Ya mo pamungo du ngaha ka ida kuti gupai nga kpikpi-aboro araka araka berewe? Gu mokedi nangia Pauro aaberãnga ha wo te. Ga Mbori ziazia toro adu kugiiko ko ke gupai nga: “Si ngia rogo kina gi unga re moi ani bangirani rogo Kristo, ani nga rungorungo aboro dagba aboro susi yo dunduko. Ono ni rengo i azingisi Kristo dagba kangba aboro, ni makawa agu yo nara ara.” (1 AKorindo 15:19, 20) Pauro abi zingabekpio ni ndikidipai nga gu nika manga amanga. Gure wa ka i ya ga Yesu zingabekpio asako ko du na kido. * (Amokedi 17:31) Si duPauro aya tipa Yesu ti ni wẽ ko nga “makawa,” bambiko ko nangia gu bambata boro i azingisi ni be kpio. Kangia Yesu angia bambata boro, gure nayugoho ayugo nga kura aboro kinaho nika zinga azinga.

Gu kura ndupai gere rengbe ka saro mo du na kido nga zingabekpio nika manga amanga. Yekova nga gu Mbori nga ga rengo ko. “Mbori, arengba nga na re zire” te. (Tito 1:2) Uru aadunga ho sa Yekova ape zire te, na ko apenga ha a te. Ya mo ko rengbe ka fu gu maabangirise nga ga zingabekpio, na ki yuguhe ayugo nga ko ima rengba ka mangaha, fuani ko ki nisa gu gako akidohe re ni zire? Gure nga gupai ka manganga ya!

Tipagine Yekova namangi mbakadapai ti ni tipa zingabekpio ku mbatayo? Mbiko gako nyemuse. Eyobo asanahe nga, “Ka boro kpi, ni adú ni ungani berewe?” Ko akaragapai nga, ‘Ka mo ayamba he, mi akaraga pai foro; mo akpinyemu guhe bero amangi.’ (Eyobo 14:14, 15) Eyobo aima du na gu kido nga gu Bako du ngbangbaturũ yo akpinyemu ka zingisako be kpio. Ya mo Mbori aria berãko? Ziazia Kekeapai naya, “Mi nga Yekova mi asa nga pa re wa sa te.” (Maraki 3:6) Mbori kindi na bakere nyemu ka bi agu aboro naima kpiko i niraki berewe na wene kpotoyo na ngbarago. Gure nga gu nyemupai rengbe gu vungu gude wirini nakpi kadu na  ni. Gu kparakparapai duho nirengo nga, Mbori na ome beko ka manga wa ko akpinyemuhe.​—Atambuahe 135:6.

Yekova nika fu ome fu Wiriko ko ye na bakere ngbarago fu agu aboro gbia bakere rungo mbiko pakpio gayo aboro. Na gini bipai du Yesu na ni tipa zingabekpio? Mbata fu Yesu zingisi Razaro be kpio, ko aima bi gu imisiri adawiri Razaro na abakureako adu na ni, na ko “ki nikpari ni aume.” (Yoane 11:35) Ti gu kura regbo sa, Yesu abi dekurugbo nga boro Naina ngisa wiiri akpi. “Nungari ki nimangi ko amanga, ko ki ya fu ri, ‘Ka mo kpári nga ya.’ ” Nibasa ko ki zingisi wiiri be kpio. (Ruka 7:​13) Sidu tie, Yesu nabi rungo na kpio ni gbegberẽhe. Nairiwo gu ngbarago ko nika du na ni ho regbo nika da tipa ko sa rungo ni bakere ngbarago rogo zegino dũ!

Ya mo mo arungongo be pakpio boro? Mo rengbe ka bihe nga kpio nga guhe adunga zigaha ti ni ya. Ono ziga kinaho nga gu zingabekpio Yekova nika mangaha vurube Wiriko. Mo tingidi gupai nga, Mbori naida mo bi gu ziga re. Ko naida mo du kinaho ka dungo gu gamo aboro naima kpiko. Mo berẽnga pa tiro oni mbakadi gaoni apai ka raka nyeanye kindi zanga na kparaka berewe!

Lionel, ani nifura tipa ko mbata kusayo, ape gupai nga: “Ni yangaraha, mi awirikipai tipa zingabekpio. Ti tonatonaha, si aima mbu fere mi idi kutini, na mi aidanga kuti gu boro napehe fere te. Ono mi agbataha rogo Ziazia Kekeapai ki bihe nga rengo du! Mi na bakere nyemu ka bi titare berewe.”

Ya mo mo naida ka ino kura apai berewe? ADezire Yekova nika du na bakere ngbarago ka yugo gu ndupai foro idi yo ti ni kuti gupai nga zingabekpio nika manga amanga ku mbatayo rogo gamo Ziazia Kekeapai. *