Paul du na diako gbiati awiriko ue aya, “Fuo geno ahe dakpa kuari rogo gaani ringara, geno riahe aima dakpa ni kerehe. Ani anaaru ti gene tenge tipa dungu asa, kurii agi apai re dunduko, riahe anaanyasa mbata fu ani ngbehe. Aboro augudi ni kerehe be gomoro, aguyo ki tona ka kpiko bangiri agene. Geno rukutu ahe adakpa ni kerehe kuti amirioni na abirioni. Ni yangaraha, gu marã du rogo gaani ringara sunge aadunga ti ni berewe te. Pa gu marã naadu bere baigo marã yo agberẽ gbiati gi makafa.”

Paul aima ino gupai nga tipa gako aborokporo bati, si nika ida ko mangipai na “ndikidi tatamana.” (Asanza 3:21) Ko aya, “Mi namangasunge na karaba, ono mi atona ka manga ai gu sunge mi ani bihe, na kini zi marã kusende ti gu mi anaazio ho. Kura aboro anaafu riahe fere kuba gu sunge mi animangihe watadu aũkporo. Kura regbo adu kinaho i ki tumo re na kpuro sazundu biama, mi abagi gu ue na ki mangisunge na gu ue. Ni yangaraha, mi agbia wiri akondo 40. Ho ami asono ni, mi abagi ra na ki ngbe agura 300 berewe. Kusa, mi afu akondo 50 tipa boro fu ngungo fere nga akiro 50. Gu ngungo re aundo re tipa gbanga regbo na gimi aborokporo na mi ki undo kura aboro na ni a.”

Paul aima ino gupai a nga, gu nyanyakipai si aida boro mangihe nga ka kido kuti Mbori. Ho ani amanga gupai ni Mbori azinahe tipaha, ko naundo rani aundo. Nibipa gbia agu ahe ani aidaha tipa tirani, Yesu aya: “Ka oni sáki nga pa ha kpotoroni yo ya. Bambiko . . . Baroni ini he ya oni nara mbiko agi ahe re.”—Ruka 12:29-31.

Si naba kina gberãrago tie nga, gu bakere vura Mbori nga Satana ima nanga dungu aboro rogo zegino i ni bakibangiriyo tipa kina aũzegino. Aboro nabakabangiriyo ni kerehe tipa agu ahe du yo na zingoho, na agu i maa kina kpiaha ku berãyo yo, na kini mangi bakere ome tipa ka gbia agu ahe adunga yo nzunzu na zingoho ya. Dungu aboro narimiso tiyo ku rogo bape, na kini da nga “kanga fu bafubape.”—Asanza 22:7.

 Kura aboro namanga gbegberẽ adiaberã. Paul aya, “Dungu aboro ambu gayo aborokporo gbiati abakureayo tipa ka ‘gbata wene raka’ gii ngbi yo. Aguyo anaamerã zanga wene awaraga nga ga ta beyo na ka i agbianga sunge ya. Wo i anaagbiatiyo dedede na akpakarapai na kini gbuku be aborisi na kini piki bangiri agene. I aafunga momu fu Mbori tipa ko undo yo te. Ono mbiko ga Mbori undo, ani adiberã tipa ka sovura kuti zingo marã wa sa wa aborokporo.”

Paul ape kurapai nga: “Yesu aya: ‘Ka oni wisigi nga pai tie tipa gu pai nikadu gba ya; bambiko kina gba nikawisiga pai tipa ha ni saha. Gu gbegberepai nga ga gu rago kina ha rengbe tipa ha.’ Gupai mi anaakpara tipaha aningia Mbori fu ‘gaani riahe fu rani areme’ wa ka ani ruho ka raka. Na ko aima undo rani, a wa Yesu kidohe tipaha. Ani anaagbianga kina gu he ani aidaha dedede te. Rogo gu kura uru sa, mi aru ti genetenge aboro aru ti ni tipa ka ngbe riahe. Ho mi ada ni mbatayo, gu he mi agbiaha angia kina kputakputa mamunyaa. Mi naaidanga na ni te. Ono si angia riahe, sidu, ani ari kina kputakputa mamunyaa rogo gu yuru re. Mi na tambua Mbori tipa undo ko re vuru gu regbo re nabaha mbiko gimi aborokporo aaranga na gomoro rogo uru sa te.” *

“Marã gu duadu berani awere. Ono nibi gupai namangi rani, ani bihe nga gu wene ziga du tipa bakabangirise nga kido kuti Mbori. Yekova * dedede rengbe ka undo rani ka si du nga ani namanga gupai ko akpinyemuhe. Ani ima bi afugo Atambuahe 34:8 si ni dati rengo nga: ‘Oni ía Yekova ka bi ko ko du ni wene ko! Boro maku nga gu ni ninafu tini ku be ko!’ Ni sangbana gipai re, ani agundenga be gu kpakarapai nga ga marã rengbe ka gbia rani berewe te.

“Ani ima rugatirani awere na gupai nzunzu nga, gu he aboro aidaha tipa ka bata, anga si nga sunge, watadu marã te, ono riahe. Ani napido gu regbo na nyemuhe ho ga Mbori akidohe nika digiso tihe ni naya: ‘Zende ahe zúku rogo ringara kpaima.’ Ono wa du rago re, ‘du ani na riahe na roko si rengbe fu rani.’ Ani nagbia ngarasaro be agu afugo Ziazia Kekeapai naya: ‘Ka oni dú nga ni akanga fu nyemu marã ya; agu ahe du be roni si ki rengbe bangironi, bambiko ko aya tigako, “Mi ahe nga unda ro wa sa te, mi ambú nga ro a wa sa te.” Si du ani aerã ti ni wenengaĩ ki ya, “Gbia nga gimi mounda; mi agúnde nga wa sa te.”’” *

Si naida na ndikidi idapase tipa ka ‘ta na Mbori’ a wa Paul na gako aborokporo amangihe. (Bambata Pai 6:9) Si ngia ani awere na kpakarapai nga ga marã watadu si agbia rani ku mbatayo, gu ga Paul kpiapai nga ga idapase re gbiati tatamana nayugo nyanyakipa pai furani.

Ono na ka singia agu akpakarapai nga ga aborokporo naye na kina bakabangirise furani?