1, 2. Ringbisihe kuti gu mokedi nangia Yoane, wai du Mbori nayugu gu gene furani rengbe ani ka kpinyemuko ngbaha?

BADUNGU aboro ima ida kuti gupai nga gu wene gene rengbe bagude ka yugopai fu wirini ngbaha nga kina gani kpiapai nitini. Gu mokedi nangia Yoane akepai nga, “nyemuse ti rani, bambiko [Mbori] nyemurani adu ti ko mbata.” (1 Yo. 4:19) Sidu tie, si ziazia nga Yekova ima maa wene kpiapai nga ga nyemuse furani wangia ko Barani na si rengbe ka undo rani ani kpinyemuko a.

² Ngba gini gene du “nyemurani adu ti [Mbori] mbata”? Gu mokedi nangia Pauro aya: “Mbori amoi dezire gako nyemuse fu rani nikpi Kristo tipa rani wa ani adu ni aboro ingapai.” (Rom. 5:8) Yekova ayugu nyemuse ni fuko Wiriko ni motumo tipa agu aboro nika ida kutiko. Gu nyemuse re ni yuguyuguhe rogo fu gamahe yo. Ga Mbori gamunihe asaha taata furani ani gbia undo ti gako nyemuse na ka yugo gaani nyemuse fuko a.​—1 Yo. 4:10.

3, 4. Wai du si aida ani yugu nyemuse fu Mbori?

³ Nyemuse nga bangua sino Yekova, si du ini ani gu ndupai Yesu akaragapai ti ni fu gu boro nasanako nga bambata ndiko be Mbori nga: “Mo kpi nyemu Gbia nga ga Mbori kpotoro yo dunduko, na mbisimoro dũ, na ga berã dũ, na omero dũ.” (Mk.  12:30) Ani nawirika gupai rogo afugo Yesu yo nga, nyemuse tipa Mbori nakoda ngbadurani ni bambataha. Ka iriso Yekova kina auru-ngba angbanga tiko te. Ono tie, ani nabi gupai nga nyemuse tipa Mbori nakoda kpotoraniyo dũ, berãrani dũ na omerani dũ. Gipai re nayugo gupai nga ndikidi nyemuse tipa Mbori nakoda dungu apai angianga kina gupai du ngbadu boro yo ya. Kurii gupai du ngbaduraniyo, nyemuse tipa Mbori nakoda gaani mangapai rogo toro yo na rogo borose yo a. Ringbisihe kuti gu nebi nangia Mika, gure nga gupai Mbori aidaha berani.​—Oni gedi Mika 6:8.

⁴ Wai du rengbe ani ka yugoho nga ani ima kpinyemu gu Barani du ngbangbaturũ yo nzunzu? Si naida ani kpinyemuko na ngbaduraniyo dunduko. A wa Yesu ayuguhe, si nakoda kpotorani, berani na gu tandu du ani na ni ka giarogo agu apai yo nga ga toro na ka irisombori. Rogo gu kekeapai naaye mbata fu gere, ani abi agene biama Yekova ayugo gako bakere nyemuse ngbaha fu awiriko. Awere tie, ani bingo wai rengbe ani ka yugo gaani nyemuse fu Yekova na ka nyakasaha ngba agu agene ko aidaha.

5. Ginipai si aida ani mangihe tipa agu apai dunduko Yekova namangihe furani?

⁵ Ho mo agbia gamahe ni, ginipai mo naamangaha? Si nawira wa mo nayugo gamo tambuahe ngba kura gene. Kurigure, mo namangasunge na gu gamahe re ngba wene gene angianga ka bipaha taata ya. Gu bawiriki nangia Yakoba akepai nga, “wene gamahe dunduko, na ziazia ũgamahe dunduko i nagama ha, si naye ari yo du Ba ni, nga Bafu aimarago, adu nga na satise ti ko ya, na kirima satise a ya.” (Yak. 1:17) Yekova akpanga ti fu agu ahe ani aidaha tipa ka raka na kadu na ngbarago te. Ya mo gure afõnga ngbaduraniyo tipa ani kpinyemuko a te?

6. Ginipai si aaida aYisaraere mangihe ka i aaida kaa gbia ga Yekova amaku?

⁶ Yekova angbembatayo fu aYisaraere tipa kama agarã, ki fu maku fuyo na ki kumukosi yo rogo borose yo na rogo toro yo ngba dungu agene. (Pa Rug. 4:7, 8) Ono tie, pa gbiayo agi amaku re kumbatayo aaru riipa giayo sangba ga Mbori aNdiko nga gu naakoda pa fuyo ‘bambata gayo amakawa aũati’ ni motumo fu Yekova rogo gayo ringara. (Gate 23:19) Gure arengbe ka sa aYisaraere i yugu gupai nga i abingo ga Yekova nyemuse na agu amaku ko afuhe fuyo na paha kusende te.​—Oni gedi Pa Fu Rugute ni Ue he 8:7-11.

7. Wai du rengbe ani ka mangasunge na gaani “ahe dũ” ka yugo gaani nyemuse fu Yekova?

⁷ Na ginipai du tipa rani? Wa vura duhe nga si aidanga ani nifu ndikidi motumo areme te, si adu ni wenepai ka ani ayugo gaani nyemuse fu Mbori ni irisa ani ko na gaani “ahe dũ.” (Snz. 3:9) Gini agene rengbe ani ka mangaha wo ngbaha? Si ziazia tie nga, ani rengbe ka mangasunge na agu ahe du berani tipa ka songoda sunge Kindo rogo gaani dagbarago na gu sunge namanga rogo zegino dunduko. Gere nga gu wene gene rengbe ani ngbaha ka yugo gaani nyemuse fu Yekova, singia ani rogo kumuko watadu rungo. (2 Kor. 8:12) Ono tie, gu kura agene kinaho rengbe ani ngbaha ka yugo na ni nga ani ima kpinyemu Yekova.

8, 9. Wai du kido kuti afugo Yekova ayugo gaani nyemuse tipa ko? Oni funga kpiapai tipa gipai re.

⁸ Oni tingidi gupai Yesu apehe fu apefuoko nga ka i bakingo bangiriyo tipa riahe na roko ya, ono i nigbata ga Mbori Kindo mbata. Ko aya Barani ima inoho nga ani naida  na agi ahe re tipa ka raka. (Mt. 6:31-33) Ka ani du na bakere kido kuti gu kidohe re, gure nika yugo bakio gu nyemuse du ani na ni tipa Yekova bambiko nyemuse gbiati kido nandu kina sa. Ani arengbanga nzunzu ka kpinyemu gu boro ani akidongo kutini ya te. (Tam. 143:8) Sidu, ani rengbe ka sana tirani nga: ‘Ya mo agu asasa mi aotoka fuani gbiati gi gene raka nayugo gupai nzunzu nga mi na kpinyemu Yekova? Ya mo gimi mangapai naʹauru dunduko nayugo gupai nga mi nakido kutiko tipa ko ningerefuo gimi azingo?’

⁹ Ngbatunga gu kido re naadu ti Kristano sa du rimoko nga Mike. Ho ko adu ni tooni, ko atona ka sonosa nyanyaki nyemu mangasunge fu Yekova rogo gu kura ringara. Ko amangi rogatise na ki batika agude ue, ono gu gako nyemupai re aguaringa tiko te. Dungu agu awaraga nafura tipa mangasunge rogo agu aba du na zingo abatungusipai rogoho angarasiko, ko gbiati gako aborokporo ki diberã tipa ka raka taata raka. I abagi kpuyo na ki tona kaa raka rogo tooni bambu. Fuo gure, Mike aumbasi gako sunge nangia ga giriso arago na ki ini wai rengbe ko ka mangasunge na Internet kaa ngera fuani ko kidu rogo kura ringara. Gako aborokporo aguari ki ga ku rogo gu kura ringara re, na fuo i mangisunge yo na ngbarago tipa agarã ue, ko aya: “Ani ima ida kuti agu afugo Yesu du rogo Matayo 6:33 ya si nga rengo!”

10. A wa si adu tipa Bakindo Davide, berã ani kurii gu rengo du tipa Yekova rengbe ka manga gine furani?

¹⁰ Agarã wa 3,000 kusayo, gupai Bakindo Davide abihe ngbangbaturũ yo aima zio ngbaduko yo. Ko akepai ki ya: “Angbangbaturũ ninataka pande gu taarimo nga ga Mbori; ari yo ninayugo pa sabeko.” Fuo gure, iriwo gu tatamana du rogo ga Mbori aNdiko aziko ko ki ya: “Gu rugute nga ga Yekova si ziazia, nimbakadi mbisimo; gu dezirepai nga ga Yekova du ni nyanyaki he, ki nisa azangainahe i du ni airatatamana.” Sangbana gi gako tambuahe re angia gine? Si asako ko ya: “Mo niídi he ya agu apai du ngbare na gu makia pai du ku kpotore yo si ngba bangiro, Ako Yekova, gi mbia, nga gu ko natumo re.” Nirengo, fofoi wene pagume aima du dagba Davide na gako Mbori.​—Tam. 19:1, 7, 14.

11. Gu nyemuse du ani na ni tipa Mbori, si naida si fõngbaduraniyo ani amangi gine nibi gu bakere inohe nga ga rengo ko nafuhe furani areme? (Oni bi gu sura du ti tonatonaha.)

¹¹ Areme, ani ima du na bakere inohe tipa ga Yekova kusikusiahe na gupai gako ringbisapai nika mangaha. Zegino nanyakasapa bakere wirikapai, ono tie, akpiapai nayugo na ni nga agu aboro napekafuo agi apai re pa gayo idapase na gberã gbiati gu nyemuse du yo na ni tipa Mbori. Ono tie, Ziazia Kekeapai nangarasa rani ani akpinyemu inohe na ki gbia tatamana gbiati rugatinapai. Gure nga ka mangasunge na gu inohe Mbori nafuhe furani tipa ka undo tirani na gu kura aboro. (Snz. 4:5-7) Mbori “nakpi nyemu aboro bati dunduko, ki ye sa gu inahe nga ga rengo.” (1 Tim. 2:4) Ani nayugo gaani nyemuse fu Yekova ho ani amanga omeni tipa ka tungusa gu wene pangbanga nga ga Kindo na kini undo aboro tipa i gitiyo na pa ga Mbori ringbisapai tipa aboro.​—Oni gedi Atambuahe 66:16, 17.

12. Wai du kura paranga boro ayugu gari tambuahe tipa gu gamahe nga ga toro Yekova afuhe?

¹² Rukutu agude ima rengba ka yugo gayo nyemuse tipa Yekova niyugo yo gayo tambuahe tipa agu ahe nga ga toro ko afuhe. Wirina nga Shannon aya ho garãri adu ni  nga 11, ri na tooni tameri garãri adu nga 10 andu tipa gu bakere dunguratise riihe angia “Godly Devotion [Kakuti Sinombori]” na avunguyo. Ti regbo papara gu bakere dunguratise re, i aya fu paranga aboro i guari ka sungo rogo gu kura ba kia. Ri aagunde agunde ono ri ki ima ndu. Fuani, ri adu na ngbarago ho i afu gamahe ni fu paranga aboro nangia gu buku nga Questions Young People Ask—Answers That Work. Sangbana gupai re angia gine kurii ga Shannon bipai tipa Yekova Mbori? Ri aya: “Gu regbo re du nzunzu mi abi gupai nga Yekova nga ndikidi boro na ko nakpinyemu re ni bakerehe.” Ri ape kurapai nga: “Nairiwo gu ngbarago du ani na ni nga gaani bakere Mbori nga Yekova nafu bawene gamahe wagu re furani!”

13, 14. Gaani bipai tipa agu arugute Yekova afuhe nayugo gine tipa gu nyemuse du ani na ni tipa ko?

¹³ Ziazia Kekeapai natingida rani nga: “Yekova naruga gu ni ko nakpi nyemu ni, wa kina bagude na gu wirini ngba ti ni.” (Snz. 3:12) Ono si naida gaani karagapai du nga gine? Gu mokedi nangia Pauro ape kina rengo ho ko aya ni wẽ: “Rugapai dunduko ni gu rago i aruga ha, si awira nga ngbarago te, ono kina rungo.” Anga pa pe Pauro pai wa gure nayugo gupai nga ko aabipa rugute na paha kusende te, ko aya: “Ono ku mbata yo si afu zuzu zereda fu agu yo nanyakasi tiyo na ni, nga gu zuzuhe nga ga rurupai.” (Eb. 12:11) Kangia ani ima kpinyemu Yekova, ani du wa ka ani bandatirani ti du na sakparakpa kuti gako arugute watadu ka soga gako arugute. Gipai re aima kpakara fu kura aboro. Gaani nyemuse tipa Mbori ima rengba ka undo rani ni bakerehe.

¹⁴ Ti rago Maraki, dungu aYisaraere aadunga na tambuahe tipa ga Yekova arugute te. I aima ino agu aNdiko naadu tipa fu motumo ono i atona ka fu agu amotumo naafunga ngbarago fu Mbori ya, si ki sako ko fu nyanyaki arugute fuyo. (Oni gedi Maraki 1:12, 13.) Banyaka gu gbegberẽpai i amangaha re adu wai? Oni bingo gupai Yekova apehe: “Mi akéda motiwa ku ri roni mi ki rogo gaoni amaku; mi ima roga ha ni rengo, bambiko oni amaa nga gi pai ku kpotoroni yo te.” (Mara. 2:1, 2) Nirengo, kangia sinorani nga ani aidanga ka giasangba Yekova te, si rengbe ka ye na kerepai kurirani.

15. Rogo zegino areme, gini bipai du ti dungu aboro nga gu si aida ani bandatirani ti ni?

¹⁵ Rogo gi zegino aboro aperesa kina patiyo mbatayo re, aboro aidanga na arugute watadu ka diaha kugume te. Zavura agu aboro nadiaha kugume, i amanganga ha wo kina boro kpotoyo yo te. Ono tie, i naruga aKristano nga, “ka oni ríngbisi nga tironi na gi zegino re ya.” Si naida ani kparia “gu he nga ga Mbori nyemu he” na kini mangihe. (Rom. 12:2) Vurube ga Yekova riigbu,  ko nafu arugute furani ti kina regboho tipa dungu apai nga ga raka, gaani mangapai na agu aboro angianga gaani abadiarogatise ya, kodatise gbiati zambuasitise. Ka ani di agu arugute re kugume na kini mangisunge na ni, gure nika yugo gupai nga ani na tambuahe na ani nakpinyemu Yekova kina boro ngbaduraniyo.​—Yo. 14:31; Rom. 6:17.

16, 17. (a) Tipagine si aida ti ni ani wisigi gupai Yekova akpinyemuhe mbata fu manga ani diaberã? (b) Wai du aYisaraere ayugu gupai nga i akpingo nyemu Yekova na kini kido kutiko te?

¹⁶ Sino rukutu agude ningia ho i abi kerepai ni, i naaora nibasa fuo avunguyo. Wa i nikaa sona, i natona kaa kido kuti tiyo na gu gayo adiaberã i amangaha. Gure nayugo na ni nga i nanyaka. Ono tie, aguyo du na wene pagume na avunguyo, i nandu fuyo kindi ka ino gayo bipai mbata fu i diberã tipa pai. Kina gu bangisapai re si aida ani mangihe rogo toro yo. Yekova ima fu gako toro furani, ko nasarani ani ‘idi pai na ki mangihe mbiko wene sangbako.’ Sidu, si adu ni kere gbegberẽpai furani ka si du nga ani mangi diaberã zanga ani berẽpa gupai ko akpinyemuhe.​—Frp. 2:13.

¹⁷ Ti regbo Samuere, aFereseto amangi aYisaraere gbegberẽ ti ngba vurayo. Gu ga Mbori aboro re aida na undo gbiati bandahe ni bakerehe. Ginipai i amangihe? I adiberã nga: “Ani yé na ga Yekova sanduki mokido Siro yo kono du ani ni, si yé ku dagba rani ka batasa rani be avurarani.” Sangbanaha angia gine? “Bakere kpio aboro ki du, mbiko aYisaraere akpiki wa aboro 30,000 nandu ni nduyo.” (1 Sam. 4:2-4, 10, 11) Si nawira wa pa dia aYisaraere Sanduki Mokido nayo aayugo gupai nga i aagbata ga Yekova undo. Nirengo, i aagbatanga ga Yekova rugapai te; i aapeka kina fuo gayo abipai na sangbanaha kidu ni gbegberẽhe fuyo.​—Oni gedi Asanza 14:12.

18. Gini bipai si aida ani du na ni nibipa ngera ku bee Yekova tipa undo?

¹⁸ Bake papara Atambuahe ayugu gu ruru bipai naadu tiko ho ko aya ni wẽ: “Mo moi bangiro ti Mbori; bambiko mi nikatambua ko berewe, nga gi mounda, nga gi Mbori. Ako gi Mbori, mbisimore du zezere rogo re yo, si du mi natingida pa ro ti ni.” (Tam. 42:5, 6) Nairiwo gu bakere nyemuse ko adu na ni tipa Yekova re! Ya mo mo sonosi ngbatunga gu nyemuse gbiati kido re kuti gu Barani du ngbangbaturũ yo? Ka si vura du nga ngbaduroyo naya foro ii, mo rengbe arengba ka kiiso gu kido du mo na ni kutiko nibi gupai Ziazia Kekeapai apehe furani nga: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya. Mo rá fu ko rogo gamo apai dunduko, Ko arúga gamo apai foro nzunzu.”​—Snz. 3:5, 6.

19. Rogo gini gene mo aida ka yugo gamo nyemuse fu Yekova ngbaha?

¹⁹ Gu gene Yekova nakpinyemu rani ngbaha nayugo wai furani si aida ani kpinyemuko. Gi gako kpiapai re dunga adu riraniyo ti aregbo dunduko. Na ani yugungo gaani nyemuse ayugo fuko ni bakerehe na ‘kpotoraniyo dunduko, na mbisimorani dũ, na gaani berã dũ, na omerani dũ.’​—Mk. 12:30.