1. Ginihe gu mokedi nangia Yoane angarasa aKristano i berẽkuriihe, na tipagine?

AGU afugo gu mokedi nangia Yoane du rogo 1 Yoane 3:1 rẽarẽ tipa ani berẽkuriihe na tambuahe. Agu afugo nga “oni bi nga ngbatunga gu nyemuse fu Mbori nga Ba furani,” Yoane amangisunge na ni ka ngarasa aKristano i berẽkuriipa bakio ga Mbori nyemuse na wai ko akpinyemuyo. Nirengo, inopa ga Mbori nyemuse wa gure rengbe ka kiiso gaani nyemuse tipa ko na ki nyakasi gaani pagume na ko.

2. Tipagine kpakaraha ti ni fu kura aboro i gitiyo na rogo gupai yo nga Mbori nakpinyemuyo akpi?

² Ono tipa kura aboro, i agianga rogo gupai yo nga Mbori nakpinyemu aboro akpi te. I nabi Mbori ni gu boro si aida i gunde tini na kini gi sangbani. Watadu mbiko iraira ayugopai, i naberãha nga Mbori akpingo nyemu aboro te na boro arengbanga ka kpinyemuko a te. Ono tipa gu kura aboro tigayo, i naberãha nga ga Mbori nyemuse tipa aboro dunduko ka i vura kaa manga kina gine vuru. A wa mo awisigi Ziazia Kekeapai, mo awirikihe nga nyemuse nga bangua sino Yekova na nyemuse du naafõngbadu ko yo ko fu Wiriko ni motumo tipa rani. (Yo. 3:16; 1 Yo. 4:8) Ono tie, gu gene i asonosi ro ngbaha ima rengba ka manga ariapai na gu bipai du mo na ni tipa ga Mbori nyemuse.

3. Gini bangua rengo naundo rani ani girogo ga Mbori nyemuse yo tipa rani?

 ³ Gini agene du tie Yekova akpinyemu rani ngbaha? Tipa ka gbia karagapai kuti gi sanahe re, si naida ani ini gu pagume du dagbarani na Yekova Mbori. Rengo ngaha nga, Yekova nga Bakusi aboro dunduko. (Oni gedi Atambuahe 100:3-5.) Si du Ziazia Kekeapai ayamba Adamu ti ni nga “wiri Mbori,” na Yesu ayugupai fu apefuoko nga i niya ti Mbori wẽ “Barani du ngbangbaturũ yo.” (Rk. 3:38; Mt. 6:9) Wa duhe nga Yekova nga Bafu-Unga, ko nga Barani; gu pagume du dagbarani na ko wakina gu du dagba bagude na awirini. Ka pepai taata, Yekova nakpinyemu rani kina wai wene baagude nakpinyemu awirini.

4. (a) Wai du du Yekova kia ti kura abaagude? (b) Ginipai ani ka wisigoho rogo gi kekeapai re na gu ngbefuoho?

⁴ Rengo ngaha nga, abaagude nga kpakpa aboro. Ka i vura manga ome amanga wai vuru, i arengbanga ka yugo nyemuse wai Yekova ayugoho te. Nirengo, kura aboro natingida gu kpakarapai atingida i asono rogoho kporo nga gu nafu bakere imisiri fuyo. Gure nafu bakere gberãrago fuyo. Zanga kapa, Yekova nga gu ngbatunga bagude re te. (Tam. 27:10) Ka ani ini wai Yekova akpinyemu rani na kini ngerefuo rani, si rengbe ka mbedisa rani na ko. (Yak. 4:8) Rogo gi kekeapai re, ani nika wisigo agene biama Yekova ayugo gako nyemuse furani ngbaha. Rogo gu kekeapai ngbefuo gere, ani nika wisigo agene biama a rengbe ani ka yugo nyemuse fuko ngbaha.

5. Ginipai gu mokedi nangia Pauro apehe fu agu aboro naadu Atenai yo tipa Mbori?

⁵ Ho gu mokedi nangia Pauro adu ni Atenai du ringara aGiriki yo, ko abi gupai nga gu gbata re aima hi be akpiahe nga ga kungbo ambori agu aboro re aidi kutini nga si du naafu raka fuyo na agu ahe i aidaha. Gipai re afõngbadu Pauro yo ko ya: ‘Gu Mbori namangi zegino na ahe dunduko rogoyo nafu unga fu aboro dũ, na õnga na ahe dunduko. Ani ni ungarani, ki nita ata, ki du kina ho rogo ko yo.’ (Amo. 17:24, 25, 28) Nirengo, mbiko ga Yekova nyemuse, ko nafu agu “ahe dunduko” ani aidaha si songodi raka rani. Mo berẽnga kurii agu apai gu fugo re akodaha.

6. Wai du kpotosende ayugopa ga Mbori nyemuse tipa rani? (Oni bi gu sura duti tonatonaha.)

⁶ Oni bingo kpotosende Yekova nga Bakusiahe ‘afuhe fu awiri aboro.’ (Tam. 115:15, 16) Aboro-birĩ-inohe ima mangasunge na bakere marã tipa ka gbata gu kura rago kadu wakina kpotosende. Wa vura duhe nga aboro-birĩ-inohe ima kura bara kama kura azegino, kina rago nagberã tiyo ka bi gupai nga, anga gu ho sa dagba agi azegino re du na agu ahe nasa aboro i raki wa kpotosende te. Kpotosende kia dagba ga Mbori kusikusiahe yo. Mo berẽnga gupai nga, dagba gu dungu azegino duho, kina kpotosende sa Yekova akusihe aboro raki rogoho na kinaha sa du ni wene kporo tipa yo! (Yes. 45:18) Gere nayugo wai Yekova akpinyemu rani.​—Oni gedi Eyobo 38:4, 7; Atambuahe 8:3-5.

7. Wai du gu gene Mbori ambakadi rani ngbaha, ayugo gupai nga ko nakpinyemu rani nzunzu?

⁷ Wa vura duhe nga Yekova akusi bawene kporo tipa rani, ko ima ino gupai nga tipa ani du na ngbarago, anga kina agu ahe nga ga borose sa ani aidaha te. Gude nidu na ngbarago ho u abi gupai ni nga avunguru nakpinyemu ru akpi na kini berẽpa ru. Yekova akusi aboro rogo kpiako yo, na ki fu gu rengba fuyo nga i bi wai ko akpinyemuyo na kini ngerafuoyo wa ka i kpinyemuko  a tigayo. (Bam. P. 1:27) Kurigure, Yesu aya: “Aboro ngbarago nga agu aboro inipa gu gayo azingo nga ga toro.” (Mt. 5:3, New World Translation of the Holy Scriptures.) Wangia Yekova gu Barani nakpinyemu rani, ko “nafu ahe fu rani u au ani ngi mbiko ho,” nga ga borose na ga toro.​—1 Tim. 6:17; Tam. 145:16.

8. Tipagine rengbe ani ti ni ka ngera koyo du “Mbori nga irarengo” ni tipa nyemuse?

⁸ Abaagude nakpinyemu awiriyo na kini idi ka bandayo ka boro nangingo yo ya. Ono tie, badungu avungu agude arengbanga ka fu wene rugute fu awiriyo te mbiko i nitiyo ima ka gu rugute du rogo Fugo Mbori yo. Sangbanaha dedede naye na vunduvunduapai gbiati gberãrago. (Snz. 14:12) Ono tipa Yekova tigako, ko nga “Mbori nga irarengo.” (Tam. 31:5) Ko nakpinyemu awiriko na ko na ngbarago ka he gu we nga ga rengo si hasi rago ka yugo gene fuyo rogo gayo raka dũ, gbe nibipa agu apai nga ga irisombori. (Oni gedi Atambuahe 43:3.) Gini arengo du Yekova nayuguhe, na wai du si ayugoho nga ko ima kpinyemu rani?

9, 10. Wai du Yekova ayugoho nga ko ima kpinyemu rani ni yugoko rengo furani (a) tipa tiko? (b) tipa rani?

⁹ Bambatapai nga, Yekova nayugo rengo tipa tiko. Ko nayugo ndikidi rimoko nga gu nge rogo Ziazia Kekeapai kisusi arimo dũ. Rogo gi gene re, Yekova nambeda na ani, na kini sarani ani iniko. (Yak. 4:8) Yekova ima yugo gu ngbatunga Mbori nga ko a na asinoko. Wa duhe nga zegino nayugopa ga Yekova ome na tatamana, ko nayugo gako ruru sarangbanga gbiati gako nyemuse vurube Ziazia Kekeapai. (Rom. 1:20) Ko wa gu bagude adunga na kina ome na tatamana sa ya, ono du na rurupai na nyemuse, si kini saha taata fu awiriko i du na mbembedi pagume na ko.

¹⁰ Yekova ima yugo gu rengo du tipa rani a tipa kina gaani undo, nga gu rengo du tipa gaani bangiriba rogo gako mbakadapai. Gipai re naye na zereda gbiati ruru mangapai dagba awiriko rogo zegino dunduko. Ani nawirika gupai rogo Ziazia Kekeapai yo nga i akusanga aboro na gu rengo beyo nga ka sia gupai ngbatiyo te, i raki zanga Mbori a te, na zanga mangapai kuti gi bangua rengo re naye na gbegberẽ sangbanaha. (Yere. 10:23) Gipai re na nyanyakipaha tipa ani du wenengai. Ani rengbe kadu na ngbarago gbiati kodatise sa kina gu ka ani idi na ga Mbori pagbia. Nairiwo gu nyemuse duti Yekova re wa ko nasia ka yugo gi nyanyakipa rengo re furani!

11. Gini akidohe Yekova nafuhe nayugoho nga ko nakpinyemu rani akpi na kini berẽpa rani?

¹¹ Gu baagude nakpinyemu awirini naberãpa raka yo ku mbatayo, na ni naida i du wenengai rogo raka yo. Si naba kina gberãrago nga, badungu aboro ainongo gupai du tipa raka ku mbatayo te, i napekafuo agu asasa rogo gayo raka yo nika undongo yo nyeanye kindi ya. (Tam. 90:10) Wangia ani awiri Mbori, ko ima kpinyemu rani nzunzu mbiko ko kidopa wene raka ku mbatayo. Gure nasa gaani raka sidu na ndikidi rogo ti ni.

12. Wai du ga Yekova rugute fu Kaina na Baruka ayugu gako nyemuse na nunga tipa yo?

¹² ‘Tipagine zingi mo ti ni? Tipagine du kpakpuro ti ni na ngbandua? Ka mo amanga wenengaĩ, kpakpuro adú nga na ngbarago te? ono mo azoga’ ingapai? (Bam. P. 4:6, 7) Gu rugute re aye ti wene regbo na wene rugapai. Rogo gi gene re, Yekova aza Kaina ho si adu ni ziazia nga Kaina adu ngba gbegberẽ gene. Si nafu kina  gberãrago nga, Kaina adeganga tuko kuti gu zahe re te, na ko ambu ni sangbanaha. (Bam. P. 4:11-13) Ho gu ga Yeremaya bakeapai nangia Baruka abihe ni nga omeko ima bata, Yekova afu rugute fuko tipa ko bi wari gako kpakarapai aenge ni. Baruka adi ga Yekova rugute kugume na si ki banda gako raka, ko aadunga wa Kaina te.​—Yere. 45:2-5.

13. Tipagine Yekova ambu aʹasada ti ni si nimangi gako ruru amoyambu?

¹³ Pauro akepai nga: “Gbia naruga gu boro ko akpi nyemu ni, ki nitaki agu awiriko ko arogo yo ku gume dunduko.” (Eb. 12:6) Ono tie, anga rugute sa nga kina fu mbusa te. Si na angbatungaha ni bakiakia. Badungu akpiapai du rogo Ziazia Kekeapai yo tipa ga Mbori ruru amoyambu nagbiatiyo na kere aʹasada nga gu naadu na rugute rogoho na si ki ima rabayo. Oni berẽnga pa Yosefa, Moize, na Davide. Agu apangbanga du tipa gayo raka ima du na futufutu wiri apai rogoho kisusi gu du tipa kura aboro rogo Ziazia Kekeapai yo. Ho ani agedapa wai ni Yekova aundo yo rogo gayo aʹasada dũ na wai ko amangisunge nayo ni bakerehe, si nasarani ani bihe nga Yekova nakpinyemu gako amoyambu na kini ngerefuo yo.​—Oni gedi Asanza 3:11, 12.

14. Wai du rengbe ani ka bi ga Yekova nyemuse ho ko afu rugute ni furani?

¹⁴ Ga Yekova rugute nasarani ani bi kura papara gako nyemuse. Agu aboro mangi ingapai, ho Yekova afu rugute ni fuyo na i ki dihe kugume na ki sa berãyo, ‘ko navú yo avu kpaima.’ (Yes. 55:7) Ginipai gipai re ayugoho? Davide afura tipa ga Yekova mbupai na agi afugo re nga: “Ko navu ro tipa ga irairaapai dunduko, nahusa gamo awokote dunduko, natumo ungaro be kere  gbarasahe, nakiisa pa ro na weneringise na wene nunga aboro a. Wa turũ ku uroyo na dioyo, wo ko naturũsa gaani tiandika ti rani a.” (Tam. 103:3, 4, 12) Ani ginga ga Yekova arugute agia na kini mangipai kutini niʹipo, na ki ini gupai nga si nayugo gu gako nyemuse adunga digidoho ti ni ya furani.​—Tam. 30:5.

15. Ginihe nayugoho nga ga Mbori aboro na nyanyakipa yo fuko?

¹⁵ Nirengo, gupai nyakipaha fu gu baagude nakpinyemu awirini nga ka banda gani aborokporo ti gu kerepai rengbe ka mangayo. Yekova nga gu Barani du ngbangbaturũ yo namanga kina gu bangisapai re. Bake papara atambuahe aya tipa Yekova wẽ: “Ko nabanda mbisimo gako ziazia aboro; ko ninabatasa yo be gbegberẽ aboro.” (Tam. 97:10) Oni berẽnga kurii gipai re. Bangiro nirengo na nyanyakipaha foro! Kina boro wo du Yekova abi gako aboro. (Oni gedi Zekaraya 2:8.) Nairiwo wai du ga Mbori aboro na nyanyakipa yo fuko!

16, 17. Oni furanga tipa agu agene Yekova abanda gako aboro ngbaha, zavura ti gi gaani regbo re.

¹⁶ Gene sa dagba agene yo Yekova abanda gako aboro ngbaha nga vurube gako amaraika. (Tam. 91:11) Maraika sa abatasi Yerusarema be agu asekere nangia ga aAsuro yo, na ki imi agu asekere re nga 185,000 rogo yuru sa. (2 Aba. 19:35) Maraika aima batasa agu amokedi nangia Petero na Pauro gbiati kura aboro a bambukiso yo a. (Amo. 5:18-20; 12:6-11) Ti gi gaani regbo re a, Yekova nabatasa gako aboro abatasa. Wirina sa riibasunge akedi ko ko ye ka bi kura gaani be-basunge sa Afirika no ape gupai nga agu avura nga ga birĩ-zogarago na ga apambori aima gbarasa gu ringara re. Kpata, roga ga aboro ahe, kodaba ngbaome na imo aboro aima ba gu ringara re ku rogo vunduvunduapai. Ono wa si avura duwo, boro aakpingo dagba awirinarani yo te, wa vura duhe nga i azanga gayo ahe na agu ahe naasongoda raka yo. Ho i asanayo ni tipa wai apai aandu nayo, i dunduko akaragapai na mongo ti ngbayo nga: “Apai dunduko wenengai, tambuahe fu Yekova!” I aima bi gupai nga Mbori nakpinyemuyo akpi.

¹⁷ Aregbo kinaho Yekova aima mbu gako ruru amoyambu avurayo imiyo, wa Setefano. Ono wa vura duhe wo, Mbori nabanda gako aboro abanda wa du yo ni badona ni fuka ko azahe fuyo nibipa ga Satana agbina. (Ef. 6:10-12) Ko naundo rani vurube Ziazia Kekeapai gbiati agu awaraga du mburuhe rii Ziazia Kekeapai gako riigbu akusa tipa ani ini gu rengo du ti gu nangahe nga ga ũkumuko, wasiwasi ambaro na zuu, gbegberẽ mangasunge na Internet gbiati gu kura apai. Si tie ziazia nga, wangia Yekova gu Baagude nakpinyemu awirini, ko nabanda yo na ko naida i du wenengai.

18. Gini bipai du mo na ni tipa gu nyemuse du Yekova na ni tipa ro?

¹⁸ Wa bi ani gu bete agene Yekova ayugo gako nyemuse furani ngbaha, si nasarani anidu kina wai Moize adu. Ho Moize aberẽkurii gako raka ni ti ngba ga Yekova sunge, ko aya: “Ako, mo mbísi rani na ga weneringise wiso, ani ki ngbiko ki ningi angi rogo gaani arame dunduko.” (Tam. 90:14) Ka inopa ga Yekova nyemuse na ka gbia ngbarago ti ni nga gu bakere momu na maku rengbe ani kadu na ni areme. Wakina gu mokedi nangia Yoane, si nafõngbadurani yo ani takipande gupai nga: “Oni bi nga ngbatunga gu nyemuse fu Mbori nga Ba fu rani!”​—1 Yo. 3:1.