni kuti gako akidohe fõnga ngbaduraniyo afõ ani mangi gupai si aidaha awere tipa ka rẽ ka rimo ku rogo vovo zegino. Nairiwo gu ngbarago du ani na ni ka ino gupai nga gu iˈiriwoapai Yesu amangihe auru kpotosende aayugopa gu zereda ngbatunga aboro dunduko nika gbia ngbarago ti ni tii gu zogarago nga ga Masiya!