1, 2. Ginipai ga Yekova aboro aima digo nimangihe?

GA YEKOVA amoyambu aima digo nisungudi pa bi ga Mbori sangbaanebi si nidigisitihe. Ni kpiapai, Yeremaya apepai ni sangbaanebi nga i nika gbarasa Yuda, na gere nga gupai namangi ho aBabero agbarasihe ni rogo gu garã nangia 607 M.B.K. (Yere. 25:8-11) Ga Mbori toro adu kugii Yesaya ko pepai tipa ku mbatayo nga Yekova nika karaga aYisaraere berewe ku rogo gayo ringara ki ya: “Maku du fu agu yo dunduko nasunguda ko.” (Yes. 30:18) Mika gako sangbanebi afura a tipa ga Mbori aboro naadu mbata aya: “Mi angéra koyo du Yekova ni.” (Mika 7:7) Tipa dungu kama agarã, ga Mbori amoyambu aima digo nisungudi ka bi wai gu sangbanebi naadu tipa Masiya watadu Kristo nika digiso tihe.​—Rk. 3:15; 1 Pet. 1:10-​12. *

² Gu ga Mbori amoyambu a du ti gaani regbo re aima digo nisungudi ka bi wai gu kura sangbaanebi du tipa Masiya nika digiso tihe. Vurube ga Masiya Kindo, Yekova nika nyasariipa gu gbegberẽ apai narungosi aboro na ki batasi gako aboro be gi zegino du tiibe Satana re. (1 Yo. 5:19) Sidu tie, si naida ani naangera  angera kindi na kidu na rubangirise nga gi zegino re ima mbeda ka digo.

3. Gini sanahe rengbe ka kura ka si du nga ani ima pido pa digo zegino tipa gbanga regbo?

³ Wangia ani ga Yekova amoyambu, ani na nyemu ka bi gupai Mbori akpinyemuhe si ‘nimángi rogo kpotosende wa duhe ngbangbaturũ yo.’ (Mt. 6:10) Ono tie, fuo dungu aboro bihe nga gi zegino re nadia regbo ni gbangaha zanga si digi, i tona ka bakabangiriyo nga, ‘Ya mo wene nduapai ho tipa ka nye kuti sungudo pada gu uru re?’ Ani wisigingo pai tipaha.

4. Gini bambata ndupai nasarani ani ngere angera kindi?

⁴ Ziazia Kekeapai nangarasa rani nga ani du na ruru bipai tipa gu gbarasahe nika manga ku mbatayo rogo gi zegino re. Yesu aya fu apefuoko wẽ “oni ngére tie.” (Mt. 24:42; Rk. 21:34-​36) Gere nisaha nga wene ndupai tipa ani sungudihe, mbiko si nga gupai Yesu aya ani mangihe! Nibi gipai re, ga Yekova riigbu nga wene kpiapai. Agu awaraga si akusaha aima digo ni ngarasi rani ani “ngere tipa ye gu uru nga ga Mbori” na kini moibangirani kuti gu ga Mbori kidohe nga ga vovo zegino.​—Oni gedi 2 Petero 3:11-13.

5. Tipagine duhe ti ni furani ni nyanyakipa pai ani ningere ti gi gaani regbo re?

⁵ Wa vura duhe nga si adu ni wenepai fu aKristano i sungudi pa digo zegino kama agarã kusayo, si a na nyanyakipaha furani areme. Tipagine? Mbiko ani naraka ti gu regbo Kristo azogarago ti ni. Gu kpiapai nayugopa du ko na ome kindo beko atona rogo gu garã nangia 1914. Na pa gberã apai kina ku mbatayo gbiati pa tungusapa Kindo, nga agu apai nayugo gupai nga ani naraka ti “digida rago.” (Mt. 24:3, 7-14) Wa duhe nga Yesu ayugongo pa wai gu bagizo regbo re nika du mbata fu digido zegino da te, si naida ani du na rubangirise na kini ngere angera kindi.

6. Tipagine si aida ani du ti ni na kido nga apai nika gberã kina ku mbatayo wa ani ambeda kuti digido zegino?

⁶ Ani ima rengbe ka sanahe nga: Ya mo anga gi “digida rago” re nafura tipa gu regbo ku mbatayo si adu nga agu apai du rogo zegino nikaa gberã kina ku mbatayo te? Ziazia Kekeapai nayugo gupai nga gbegberẽ apai nikaa maapai rogo “kusa rago.” (2 Tim. 3:1, 13; Mt. 24:21; Yugo. 12:12) Sidu, si naida ani ini gupai nga agu apai namanga rogo zegino awere nikaa gberã kina ku mbatayo kisusi.

7. Ginipai Matayo 24:37-​39 ayugoho tipa agu apai du rogo zegino rogo yangara arame?

⁷ Ono oni naberãha nga apai nika gberã ki da wai mbata fu “bakere gberãngbi” da? (Yugo. 7:14) Ni kpiapai, ya mo oni namaa berãroni nga avura nika manga rogo aringara dunduko, ka aboro dunduko adu nga na riahe ya, na akaza ki ni mangi rogo angbadimo akporo dũ? Ti agu aregbo re, zavura agu aboro ni naati kango Ziazia Kekeapai nika ida kuti gupai nga gu sangbaanebi nga ga Ziazia Kekeapai nadigiso tihe. Ono tie, Yesu aya dungu aboro nika ‘inongo’ padu ko na ome kindo beko ya, i nika manga kina agu apai ngbatiyo rogo raka yo daho regbo ka digo ni. (Oni gedi Matayo 24:37-39.) Sidu, Ziazia Kekeapai ayugongo gupai nga sino raka nika gberã rogo yangara areme kisusi asusa tipa ka sa aboro ngbaome i idi kuti gupai nga digido raka nambeda kada te.​—Rk. 17:20; 2 Pet. 3:3, 4.

8. Gini gopai du gbaiga fu agu aboro nairisa gu ga Yesu zinahe du tipa “ngera” angera kindi?

⁸ Ono tipa agu aboro nadigi niirisi ga Yesu arugute idi kuti agi akpiapai re, i ima  inoho nga si du wa ka si digisitihe gbaiga ngba gu gene nika gbeberãyo i ‘ningere’ angera. (Mt. 24:27, 42) Na gere nga gupai natona ka manga tona rogo 1914. Natona ti gu regbo re ka ndu ku mbatayo, apapara agu akpiapai nayugo padu Kristo na ome kindo beko aima digo ni digisitihe. Nirengo, ani naraka awere rogo “digida rago” nga gu guru regbo nandu kuti digido gi gbegberẽ zegino re tipa i gbarasihe.

9. Gini nduapai nasarani ani nye kaa sungudo pa digido gi zegino re?

⁹ Ono tipagine tie si aida aKristano sungudihe ti ni? Ani nasungodo ho mbiko gure nayugo gaani giasangba fu Yesu Kristo. Na ani ima rugatirani a na pa gupai nga Kristo awere na nazogarago. Gu maabangirise du ani na ni, anga mburuhe ri gu kungbopai gbua idi ani he te, ono mburuhe rii gu gopai du rogo Ziazia Kekeapai nga gu nasarani ani nye ka ngera angera kindi wa ani asungodo gi gbegberẽ zegino re si digi.

10, 11. (a) Ginipai Yesu ambakadi gako abawiriki tipaha? (b) Ginipai Yesu apehe fu apefuoko i mangihe ka si adu nga i sungudi pa digido zegino tipa gbanga regbo ka si adanga ya? (Oni bi gu sura du ti tonatonaha.)

¹⁰ Agurani kinaho naima digo ningere rogo toro yo tipa dungu agarã. Ono tie, si aidanga ani mbupa ima digido zegino si rungburasi rani rogo toro yo ani ki mbu sungudo ho te. Ani mbakaditirani na kini pidi pada Yesu nga gu boro nika gbarasa gi gbegberẽ zegino re. Oni tingidi gupai nga Yesu angarasi apefuoko ki ya: “Oni bánda tironi abanda, oni ngére angera ki nikpari; bambiko oni aina nga ragoho te. Si wa ka boro nye rogo kura ringara, ni naguari kpuni ki asia paha fu gani aboro sunge, ki kparaka sunge fu yo ni ba sa sa, ki ya fu sungudi ngbadimo ni ningere angera. Oni ngére a wo, bambiko oni aina nga ni gu rago irakporo ka yega te, ka ni yega a nyemu na bebere yuru, na ho kondo nakua ni, a wiso a - ko ka tunguo roni atunguo oni ra ara. Gu pai mi agumba fu roni kina ha mi agumba fu aboro dũ, oni ngére angera.”​—Mk. 13:33-​37.

¹¹ Fuo apefuo Yesu ini gupai nga Kristo ima tona ka zogarago rogo 1914, i ambakaditiyo nibasa mbiko i aaberãha nga digido zegino nika da ti gu regbo re. I amangihe wo ni kiiso yo gayo sunge tungusapai. Yesu ayugu gupai nga ko nika ye ‘nyemu na ho kondo nakua ni.’ Ginipai ka gako abawiriki arengbe ka mangaha ka si adu nga gipai re mangi? Ko aya fuyo: “Oni ngére” angera. Pa ima digido rago koyo aarengbanga ka sayo i mbu berãpaha riyo yo wagusa te.

12. Ginihe Abakuka asana Yekova tipaha, na wai du Mbori akaragapai fuko?

¹² Ani bingo gupai naadu tipa gu nebi nangia Abakuka Mbori afu sunge fuko ko ndu ka pe pa gbarasa Yerusarema ku mbatayo. Ti gu regbo ko ada yo, aboro aima inopai tipa gu zahe naadu tipa gbarasa gu gbata re tipa dungu agarã. Apai aima da kuti gu bangiriba nga ‘gbegberẽ aboro ake pati ruru yo kirikiri, na pa sarangbanga ki da ni irairaha.’ Sidu, si airiwonga ka bi gupai nga Abakuka asanahe ki ya: “Ako Yekova, mi ka akpara ni gbanga ha waĩ tipa undahe”? Kuba gupai nga Yekova karagapai kuti gi sanahe re nibasa, ko akido gi ruru nebi re nga gu pa gbarasahe ko afuraha tipaha re, “si aíma nga te.” Mbori aya fu Abakuka wẽ “mo súngudi he.”​—Oni gedi Abakuka 1:1-4; 2:3.

13. Gini berãpai ka Abakuka arengbe kadu na ni, na tipagine ka si arengbe ti ni kadu ni pa zanga tatamana?

¹³ Oni berẽnga gupai nga ka Abakuka ada  na gberãrago na ki berẽ gupai nga: ‘Mi aima digo nigipa gbarasa Yerusarema tipa dungu agarã. Na ka si du nga regboho ata mbedanga te? Rẽnga ha mi ni tungusipa ha wa ka i ya i nika gbarasa gi gbata re barambeda te. Mi nika mbuhe fu kura aboro.’ Ka Abakuka atona ka berã ngbatunga agu aberã re, ka gu pagume naadu dagbako na Yekova aima gberã, na ka pa gako raka agberẽ agbera ho ka aBabero agbarasi Yerusarema ni!

14. Tipagine rengbe ani ti ni kadu na kido nga ka ani moi bangirani tipa digido zegino, ani adunga na gberãrago te?

¹⁴ Rogo vovo zegino, ani aduadu na ndupai berãni tipa ka berãkuriipa agu agopai dunduko naadu tipa digido zegino nga si aima manga nirengo. Berãkurii wai apai amanga rengbe ka nyakasa gaani kido kuti Yekova gbiati gu gako akidohe ata manganga ya. (Oni gedi Yosua 23:14.) Ani nika du na ngbarago tipa Mbori nga gu boro ‘ini rago ahe na regbo na gako tandu,’ ko nazungodi rani ani raki na rubangirise mbiko “digida apai dunduko nambeda.”​—Amo. 1:7; 1 Pet. 4:7.

15, 16. Tipagine du he ti ni nga tungusapai zaaza nga gu wenepai rengbe ani ka mangaha awere?

¹⁵ Si naida ani du na maabangirise nga ga Yekova riigbu nikaa aundo rani aundo tipa kaa tingida rani na agu apai nga si naida ani ta raka kini mangisunge fu Mbori. Anga agi atingidapai re gbua tipa ka sarani ani mangisunge fu Mbori ti aregbo dunduko te, ono si tipa ka undo rani ani ini gupai nga agu apai nayugo padu Kristo awere na ome Kindo beko nadigiso tihe. Gini wene gene rengbe ani ngbaha ka mangapai kuti gu regbo ani araka ti ni awere? Nirengo, ani du si abi rani tipa ani gbata ga Mbori Ngbi na gako rurupai ni tungusa ani wene pangbanga zaaza.​—Mt. 6:33; Mk. 13:10.

¹⁶ Wirinarani sa ni dee aya: “Ka ani atungusapai tipa ga Mbori Kindo, ani rengbe ka batasa aboro be gu kere kpio rengbe ka ye ku mbatayo.” Ri ima ino gupai du tipa batasa aboro, mbiko ri na kumbari abati ti gu regbo gu kurungba rimoho angia Wilhelm Gustloff arindo rogo gu garã nangia 1945. Zavura ti gu kere regbo re, boro ima rengba kadu na iraira biapai tipa guhe nyakipaha. Gu wirinarani re atingidipa gu dee naata ngbari nga: “Gimi mangu! Gimi mangu! Gimi afongo! Gimi afongo naabaha ima nye vuru kurungba yo. Pa gimi ahe dunduko ima gberã!” Ono tipa gu kura aboro tigayo, i amangi ome tipa ka maa gayo raka ngbapai tipa ka batasa agu aboro naati ku rogo kere zezere ime. A wa agu aboro re  amangihe, kinawo du ani amanga ome tipa ka batasa aboro. Si naida ani tungusipai ni ipo ka undo kura aboro i bati be gu gbarasahe nika manga ku mbata barambeda.

17. Gini nduapai du berani tipa ka ida kuti gupai nga digido gi zegino re rengbe ka ye wa ikpirogumba?

¹⁷ Agu apai namanga rogo zegino nayugo gupai ziazia nga agu asangbanebi nga ga Ziazia Kekeapai nadigiso tihe na digido gi zegino re ima mbeda kada. Sidu, si aidanga ani berẽ gupai nga bakere regbo gu nyeanye koyo kindi tipa gu “nyarinde” du na ‘gbangaru bawe’ du paru rogo Yugoti 17:16 gbarasi Babera Duna Bakere Ome Ti Ni nga bariwara ngbii zire pambori gi zegino re te. Si naida ani tingidi gupai nga ‘Mbori amaa sangbako ku kpotoru yo’ tipa u mangi gipai re na gipai re ima rengba ka manga wa ikpirogumba! (Yugo. 17:17) Imanga pa da digido gi zegino re berewe te. Wene ndupai kinaho si aida ani degeturani ti ni kuti gu zahe Yesu fuhe ki ya: “Oni bánda tironi, oni ka hisa kpotoroniyo na bakere riahe, na kpibuda, na berãpa gi unga re, gu rago ki da re nibasa wa kina gbina naza.’’ (Rk. 21:34, 35; Yugo. 16:15) Ani dinga berã adia awere tipa ka mangasunge fu Yekova zaaza na ki du na kido nga ko “namanga pai fu agu yo nasunguda pa” ko.​—Yes. 64:4.

18. Gini sanahe ani nika sakapai tipaha rogo gu kekeapai ngbefuo gere?

¹⁸ Wa ani apido gi zegino re si digi, si naida ani degeturani adega kuti agu afugo gu bawiriki nangia Yuda, si naya: “Abadiangba, oni ta sonosa tironi rogo gaoni ziazia idapase, nikpari rogo Ziazia Toro yo, oni bánda tironi rogo ga Mbori nyemuse yo, ki ningere fuo ga gaani Gbia Yesu Kristo inapai sa nyenye unga.” (Yuda  20, 21) Ono wai du rengbe ani ka yugoho nga ani nasungudo ga Mbori kidohe tipa vovo zegino na ani nangera ku mbatayo tipaha? Gere ni kangia gu riipai ani nika wisigopai tipaha rogo gu kekeapai ngbefuo gere.