1, 2. (a) Tipagine duhe ti ni ni nyanyakipa pai fu aKristano i du ni ruruyo fu Mbori, na wai du duhe na ngbaya na pa kpara ani ti rani ti zegino? (Oni bi gu sura du ti tonatonaha.) (b) Gini ahe du aboro areme ni ruruyo fuhe, ono sangbanaha rengbe kadu nga gine?

DU NI RURUSE na zanga rimisotise ku rogo biri-zogarago nga agu akpakarapai ndikidi aKristano agbiatiyo na ni angianga kina ti regbo vura sa ya. Tipagine? Bambiko agu aboro dunduko kpara gayo raka fu Yekova aima kidoko nga i nika kpinyemuko kidu ni ruruyo fuko na kini gisangbako. (1 Yo. 5:3) Ka si vura ngia ani naraka wari watadu ginipai du tipa rani vuru, si naida ani mangipai kuti ga Mbori sino ruru mangapai. Padu ani ni rururani koyo du Yekova ni na gako Kindo, paha ima nyaka kisusi kura apai dunduko. (Mt. 6:33) Gu ngbatunga padu ni ruruse re naida gupai nga ka aKristano rimisingo tiyo ku rogo agu atagbagapai nga ga gi zegino re ya.—Yes. 2:4; oni gedi Yoane 17:11, 15, 16.

² Agu aboro adu nga na ani rogo idapase ya, ima rengba ka du ni ruruyo fu gayo ringara, tunga yo, gayo sino mangapai watadu gu gayo aboro nangi kandi fu gayo ringara. Ngbatunga gu du ni  ruruse re aima sa gupai nga aboro nimangi abaangirã, sogote, na ti kura aregbo si ima ye na uka kure gbiati imo tunga aboro kusayo kpäkäyä. Gu gene aboro amangapai tipa ka mbakada agi api re ngbaha, singia ngba wene gene watadu gbegberẽ gene, ima rengba ka ye na pai kurirani watadu agumerani bambiko ani naraka kina dagba agi aboro re. Wa duhe nga Mbori ambakadi aboro na gu sino rogoyo yo nga ga rurupai, agu adiaberã airangbii adiaha ima rengba ka ba gberãrago tirani mbiko gu bipa du ani na ni nga ga rurupai na kidu ni wenehe. (Bam. P. 1:27; Pa Rug. 32:4) Wai du ani amangapai ti gu regbo re? Si ima rengba kadu furani taata ani rimisi tirani ku rogo gu vunduvunduapai nga ga zegino.

3, 4. (a) Tipagine aKristano naarimisongo tiyo ti ni ku rogo agu atagbagapai nga ga gi zegino re ya? (b) Ginipai gi kekeapai nika fura tipaha?

³ Agbia-ngbii rengbe ka manga aboro ringara ngbaome ka sa gupai nga i rimisi tiyo ku rogo agu atagbagapai na kura. Ndikidi aKristano arengbanga ka manga gipai re te. Ani arimisongo tirani ku rogo agu atagbagapai nga ga biri-zogarago te; ani asonga vura a te. (Mt. 26:52) Ani arimisongo tirani ku rogo agu abipai nga kura papara ga Satana zegino gu duho ni wenehe susi kuraha te. (2 Kor. 2:11) Ani arimisongo tirani ku rogo agu avura nga ga zegino a te mbiko ani nga aboro zegino te.—Oni gedi Yoane 15:18, 19.

⁴ Ono tie, wangia ani aboro ingapai, bete agurani kinaho rengbehe kadu furani ni kpakarapai tipa ani di agu abipai nga ga kparakaro ani adu na ni mbata kusayo. (Yere. 17:9; Ef. 4:22-24) Sidu, gi kekeapai re nika sakapai tipa gu bete bangua arugute rengbe ka undo rani ani dibe ngbatunga agu asino re. Ani nika wisigo wai a rengbe ani ka raba berãrani na sangbakpotoraniyo tipa ka du ni rururani fu ga Mbori Kindo.

5, 6. Wai du Yesu anaabi gu badungu ngbatunga aboro naadu ti ragoko, na tipagine?

⁵ Kangia mo naabaka bangiro tipa gupai rengbe mo ka mangaha ka mo gbiatiro na ngbatungapai wa gure, si adu wenengai mo sana tiro nga, ‘Ginipai ka Yesu amangihe tipa gipai re?’ Gu rikaaboro Yesu araki dagbayo i aye rogo arago ni bakiakia wa Yuda, Gariraya, Somorona na kura aba. Agu apangbanga nga ga Ziazia Kekeapai nayugo gupai nga akparakaro na atagbagapai aduadu dagba agu aboro naaraka rogo agu arago re. (Yo. 4:9) Tagbagapai anidu adu dagba aFarusi na aSadoke (Amo. 23:6-9), dagba aboro na abarogo-marã ngbeti (Mt. 9:11), dagba agu aboro nawirikipai be abayugupai na aguyo naawirikanga ha ya. (Yo. 7:49) Rogo bambata sa kama agarã, aRomo naazoga aYisaraere na aboro aima soga gayo zogarago ni kerehe. Wa vura duhe nga Yesu aima ino gu rengo du tipa apambori wenengai na ko aima ino gupai a nga bata atona yo du aYudo ni, ko aangarasanga gako abawiriki i du na sogote dagbayo te. (Yo. 4:22) Kuba gure, ko angarasi yo i kpinyemu aboro dunduko wa gayo amurakporo.—Rk. 10:27.

⁶ Tipagine Yesu aaidanga ti ni na gu sogote naadu dagba aYudo ya? Bambiko ko na Bako arimisongo tiyo ku rogo agu atagbagapai nga ga gi zegino re te. Ho Yekova ambakadi kumba na dee ni vurube Wiriko, ko aaida i hiisi kpotosende nabaha. (Bam. P. 1:27, 28) Mbori ambakadi aboro ngba gu gene rengbe yo ka vunga kura aboro na rangi kpotoyo kia. Yekova na Yesu abingo ngbatunga kura aboro, rangi kpotoyo, watadu afugo yo nga si ngba kisusi akuraha te. (Amo. 10:34, 35; Yugo. 7:9, 13, 14) Ani du wa ka ani wiriki gayo wene kpiapai.—Mt. 5:43-48.

7, 8. (a) Ginipai si aida aKristano ngbe na ni? (b) Ginipai si aida aKristano inihe tipa gbia ziga kuti agu akpakarapai nga ga aboro?

 ⁷ Ono tie, gupai sa si aida ani mangihe nga ka songoda ga Yekova bakere pagbia. Tagbagapai atona ati Edene yo ho Satana asovura ni kuti ga Yekova zogarago. Awere tie, aboro dunduko si aida i diberã singia i naida kuti Mbori nga gako gene mangapai ngba kisusi ga Satana watadu ga Satana ngba kisusi gako. Ya mo mo nangbe na Yekova ni sia mo ka irisa gako andiko kuba manga kina agu apai mo aidaha? Ya mo mo nabi gako Kindo ni yangara ziga kuti ga aboro ambugo? Watadu mo idi kuti gupai nga aboro ima rengba ka zoga tiyo wenengai?—Bam. P. 3:4, 5.

⁸ Gamo akaragapai kuti agi asanahe re nayugo wai rengbe mo ka karagapai fu boro ho ni asana ga bipai ni tipa agu atagbagapai nga ga birĩ-zogarago. Aboro birĩ-zogarago, na agu aboro namanga bakere ome tipa ariapai aima digo nisota ka gbia ziga kuti agu apai naye na kparakaro. Si ima rengba kadu nga wene ndupai kinaho i amanga gu bakere ome re ti ni. Ono wa vura duhe wo, aKristano idi kuti gupai nga kina ga Mbori Kindo sa nika ye na ziga kuti ga aboro akpakarapai na ki ye na rurupai ku auru kpotosende. Si naida ani mbu apai naabaha kina ku be Yekova. Nirengo, ka singia aKristano ni basasa nanyakasa kina pa agu apai i aberãha ya si nga wene ziga, ya mo gaani dungurati kparakanga te?

9. Gini kpakarapai naadu rogo gu dungurati naadu Korinda yo rogo bambata sa kama agarã, ono gini ziga Pauro afuhe?

⁹ Oni bingo wai aKristano amangipai rogo bambata sa kama agarã kuti pai sa nakusi kparakaro rogo dungurati. Gu kura aboro Korinda yo aya: “‘Mi nga ga Pauro boro,’ ‘Mi nga ga Aporo ko,’ ‘Mi nga ga Kefa ko,’ ‘Mi nga ga Kristo ko.’” Ka si vura du nga ginipai nakusi gipai re, Pauro adu na bakere gberãrago mbiko gu sangbanapai si aye na ni. Si du ko asanahe ti ni nga, “Kristo kparaka?” Ginihe nangia ziga kuti gu ngbatunga gbegberẽ aberã re? Pauro angarasi aKristano nga: “Awere mi zungadi roni, awirina, ni rimo gaani Gbia Yesu Kristo, ya oni mongo gumba pai sa, ka oni kparaka nga dagba roni yo ya; ono oni mongo du teketeke na berã sa na rugatinapai sa.” Areme, si aidanga kparakaro du rogo gu dungurati nga ga aKristano te.—1 Kor. 1:10-13; oni gedi ARomo 16:17, 18.

10. Gini kpiapai gu mokedi nangia Pauro afuhe fu aKristano tipa i kparatiyo ti agu atagbagapai nga ga zegino?

¹⁰ Pauro angarasi mbedimbedi aKristano i berẽpa gayo raka ku ngbangbaturũ angianga kaa berãpa agu ahe nga ga kpotosende ya. (Frp. 3:17-20) * Si aaida i mangipai wa agu amokedi namangasunge kuba Kristo. Amokedi nga ga aringara naarimisongo tiyo ku rogo agu apai nga ga agu aringara i akeda yo ku rogoho te. I ni ruruyo fu kina gayo ringara sa. (2 Kor. 5:20) Agu aKristano du na maabangirise ka raka auru kpotosende ane nga avuru ga Mbori Kindo a, si arunga fuyo i rimisi tiyo ku rogo agu atagbagapai nga ga zegino te.

11, 12. (a) Gini ngbatunga aba rengbe ka saha si du ni kpakarakpakaraha fu Kristano ni nye ni ruru ni fu ga Mbori Kindo? (b) Ginipai kura Kristano agbia tiri na ni, na wai du ri amangipai kuti ni?

¹¹ Rogo badungu aringara, aboro ringara naraka mbembedi na akurayo. I ni kodikodi yo rogo agu apai nabiyo, asinoyo, na fugoyo i abihe na nyanyakipaha. Rogo ngbatunga aba wa gure, si naida aKristano raba berãyo na sangbakpotoyo yo wenengai tipa ka karagapai ngba wene gene ho tagbagapai  akura ni si aida i songodihe. Wai du rengbe yo ka manga gipai re?

¹² Oni bingo gu kpiapai nga ga Mirjeta * na raki rogo gu papara ringara i anaayambaha nga Yugoslavia. Ri asono na gu bipai nga ka soga aboro gu ringara nga Serbia. Ho ri aini gupai ni nga Yekova akparakanga aboro te na Satana du naye na agu asogote nga ga angbatunga, ri amangi ome ka dia gu sogote re kusayo. Wa si avura duwo, ho vura nga ga angbatunga aenge ni rogo gari dagbarago, gari kuru sogote akaragatihe berewe kubaha, na ri ki bihe ni kpakarapai ka tungusapai fu aboro Serbia. Ono tie, ri aye ka ino gupai nga, si aidanga ri sungu asungo na kidu na gu maabangirise nga gu gbegberẽ berã re nika go ago nisaha te. Ri akpari fu Yekova ko undo ri tipa ri dibe gu asada re na tipa ri kiisi gari sunge ki rẽ kada nga nazakigene. Ri aya, “mi ima bi gupai nga gbe berãse kuti sunge tungusapai nga guhe naundo ni bakerehe, gene tungusapai yo, mi naasada ka wirika ga Yekova wene asino nga ga nyemuse, na mi ima bi gupai nga gimi agbegberẽ aberã ima go kusayo.”

13. (a) Gini ngbatungapai naasa gberãrago ti kura Dezire Yekova sa, ono wai du ri amangipai sa ni? (b) Ginipai ani awirikaha ti gu kpiapai nga ga Zoila?

¹³ Oni bingo kura kpiapai nga ga kura wirina nga Zoila. I avunguri Amerika yo, na ri rogo dungurati sa Putu yo. Ri abi gupai nga rogo gari dungurati, bete kura awirina nga aguyo naaye rogo gu ringara nga Mekisiko anaafura gbegberẽ bara gu rago i avunguri rogoho, gaha asino, na zavura gaha amanzigo. Kangia mo du naadu, ginipai ka mo amangihe? A wa du sino aboro, gu ngbatunga afugo re aima ba gberãrago ti Zoila. Ono gupai ngba nga, ri agbata undo be Yekova tipa ka diabe gu gbegberẽpai naasona kpotoriyo re. Ani ima inoho nga kura aboro kina dagbarani nasota kindi na ngbatunga apai wa gure. Ani aidanga ka pe gupai watadu ka manga gupai rengbe ka kusa kparakaro dagbarani te, watadu dagba kura aboro a te.—Rom. 14:19; 2 Kor. 6:3.

14. Wai du rengbe aKristano ka raba berãyo gbiati sangbakpotoyo yo nibipa gayo bipai tipa kura aboro?

¹⁴ Ya mo wai i asonosi ro watadu gu rago du mo rogoho sa ro mo nibipa ga ringara watadu dagbarago na paha kuari kisusi? Ya mo mo naberã gu ngbatunga aberã re kindi kpotoro yo? Si aidanga aKristano mbu gu bipai du yo na ni tipa kura aringara si gbarasi wai i abi kura aboro te. Ono na ka mo bi gupai nga mo gu duadu na gbegberẽ aberã tipa aboro kura ringara, agu aboro du sinoyo kia, afugo, watadu du rangi kpotoyo kia? Si adu ni wenepai ka mo berãkuriipa wai Yekova abi agu aboro nakiisopa gayo ringara na du na iraira bipai tipa kura aboro. Wisigopai tipa gipai re na gu kura ri apai ima rengba kadu ni gupai rengbe oni ka wisigopai nisase tipaha watadu ti regbo gu irisombori nga ga aborokporo. Fuani mo ki kpari fu Yekova ko undo ro mo nibi apai kina wai ko abihe.—Oni gedi ARomo 12:2.

15, 16. (a) Ginipai si aida ani inihe nibipa wai aboro nika mangapai tipa gaani padu ni ruruse fu Mbori? (b) Wai du rengbe avunguagude ka undo awiriyo tipa i dibe gu kpakarapai nabipa gayo padu ni ruruse nga ga aKristano?

¹⁵ Ku mbatayo gizo, ga Yekova amoyambu dunduko nika gbiatiyo na gupai sangbakpotoyo nika ida i mangipai kia ti agu aboro du patiyo, singia gayo abadiasunge, akurayo sukuru yo, amurakporo, agumeyo watadu kura aboro. (1 Pet. 2:19) Ono wa vura duhe wo, ani du wa ka ani mangipai kia! Ka si iriwongo tirani ka bi gupai nga zegino nika soga rani tipa gaani diaberã ya; Yesu aima pe gupai nga i nika soga rani asoga. Badungu asoga rani abingo gu kparatise nga ga aKristano kusayo ti agu tagbagaapai nga ga zegino na nyanyakipaha te. Tipa rani tigaani, ani nabihe na nyanyakipaha.

 ¹⁶ Tipa ani du ni ruru rani fu Yekova, si naida ani ru nyanyaki ho ani agbiatirani ni na kerepai. (Dan. 3:16-18) Aboro dunduko nagunde be aboro, ono paranga aboro gbe duhe fuyo ni kpakarapai ka mangapai kia ti kura aboro. Kangia awiro nagbiatiyo na gu kpakarapai du wa iriso bendeere watadu agu aʹuru ongoda nga ga ringara, si naida mo undo yo. Oni mangisunge na gu regbo nga ga gu Irisombori Nga ga Aborokporo tipa ka undo yo i inipai tipa gipai re wa ka i ruho ka diabe agu akpakarapai re zanga gunde. Oni undo yo i fura tipa gupai i naidi kutini zanga gunde ono na irisa. (Rom. 1:16) Tipa ka undo awiro, mo ima rengba ka fura na gayo bayugupai tipa gipai re ka si aidaha wo.

17. Gini sino si aida ani sogoho, na tipagine?

¹⁷ Kina rengo du nga ani ima rengba kadu na nyemu gu ringara i asonosi rani rogoho, asinoho, afugoho, na gu riahe du rogoho. Ono tie, si naida ani sogo gu sino nga “kina gimi ngba.” Yekova akusi ahe dunduko ni bakiakia tipa ka fu ngbarago furani. (Tam. 104:24; Yugo. 4:11) Tipagine tie rengbe ani ka kakuti gupai ti ni nga gene manga kurapai sa ngba kisusi kuraha?

18. Ka ani du na gu bipai nga ga Yekova, wai du rengbehe ka ye na maku?

¹⁸ Mbori naida ngbatunga aboro dunduko gbia ndikidi inohe nga ga rengo na ki gbia nyenye unga. (Yo. 3:16; 1 Tim. 2:3, 4) Dia gu wene abipai nga ga kura aboro kugume nasarani ani du na inohe na kini banda gaani kpamiatise nga ga aKristano. Tipa ani kakuti gaani padu ni ruruse fu Yekova, si naida ani zanga rimiso tirani ku rogo agu atagbagapai nga ga zegino. Ani aranga ni gorani fu kura aboro ka songoda yo te. Nairiwo wai ani atambua Yekova tipa batasa ko rani be agu asino nga ga sogote, rukö, na gu mangapai nga ga abaangirã hi rogo gi ga Satana zegino re! Ani dinga berã adia ka sonosa gu sino nga ga zereda wa gu bake atambuahe apehe nga: “Oni ngére, nga gu wenepai na wenerago a ka awirina sungu sa na berã sa!”—Tam. 133:1.