1. Wai rengbe ani ka mangasunge na gu kparakpee du rogo Matayo 6:9-​13 gene tungusapai yo?

BADUNGU aboro rengbe ka pe ga Gbia Kpee kina ngbariyo. Ho ani atungusapai ni kporo na kporo, ani naafura dedede tipa gi kparakpee re ka undo irakporo ni ini gupai nga ga Mbori Kindo nga ndikidi zogarago nga gu nika ye na dungu weneapai ku auru kpotosende. Watadu ani naafura tipa gu bambata sanahe re ka yugo gupai fu irakporo nga Mbori na kina ndikidi rimoko ti ni, si aida ani irisihe airisa.​—Mt. 6:9.

2. Wai du ini ani gupai nga Yesu aidanga ani pe gaani kparakpee teketeke wakina gu ko apehe te?

² Ya mo Yesu aaida gupai nga ani ni peke kina agu apai dunduko ko apehe rogo gako kparakpee yo ho ani akpara ni, wa gu kura akanisa naamangaha? Oó. Mbata fu Yesu pe gupai i naya ti ni kpia kparakpee, ko aya: “Wa oni akpara ka oni kpari nga ni dogodi gu kpe ni ba sa sa,” ya. (Mt. 6:7) Kusa berewe, ko ape kina gu bangisa kparakpee re ono na gu kura afugo kia. (Rk. 11:1-4) Rogo gi gene re, Yesu aundo rani ani ini gini apai  rengbe ani ka sanahe tipaha na gu nyakipaha kisusi. Sidu, rẽarẽ tie ani ya si nga kpia kparakpee.

3. Gini asanahe rengbe ani ka berẽkuriihe wa ani kaa wisigo gi kpia kparakpee re?

³ Rogo gi kekeapai re na gu ngbefuoho, ani nika wisigo agu apai du rogo gi kpia kparakpee re. Wa ani kaa wisigoho mo sananga tiro nga, ‘Wai du rengbe gi kpia kparakpee re ka undo re mi mbakadi gimi kparakpee? Gu nyakipaha gbe nga, ya mo mi naraka na ngbanya na gu kparakpee re?’

4. Gu fugo nga “Barani” natingida rani na ginipai, na ngba gini gene du du Yekova ni ‘Ba’ agu aKristano du na maabangirise ka raka auru kpotosende?

⁴ Gu fugo nga “Barani,” angianga “Buba” ya na tingida rani na gupai nga ani rogo gu “riigbu nga ga kodikodi awirina” du nakpinyemu tiyo nzunzu. (1 Pet. 2:17) Nairiwo gu momu re! Rẽarẽ Mbedimbedi aKristano nga agu aboro nga awiri Mbori du na maabangirise ka ga ku ngbangbaturũ yo ya ti Yekova “Barani.” (Rom. 8:15-​17) Agu aKristano du na maabangirise ka raka auru kpotosende ane ima rengba ka yamba Yekova nga “Barani.” Ko du nga gayo Bafu-Unga, na ko du a nafu agu ahe fu ndikidi airisiko i aidaha. Agu aboro du na maabangirise ka raka auru kpotosende nika da ni ndikidi awiri Mbori ho i nika da ni ni rengberengbe yo na ki yuguhe nga i ni ruru yo ti regbo yangara asada.​—Rom. 8:21; Yugo. 20:7, 8. 

5, 6. Gini wene gamahe rengbe avunguagude ka fuhe fu awiriyo, na ginipai si aida agude mangihe na gu gamahe re? (Oni bi gu sura du tonatonaha.)

⁵ Avunguagudee nafu wene gamahe fu awiriyo ho i ayugo wai ni fuyo ka kparakpee na ki undo yo i bi Yekova ni gu Bayo naberã payo. Wirina sa nga babi adungurati South Africa yo natingida gupai nga: “Naatona ti gu uru ani avungu awirani nga adegude, mi anaakparakpee na yo ayuru dũ, kinagu ka si adu nga mi tiikporo te. Awirani naape gupai dedede nga i atingidanga gupai mi anaapehe rogo kparakpee te. Ono tie, i natingida wai rago anidu ti gu regbo re, na wai duhe ni ziaziaha ka fura na gu Barani nga Yekova, na wai si asa boro nidu zeredi berãni yo. Ho si adani nga i ima rengba ka manga kparakpee, mi angarasi yo tipa i kpari na fugo yo kuari mi gi agu apai i apekaha fu Yekova. Gere angia wene momu fere ka ino gupai du kpotoyo. Fuani, mi aˈasadi ka undoyo i ni rimisi nyanyakipa pai nga ga kpia kparakpee ku rogo gayo kparakpee wa ka si sa gayo kparakpee si du na wene rogoyo ti ni.”

⁶ Si airiwongo ka bi gupai nga awiriko amangi sonakumbatayo rogo toro yo te. I awere na ngbarago na gayo abadiarogatise, na i namanga sunge kindo ti aregbo dũ. Gu kura nyanyakipa gamahe ho rengbe avunguagude ka fuhe fu awiriyo susi gu nga i du na wene pagume dagbayo na Yekova te. Rengo ngaha nga, boro na boro si aida ni banda gani pagume na Yekova. Gipai re nakoda wirikapa wai ka kpinyemu rimo Mbori, na kini bihe na dudunguro irisa.​—Tam. 5:11, 12; 91:14.

7. Gini momu du ga Mbori aboro na ni, na ginipai gipai re aidaha berani?

⁷ Si ni pa momu furani ka ino rimo Mbori na kadu ni agu aboro ko ‘narogo yo sa rimoko.’ (Amo. 15:14; Yes. 43:10) Ani naakpara fu gu Barani du ngbangbaturũ yo nga: “Ani írisi rimoro airisa.” Ngbatunga gu sanahe re ima rengba ka sarani ani sana Yekova ko undo rani ka ani  mangingo gupai watadu ka pe gupai nika ye na wasiro kuti rimoko ya. Si aidanga ani du wa gu kura aboro naadu rogo bambata sa kama agarã nga aguyo naana manganga gupai i anaatungusaha ya te. Gu mokedi nangia Pauro aya fuyo: “I nagberã ngbayo yo ti rimo Mbori dagba aGendiria mbiko” roni.​—Rom. 2:21-​24.

8, 9. Oni funga kpiapai nayugo wai Yekova afu maku fu agu aboro naida ka irisa rimoko.

⁸ Ani naida rimo Mbori du ni irisiirisihe. Kura wirinarani sa kumbari akpi Norway yo, ri anye na bangisa wiiri nga kumba gude garãko adu ue. Ri ape gupai nga: “Si angia rika kpakarapai fere rogo gimi raka yo. Mi anaakpara fu Yekova na auru dũ, tipa ko fu ome fere mi du nyanyaki tipa ka zanga mbugene fu Satana ko soipai kuti Yekova mbiko gu iraira diaberã ka mi arengbe ka mangaha. Mi aaida ka irisa rimo Yekova, na mi aaida wire bi bako berewe rogo paradizo yo.”​—Snz. 27:11.

⁹ Ya mo Yekova akaragapai kuti gu kparakpee re? Ii. Gi wirinarani re agbia undo mbiko koda ri tiri dedede na agu awirinari nga aidipase. Tingbafuo agarã bisue, ri amangi rogatise na bakumba rogo dungurati. Garã wiiri awere nga 20, na ko nga gu wirina naima zio bapatiza. Ri aya: “Mi na bakere ngbarago mbiko kumbami undo re tipa mi sonosi wire.”

10. Ginipai si aidaha tipa rimo Mbori du ni irisiirisihe?

¹⁰ Ginipai si aida ani mangihe ka sa rimo Yekova si du ni irisiirisihe zanga pai du ti ni? Tipa gupai re mangi, si naida Yekova di agu aboro dunduko kusayo na ka gako pagbia. (Oni gedi Yezekere 38:22, 23.) Aboro nika gbia rengba yeeyee. Nirengo, ani nasungudo gu regbo aboro dunduko gbiati amaraika nikaa bi rimo Yekova ni ziaziaha! Fuo gure, gu Barani du ngbangbaturũ yo “adu mbata yo fu ahe dunduko.”​—1 Kor. 15:28.

11, 12. Nimbedi kuti digido 19 kama agarã, ruru aKristano aini ginipai?

¹¹ Mbata fu Yesu ga ku ngbangbaturũ yo, gako abawiriki asanako nga: “Gbia, mo agasa ga aYisaraere ngbi fu yo wa du rago re?” Ga Yesu karagapai nayugo gupai nga si angianga regbo tipa i ini gini regbo ga Mbori Kindo nika tona zogarago ti ni te. Ko aya fu yo wẽ si naida i moiberã yo fuo sunge tungusapai nga gu si aida i mangihe. (Oni gedi Amokedi 1:6-8.) Wa si avura duwo, Yesu ayugu gupai fu apefuoko nga si naida i moiberã yo tipa ye ga Mbori Kindo. Natona ti gu regbo nangia ga amokedi, aKristano aima digo nikpari tipa gu kindo re ye.

¹² Ho regbo ambedi ni ga Mbori Kindo tona zogarago vurube Yesu ngbangbaturũ yo, Yekova aundo gako aboro i rugutiyo na pa agu apai naamanga ti gu regbo re. Rogo gu garã nangia 1876, Charles Taze Russell akepai rogo gu magazini nangia Bible Examiner. Gu kekeapai nga gu naya “Gentile Times: When Do They End?” re, ayugu 1914 ni nyanyakipa garã. Gu kekepai re afura tipa gu sangbaanebi du rogo Daniere nga gu nafura tipa regbo wa “bara saba” ya si nga “rago aGendiria” nga gu Yesu afura tipaha a. *​—Dan. 4:16; Rk. 21:24.

13. Ginipai namangi rogo gu garã nangia 1914, na ginipai agu apai namanga rogo zegino awere ayugoho?

¹³ Rogo gu garã nangia 1914 vura atona Putu yo, si nga gu vura nagbandaka na  arago dũ na ki sa gupai nga zegino nabaha sovura. Ti gu regbo si anyasi ti ni nangia 1918, zingo riahe amangi na riri akaza nga gu dungu aboro akpi behe susi aguyo nakpi be vura. Rogo gi gene re, gu ‘pa ye’ Yesu ape paha nga i nika inopa du ko ti ni ni Bakindo atona ka digiso tihe. (Mt. 24:3-8; Rk. 21:10, 11) Dungu goapai duho nayugo gupai nga gu garã nangia 1914 angia gu regbo i afu “kpakpari” bakindo fu Gbia Yesu Kristo. Ko “ki ta kura nidi be apai, ki ndu ka dia be apai.” (Yugo. 6:2) Ko agirisi ngbangbaturũ ho ko asovura ni kuti Satana na gako adaimona na ki ba yo ku sende no. Naatona ti gu regbo re, aboro aima ino rengo agi afugo re: “Rungo du fu kpotosende na baime, bambiko bakitingbanga azorõ koyo du oni ni na bakere zinga, bambiko ko ini he ya kina bete rago nye fu ko.”​—Yugo. 12:7-​12.

14. (a) Tipagine duhe ti ni kindi ni nyanyakipa pai kaa kpara akpara kindi tipa ga Mbori Kindo ye? (b) Gini momu du berani?

¹⁴ Gu sangbanebi du rogo Yugoti 12:7-​12 nasakapai tipa wai pa tona ga Mbori Kindo ka zogarago adu sa na pa gu gbegberẽ apai natona ka manga aboro. Yesu nga Bakindo nga ga ga Mbori Kindo atona zogarago dagba asogoko. Ani nikaa kpara akpara kindi tipa ga Mbori Kindo ye daho Yesu nika nyasariipa gbegberẽ apai ni auru kpotosende. Ti kina gu bangisa regbo re, si naida ani raki ringbisihe kuti gu kparakpee re ni manga ani pai ka ringbisa gu bakere papara sangbana agu apai i aino ‘pa ye’ ko ti ni. Yesu afura tipaha ku mbatayo niya: “Gi  wene pangbanga nga ga ngbi re i atungusa ha rogo zegino dunduko mbiko ndika fu arikaaboro dũ; ragoho ki digi adiga.”​—Mt. 24:14.

15, 16. Wai rengbe ani ka raka na ngbanya kuti gu sanahe nga ga Mbori pai mangi auru kpotosende?

¹⁵ Agarã wa 6,000 kusayo, ga Mbori pai aamanga zanga kpakarapai auru kpotosende ane. Gere nga gupai Yekova angere ti ni ki bi wai ko akusi aboro ni weneyo ki ya: Si “ni wene he gbe.” (Bam. P. 1:31) Tingbafuo gure, Satana asamungu kuti Yekova, na naatona ti gu regbo re, kina bete aboro gbua namanga ga Mbori pai auru kpotosende ane. Ono areme tie, ani na momu ka raka ti gu regbo bange aDezire Yekova nada ti amirioni muambe na i nakpara tipa ga Mbori pai mangi auru kpotosende ane, na kini asadi ka raka na ngbanya kuti gu kparakpee re. I namanga gipai re ngba gu gene i araka ngbaha kini tungusipai na kini mangisunge sa aboro ni abawiriki.

¹⁶ Ni kpiapai, wirinarani i abapatiza ri rogo gu garã nangia 1948 nga mokedi namangasunge rogo kura papara Afirika aya: “Nibi gi papara kpia ga gbia kparakpee re, mi naakpara dedede i tungusipai fu agu aboro du wa akandoro na i ki inipai tipa Yekova mbata fu regbo susi. Na ho mi naida ni ka tungusapai fu boro, mi naasana Yekova tipa ko fu tatamana fere mi rimisipai ku ngbaduni yo. Na nibi agu aboro du wa akandoro naima gia rengo, mi naakpara fu Yekova ko fu maku kurii gu ome ani amangaha tipa ka ngerafuo yo.” Zanga kapa, gi wirinarani du garãri nga 80 re ima du na diabese gene tungusapai yo, mbiko gu undo nga ga kura awirina, ri ima undo dungu aboro i da ni aDezire Yekova. Zanga kapa, si nawira wa mo ima rengba ka berãpa agu aboro nafu tiyo zaaza tipa ka manga ga Mbori pai si ki zavura du nga i nga gbinza aboro vuru.​—Oni gedi AFiripoio 2:17.

17. Gini bipai du mo na ni nibipa wai Mbori nika karagapai sa gaani sanahe nga ga gako pai mangi auru kpotosende ane?

¹⁷ Ani nika kaa kpara akpara kindi tipa ga Mbori pai mangi auru kpotosende ane dati ti gu regbo i nika dia avura ga Mbori Kindo kusayo. Ani nika bi ga Mbori pai si nimangi auru kpotosende ane ni bakerehe gbe ti gu regbo i nika zingisa agu abirioni aboro ku rogo paradizo kpotosende nakpiki. Yesu aya: “Ka gi iriwo nga ti roni re ya, bambiko ragoho nada, ho agu yo ka gia fugo [re] ni dunduko du rogo amurã yo, ki kuru.” (Yo. 5:28, 29) Nairiwo wai gu wene regbo nika ngiaha re nga ani du ni ungarani ka dia agu aboro nakpiki kugume! Mbori “awéga aume ti bangiriyo ku sa yo.” (Yugo. 21:4) Dungu agu aboro i nika zingisayo be kpio nika ngia “iraira” aboro, nga aguyo naraki ki kpiki mbata fu i ini gu rengo du tipa Yekova Mbori na Wiriko. Si adu ni momu ka yugopai fu agu aboro i nika zingisayo re tipa gupai Mbori aidaha na gako ringbisapai, si ki undoyo tipa i rẽ ka gbia “nyenye unga.”​—Amo. 24:15; Yo. 17:3.

18. Ginihe aboro azingo tipaha gbe?

¹⁸ Tipa gupai nga zereda du rogo zegino dunduko si naruriipa sa rimo Yekova si du ni irisiirisihe vurube gako Kindo. Rogo gi gene re, gu karagapai du tipa agu asanahe du biata rogo ga gbia kpia kparakpee nika mbisa gu bakere nyemupai nga ga aboro. Wa du rago re tie, gu kura nyanyaki apai kinaho biama rogo gu kpia kparakpee yo nga ga Yesu. Ani nika fura tipaha rogo gu kekeapai nika ye fuo gere.