1-3. Tipagine wirinarani sa adu ti ni na kido nga Yekova ima inopai tipa gaani azingo?

BANGIRI Lana agonga ti gupai namangi rogo kura uru sa Germani yo rogo 2012 te. Ri nabihe nga ri agbia karagapai kuti gari akparakpee ue. Ri akpari bambata kparakpee ti gu regbo ri adu rogo baasi nindu ku ba-tiyara yo (aéroport). Ri akpari fu Yekova ko undo ri wa ka ri tungusipai fu boro. Ri amangi gu ue kparakpee fuo da ri ba-tiyara yo na ki ini gupai nga gari tiyara andunga rogo gu uru re te ono si andu fuo girarago. Lana akpari mbiko gupai nga gu marã naadu beri aima nyasa na ba aadunga ho ka ri andu ka sungo rogoho te.

² Lana aanyasanga gu ue kparakpee te ho ri agi fugo boro ni naafura fuori ni ya, “Wai tie Lana, ginihe mo amangaha ane?” Gu paranga naafura furi re angia gu boro ri anidu na ni sukuru yo. Ko aye kuho na nako gbiati titako nga aguyo naaye ka biko wa ko aaga ku South Africa yo. Ho nako nga Elke aini gupai ni naadu tipa Lana, ri ayambu ri ri ndu ka sungo fuoyo kporo yo. Elke na nari angia wene sino aboro fu Lana na i asasana Lana na dungu asanahe tipa gari idapase na gu sunge tungusapai ti aregbo dũ ri amangaha.

 ³ Fuo rago giri wiso, fuo riyo kundo riahe, Lana akaragapai kuti dungu asanahe rogo Ziazia Kekeapai yo, ri adi gayo adresi tipa ka kedaha ku rogo gu dungurati narengbe ka undo yo. Lana aga ku kporo yo zezeredi na kini ndu ku mbatayo na gari sunge nga ga abazakigene. Ri nabihe nga “gu ko ninagia kpetambuahe!” aima mangapai kuti agu akparakpee ri amangihe.​—Tam. 65:2.

4. Gini azingo ani nika wisigopai tipaha?

⁴ Ho ani agbiatirani ni na akpakarapai ni tunguotunguoho, si arengbanga kadu furani ni kpakarapai tipa ani kparikpee te, na Yekova na ngbarago ka karagapai kuti ngbatunga agu asanahe re. (Tam. 34:15; Snz. 15:8) Ono tie, ka ani berẽkurii kpia kparakpee, ani bi gupai abi nga gu kura nyanyakipa azingo kinaho bangirani na go ago ti ni ti gu kura aregbo. Ni kpiapai, ani bingo wai du gu gaani azingo nga ga toro ni yuguyuguhe rogo gu yangara asanahe biata du rogo gu kpia kparakpee re. Na ya mo kurapai ho rengbe ani ka mangaha tipa ka raka ringbisihe na gu biama sanahe nga ga kpia kparakpee, nibipa gaani riahe nga ga uru?​—Oni gedi Matayo 6:11-​13.

5, 6. Tipagine du gu gaani sanahe nga ga riahe na nyanyakipaha ti ni ka si vura du vurũ nga ani na kina bete aũzegino berani?

⁵ Oni kparia gupai nga gere nga gu sanahe kina boro asanaha, angianga tipa kina “gimi” riahe nga ga areme ya ono tipa “gaani” riahe nga ga areme. Victor nga gu babiapai ninaata ata rogo gu kura papara Afirika aya: “Mi naatambua Yekova nga mi gbiati diare naabakanga bangirini tipa wari ani nika gbia riahe ni te, watadu ka bakabangirani nga da nika fu marã tumo bambu furani te. Awirinarani na ngerafuo rani na aˈuru dunduko. Ono gupai mi naakpara tipaha nga agu awirina naundo rani Mbori undoyo i ni sovura kuti gu zingo marã namanga yo.”

⁶ Kangia ani na riahe berani nika dia rani na dungu aˈuru, si naida ani berẽpa agu awirinarani naraka rogo rungo watadu aguyo gberãngo na gbarasipa gayo ahe. Si aidanga ani kpari kina kpee tipa yo te, ono ani mangipai kuti gu kparakpee re. Ni kpiapai, ani rengbe ka fu kina bete gu he du berani fu gu wirinarani du rogo zingo. Ani rengbe arengba a kaa fu gamahe dedede tipa gu sunge tungusapai namanga rogo zegino dunduko, na kini berẽ gupai nga i namangasunge na gu marã re ngba wene gene.​—1 Yo. 3:17.

7. Wai du Yesu afu kpiapai tipa gu gako rugute nga “ka oni wisigi nga pai tie tipa gu pai nikadu gba ya”?

⁷ Ho Yesu aafura ni tipa gaani riahe nga ga uru, si nawira wa ko aafura tipa guhe du ani na zingoho. Rogo gi gene re, ko andu ku mbatayo na sakapai tipa wai Mbori angerafuo ambumbudo na ki ya: “Ko aukadi nga roni susi gi te re? Ako oni du na toni idapase. Ka oni wísigi nga pai ki ya, . . . ‘Gini roko ani ka ukadi tirani na ni?’ ya.” Ko adigisihe na gu nyanyaki afugo du re nga: “Ka oni wisigi nga pai tie tipa gu pai nikadu gba ya.” (Mt. 6:30-​34) Gipai re nayugo gupai nga, kuba merafuo aũzegino, si naida ani rengbe kina be agu ahe du berani. Ngbatunga agu azingo re nakoda du na kporo, sunge marã tipa ka ngerafuo gaani aborokporo, na tatamana tipa ka sovura kuti agu aima nga ga kpotose. Ka si du nga kina ngbatunga agu azingo re ani nikaa kpara tipaha, gure yuguhe ayugo nga kinaha ani aberãpaha kisusi. Ani na agu azingo tirani nga ga toro nyakipaha kisusi gbe.

8. Gupai Yesu apehe tipa gaani riahe nga ga uru, si naida si tingidi rani na pa gini nyanyakipa zingo? (Oni bi gu sura du ti tonatonaha.)

⁸ Gupai Yesu apehe nga gaani riahe nga ga uru re si naida si tingidi rani na pa gu zingo du ani na ni tipa gu riahe nga ga toro. Bairarani aya: “Boro anye nga ni ungani mbiko kina riahe te, ono mbiko agu apai dunduko naye ngba Mbori yo.” (Mt. 4:4) Si naida ani  naakpara ti aregbo dunduko nga nikafu gu riahe afu furani nga ga toro ti kina regboho.

9. Rogo gini gene du gaani ingaapai wa “bape”?

⁹ Tipagine Yesu amangisunge ti ni na gu fugo nga “bape,” baraho ko afura ni kusa tipa “ingaapai”? (Mt. 6:12; Rk. 11:4) Agarã wa 60 kusayo, gi magazini re aya: “Pa inga ani kuti ga Mbori arugute nasarani ni aboro bape fuko. . . . Mbori ima rengba ka ya ani fu kina ungarani kuba gaani ingaapai. . . . Ko ima rengba ka dia gako zereda tirani kusayo, na ka ko adunga na wene pagume na ani ya. . . . Si naida ani yugu nyemuse fuko, giasangba; na ho ani aingapai ni, ani agasanga gu bape du berani nga ka kpinyemu Mbori te, mbiko Mbori aidanga na ingapai te.”​—1 Yo. 5:3.

10. Yekova rengbe ka mbupai furani riimburu ginipai, na gini bipai si aida ani du na ni tipa gipai re?

¹⁰ Gu zingo du ani na ni na aˈuru dunduko tipa i mbupai furani nayugo gupai nga kina riimburu ga Yesu motumo sa rengbe Mbori ka mbupai furani ti gaani aingapai. Wa vura duhe nga i afu gi motumo re agarã wa 2,000 kusayo, si naida ani bihe na kikiipaha wa gu gamahe fuyo ho kina areme. Gu “motumo” i afuhe tipa raka rani nga “kikiipa he” mbiko kpakpa-boro ho narengbe ka mangapai ka fu gu motumo re te. (Oni gedi Atambuahe 49:7-9; 1 Petero 1: 18, 19.) Nirengo, si aidanga ani zanga tambua Yekova tipa gi bakere gamahe re te. Na berewe a, gu fugo nga “gaani ingaapai,” angianga “gimi ingapai” ya, si naida si tingidi rani nga awirinarani dunduko naida na gi gamahe nga ga inopai re. Si tie ziazia nga, Yekova aidanga ani bakibangirani tipa kina padu ani wenengai rogo toro yo te, ono tipa akuarani a, kodihe na aguyo ingipai kuti rani. Dedede, ngbatunga agu aingapai re ni rukutuhe na si nafu momu furani ani yuguhe nzunzu nga ani nakpinyemu awirinarani na ani na nyemu ka mbupai fuyo a wa Mbori ambupai furani.​—Koro. 3:13.

11. Tipagine duhe ti ni ni nyanyakipa pai ka mbupai fu akuarani?

¹¹ Si nafu kina gberãrago nga, ani naakpi pai akpi ti kura aregbo kuti akuarani. (Pa Mot. 19:18) Ka ani fura tipa gupai re, kura aboro nangbe angbe na ani, na si ki ye na kparakaro rogo dungurati. Ka ani mbu ngbatungapai wa gure si ndu ku mbatayo, si nika yugo gupai nga ani na tambuahe tipa ga Mbori inapai gbiati motumo te. Barani idinga berewe ani gbia undo ti gu motumo nga ga Wiriko ka si du nga ani aidanga ka mbupai  fu akuarani te. (Mt. 18:35) Yesu aima sakapai ni bakerehe tipa gipai re ngbutuko fuo peko kpia kparakpee. (Oni gedi Matayo 6:14, 15.) Ni yangaraha, ka ani aida ka gbia undo be ga Mbori mbupai, si aidanga ani sa manga ingapai ni sinorani te. Zanga ani manga ingapai nandu na ani kuti gu kura sanahe.​—1 Yo. 3:4, 6.

12, 13. (a) Ginipai namangi Yesu fuo zioko bapatiza? (b) Tipagine duhe ti ni nga ka ani ti ku rogo asada, kina rani du ye he berani? (d) Pa nye Yesu ni ruruko dati kpio nayugo ginipai?

¹² Wisigo ani gupai namangi Yesu ngbutuko fuo zioko bapatiza rengbe ka undo rani ani rugutirani na pa gu ndupai si aida ani sanahe ti ni nga: “Ka mo ngbé nga fu rani ku mbata yo sa asada ya.” Ga Mbori toro angbe fu Yesu ku ngbakungbo yo. Tipagine? Tipa “Bakitingbanga asadi ko.” (Mt. 4:1; 6:13) Ya mo si naida gipai re iriwo tirani? Ka si du nga ani ima rugatirani na ndu gupai Mbori akedi Wiriko ku auru kpotosende ti ni si iriwongo tirani te. Ko aye tipa ka rugusa gupai namangi ho Adamu na Eva asogo pa ga Mbori bakere pagbia ni. Dungu asanahe aduho si aaida na gbanga regbo tipa i karagapai kutini. Ni kpiapai, ya mo Mbori akusi aboro ngba gbegberẽ gene? Ya mo si arengbe ka du taata fu rengberengbe boro ni kakuti ga Mbori bakerepa pagbia ‘gbegberẽ ko’ ki vura ni sovura kuti ni vurũ? Na ya mo aboro arengbe kadu wenengai zanga gu zogarago nga ga Mbori wa Satana apehe? (Bam. P. 3:4, 5) Si aida na regbo tipa ka karagapai kuti ngbatunga asanahe wa gure mbiko si narengbe ka yugoho fu aboro na amaraika nga Yekova namangasunge na gako bakere pagbia ngba wene gene.

¹³ Yekova ni ziazia ko, si du ko aˈasadanga boro ni mangi gbegberẽpai te. Kuba gure, Bakitingbanga du nga “Iraasada.” (Mt. 4:3) Bakitingbanga ima rengba ka ye na dungu aˈasada kuti rani. Wa vura duhe wo, boro na boro du si aida ni bihe singia ka mbu tiní ko rimisi ni ku rogo asada watadu ka ru nyanyaki. (Oni gedi Yakoba 1:13-​15.) Tipa Yesu, ko aima soga ga Satana asada kinaho nibasa ni mangako sunge na Fugo Mbori. Rogo gi gene re, Yesu akakuti ga Mbori ruru bakere pagbia. Ono Satana aambunga fuo Yesu te. Ko aguari patiko tipa wiri “toni rago.” (Rk. 4:13) Yesu aambunga gene fu Satana ko gbarasipa gako kakuti ruru mangapai te. Kristo aabi pa ga Yekova bakere pagbia na nyanyakipa ha na ko ayuguhe nga rengberengbe boro rengbe arengba kadu ni ruru ni zavura ti regbo kere aˈasada vurũ. Ono tie, Satana namanga ome tipa apefuo Yesu ni zi ti gako gbina, na si nakoda ro akoda a.

14. Ginipai si aida ani mangihe ka si du nga ani aidanga ka ti ku rogo asada te?

¹⁴ Nibi gu kango du tipa ga Mbori bakere pagbia, Yekova mbugene fu Iraasada ko mangisunge na gako zegino tipa ka asada rani. Anga Mbori naye na asada sarani te. Kuba gure, ko na kido kuti rani na ko naida ka undo rani. Ono wa vura duhe wo, ko naida ani mangisunge na gaani ranirii, na ko amanganga pai nibasa tipa ka banda rani ani zanga ti ku rogo asada te. Apai ue si a ida ani mangihe nga kaa ngera angera rogo toro yo na ki kpatagara kuti kparakpee. Yekova nakaragapai kuti gaani akparakpee wai?

15, 16. (a) Gini bete aasada duho si aida ani bandatirani behe? (b) Da si aida i bira ni ka si du nga boro ti ku rogo ingapai?

¹⁵ Yekova nafu gako ziazia toro furani nga gu rengbe ka nyakasa rani na ki undo rani ani sovura kuti aˈasada. Ko naza rani a rogo Fugoko yo na gako dungurati tipa agu apai si aida ani nehe, wa gbarasa gaani regbo ni bakerehe, marã, gbiati ome kuti agu apai anyakanga paha ya. Espen na Janne naraka rogo kumukokumuko ringara Putu yo. Tipa dungu agarã, i angia abazakigene rogo gu papara gayo ringara naadu na bakere zingo  abatungusipai rogoho. Fuo i vungu bambata wiriyo, i ambu sunge abazakigene, na i awere na ue gude beyo. Espen aya, “Ani naakpara fu Yekova dedede nga ka ani tinga ku rogo asada awere wa duhe nga ani arengbanga ka dia bakere regbo ku gene agu apai nga ga toro wa gu ani anaamangaha mbata te. Ani naasana Yekova ko undo rani ani bandapa du ani wenengai rogo toro yo na kini tungusipai zaaza.”

¹⁶ Gu kura vovo asada namanga awere ti gaani regbo re nga bi kpia kundiri aboro. Ka ani ti ku rogo ngbatunga gu asada re, si aidanga ani bira Satana te. Tipagine? Bambiko Satana na gako zegino arengbanga ka manga rani ngbaome ani mangi gupai ani aidanga na ni ya te. Gu kura aboro aima ti ku rogo ngbatunga gi asada re ni mbuyo berãyo si ni berẽ kurii gbegberẽ apai. Ono ani ima rengba ka sovura kutini, kina wai kutu awirinarani namangihe.​—1 Kor. 10:12, 13.

17. (a) Wai du rengbe ani ka raka na ngbaya na gaani sanahe tipa ka bata be gbegberẽ ko? (b) Gini undo aboro nika gbiaha barambeda?

¹⁷ Tipa gaani raka du na ngbaya dagbaha na gu sanahe nga ‘mo túka rani be gbegberẽ ko,’ ani du wa ka ani mangi ome ka zanga du “ni aboro [ga Satana] zegino.” ‘Ka nyemu [ga Satana] zegino du nga ti rani ya, na agu ahe du zegino’ a ya. (Yo. 15:19; 1 Yo. 2:15-​17) Ani nika sota asota kindi tipa ka mangaha wo. Nairiwo gu undo aboro nika gbiaha ho Yekova nika karagapai ni sa gi sanahe re ni diako Satana kusayo na ki gbarasi gako gbegberẽ zegino! Ono tie, ani du wa ka ani tingidi gupai nga, ho i aba Satana ni ngbangbaturũ yo, ko aima inoho nga kina bete regbo nye fuko. Wa duhe nga ko na bakere zinga, ko namanga bakere ome tipa ka sarani ka ani nye nga ni rururani ya. Sidu, si naida ani kpari akpara kindi tipa Mbori batasirani beko.​—Yugo. 12:12, 17.

18. Tipa ka bata ti regbo digido ga Satana zegino, ginipai si aida ani mangihe?

¹⁸ Ya mo mo nakpinyemu ngbatunga gu wene sangbanapai re? Mo ni kpari akpara tie kindi tipa ga Mbori Kindo ye ka ziasi rimo Mbori na ka sa gako pai si mangi auru kpotosende. Mo ni ngere koyo du Yekova ni kindi tipa ko fu agu ahe mo azingo tipaha rogo toro yo na rogo borose yo. Nirengo, si naida mo diberã ka raka na ngbaya na kpia kparakpee.