Agu Asanahe Ziazia Kekepai Akaragapai Kutini
Wari gbegberẽpai aye ni?
Da du na asadi tipa ko mangi gupai du ni gbegberẽhe?—Matayo 4:8-10
Dedede aboro naaida kadu na zereda dagbatiyo, ni airarengo, na ni wenesino aboro. Ono tipagine tie ani abi kina zuu, irairapai gbiati gbegberẽ mangapai ti ni? Ani naagia gbegberẽ apangbanga dedede. Ya mo boro kinaho naʹasada ka sa aboro i du ni gbegberẽ yo?—Oni gedi 1 Yoane 5:19.
Ya mo Mbori ambakadi aboro na gbegberẽpai rogoyo yo? Wagusa te, Yekova Mbori ambakadi aboro rogo kpiako yo, na gupai rogoyo yo nga i wiriki gako nyemuse. (Bambata Pai 1:27; Eyobo 34:10) Ono Mbori airisi wiri aboro ni fu ko ranirii fuyo. Ho bambata avungurani asia ka manga gbegberẽpai ni, i aká ga Mbori wene kpiapai na ki da ni aboro ingapai. Ani adi gu nyemupai nga ga manga ingapai tiyo.—Oni gedi Pa Fu Rugute ni Ue he 32:4, 5.
Ya mo gbegberẽpai nika nyeanye kindi?
Mbori naida ani ne gu gbegberẽpai du rogo rani yo re. (Asanza 27:11) Ko nayugopai furani tipa wai ka ne manga gupai du ni gbegberẽhe na wai ka ani gbia ndikidi ngbarago. Ono awere tie, ani arengbanga ka wirika ga Mbori nyemuse teketeke te.—Oni gedi Atambuahe 32:8.
Wa vura duhe nga ome gbegberẽpai ima kio awere, Mbori nambugene fuhe tipa wiri bete regbo ka sa aboro dunduko i bi gu gbegberẽ sangbanapai si aye na ni. (2 Petero 3:7-9) Ono tie, barambeda, kpotosende nika hi be agu aboro du na ngbarago na nagia sangba Mbori.—Oni gedi Atambuahe 37:9-11.
Gere Ima Rengba a ka Ngba Tiro
AGU ASANAHE BAIBIRI AKARAGAPAI KUTI NI
Ya Mo Bakitingbanga Nga Ndikidi Boro?
Ya mo Bakitingbanga gbua nga gu kungbo sino nga ga gbegberẽ mangaapai du kpoto boro yo watadu ndikidi boro du nga ko?
