1, 2. (a) Gini ngbatunga amaku mo angera tipaha ku mbatayo rogo Paradizo? (Oni bi gu sura du ti tonatonaha.) (b) Gini amaku nga ga toro nika du rogo vovo zegino?

“NDIKIDI UNGA.” Tipa dungu rani, gu fugo re naye na gupai kurirani yo nga ga nyenye unga rogo Paradizo auru kpotosende ane. Nirengo, gu mokedi nangia Pauro aringbisi “nyenye unga” na “ndikidi unga.” (Oni gedi 1 Timoteo 6:12, 19.) Ani namaabangirani tipa gu unga digidoho nika dunga ti ni ya, na si nika ye na bakere ngbarago furani. Si ima kpakara ka ino wai ani kadu rogo aʹuru ni basasa na wene kpotorani, gbiati berãrani. (Yes. 35:​5, 6) Oni berẽnga kina wai ani kadu na ngbarago tipa kaa kodatirani na abakurearani kodihe na aguyo i nika zingisayo! (Yo. 5:28, 29; Amo. 24:15) Ani nika du a na momu tipa ka kiiso gaani inohe rogo birĩ-inohe, manzigo, meka abambu, watadu gu kura apai.

² Wa ani angera ku mbatayo tipa gu weneapai nika manga re, gu bambata maku ani ka gbiaha rogo vovo zegino nika ngia gu maku nga ga toro. Nairiwo gu bakere ngbarago ani kadu na ni tipa ka ino gupai nga rimo Yekova gbiati gako bakere pagbia aima du ni taasitaasi he! (Mt. 6:9, 10) Ani adu na ngbarago ka bi ga Yekova bambata ringbisapai tipa aboro na kpotosende si nidigisitihe. Na oni berẽnga kina wai apai nika du taata tipa ani mbedi na  Yekova ho ani nika da ni ni rengberengbe rani!​—Tam. 73:28; Yak. 4:8.

3. Ginihe si aida ani mbakaditirani tipaha awere?

³ Agu amaku re ima rengba kadu nga gaani mbiko Yesu akido rani nga Mbori rengbe ka manga “apai amanga dunduko.” (Mt. 19:25, 26) Ono ka ani aberãpa raka rogo vovo zegino na kaa raka araka kindi tii ga Kristo Zogarago Tipa Agarã Kutu, ani du wa ka ani mangipai awere tipa ka “nye anye” na nyenye unga. Si naida ani sungudi pa digo gi gbegberẽ zegino re, na si naida ani mangi wene diandue tona kina awere tipa ka mbakadatirani tipa ka raka rogo vovo zegino. Wai du rengbe ani ka manga gipai re wa ani araka rogo gi gbegberẽ zegino re?

4. Oni funga gu kpiapai nayugo wai rengbe ani ka mbakadatirani tipa raka rogo vovo zegino.

⁴ Wai rengbe ani ka mbakadatirani awere tipa raka rogo ga Mbori vovo zegino? Ani yanga oni naberãpa ga ku rogo gu kura ringara. Wai rengbe oni ka mbakada tironi tipa gu ariapai re? Oni ima rengba ka tona ka wirika fugo agu aboro naraka yo. Ka wirikapai tipa gayo wene asino. Ka tona ka ri gayo ngbatunga ariahe. Na oni ima rengba ka tona ka raka si kidu wa i asonosi roni kina rogo gu ringara re. Nirengo, gere nga gu raka ani amaabangirani tipa ka rakaha rogo gu ringara re. Wakina gure a, ani ima rengba ka tona ka mbakadatirani tipa raka ku rogo vovo zegino kina awere, na kini bi tirani wa ani naraka kina rogoho. Nibi gipai re, ani bingo gu kura kpiapai naye re.

5, 6. Wai du rengbe rafu agu arugapai nga ga siokrasia ka undo rani ani rẽ tipa raka rogo vovo zegino?

⁵ Rogo vovo zegino, ga Mbori bakere pagbia nika du ni ba tumbatumbaha. Nairiwo gu wene ongoda ani ka gbiaha be gu kere zogarago du tii be Satana rogo gi zegino re! Kura aboro nabi ranirii gbiati gu bipai nga kina gimi ngba ni agu apai agberãnga ya, ono ginipai agi apai re aye na ni? Zanga dia ga Mbori arugapai kugume aye na kina rungo, gberãrago, gbiati kereapai. (Yere. 10:23) Nangba wai ani angera ku mbatayo ho aboro dunduko ka raka ni kutii ga Yekova bakere pagbia!

⁶ Si adu ni pa ngbarago kadu tii ga Yekova mbakadapai rogo vovo zegino wa ani ka manga ome tipa ka sa kpotosende si da ni bawenehe, ka yugopai fu agu aboro i nika zingisayo, na kini mangi gupai Yekova akpinyemuhe tipa aboro. Ono ginipai rengbe ka manga ka si du nga i fu gu sunge furani ani aidanga na ni ya? Ya mo ani amanga ome tipa ka mangasunge na agu arugute i nika fuhe furani tipa gu sunge re na ki mangi gu sunge re na ngbarago? Dungu rani rengbe ka karagapai nga ii! Sidu, ya mo ani nara ni gorani fu agu arugute nga ga siokrasia awere? Ka si du nga ani namangaha wo, gure nga ani nambakada tirani tipa ka raka tii ga Yekova zogarago.

7, 8. (a) Tipagine si aida ani sonosi gu sino nga ga giatise ti ni? (b) Gini aʹariapai mangi fu kura aKristano? (d) Ginipai si aida ani du na kido tipaha nibipa raka rogo vovo zegino?

⁷ Anga kina ra ni gorani fu ga Yekova mbakadapai awere rengbe ka mbakada rani tipa ani rẽ ka raka rogo vovo zegino te, ono si naida ani mangi ome awere tipa ka sonosa gu sino nga ga rengba be apai gbiati giatise. Ka ani aagia tirani na agu aboro nangbembatayo rogo apai areme, na kini gbia ngbarago rogo gu vovo sunge ani nagbiaha, si nawira wa kina gu bangisa sino re nika du tirani rogo vovo zegino. (Oni gedi AEbere 13:17.) Rogo Ringara Mokido, i akparaka ũkumbo fu aYisaraere ringbisihe na bangeyo. (Geda 26:52-56; Yos. 14:1, 2) Areme, nirengo, ani ainongo gu ba i nika ya furani ani raki rogoho  rogo vovo zegino te. Ono tie, giatise nika sarani ani du na ngbarago wa ani amanga gupai Mbori akpinyemuhe rogo agu aba ani nika raka rogoho auru kpotosende.

⁸ Gu momu ani ka gbiaha nga ka raka tii ga Mbori Kindo, paha ima nyaka kisusi gu ome ani amangaha tipa ka giatirani na ga Yekova riigbu na kini mangi agu asunge i fuhe furani nga ga siokrasia. Nirengo, agu apai du tipa rani ima rengba ka ariatihe wa regbo kaa ndu. Ni kpiapai, bete aboro Betere Amerika yo agbia vovo sunge nga ka mbu sunge Betere ka ndu ka tungusapai na i nagbia bakere amaku awere rogo gu vovo sunge re. Gu kura awirina naaningia agu ababiapai nata ata ima da ni abazakigene mbiko wa garãyo niima nge watadu mbiko gu kura apai. Ka ani du na gu sino nga ga rengba be apai, kpara fu Mbori, na kini mangi ome tipa gako sunge, ani nika gbia ngbarago na bakere amaku zavura rogo gi kere zegino ani araka rogoho re. (Oni gedi Asanza 10:22.) Na ginipai du tipa gu gaani maabangirise du ku mbatayo? Si rengbe kadu nga ani naberã aberã tipa wari ani aida ka raka ni rogo vovo zegino, ono i ima rengba ka sana rani ani ndu ka raka rogo gu kura ba kia. Ka si vura du nga ani sungu rogo gu kura ba kia na kini mangisunge fu Mbori, ani nika duadu na tambuahe na ngbarago na kini bi gu ba re ni bawenehe.​—Nem. 8:10.

9, 10. (a) Gini abangiriaba si nika ida ani yugu gaani zerangbaduse rogoho rogo vovo zegino? (b) Wai rengbe ani ka yugo na ni nga ani na zerangbaduse?

⁹ Rogo vovo zegino, kura aregbo kinaho si nika ida ani mangipai na zerangbaduse. Ni kpiapai, ani nika gia gupai agia nga gu kura aboro na ngbarago mbiko gumeyo ima zinga be kpio. Ono tie, si aida aida ani pidi tipa i zingisi gumerani. Ka pai mangi wa gure, ya mo ani adu na ngbarago na agu boro re na ki du na zerangbaduse? (Rom. 12:15) Ka ani wiriki kadu na zerangbaduse tipa digisidigisi ga Yekova akidohe awere, si nika undo rani ani du na zerangbaduse a ti gu regbo re.​—Batu. 7:8.

¹⁰ Ani ima rengba ka mbakadatirani a tipa raka rogo vovo zegino ni du ani na zerangbaduse nibipa agu arengo nakura. Ya mo ani nawisigo Fugo Mbori kakaka na ki du na zerangbaduse tipa ka sungudo gaani giarogopaiyo tipa agu arengo nga ga Ziazia Kekeapai si ziasi tihe? Ka ya wo du, ani adunga na kpakarapai tipa kadu na zerangbaduse rogo vovo zegino wa Yekova nikaa yugo gupai ko akpinyemuhe tipa aboro te.​—Snz. 4:18; Yo. 16:12.

11. Ginipai Yekova ayugoho awere furani tipa gu pagume nika du dagba aboro, na gini undo ani ka gbiaha ti ni rogo vovo zegino?

¹¹ Gu kura sino rengbe ka sarani ani rẽ tipa ka raka rogo vovo zegino si nga mbupai fu kura aboro. Ti regbo ga Yesu Zogarago Tipa Agarã Kutu, si adia regbo adia tipa ruru aboro na gbegberẽ aboro di sino zangarengba tiyo kusayo. (Amo. 24:15) Ya mo ani amangapai na akuarani rogo nyemuse ti gu regbo re? Ka ani wiriki ka mbupai fu akuarani ngbaduraniyo, na ki zanga du na akpakarapai dagbarani awere, si aduadu taata furani tipa ani mangihe wo a ti gu regbo re.​—Oni gedi AKorosaio 3:12-14.

12. Gini asino si aida ani du na ni awere nga gu nika undo rani ku mbatayo?

¹² Rogo vovo zegino, ani agbianga agu ahe ani aidaha ti kina gu regbo ani aidaha ti ni te. Kuba gure, si nika ida ani du na tambuahe na ki rengbe kina be agu apai nika du berani wa ani ka gbia undo ti rafu ga Yekova bakere pagbia. Gere du nga manga agu asino Yekova ayugoho furani awere. Ka ani awirika ka raka awere wai ani nika raka yo, gure nga ani nasonosa agu asino si nika ida  ani du na ni yo nyeanye kindi. Ani nanyakasa gaani idapase awere tipa “gu zegino nikadu.” (Eb. 2:5; 11:1) Kurigure, ani nayugo wai ani akpinyemu gu ruru mangapai nika du ti gu regbo re auru kpotosende. Nirengo, ani nambakada tirani tipa nyenye unga rogo ga Mbori vovo zegino.

13. Gini ngbatunga mangapai ani ka peresapa ha rogo vovo zegino?

¹³ Oni bingo gu kura gene rengbe ani ngbaha ka mbakadatirani tipa ndikidi raka ku mbatayo. Wa vura duhe nga Mbori kido rani na pa bakere riahe gbiati gu kura ahe ku auru kpotosende rogo vovo zegino, ani nika gbia bakere ngbarago be gupai nga gaani azingo nga ga toro nikaa ringbisatihe aringbisa. (Mt. 5:3) Agu apai nga ga toro nika ngia agu apai ani kaa peresa paha mbatayo, na ani kaa yugoho nga ani na ngbarago rogo Yekova yo. (Tam. 37:4) Ka ani moi agu apai nga ga toro ku mbatayo awere, gure nga ani nambakada tirani tipa ndikidi unga ku mbatayo.​—Oni gedi Matayo 6:19-21.

14. Gini asasa nga ga toro rengbe ka undo paranga aboro i moi nyenye unga ku berãyo yo?

¹⁴ Wai rengbe ani ka kiiso gaani ngbarago rogo agu apai nga ga toro? Gene sa nga ka maa agu asasa nga ga toro. Kangia paranga boro nga mo naberãpa manga kura ngbatunga sunge rogo ga Yekova riigbu, si angba gbe ka mo wisigi bete agu awaraga nafura tipa ngbatunga agu sunge nga ga Kindo ti aregbo dunduko na ki moihe ni gamu sasa. * Mo ima rengba ka fura a na agu aboro di dungu agarã kuti ngba gi sunge re. Ka mo moi sunge kindo ni gamu sasa, gure nga mo nambakada tiro tipa ka mangasunge fu Mbori rogo vovo zegino, mbiko gu sunge mo amanga re nika du na nyanyakipaha yo.

15. Gini asasa nga ga toro rengbe abatungusipa Kindo ka maaha?

¹⁵ Wangia ani abatungusipa Kindo, gini sasa nga ga toro si aida ani moihe? Ani ima rengbe ka manga ome tipa ka kiiso gaani inohe rogo gu kura ngbatunga asunge tungusapai. Watadu ani rengbe ka kiiso gaani giarogo gu bangua arugute nga ga Ziazia Kekeapai na kini mangihe. Si angba gbe a ka ani mangi ome tipa ka ino wai ka gedapai kpadio di regbo adunguratise, ka ino fu gumbapai wenengai watadu fu akaragapai ba dunguratise yo. Nirengo, oni ima rengba ka berãpa gu kura abangiriaba. Gu memepai duho nga: Maa agu asasa nga ga toro nika saroni oni du zaaza tipa agu apai nga ga toro, na gere nika undo roni oni mbakaditironi tipa raka ku rogo vovo zegino.

16. Tipagine du mangasunge ti ni fu Yekova ni wene sunge rogo raka yo?

¹⁶ Ya mo pa dia ani regbo tipa ka mbakadatirani tipa ga Mbori vovo zegino nayugo gupai nga ani nagbirisa gaani regbo awere? Wagusa te! Sunge ho ngba wa mangasunge fu Yekova te. Anga si nga gu sunge ani amangaha gbua ka bata ti regbo bakere gberãngbi te. Gere nga gu gene i ambakadi rani ani raki ngbaha na si naye na bakere ngbarago furani. Pa ngbe Yekova ku mbatayo furani gbiati gako nyemuse ima ngba kisusi raka zanga pagume na ko. (Oni gedi Atambuahe 63:1-3.) Nirengo, si aidanga ani pidi kina vovo zegino tipa ka gbia ngbarago ti agu amaku nga ga toro du surungbaha nga mangasunge fu Yekova na ngbaduraniyo dunduko te, agu amaku re kinaho awere! Dungu rani aima digo nigbia agi amaku re tipa dungu agarã, na ani ima inoho nga kura sunge ho rogo raka yo rengbe ka ye na ngbarago susi gi sunge re te.​—Tam. 1:1-3; Yes. 58:13, 14.

17. Ani nika maa agu apai ani akpinyemuhe na agu nga ga ngbarago wari rogo Paradizo?

¹⁷ Agu apai ani akpinyemuhe gbiati agu apai nga ga ngbarago nika duadu rogo ga Mbori vovo zegino. Gu kurapai nga, tipagine Yekova akusi rani ti ni na nyemu agu apai ani akpinyemu ka mangaha gbiati agu apai nafu ngbarago furani ka si du nga ko aidanga ani mbiisi gi nyemupai re wenengai te? (Batu. 2:24) Rogo gi gene re na agu akuraha, Yekova dedede nikaa ‘mbisa gu nyemuhe nga ga unga ahe dunduko.’ (Tam. 145:16) Zambuatise gbiati ongoda na kina baha ti ni, ono gu ngbarago ani agbiaha behe rengbe ka kio ka si du nga ani moi gaani pagume na Yekova ni bambatapai. Kina gu bangisapai re nika du rogo Paradizo. Nairiwo wai ngbaha nga ani amoi agu apai ani akpinyemuhe kina rogo gaha bangiriba baraho ani agbata ga Mbori Kindo ni na kini moi bangirani ti agu amaku nga ga toro du kina awere fu ga Yekova aboro!​—Mt. 6:33.

18. Wai rengbe ani ka mbakadatirani tipa nyenye unga ku rogo Paradizo?

¹⁸ Rogo Paradizo, ani nika du na gu ngbarago ani aagbianga ha mbata rogo gaani raka yo ya. Ani mangingo ome amanga tipa ka kiiso gu nyemupai du ani na ni tipa ka raka ndikidi raka ni mbakada ani tirani awere. Ani sonosi agu asino nga ga Mbori na ki gbia bakere ngbarago ni manga ani sunge Kindo zaaza. Ani mangihe ni gaani sasa tipa ka maa agu asasa nga ga toro na kini gbia ngbarago. Na ka ani du na nyanyaki idapase kuti ga Yekova akidohe, ani sungudi gu vovo zegino asungudo nika ye!