1, 2. Ngba gini gene du du berã boro kia?

FUGO naundo aboro i gedipai, i kepai, i fura, i girogo gupai yo aboro apehe, i kpari fu Yekova, na kini tambuako rogo bia yo. Agi amangapai re dunduko nakoda berã boro nga gu aboro birĩ-inohe agianga tiyo na ni wenengai ya. Mbiko padu berãrani kia, si du du ani ti ni na rengba ka wirika kura afugo. Kura bakere bayugupai tipa afugo sa aya, “Gu tandu du agude na ni ka wirika afugo, si nga gu sino i aino aboro ti ni.”

² Mbori du nafu gu tandu fu aboro nga i nifura. (Tam. 139:14; Yugo. 4:11) Gu berã Mbori afuhe furani si kia ngba gu kura nyanyakipa gene berewe. Ani wa anya te bambiko i akusi rani rogo “kpia Mbori” yo. Ani na ranirii berani bambiko ani ima rengba ka sia ka mangasunge na fugo rani kafu taarimo fu Mbori.—Bam. P. 1:27.

3. Gini bawene gamahe Yekova nafuhe furani tipa ani duni airatatamana?

³ Agu aboro dunduko naida ka iriso Bakusi fugo nga Mbori, ko ima fu bawene gamahe fuyo nga Ziazia Kekeapai. I ima kusaha awere rogo afugo naima susa 2,800 singia kina Vovo Ndiko watadu si nabaha. Ho mo ageda Ziazia Kekeapai ni, gure nga mo na hiiso berãro na ga Mbori aberãpai. (Tam. 40:5; 92:5; 139:17)  Rogo gi gene re, mo ima rengba ka gbia ngbarago ti berãkurii agu apai “rengbe na fu tatamana foro sa bata.”—Oni gedi 2 Timoteo 3:14-17.

4. Ginihe nga berãkuriipai, na gini asanahe ani ka wisigoho?

⁴ Ka berãkuriipai nga ka gbe berãro kuti pai, singia wenepai watadu gbegberẽpai. (Tam. 77:12; Snz. 24:1, 2) Agu aboro ue rengbe ani ka berãkurii payo nga Yekova Mbori na Wiriko nga Yesu Kristo. (Yo. 17:3) Ani ima rengba ka bakabangirani nga, gini ngbanya du dagba gedapai na berãkuriipai? Gini amomu du berani tipa ka berãkuriipai, na wai du rengbe ani ka sa berãkuriipai ni gupai ani agbia ngbarago behe?

5, 6. Ho mo agedapai ni, ginipai rengbe ka undo ro tipa mo kiisi gamo giarogopaiyo na gu tandu du mo na ni ka tingida gupai mo agedaha?

⁵ Berãro ima rengba ka manga iʹiriwoapai zanga mo mangi bakere ome amanga. Ni kpiapai, gbida wege, nduge, zubo na ngbagida, gbiati kepai na kompiuta nga agu apai boro amangaha zanga ni bere aberã. Gipai re ima rengba kadu a nga rengo tipa gedapai. Sidu tie, si ni nyanyakipa pai ka maa berãro tipa ka giarogo gupai yo mo agedaha. Ho mo anyasa genewaraga ni watadu mbata fu mo tona gu kura vovo riipai, mo ima rengba ka ru tooni ka berãkurii gupai mo nagedihe ka ino singia mo ima giarogoyo wenengai. Rengo ngaha nga, ka berãro du ni fudifudihe na ka mo amaanga berãro ya, si ima rengba ka sa berãro si ni ta ti kura apai kia, na si ki sa gupai nga ka gamo gedapai du nga na wene sangbanaha ti ni ya. Wai du rengbe mo ka ne gipai re?

⁶ Aboro birĩ-inohe wetekepai ki bi gupai nga ho boro agedapai ni na fugo ni kuari si nasaha funi taata ni tingidi agu apai ni agedaha. Bakusi berãrani ima ino gipai re. Si du ko arugu Yosua ti ni ko ni gedi gu Kitabu nga ga gako aNdiko na “woro [fugoko] kusende.” (Oni gedi Yosua 1:8, New World Translation of the Holy Scriptures.) Si nawira wa mo nika bi gupai nga geda Ziazia Kekeapai zezeredi, watadu na woro fugoro kusende nika du na bakere ome kurii berãro. Gipai re ima rengba ka undo ro mo moiberãro wenengai.

7. Gini regbo du ni wenehe tipa ka berãkurii Fugo Mbori? (Oni bi gu sura du ti tonatonaha.)

⁷ Wa vura duhe nga, si aidanga bakere ome tipa ka gedapai te, berãkuriipai naida mo gbe berãro agbe. Si du nga ndu gupai berã kpakpa aboro na ariatihe ti ni ka berã kina gupai du taata, nga gu si aidanga ni mangi ome tipaha ya. Rogo gi gene re, gu wene regbo ngba tipa ka berãkuriipai nga ho mo aongoda ni rogo gu ba adu nga na agu apai rengbe ka fuda berãro ya. Bake papara Atambuahe abi gupai nga, wene regbo ka berãkuriipai nga ho ko anipi ni ri gako barame yuru. (Tam. 63:6) Yesu naadu na rengberengbe berã aima ino nyakapa du rogo gu ba du zezeredi ka berãkuriipai na ka kpara fu Mbori.—Rk. 6:12.

8. (a) Gini kurapai rengbe ani ka berẽkuriihe kupati Fugo Mbori? (b) Wai du Yekova abi gu regbo ani adiaha ka fura tipa ko?

⁸ Wisigo agu apai beraro yo mo agedaha rogo Ziazia Kekeapai nga gu nyanyakipa gene rengbe mo ka berãkuriipai ngbaha, ono agu akura agene kinaho. Ni kpiapai, ho mo abi wai ni iiriwo kusikusiahe, mo ru tooni na ka berãkuriihe. Gipai re nika saro mo tambua Yekova tipa gako wenesino na ka si du nga mo na bakureamo ho mo rengbe ka peka gamo abipai funi tipa gupai re. (Tam. 104:24; Amo. 14:17) Ya mo Yekova nabi  ngbatunga gu kparakpee re na agu apai ani apekaha tipa ko re na nyanyakipaha? Fugoko karaganga pai furani. Nibipa gi kere gbegberẽ regbo ani araka ti ni re, i nakido rani nga: ‘Si du agu yo nagunde ti Yekova i ki nigumba pai dagba yo dedede; Yekova adegatuko ki nigi payo, i akepai rogo kitabu tingidapai bara bangiriko tipa aguyo nagunde ti Yekova ki niberẽpa rimoko.’—Mara. 3:16.

9. (a) Ginipai Pauro aya fu Timoteo ko berẽkuriihe? (b) Wai du rengbe ani ka mangapai kuti ga Pauro rugute ho ani ambakada tirani ni tipa tungusapai?

⁹ Gu mokedi nangia Pauro aya fu Timoteo ko “berẽ pa” gu ome du fugoko, gako mangapai, na gako yugopai na ni. (Oni gedi 1 Timoteo 4:12-16.) Wakina Timoteo, ani na dungu apai berani nga ga toro ka berãkuriihe. Ni kpiapai, si naida ani di regbo ka berã ho ani mbakada gupai ni ani andu ka wirikaha na gaani bawiriki Ziazia Kekeapai. Si naida ani berẽpa gu sanahe watadu kpiapai rengbe ani ka undo gaani bawiriki Ziazia Kekeapai na ni ni mangi sonakumbatayo. Ngbatunga gi regbo re ima rengba kadu ni wenehe, mbiko berãkurii agi apai re nika nyakasa gaani idapase na ki undo rani ani yugupai fu boro ni wenehe na kidu zaaza. Kina gu bangisapai re a du tipa mbakada kpotoraniyo tipa tungusapai (Oni gedi Ezara 7:10.) Geda kapita sa rogo gu kitabu nga Amokedi nika ‘utudo’ rani ani du zaaza tipa tungusapai. Berãkurii gu veresi ani aida ka mangasunge na ni gene tungusapai yo rogo gu uru re na gu waraga ani aida ka mangasunge na ni nika undo rani ani mangi gaani sunge. (2 Tim. 1:6) Mo berẽpa agu aboro du rogo gaoni dagbarago na gupai rengbe ka zingisa gayo nyemupai. Ngbatunga gu mbakadatise re nika fõ rani ani tungusipai wenengai “ni yugu pa Toro na tandu” rogo Fugo Mbori yo.—1 Kor. 2:4.

10. Gini kura amomu du berani ka berãkurii agu apai nga ga toro?

 ¹⁰ Ya mo mo naakeka memeapai ti regbo gumbapai, na ti regbo bakere adunguratise? Fugö agi apai re nafu wene momu foro mo berãkurii agu apai mo na wirikihe rogo Fugo Mbori yo na be gako riigbu. Berewe a, adiwi dunduko ani agbia vovo aNgbaõbambu Sinziri na Awake! na gu vovo awaraga i akusaha ti regbo bakere adunguratise nga gu nafu vovo apai furani rengbe ani ka gedaha na kini berẽkuriihe. Ho mo ageda Yearbook ni, si ima rengba kadu ni wenepai ka ru tooni mbata fu mo tona ka geda kura pangbanga. Gipai re nika fu regbo foro mo berẽkurii gupai mo nagedihe na ki mbu gu pangbanga re si zi ngbaduroyo. Si ima rengba ka ida gupai nga mo gba he tii gu memeapai na ki kekeapai pangba gamo waraga, nga gu rengbe ka undo ro ho mo ambakadatiro ni ka ndu ka bi gu boro mo atungusipai funi, ho mo andu ni ka ngarasa kura boro, watadu gu gumbapai mo nika mangaha kumbatayo. Gu kura nyanyakipa pai berewe nga, ho mo ageda agu awaraga ni du mburuhe rii Ziazia Kekeapai mo ki ru tooni ka berãkuriihe, si nika fu momu foro mo di agu apai re ku kpotoro yo na ki kpari fu Yekova tipa gu wene apai mo na wirikihe re.

11. Ginipai si aida ani berẽkuriihe, na tipagine? (Oni bi gu kekeapai du bandu waraga yo.)

¹¹ Rengo ngaha nga, gu bambata he si aida ani berẽkuriihe nga Fugo Mbori gako toro adu kugii pa kehe. Ani ya nga mo rogo gu ba i naima dia Ziazia Kekeapai bero rogoho. * I adianga gupai bero nga ka berãkurii agu apai mo agedihe na ki igihe ku berãro yo te, wa gu nga agu averesi ngba tiro na afugo bia Kindo. (Amo. 16:25) Na ga Mbori toro nika undo mo tingidi gu wene apai mo awirikihe.—Yo. 14:26.

12. Gini ngbatunga geda Ziazia Kekeapai du ni wenehe?

¹² Oni ima rengba ka sia uru sa rogo poso yo tipa geda Ziazia Kekeapai nga ga Gu Sukuru Nga ga Siokrasia na ka berãkuriihe. Oni ima rengba ka sia kura uru tipa ka berãkurii agu apai Yesu apehe. Oni ima rengba ka ida kuti gupai nga dagba agu akitabu aboro na inihe wenengai rogo Ziazia Kekeapai, si nga agu aKitabu Wene Pangbanga du tipa ga Yesu raka na tungusapai. (Rom. 10:17; Eb. 12:2; 1 Pet. 2:21) Ga Mbori aboro ima gbia gu waraga du na agu apangbanga nga ga Yesu gbiati gu regbo ko adu auru kpotosende ane, na si ni tangaratangaraha ti genehe. Si nga gu wene ũsunge, gbe ka ani gedihe sirisiri na kini berẽkurii agu apangbanga du rogo agu aKitabu Wene Pangbanga i namoihe rogo akapita ha ni basasa.—Yo. 14:6.

13, 14. Tipagine nyakipa gupai ti ni nga ani berẽkurii agu apai nga ga toro, na ginipai rengbehe ka ngarasa rani ani mangihe?

¹³ Berãkuriipa agu apai nga ga toro naundo Kristano ni sono rogo toro yo. (Eb. 5:14; 6:1) Gu boro adianga regbo kaa berã tipa Yekova na Yesu ya ni arengbanga ka nye nyanyaki rogo toro yo te. Gu boro re ima rengba ka bitikpa kusayo ngbagene rengo. (Eb. 2:1; 3:12) Yesu azahe nga ka ani agianga Fugo Mbori na ki dihe ‘na gu rengo du kpotoraniyo’ ya ani ‘kanga kuti ni’ te. Kuba gure, ani ima rengba ka ‘merã gene berãpa zegino na ũkumuko na nyemuahe rogo gi unga re ka ani azunga nzunzu he ya.’—Rk. 8:14, 15.

¹⁴ Sidu tie, ani ndu kumbatayo kaa berãkurii  Fugo Mbori. Gipai re nika sarani ani berẽkuriipa ga Yekova taarimo, na asinoko du rogo Ziazia Kekeapai yo. (2 Kor. 3:18) Gini kurapai rengbe ani ka sanahe tipaha? Sona rogo gu inohe yo nga ga Mbori, na kaa bi gako taarimo, nga wene momu na si nga gupai nikaa digongo ya a wa ani kaa wirika gu Barani du ngbangbaturũ yo.—Batu. 3:11.

15, 16. (a) Wai du rengbe ani nitirani ka gbia undo ti berã ani kurii agu apai nga ga toro? (b) Tipagine rengbehe kadu ti ni ti kura aregbo ni kpakarapai ka berãkuriipai, ono ginipai si aida ani naamanga ome amanga ti ni kindi?

¹⁵ Ni ndu ani kumbatayo kindi kaa berãkurii agu apai nga ga toro, ani nika banda padu ani zaaza rogo rengo yo. Rogo gi gene re, ani nika du ni mburu wasa fu awirinarani na fu agu aboro du nyemu rengo tiyo ani agbia yo gene tungusapai yo. Berã dudunguro kuriipa gu bakere gamahe Mbori afuhe nga ga Yesu motumo nika undo rani ani bi gu momu nga ga du na wene pagume na gu Ziazia Barani nga Yekova na nyanyakipaha. (Rom. 3:24; Yak. 4:8) Wirinarani nga Mark du South Africa yo i aziko tipa garã biata mbiko zanga rimiso tiko ku rogo agu apai nga ga gi zegino re, ko aya: “Ani rengbe ka ringbisa berãkuriipai kuti bi gu vovo apai du ni wenehe. Ka ani aberãkurii agu apai nga ga toro, kinawo ani ka ino vovo apai tipa Yekova Mbori. Ti kura aregbo ho mi abi tire ni nga mi na gberãrago na kini bakibangire tipa gupai du ku mbatayo, mi naadia Ziazia Kekeapai na ki berẽkurii gu papara Ziazia Kekeapai mi agedaha. Na mi ki bi tire nga mi ima zereda.”

¹⁶ Rengo nga ha nga, gu zegino du ani areme rogoho si hi be agu apai nafuda rani na si nasarani ka ani berẽnga kurii agu apai nga ga toro ya. Kura ruru wirina sa rogo kura papara Afirika du rimoko nga Patrick aya: “Berã re hi be dungu apai, nga gu du ni wenehe na gbegberẽhe nga gu si aida mi naakparakaha na aʹuru dũ. Ho mi awisigo agu apai ni du berãre yo, mi nabi gupai nga gbegberẽ apai kina yo, na mi nakpara fu Yekova tipaha mbata fu mi tona ka berãkuriipai na ziazia berã re. Wa vura duhe nga, manga gipai re nadia bete regbo mbata fu mi tona ka berãkurii agu apai nga ga toro, mi nabi tire nga mi ima mbeda na Mbori. Gipai re nazaka berãre mi girogo rengo yo wenengai.” (Tam. 94:19) Nirengo, dungu aundo kinaho fu agu aboro ‘nawisigo Ziazia Kekeapai na aʹuru’ dũ na kini berẽkurii gupai i awirikaha.—Amo. 17:11.

17. Wai du mo naagbia regbo tipa ka berãkuriipai?

¹⁷ Gu kura aboro nazinga rame yo kina boro wiso ka gedapai, berẽkuriipai, na kini kpari fu Mbori. Gu kura aboro namanga gipai re ti regbo gayo ongoda nga ga bebere uru. Mo ima rengba ka bihe a nga mo mangi gipai re nyemu watadu mbata fu mo ndu ka pi. Kura aboro nageda Ziazia Kekeapai wiso na mbata fu i ndu ka pi. Rogo gi gene re, mo nagedaha “uru na yuru.” (Yos. 1:8) Gupai nyakipaha nga ka ngbe regbo ti agu apai anyakanga paha ya tipa ka berãkurii Fugo Mbori.—Ef. 5:15, 16.

18. Ginipai Ziazia Kekeapai akidoho fu agu aboro dunduko naberãkurii Fugo Mbori na aʹuru dũ na kini mangi ome ka manga gupai i awirikaha?

¹⁸ Fugo Mbori dedede nakido agu aboro naberãkurii he na kini mangi ome ka manga gupai i awirikaha nga i nika gbia amaku. (Oni gedi Atambuahe 1:1-3.) Yesu aya, “aboro maku nga agu yo ti gure, nagia ga Mbori pai, ki nika kuti ni!”(Rk. 11:28) Gu nyakipaha gbe nga, berãkurii agu pai nga ga toro na aʹuru dũ nika undo rani ani ye na iriso fu Bakere Bakusiahe nakusi berãrani, ko nika fu ngbarago awere furani na nyenye unga rogo gako vovo zegino.—Yak. 1:25; Yugo. 1:3.